Ihaji Hatrene La Ihnimi Iehova
“Ame la hna hnime hnei [“Iehova,” MN], te, kola hajine hnei nyidë.”—HEBERU 12:6.
1. Nemene la aqane qejepengöne la ihaji e hnine la Tusi Hmitrötr?
NEMENE la mekuna i epun ngöne la epuni a dreng la hnëewekë hna hape “ihaji”? Alanyimu la itre atr ka mekune ka hape, kola iameköti, ngo tha eje hmekuje kö lai. Öni Tusi Hmitrötr, ame la ihaji tre, nyine loi koi së, nge ka ce tro memine la atrehmekun, me inamacan, me ihnim, me mel. (Ite Edomë 1:2-7; 4:11-13) Celë hi kepin matre, ame la kola haji së hnei Akötresie tre, Nyidrëti lai a hnimi së, nge aja i Nyidrë tro sa mel epine palua. (Heberu 12:6) Nyipici laka, ame itre xa ijin, Akötresie a ameköti së, ngo tha ka catre menu kö, maine iakötrë pena la aqane ihaji Nyidrë. Ame la nyipi aliene la hnëewekë hna hape, “ihaji” tre, kola qaja la ini, tune la kola inine la nekönatr hnei keme me thin.
2, 3. Nemene la aliene la ihaji? (Wange ju la pane iatr.)
2 Pane mekune jë la ceitune celë! Kola elo balo hnei Johnny, ketre nekönatr trahmanyi e hnine la uma. Öni thin: “Johnny, ase hë lo qaja ka hape, tha hnë elo balo kö la, wanga kaqa pi la itre ewekë!” Ngo, tha drei thine kö, kolo palahi a elo balo e hnine la uma. Sesë jë hi balo a lepe la trengene iengen, me akaqane ej. Nemene la aqane haji Johnny hnei thin? Hnei eahlo hna qaja koi nyën la kepin matre ka ngazo la hnei nyën hna kuca. Aja i eahlo tro nyën a trotrohnine laka, nyine loi koi nyën, nge nyipiewekë troa idrengethenge. Ame la itre hna amekötin hnei keme me thin tre, tha ka hace kö. Matre, hnei eahlo hna pane haji Johnny, me cipane lai balo koi itre hnepe ijine hi. Nyipici laka, tha madrine kö Johnny, ngo celë hi ka xatua nyëne troa trotrohnine laka, hetre pune kowe la hna tha idrei.
3 Ame easë, itre keresiano, easë la itre atrene la ekalesia i Akötesie. (1 Timoteo 3:15) Matre, meköt tro Iehova Keme së, a ameköti së, me iëne la loi me ngazo thatraqai së. Nge, ijije hi tro Nyidrëti a haji së ngöne la easa ena la itre wathebo i Nyidrë. Ketre, maine ka ngazo la aqane ujë së tre, troa hetre pun koi së. Nge, ame la Iehova a haji së cememine la ihnim, Nyidrëti hi lai a amekunë së la enyipiewekën tro sa drengethenge Nyidrë. (Galatia 6:7) Atraqatr la ihnimi Akötresieti koi së, matre tha ajane kö Nyidrë tro sa akötr.—1 Peteru 5:6, 7.
4. (a) Nemene la aqane tro sa haji itre xan thenge la aja i Iehova? (b) Nemene la hne së hna troa ithanatan ngöne la tane mekune celë?
4 Ame la easa hajine la nekönatr maine hajine la ka ini Tus thenge la hna qaja e hnine la Tusi Hmitrötr, tro lai a xatua angeic troa ketre atre drei Keriso. Easa xome la Tusi Hmitrötr matre troa ini angeic la meköt, me xatua angeic troa trotrohnine me ‘trongëne la nöjei ewekë asëjëihë lo hnei Iesu hna ahnithe koi së.’ (Mataio 28:19, 20; 2 Timoteo 3:16) Aja i Iehova tro sa ini angatre tune lai, matre tro fe angatr a hane xatuane la itre xan troa xötrethenge Keriso. (E jë la Tito 2:11-14.) Tro sa ce ithanatane la köni hnyinge celë: (1) Kola mama tune kaa la ihnimi Iehova ngöne la Nyidrëti a haji së? (2) Nemene la ini hne së hna xom qaathene la itre atr ka kapa la ihaji Iehova? (3) Nemene la aqane tro sa nyitipu Iehova me Iesu ngöne la aqane ihaji nyidro?
IHAJI—IHNIMI AKÖTRESIETI LAI
5. Kola mama tune kaa la ihnimi Iehova ngöne la Nyidrëti a haji së?
5 Tru la ihnimi Iehova koi së matre Nyidrëti a ini së, me haji së. Aja i Nyidrë tro sa qale catr koi Nyidrë, me mel epine palua. (1 Ioane 4:16) Tha hnei Nyidrëti pi kö hna ithanata angazonyi koi së, maine thaipië së pena. (Ite Edomë 12:18) Hnei Nyidrëti pe hna wangatrune la itre thiina ka lolo the së, me nue së troa isa ië ewekë. Iehova a amamane la ihnimi Nyidrë ngöne la Nyidrëti a haji së jëne la Tusi Hmitrötr, me itre itusi së, me jëne keme me thin, me itre qatre thup. Nyipici laka, ame la itre qatre thup a hamë së la itre ihaji nyine hmekë së cememine la ihnim me thiina ka menyik tre, angatre hi lai a xötrethenge la aqane hnimi së hnei Iehova.—Galatia 6:1.
6. Kola mama tune kaa la ihnimi Iehova ngöne la kola amë la ketre trejin qa ngöne la hnëqa i angeic?
6 Ame la ihaji tre, tha ene hmekuje kö la troa hamë eamo. Maine troa kei kowe la ngazo hnene la ketre trejin, troa ami angeic qa ngöne la itre hnëqa e hnine la ekalesia. Iehova hi lai a amamane la ihnimi Nyidrë koi angeic matre, tro angeic a trotrohnine la enyipiewekëne la troa catr e la Tusi Hmitrötr me mekun ajuin, me catre thithi fe. Maine tro angeic a kuca la itre ewekë cili, tro ha acatrene hnyawa la aqane imelekeu i angeic me Iehova. (Salamo 19:7) Nge, e thupen, ijiji angeice hmaca ha troa hane xome la itre hnëqa e hnine la ekalesia. Ame la kola upetröneëne la ketre trejin tre, hatrene hi la ihnimi Iehova lai. Nyidrëti a thupëne matre tha tro kö a ajojezine la ekalesia hnene la itre thiina ka ngazo. (1 Korinito 5:6, 7, 11) Ka meköti palahi la aqane ihaji Nyidrë ke, kola xatuane la atre hna upetröneë troa trotrohnine la engazone la aqane ujë i angeic. Celë hi ka aijijë angeic troa ietra.—Ite Huliwa 3:19.
ELOINE LA IHAJI IEHOVA
7. Drei lae Sebena, nge nemene la itre thiina ka ngazo ka ej thei angeic?
7 Loi e tro sa trotrohnine la enyipiewekëne la troa kapa la ihaji. Tro sa ce ithanatane la hna melën hnene la lue atr hna hajin hnei Iehova. Tro sa pane ce wang la pengöi Sebena, ketre atre Isaraela ka mele ngöne la ijine i Hezekia joxu, memine la pengöi Graham, ketre hlue i Iehova enehila. Sebena lo “ate musinëne la uma” i Hezekia joxu matre, ketre hnëqa ka tru la hnei angeic hna cilën. (Isaia 22:15) Ngo, hnei Sebena hna pi tru, nge aja i angeic tro la itre atr a atrunyi angeic. Ame hnei angeic hna xupe la ketre hua ka tru thupen thatraqai angeic, me tith la ‘itre ikariota ka lolo.’—Isaia 22:16-18.
Maine ka hni ka ipië së, nge easa ajan troa saze, tro hë Iehova a amanathithi së (Wange ju la paragarafe 8-10
8. Nemene la aqane haji Sebena hnei Iehova, nge nemene la thangane lai?
8 Pine laka hnei Sebena hna thel troa atrunyi angeice kö, ame hnei Iehova hna hamëne la hnëqa i angeic koi Eliakima. (Isaia 22:19-21) Kolo ijine Saneribi joxu ne Asuria a thel troa lep apatrene Ierusalema. Thupene lai, hnei Saneribi hna upe la itre hene musi Asuria, memine la trongene isi ka tru kowe la angetre Iudra, matre tro Hezekia joxu a nue Saneribi troa thapa la nöj. (2 Ite Joxu 18:17-25) Hnei Hezekia hna upi Eliakima me lue xa ka mus troa ithanata me angatr. Ame la ketre e nyidro tre, Sebena, angeice pë hë a seketere. Kola mama e cili laka, tha hnei Sebena kö hna dreng akötrëne la ihaji Iehova, ngo hnei angeice pe hna kapa la hnëqa ka co cememine la hni ka ipië. Köni ini nyine tro sa xom qaathei Sebena.
9-11. (a) Nemene la köni ini nyine tro sa xom qaathei Sebena? (b) Nemene la aqane ketri epun hnene la aqane ujë i Iehova koi Sebena?
9 Ame la hnapan, hnene la hna melën hnei Sebena hna jelenyipicine lo hna hape, “Pane la pi tru nge pine pe troa pat.” (Ite Edomë 16:18) Ame la easa kapa la ketre hnëqa ngöne la ekalesia, maine jë troa atrunyi së hnene la itre xa trejin. Tune kaa la aqane tro sa ujë? Tro kö sa hetre hni ka ipië me mekune laka, ame la itre hne së hna atreine kuca tre, qaathei Iehova? (1 Korinito 4:7) Paulo aposetolo a hmekë së, me hape: “The tro kö kete ate a mekune atrunyi angeice kö hune la ka ijij troa mekun ; ngo mekune acone hi.”—Roma 12:3.
10 Ame la hnaaluen tre, kola mama jëne la aqane haji Sebena laka, ame koi Iehova, ijiji angeice hi troa ujë. (Ite Edomë 3:11, 12) Ketre ini lai thatraqane la itre trejin hna pane amë qa ngöne la itre hnëqa i angatr. Tha tro pi kö angatr a dreng akötrëne la ihaji, ngo loi e tro palahi angatr a kuca asë la hnei angatr hna atrein ngöne la huliwa i Iehova. Loi e tro fe angatr a kapa la ihaji qaathei Nyidrë, ceitu me hatrene la ihnimi Nyidrë. The thëthëhmine kö laka, tro palahi Nyidrëti a nyijune kowe la itre ka hetre hni ne ipië. (E jë la 1 Peteru 5:6, 7.) E ka hni ka ipië së, tro la ihaji Iehova a xom ameköti së, tune la dro ka fedr.
11 Ame la hnaakönin, hetre ini nyine tro sa xom qa ngöne la aqane haji Sebena hnei Iehova. Kola mama ngöne la aqane ihaji Iehova laka, Nyidrëti a sisine la ngazo. Ketre, tha patre kö la ihnimi Nyidrë kowe la atr ka kei kowe la ngazo. Iehova a goeëne la ewekë ka loi thene la itre atr. Haawe, maine epuni la ketre keme me thin, maine qatre thupe pena, xome jë la aqane ihaji Iehova.—Iuda 22, 23.
12-14. (a) Nemene la aqane ujë ne la itre xa trejin ngöne la kola haji angatr hnei Iehova? (b) Hna xatuane tune kaa la ketre trejin hnei Tusi Hmitrötr, nge nemene la thangane lai?
12 Ngo, alanyimu la itre ka dreng akötrën la kola haji angatr, matre angatr a iananyi me Akötresie, memine la ekalesia. (Heberu 3:12, 13) Hapeu, kolo kö lai a hape, ka luzi hë angatr? Ohea! Hanawang la hna melën hnei Graham. Hna upetröneë angeic ekö, nge hna kepe angeic hmaca hnene la ekalesia. Ngo, thupene lai, tha cainöje trootro hë angeic, nge patre fe hë angeic ngöne la itre icasikeu. Hnene la ketre qatre thup hna thel troa easenyi Graham. Hna sipo nyidrë hnei Graham troa ini Tusi me angeic.
13 Önine la qatre thup: “Hnei Graham hna pi tru. Angeic a qaja angazone la itre qatre thup ka upetröneë angeic ekö. Matre, anyimua ini Tusi nyio, nge e thupen, hnei nyio hna ce wang la itre xötr ka qejepengöne la pi tru, memine la itre ethan. Hnei Graham hna goeën la Wesi Ula i Akötresie ceitu me kola thulu, ene pe, hace catr la hni angeic la kola mama la pengöi angeic! Hnei angeic hna trotrohnine laka, ka pi tru angeic, nge tha ka loi kö troa qaja angazone la itre qatre thup, ame hnei angeic hna canga ujë. Hnei angeic hna sine hmaca la itre icasikeu, me inine lapane la Tusi Hmitrötr, me thith o drai. Ketre, hnei angeic hna xome hmaca la itre hnëqa i angeic, ene la troa he ne hnepe lapa. Atraqatre la madrine ne la föi Graham me itre nekö i nyidro!”—Luka 6:41, 42; Iakobo 1:23-25.
14 Önine fe la qatre thup ka hape: “Ame la ketre ijin, hnei Graham hna qaja koi ni la ketre ewekë ka ketr la hning. Öni angeic: ‘Itre macatre ne atre ni la nyipici, nge hnenge fe hna hane pionie. Ngo eni a atrehmekun enehila laka, ka tru la ihniming koi Iehova.’ ” Hna thue hnëqa i Graham troa tro fë micro ngöne la itre ijine icasikeu. Madrine catre angeic troa eatrëne la hnëqa cili. Önine la qatre thup: “Kola ini eni hnene la hna melën hnei Graham laka, ame la atr ka kapa la ihaji, me aconyi angeice kö xajawa i Iehova, tro hë angeic a kapa la itre manathithi ka tru!”
NYITIPU AKÖTRESIETI JË ME IESU LA EPUNI A HAMË IHAJI
15. Nemene la nyine tro epuni a kuca matre tro la itre trejin a kapa la ihaji?
Ame la kola öhne hnene la itre xa trejin laka, ka hni ka ipië epun, tro hë angatre lai a kapa la ihaji
15 Maine easa ajan troa maca troa hamë ini, loi e tro fe sa atreine kapa la itre ihaji hna hamën koi së. (1 Timoteo 4:15, 16) Ketre tune mina fe, e hnei Iehova hna acilë epun troa hajin la itre xa trejin, loi e tro epuni a hetre hni ne ipië, me nue Nyidrë troa xomiujine la mele i epun. Ame la kola öhne hnene la itre xa trejin laka, ka hni ka ipië epun, tro hë angatre lai a metrötrë epun, me kapa la ihaji. Hetre ini hne së hna troa xom qa ngöne la tulu i Iesu.
16. Nemene la ini hne së hna xome qa ngöne la aqane ihaji me ini Iesu?
16 Hnei Iesu palahi hna drengethenge la Keme i nyidrë, ngacama jole ju hë koi nyidrë. (Mataio 26:39) Hnei nyidrëti hna amexeje kowe la itretre drei nyidrë laka, ame la inamacane i nyidrë, memine la itre ini hnei nyidrëti hna hamën tre, qaathene la Keme i nyidrë. (Ioane 5:19, 30) Ka hni ka ipië Iesu, nge ka idrengethenge nyidrë. Celë hi ka xatua nyidrë troa utipine la itre atr, me hamë ini koi angatr. Madrine catr la itre atr troa ce me nyidrë. (E jë la Luka 4:22.) Iesu a ithuecatre kowe la itre ka kucakuca, me pë trengecatr. (Mataio 12:20) Hnene la itre aposetolo hna iwesitrë pi göhnë me thel troa atre ka hape, drei la ka tru thei angatr. Tha hnei Iesu pi kö hna wesitr, hnei nyidrëti pe hna haji angatr cememine la ihnim, me thiina ka menyik.—Mareko 9:33-37; Luka 22:24-27.
17. Nemene la nyine tro la itre qatre thup a kuca matre troa thupëne hnyawane la ekalesia?
17 Loi e tro palahi la itre qatre thup a xome la Tusi Hmitrötr ngöne la angatr a hamë ihaji. Nyipiewekë tro angatr a nyitipu Iesu. Angatre hi lai a amamane ka hape, aja i angatr troa nue Iehova me Iesu troa eatrongë angatr. Öni Peteru aposetolo: “Ithu ane jë la hnënge mamoe i Akötesie thei nyipunie, me thupën, the göi mus, ngo loi e göi aja kö, thenge Akötesie ; nge tha göi hete mo, ngo loi pe göi hni ka ajan ; kete the qene joxune la ite qâ i nyipunie, ngo loi nyine tulu ne la hnënge mamoe.” (1 Peteru 5:2-4) Ame la itre qatre thup ka drengethenge Iehova me Iesu, hetre thangane ka loi hnei angatr hna troa kapa, memine fe la itre atrene la ekalesia.—Isaia 32:1, 2, 17, 18.
18. (a) Nemene la hnëqa i keme me thine qaathei Iehova? (b) Nemene la ixatua hnei Iehova hna hamën kowe la keme me thin?
18 Tune kaa la aqane ihaji e hnine la hnepe lapa? Öni Iehova kowe la itre he ne hnepe lapa ka hape: “The aciane kö kowe la ite nekö i nyipunie la iwesitë ; ngo loi pe hia angate jë ngöne la ini me ihaji [Iehova].” (Efeso 6:4) Hapeu, ka nyipiewekë kö la troa ini me ihaji? Kola qaja ngöne Ite Edomë 19:18 ka hape: “Hajinejë la nekö i ’ö e hete mejiune pete kö, ngo the tro kö eö a pi humuthi nyën.” Hnei Iehova hna ahnithe kowe la keme me thin la hnëqa ne troa hajin la nekönatr. E tha eatrëne kö nyidro la hnëqa i nyidro, troa hetre pune koi nyidro! (1 Samuela 3:12-14) Ame la keme me thin a sipo ixatua koi Iehova, Nyidrëti a hamëne koi nyidro la inamacan, me trengecatr ka ijij. Nge, nyidroti a mejiune laka, troa eatrongë nyidro hnene la Wesi Ula i Nyidrë, memine la uati hmitrötr.—E jë la Iakobo 1:5.
KOLA HNËKË SË TROA CE MELE TINGETING EPINE PALUA
19, 20. (a) Nemene la itre manathithi hne së hna kapa e tro sa dreng la ihaji Iehova? (b) Nemene la hne së hna troa ce ithanatane ngöne la tane mekun ka troa xulu?
19 Maine tro sa kapa la ihaji qaathei Iehova, me xome la aqane ihaji Nyidrë me Iesu, tro hë sa hetrenyi la itre manathith ka nyimutre! Troa tingeting la itre hnepe lapa memine la ekalesia. Lapa hnyawa la itre atren, ke hna hnimi angatr me wangatrunyi angatr, nge hna thupë angatr. Celë hi tingetinge lai me madrin hne së hna kapa enehila, ngo the qaja palaha la tingeting me madrine së elany! (Salamo 72:7) Ame la ihaji hne së hna kapa qaathei Iehova enehila tre, kola hnëkë së tro sa ce mel epine palua. Tro sa mele tingeting me cas, nge Iehova la Keme së. (E jë la Isaia 11:9.) Maine tro sa lapa mekune lai, tro hë sa trotrohnine hnyawa laka, ame la ihaji tre, celë hi hatrene la ihnimi Iehova koi së.
20 Ame ngöne la tane mekun ka troa xulu, tro sa ce wange la aliene la ihaji e hnine la hnepe lapa, me e hnine la ekalesia. Tro sa ce ithanatane la aqane tro sa atreine sipu hnöth la mele së. Nge, easë fe a troa ce wange la aqane tro sa thipetrij la ewekë ka troa akötrëne la mele së. Ngo, ka catrehnine kö hune la ketre ihaji hna hamëne koi së.