“Dengeju La [Ihaji], Nge Inamacanepi”

1. Nemene la aqane tro sa hetrenyi la inamacan, nge troa xatua së tune kaa?

TRENE inamacan Iehova, nge Nyidrëti a hamëne gufane la inamacane kowe la itre atr asë. Kola qaja ngöne Iakobo 1:5 ka hape: “Maine kete e nyipunie ka pë inamacan, tro angeic’ a sipo Akötesie, ate hamëne atrune kowe la nöjei ate asëjëihë, nge tha wesite kö.” Ame la ketre aqane tro sa kapa la inamacan tre, troa dreng la ihaji Iehova. Celë hi ka sewe së troa kuca la itre ewekë ka ngazo, me xatua së troa qale koi Iehova. (Ite Edomë 2:10-12) Tro hë sa hetrenyi la ketre mejiune ka lolo, ene la troa mele epine palua.—Iuda 21.

2. Nemene la aqane tro sa kapa la ihaji Akötresie?

² Hnene laka, itre atr ka tha pexeje kö së, nge isa aqane hia së kö, jole koi së e itre xa ijin troa kapa la ihaji, maine öhnyi eloine pena. Ngo, ame pe la easa öhne la itre thangane la ihaji Iehova ngöne la mele së, easa trotrohnin e cili la etrune la ihnimi Nyidrëti koi së. Kola qaja ngöne Ite Edomë 3:11, 12 ka hape: “Neköng, the sixelene kö la eamo i Iehova ke ame lo hnei Iehova hna pune hnim, te, nyidëti a hajin.” Tha sihngödri kö koi së laka, Iehova a ajane la ka sisitria kowe la mele së. (E jë la Heberu 12:5-11.) Pine laka, atrepengö së hnyawa hi hnei Nyidrë, ame la ihaji hnei Nyidrëti hna hamën, ka ihmeku hnyawa hi memine la jol ka eje the së. Ame ngöne la tane mekune celë, tro sa ce ithanatane la foa lao götrane la ihaji: (1) atreine sipu hnöthe la mel (2) ihaji i kem me thin, (3) ihaji e hnine la ekalesia, me (4) ketre akötr ka tru catre kö hune la akötre ne ihaji.

INAMACANE LA ATRE SIPU HNÖTH LA MELE I ANGEIC

3. Nemene la aqane tro la nekönatr a atreine sipu hnöth la mele i nyën? Hamëne jë la ketre ceitun.

³ Ame la easa sipu hnöth la mele së tre, easë hi lai a xomehnöthe la itre ewekë matre troa lolo la aqane ujë së me aqane mekune së. Tha hna hnaho së kö cememine la atreine troa sipu hnöth la mele së, ngo hne së pe hna inin. Ame la kola inine hnene la keme me thin la nekönatr troa ti velo, nyidroti a pane ea lai velo wanga kei pi. Ngo nango qea ha, nekönatre hë a inine troa të hune lai velo, nge kolo ha nue hnei keme me thin tro nyën a weje velo. Ame hë la kola öhne hnei nyidroti laka, atreine hë la nekönatr ti velo, nyidroti hi a nue nyëne pi. Ceitune hi lai memine la kola inine la nekönatr hnei kem me thin, “ngöne la ini me ihaji [Iehova].” Nyidroti a xatuane la nekönatr troa inamacan, me atreine sipu hnöthe la mele i nyën.—Efeso 6:4.

4, 5. (a) Pine nemen matre nyipiewekë troa atreine hnöth la mel ngöne la easa xetrëne la “ate ka hnyipixe”? (b) Pine nemen matre tha tro pi kö sa hnehengazo menu ngöne la easa tria?

⁴ Ceitune hi memine la itre atr ka atre Iehova, nge itre ka tru hë. Ngacama atreine hë angatr hnöthe la mele i angatr, ngo ame pe, tha itre keresiano ka macaje pala kö. Ame hë la angatr a xetrëne la “ate ka hnyipixe” me thele troa xötrethenge Keriso, angatre hi lai a kökötre me macaje trootro. (Efeso 4:23, 24) Maine tro sa atreine isa hnöthe la mele së, tro hë “sha xelene la thina ka tha ijiji Akötesie me nöjei aja ne la fen, ngo tro sha lapa mekun, me thina meköt, me thina ka ijiji Akötesie ngöne la mele celë.”—Tito 2:12.

⁵ Ngo, itre atr ka ngazo asë hi së. (Ate Cainöj 7:20) Haawe, e traqa ju së tria, kolo kö lai a hape, thatreine kö së hnöthe la mele së? Ohea. Hna qaja ngöne Ite Edomë 24:16 ka hape: “Troa a [seven] la o kei la ate ka meköt, me mejë hmaca.” Nemene la ka troa xatua së troa “mejë hmaca”? Tha hnene kö la sipu trengecatre së, ngo hnene pe la emenene la uati hmitrötr. (E jë la Filipi 4:13.) Ame fe la xomehnöth tre, celë hi ketre igötranene la wene ne la ua.

6. Nemene la nyine tro sa kuca matre tro sa hetre hni ne ajan troa ini Tus? (Wange ju la pane iatr.)

⁶ Maine tro sa catre thith, me inine la Tusi Hmitrötr me sine thel ej, tro hë sa atreine hnöth la mele së. Nge tune kaa e jole koi epuni troa e Tusi Hmitrötr, maine pë pena kö aja thei epun? The cile kö. Maine tro epuni a thele Iehova, tro Nyidrëti a xatua epuni troa hetre ‘hni ne ajan’ kowe la Wesi Ula. (1 Peteru 2:2) Sipo Iehova jë troa xatua epuni troa atreine hnöth la mele i epun. Tro ha hetre ijine i epuni troa inine la Tusi Hmitrötr. Maine jë itre hnepe menetre hi ne tro epuni a ini Tus ngöne la xötrei. Ngo ame hë e thupen, tro ha hmaloi trootro, nge hetre aja i epuni hë troa ini Tus. Ketre, tro fe a hetre madrine i epuni troa sine thele la itre mekuna i Iehova ka sisitria.—1 Timoteo 4:15.

7. Nemene la ka troa xatua së troa eatrëne la itre hne së hna mekun göne la huliwa i Iehova?

⁷ Maine tro sa atreine hnöth la mele së, tro hë sa eatrën la itre hne së hna mekun göne la huliwa i Iehova. Hnene la ketre kem hna nango nanazije troa cainöj. Nyidrëti a mekune ju troa xome la huliwa ne pionie lapa. Nemene la ka xatua nyidrë troa hnöthe la mele i nyidrë? Hnei nyidrëti hna e la itre zonale së ka qaja la eloine la troa pionie, me thithi fë la aja i nyidrë. Ketre, hnei Nyidrëti hna hane xom, e itre xa ijin, la huliwa ne pionie ka ixatua. Haawe, lolo catre hë la aqane imelekeu i nyidrë me Iehova. Tha hnei nyidrëti kö hna nue la ketre ewekë troa sewe nyidrë; hnei nyidrëti pe hna catre isine troa aejëne lo aja i nyidrë. Ame hë e thupen, nyidrëti hë a pionie lapa.

HIANE JË LA NEKÖNATR NGÖNE LA IHAJI IEHOVA

8-10. Nemene la aqane tro kem me thin a hiane la nekönatr matre tro nyën a hane nyihlue i Iehova? Hamëne jë la ketre tulu.

⁸ Hnei Iehova hna amekötine laka, tro la keme me thin a hiane la nekönatr “ngöne la ini me ihaji [Nyidrë].” (Efeso 6:4) Tha ka hmaloi kö enehila troa hiane la itre nekönatr. (2 Timoteo 3:1-5) Ame la kola hnahone la nekönatr, thatre pala kö nyën la loi me ngazo, nge tha hna inine kö la mekuthethewe i nyën. Celë hi matre, nyipiewekë troa haji nyën. (Roma 2:14, 15) Hnene la ketre atr ka qejepengöne la Tusi Hmitrötr hna qaja ka hape, ame la qene Heleni ne la hnëewekë “ihaji” tre, kolo fe a qaja la “aqane macaje trootro la nekönatr” utihë la kola nyipi atr.

⁹ Tingetinge la hni ne la nekönatr, e hna haji nyën hnei keme me thin, cememine la ihnim. Ketre, nyën a trotrohnine laka, tha tro kö nyën a sipu kuci mekun. Nge, tro kö nyën a xeni pun la itre huliwa i nyën. Celë hi matre, nyipiewekë catre kowe la keme me thin keresiano troa mejiune kowe la inamacane i Iehova ngöne la kola hiane la nekönatr. Isapengöne kö la aqane hiane la itre nekönatr thenge la itre götrane hnei angatr hna mele ngön. Ketre, kolo palahi a saze la aqane hiane la itre nekönatr. Ngo, ame la kem me thin ka drengethenge Akötresie, tha nyidroti kö a saze lapane la aqane hiane nyidroti la nekönatr, maine mejiune pena kowe la inamacane i fen.

¹⁰ Hetre ini nyine tro sa xome qa ngöne la tulu i Noa. Ame lo Iehova a upi Noa troa cane la aka, thatre kö Noa la aqane troa kuca. Casi hi laka, loi e tro angeic a mejiune koi Iehova. Kola mama laka, hnei angeic “hna kuca” thenge la hna ahnithe hnei Iehova. (Genese 6:22) Nemene la thangane lai? Jëne la aka, mele pë hë Noa me hnepe lapa i angeic! Kola mama laka, hnei Noa hna eatrëne hnyawa la hnëqa ne kem ke, hnei angeic hna mejiune kowe la inamacane i Akötresie. Hnei Noa hna inine hnyawa la itre nekö i angeic, me amamai tulu ka loi, ngacama jole la mel qëmekene troa traqa la Iwë.—Genese 6:5.

11. Pine nemen matre loi e tro la kem me thin a kuca asë la hnei nyidroti hna atrein, matre troa inine la nekönatr?

¹¹ Maine epun la ketre keme me thin, nemene la nyine tro epuni a kuca ‘thenge’ la hna qaja hnei Iehova? Drenge ju la hna qaja hnei Iehova. Sipo Nyidrëti jë troa xatua epun troa hiane la nekö i epun. Thele jë la itre eamo e hnine la Wesi Ula i Nyidrë, nge drengethenge jë la organizasio i Nyidrë. Tro kö la itre nekö i epuni elanyi a olene koi epun! Önine la ketre trejin: “Eni a olene atraqatr la aqane hia ni hnei kaka me nenë. Hnei nyidroti hna kuca asë la hnei nyidroti hna atrein matre troa ketr la hning. Hnei kaka me nenë hna xatua ni troa qale catre koi Iehova.” Ame e itre xa ijin, kola kuca asë hnene la kem me thin la hnei nyidroti hna atrein matre troa inine la nekönatr. Ngo, ame pe, hna trotriji Iehova kö hnei nyudren. Ame la kem me thin a kuca asë la hnei nyidro hna atrein, tre, lapa hnyawa la mekuthethewe i nyidro. Nge nyidroti a mejiune laka, tro hmaca kö a bëeke la nekönatr koi Iehova.

12, 13. (a) Nemene la aqane tro kem me thin a drengethenge Akötresie ngöne la kola upetröneë la nekönatr? (b) Nemene la thangane kowe la ketre nekön la hna drengethenge thenge Iehova hnei kem me thin?

¹² Ame la ketre itupathi ka tru kowe la kem me thin tre, ene la troa drengethenge la itre hna amekötine ngöne la kola upetröneë la nekönatr. Hna qaja hnene la ketre trejine föe ngöne la kola upetröneë la nekö i eahlo jajiny, ka hape: “Hnenge hna thele e hnine la itre itusi së la ketre kepin ka troa aijijë eni troa iöhnyi memine la nekönge jajinyi me aping.” Ngo hna xatua eahlo hnene la föi eahlo troa trotrohnine laka, ka tru hë angeic. Nyipiewekë tro pe nyidroti a mele nyipici koi Iehova.

¹³ Thupene la itre macatre, kola kapa hmaca la nekö i eahlo e hnine la ekalesia. Önine la thin: “Ame hë enehila, nyio a ihë me icinyanyikeu e nöjei drai! Angeic a metrötrë nyio ke, hnei nyio hna drengethenge Akötresie. Lolo la aqane imelekeu hun.” Maine troa upetröneë la nekö i epun, hapeu, tro kö epuni a ‘lapaune koi Iehova hnene la hni ka pexej’? Tro kö epuni a amamane koi Nyidrë laka, ‘tha epuni kö a lapa qale kowe la hnei epun hna trotrohnin’? (Ite Edomë 3:5, 6) Tha tro pi kö sa thëthëhmine laka, ame la kola haji së hnei Iehova tre, Nyidrëti hi lai a amamane la edraiëne la inamacane i Nyidrë memine la etrune la ihnimi Nyidrëti koi së. Hnei Nyidrëti hna upe la nekö i Nyidrë thatraqane la nöjei atr asë, ene mina fe la nekö i epun. Aja i Akötresie tro asë hi së a hetrenyi la mele ka tha ase palua kö. (E jë la 2 Peteru 3:9.) Haawe keme me thine fe, catre pi kapa la ihaji Iehova, me drenge la itre hnei Nyidrëti hna amekötin, ngacama hace koi epun. The trije kö la ihaji, ngo drenge ju pe me kapa!

IHAJI E HNINE LA EKALESIA

14. Nemene la aqane tro sa kepe thangane la ini hna hamëne hnene la “ate thupe nyipici”?

¹⁴ Hnei Iehova hna ahnith laka, tro Nyidrëti a thupën me inine la ekalesia i keresiano. Easa öhne laka, hnei Iehova hna acili Iesu troa thupëne la ekalesia. Nge, hna upi Iesu fe troa acile la “ate thupe nyipici” matre troa hamëne la göxen qaathei Akötresie. Celë hi xen ka aijijë së troa mele nyipici koi Iehova. (Luka 12:42) Kola hamëne hnene la “ate thupe” la ini ka lolo, maine ihaji pena. Maine jë, hnei epuni hna hane drenge la ketre cainöj maine e la ketre zonale së ka xatua epuni troa saze la aqane mekun me aqane ujë i epun. Madrine jë la kola saze la mele i epun. Celë hi ka amamane laka, epuni a kapa la ihaji Iehova.—Ite Edomë 2:1-5.

15, 16. (a) Nemene la eloine koi së, la huliwa ne la itre qatre thup? (b) Nemene la nyine tro sa kuca matre madrine la itre qatre thup troa cilë hnëqa?

¹⁵ Hnei Keriso fe hna upe la itre qatre thup troa thupëne me hnime la ekalesia. Tusi Hmitrötr a hë angatr ka hape, “ite ahnahna.” (Efeso 4:8, 11-13) Nemene la aqane tro sa kepe thangane la huliwa ne la itre qatre thup? Loi e tro sa xötrethenge la lapaun memine la tulu ka lolo i angatr. Tro fe sa trongëne la eamo hnei angatr hna xom qa hnine la Tusi Hmitrötr. (E jë la Heberu 13:7, 17.) Tru la ihnimi ne la itre qatre thup, nge aja i angatr tro sa qale catre koi Akötresie. Ame la angatr a öhne laka, patre kö së ngöne la itre ijine icasikeu, nge tha cainöje hë së, angatre hi a canga nyenyap troa xatua së. Tro angatr a drei së me hamëne la itre eamo qa hnine la Tusi Hmitrötr, itre ka troa akeukawane la hni së. Öhne kö epun la ihnimi Iehova, ngöne la kola ixatua hnene la itre qatre thup?

¹⁶ Tha ka hmaloi kö kowe la itre qatre thup troa hamë eamo. Easa mekune lo kola tro hnei Nathana, ketre perofeta, troa ithanata koi Davita joxu thupene la hnei angeic hna thel troa juetrëne la ngazo. Tha ka hmaloi kö koi Nathana! (2 Samuela 12:1-14) Tune kaa fe Paulo aposetolo, ngöne lo nyidrëti a haji Peteru pine la aqane ujë i angeic kowe la angetre ethen? Nge, Peteru la ketre aposetolo. Eje hi lai laka, tha ka hmaloi kö koi Paulo! (Galatia 2:11-14) Haawe, nemene la nyine tro epuni a kuca, matre tha tro kö a jole kowe la itre qatre thup troa hamë eamo? Loi e tro epuni a hetre hni ne ipië me hni ne ole, me idrengethenge. Ame la ixatua hna hamëne hnene la itre qatre thup tre, celë hi hatrene la ihnimi Iehova. Tro hë epuni a kepe eloin, nge tro fe la itre qatre thup a madrine troa cilëne la hnëqa i angatr.

17. Nemene la aqane xatuane la ketre trejine föe hnene la itre qatre thup?

¹⁷ Hna qaja hnene la ketre trejin föe ka hape, hnene la itre ewekë ka traqa koi angeic ekö, matre jole catr koi angeic troa hnimi Iehova. Tru la hleuhleu ngöne la mele i angeic. Öni angeic: “Atre hnyawa hi eni laka, loi e tro eni a wange la itre qatre thup. Tha hnei angatr kö hna wesitrë ni maine xöjetriji eni pena. Ngo hnei angatre pe hna hamë ithuecatre koi eni me aegöcatrenyi eni. Ketre, ngacama tru la huliwa i angatr thupene la itre icasikeu, ngo tro pala kö la ketre e angatr a traqa troa pane wai eni. Hnene la meleng ekö, matre ame koi eni, tha ijijinge kö troa kapa la ihnimi Akötresie. Ngo ame pe, hnei Iehova palahi hna nyijëne la ekalesia memine la itre qatre thup, matre troa amamane la ihnimi Nyidrë koi eni. Hnenge hna thith me sipo Akötresie, matre tro palahi Nyidrëti a ce me eni.”

AKÖTRE KA TRU CATRE KÖ HUNE LA AKÖTRE NE LA IHAJI

18, 19. Hetrenyi kö la ketre akötre ka tru catre hune la akötre ne la ihaji? Qaja jë la itre hna melën.

¹⁸ Ka akötr e itre xa ijine la ihaji, ngo troa tru catre kö la akötr, e tro sa trije la ihaji Iehova. (Heberu 12:11) Hetre ini nyine tro sa xom qa ngöne la hna melën hnei Kaina me Zedekia joxu. Ame la Iehova a öhne laka, Kaina a methinë Abela, nge ej e kuhu hni angeic la ajan troa humuthi Abela, hnei Nyidrëti hna canga hmekë angeic. Öni Nyidrë: “Ue lae eö a elëhni ? nge ngöne nemene iazi la qëmeke i ’ö ? Hape u, maine eö a kuca la loi, tha tro kö a kepe eö ? nge e tha kuca kö eö la loi, hawe, mekölë hë la hulö ngöne la qëhnelö. Nge tro ha fei ’ö la aja i angeic, nge tro eö a musinë angeic” (Genese 4:6, 7) Hnei Kaina hna trije la ihaji Iehova, ame hnei angeic hna humuthe la trejin me angeic. Angeice pë hë a xeni pun la aqane ujë i angeic utihë la angeic a mec. (Genese 4:11, 12) Maine drei Iehova ju hnei Kaina, tha tro kö a traqa koi angeic la itre akötr ka nyimutre.

¹⁹ Ame Zedekia, ketre joxu ka pëhnënyöngön angeic, nge ka ngazo thiina. Ame ngöne la angeic a joxu, ka ngazo la mele ne la angetre Ierusalema. Tha mano kö Ieremia perofeta iele Zedekia matre tro angeic a ujë. Ngo, hnei angeic hna trij la ihaji Iehova, ame hna traqa koi angeic la itre akötr ka tru. (Ieremia 52:8-11) Tha aja i Iehova kö tro sa akötr pine la itre ngazo së!—E jë la Isaia 48:17, 18.

20. Nemene la thangane kowe la itre ka kapa la ihaji Iehova, me kowe la itre ka trije ej?

²⁰ Alanyimu enehila la itre ka hnyima fë la ihaji Iehova, me wangesixan ej. Ngo, easenyi hë la ijin troa xeni pun hnene la itre ka trije la ihaji Nyidrë. (Ite Edomë 1:24-31) Celë hi matre, loi e tro sa trongën la hna hape, “Dengeju la hna inin, nge inamacanepi.” Kola qaja ngöne Ite Edomë 4:13 ka hape, “Xölehujeju eö la hna inin, the nue, thupëneju ej ; ke celë hi mele i ’ö.”