Troa Hajine Tune Kaa La Kuku?

“Treqene pala ju pë ni la loto i Jordan, ngo tha traqa pi kö. Aköni a triane hë angeice la hawa hna sa. Eni a mekune ka hape, ‘Ekaa jë? Tha eatre jë kö? Tha mekune kö ka hape, nyiho la a hnehengazo!’ Ame hë la angeic a traqa, eni hi lai a troa nue asë la trenge hninge koi angeic.”—GEORGE.

“Sesëkötre ngazo pi kö ni la neköng jajiny a ho. Xei ju hi ni a goeë nyën e nango xolouthi lue itrasitr. Hna xe hnene la mama i nyën ka foa lao macatre.”—NICOLE.

Ka sikisi lao macatre ne la nekö i nyiho jajiny. Nyën a catre fë, ka hape: “ ‘Tha hnenge kö hna atrekënö lai otrene wanakoim. Hnenge lai hna öhn!’ Treije pi kö nyiho la nyiho a goeë nyën a pi hune fë la thoi.”—STEPHEN.

MAINE ka trene kuku epun, ma trotrohnine hi epun la hna qaja hnei angatre caha. Ame itre xa ijin, epuni a thele la aqane troa hajine la nekönatr, maine pena, thatre hë epun ka hape, tro kö a haji nyën? Hapeu, ngazo troa hajine la nekönatr?

NEMENE LA IHAJI?

Ame la “ihaji” hna qaja e hnine la Tusi Hmitrötr, tre tha kolo hmekuje kö a qaja la wameuc. Ame la ka ihaji, tre ka ini, nge ka iameköti fe. Tha hna hane kö qaja ka hape, troa iaxösisi, maine sasaithi tulu pena la aqane ihaji.—Ite Edomë 4:1, 2.

Ame la ihaji, tre ka tune la troa eëny. Ame la atr ka eëny, tre angeic a pane hnëkëne la göhnen la feja, me fi, me ithuan, me thupën, wanga si meci jë, maine cia trane pena hnei itre ka ithiny. Ame hë la kola tru lai feja, tro la ka eëny lai a triji hacen acon, matre cia loi. Atre hi lai ka eëny ka hape, nyimu aqane kuca, matre tro angeic a nyihnyawane lai feja. Ka ceitu hnyawa hi lai memine la ihaji. Ngo ame itre xa ijin, nyipi ewekë troa pane wameucëne la nekönatr, tune lai kola triji hacene lo feja, matre lepe trij acone pi la itre itine ka ngazo qaathei nyën. Ngo, ame la kola triji hacene la feja, tre tro la ka eëny a thupëne la aqane troa thupe wapicin, wanga eatre menu jë lai feja. Ka ceitu hi lai me ihaji hna hamëne hnei keme me thin: troa hamëne cememine la ihnim.

Ame la tulu ka loi koi itre keme me thin, tre Iehova Akötresie, lo hna qaja hnene la Tusi Hmitrötr. Kola “ajane la hna inin” hnene la itre hlue i Nyidrë ka idrei e celë fen, ke lolo, nge hetre thangane la aqane ihaji Nyidrë. (Ite Edomë 12:1) Angatr a ‘xölehuje la hna inin’ nge ‘tha nue kö.’ (Ite Edomë 4:13) Tro lai a hmaloi kowe la nekö i epuni troa kapa la ihaji, e tro epuni a xom la köni aqane ihaji Akötresie. Troa ihaji (1) cememine la ihnim, (2) ngöne la tulu, nge (3) ca jëne aqane ihaji.

HNA HAMËN CEMEMINE LA IHNIM

Akötresieti a ihaji, ke hetre ihnimi Nyidrë. Öni Tusi Hmitrötr: “Ame lo hnei Iehova hna pune hnim, te, nyidëti ka hajin, tune la keme a hajine la kuku hnei angeice hna madin.” (Ite Edomë 3:12) Nge ame Iehova, tre “ate utipine me ka ihnim, ate xomi hni ahoean.” (Esodo 34:6) Celë hi kepine matre tha ka sasaithi tulu kö la aqane ihaji Iehova. Tha Nyidrëti kö a hna la itre trenge “ewekë kösë hna thine hnei taua,” ka tune la itre ithanata ka iakötrë, me iqeje gele lapa, maine ihnyima sai pena.—Ite Edomë 12:18.

A mother patiently listens to her daughter — DRENGE JU

Nyipici laka, thatreine kö tro la itre keme me thin a xomihni, tune la aqane xomihni Iehova. Ngo ame la kola traqa lai ijine thatreine hnyawa ha epuni xomihni, mekune kö, ka hape ame la ihaji hna hamëne hnene la atr ka elëhni, tre ka iakötrë, nge ka pë thangan. Nge tha aqane ihaji kö lai. Kolo pe lai a nue hni.

Ka hetre thangane ka loi la ihaji hnei epuni hna hamëne cememine la xomihni me ihnim. Celë hi lai hna öhne hnei George, ketre kem, me Nicole fe, ketre thine kö.

A loving father prays with his son — THITHI JË

“Ame la Jordan a traqa, ka boele hnyawa la hning, ketre tui ifëneköng; ngo hnei nyiho hna isa xomihni, me pane drenge la hna qaja hnene la nekö i nyiho. Ngo pine laka, hnenyipajidri hë, öni huni jë, ithanata hnyawa jë hë huni elany. Eahuni pë hë a ce thithi jë, me isa tro troa meköl. Ame hë elany thupene la hna mano hnyawa, nyiho pë hë a ithanata hnyawa jë me angeic, me thele troa ketr la hni angeic. Canga kapa hi angeice la ihaji, me itre hna amekötin. Ame la eloin, hnei nyiho hna mekune ka hape, tha loi kö troa ithanata, ngöne la kola elëhni. Nge nyiho a öhne laka, ame la aqane ujë cili, ke ka hetre thangane ka loi pala hi.”—George.

A caring mother reasons with her daughter — ITHANATA JË

“Kola elë la hning kowe la neköng trahmany, pine nyëne lepe menune la jini nyën. Tha canga ameköti nyëne kö ni, ke elë pala ha la hning; ngo eni pë hë a upi nyëne jë kowe la hnahage i nyën. Ame hë la kola nango lapa kötre la elëhning, eni pë hë a qaja jë koi nyëne ka hape, tha loi kö troa isi, nge ka akötr kowe la jini nyën la ewekë hnei nyëne hna kuca. Ame hë la pun, tre nyëne pë hë a qeje menu jë kowe la jini nyën, me haluthi nyën.”— Nicole.

Nyipici laka, ame la ihaji me iameköti, tre troa loi, e hna hamëne cememine la ihnim.

HNA HAMËN NGÖNE LA TULU

Ame la ihaji hnei Iehova hna hamën, tre “thenge [pala hi] la meköt.” (Ieremia 30:11; 46:28) Nyidrëti a ihaji thenge la nöjei ithuemacany hnei Nyidrëti hna kapa, ene fe lo itre ka tha mama kö. Tro keme me thin a nyitipu Nyidrëti tune kaa? Öni Stephen, lo hna qaja ekula, ka hape: “Ngacama akötre catre koi nyiho, nge thatre kö nyiho la kepin matre Natalie a pi hune fë la thoi, ngo hnei nyiho hna thele troa pane trotrohnine la pengö i nyën: ene la macatre, me hna atreine trotrohnin.”

Hnei Robert, föi Nicole, hna hane kuca tune lai. Ame la kola ngazo la thiina ne la nekönatr, angeic a pane thele troa atre ka hape: ‘Ketre hna majemine lai, maine nyëne petre hi a kuca la ewekë cili? Tha ka kucakuca kö, maine wezipo pena? Maine jë hetre ketre jol, ngo ka sihngödr?’

Ame la keme me thin ka hetre wangatrehmekun, tre tha nyidroti kö a goeëne la nekönatr tune la ka tru. Celë hi lai hna hane wangatrehmekune hnei Paulo aposetolo, ke öni nyidrë: “Lo nekönate pete kö ni, hnenge hna ewekë qene nekönat, hnenge hna trotrohnine qene nekönat.” (1 Korinito 13:11) Öni Robert: “Ame la atreine jë ni waiewekë hnyawa me hmitre elëhni, ke hnenge hmaca hna mekune lo pengöng, lo eni petre kö a nekönatr.”

The upe kö la nekönatr troa kuca la hnei nyën hna thatrein, nge ketre the nyi xöle i nyëne kö kola kuca la ewekë ka ngazo. Goeëne ju hi la hnei nyën hna atrein, me thatrein, me itre xa ewekë kö, matre ijije troa hamëne la ihaji ngöne la tulu.

CASI HI LA AQANE IHAJI

Öni Malaki 3:6: “Iehova ni, tha ka ujë kö ni.” Tingetinge la hni ne la itre hlue i Akötresie, ke nyipici la ithanata celë. Tro fe a tune lai la itre nekönatr. Ngo maine ka saze lapa la aqane iameköti epun, thatre hë nyudreni la nyine kuca, haawe, tro hë nyudreni lai a elëhni.

Öni Iesu: “Loi la ewekë i nyipunie troa Eje hi, eje hi ; Pëkö, pëkö.” Ka nyipici lai göi itre trene kuku. (Mataio 5:37) Pane mekune hnyawa ju la hnei epuni hna troa kuca, qëmekene troa qaja koi nekönatr. Maine hnei epuni hna qaja koi nyën la hna troa kuca koi nyën, e ngazo la thiina i nyën, aeatrëne ju la ithanata i epun.

Nyipi ewekë tro keme me thin a isa qeje mekun, matre casi la aqane ihaji nyidro. Öni Robert: “Maine hnenge hna kapa la sipo i ha nekönatr, nge atre hi ni ka hape, xele kö thine i nyudren, eni pë hë a hmaca ju troa ca mekune me föeng.” Maine ka isazikeu la mekuna i keme me thin, nyipi ewekë tro nyidroti a pane ce ithanata cas, matre traqa kowe la mekune ka cas.

NYIPI EWEKË LA IHAJI

Maine ka ihaji epun cememine la ihnim, me ngöne la tulu, nge casi pala hi la aqane ihaji, tui Iehova, tro ha hetre thangane ka loi koi ha nekönatr. Tro la ini epun a xatua nyudren troa macaj, me nyipi atr, me atre la nyine tro angatr a kuca elany e tru hë angatr. Öni Tusi Hmitrötr: “Ininejë la nekönate thenge la jë i nyën ; nge e qatë hë tha tro kö nyën’ a jea qa ngön.”—Ite Edomë 22:6.