Ita Ne Thup göi 03 Okotropa

Ketre Mejiune Qaathei Akötresie Ene La Troa Mele Epine Palua e Celë Fen

“Hna apone la ite ewekë hna xupe kowe la ka tha nyipi ewekë . . . [hnene] la mejiun.”—ROM. 8:20.

1, 2. (a) Pine nemen matre ka nyipi ewekë koi së la mejiune troa mele epine palua e celë fen? (b) Pine nemen matre nyimutre la itre atr ka thaa mejiune kö kowe la mele ka thaa ase palua kö e celë fen?

MAINE jë mekune pala kö nyipunie lo aqane madrine nyipunie ngöne lo nyipunieti a atre, laka, thaa tro hmaca kö la itre atr elanyi a qatre trootro me mec, ngo tro pe angatr a mele epine palua e celë fen. (Ioane 17:3; Hna ama. 21:3, 4) Maine jë atraqatre mina fe la madrine i nyipunie troa thawa kowe la itre xan, la mejiune celë qa hnine la itre Hna Cinyihan. Eje hi laka, ame la mejiune troa mele epine palua, tre, celë hi ketre götrane ka sisitria ne la maca ka loi hne së hna tro fë. Hetre thangane ej ngöne la aqane goeëne së la mel.

² Ngo ame pe la itre hmi ka uune fë, ka hape, itre Keresiano angatr, tre, hnei angatr hna wange sixane la mejiune troa mele epine palua e celë fen. Ngacama Tusi Hmitrötr a inine, ka hape, ka meci la u, ngo nyimutre la itre hmi ka qaja, ka hape, ame la kola meci la atr, tre, hetre götrane i angeic ka mele pë hë. (Ezek. 18:20) Qa ngöne lai, nyimutre la itre atr ka thaa mejiune kö kowe la mele ka thaa ase palua kö e celë fen. Haawe, maine jë easë a isa hnying, ka hape: Hapeu, Tusi Hmitrötre kö a nyipi sajuëne la mejiune cili? Maine nyipici laka, Tusi Hmitrötr a sajuëne lai, haawe, eue la Akötresieti a pane qaja amamane la mejiune cili kowe la itre atr?

“Hna Apone . . . Kowe La Ka Tha Nyipi Ewekë . . . [hnene] la Mejiun”

3. Kola mama hnyawa tune kaa la aja i Akötresie kowe la nöjei atr asë, ngöne lo qaane la mele ne la atr?

³ Hna mama hnyawa la aja i Iehova kowe la nöjei atr asë, ngöne lo qaane la mele ne la atr. Hnei Akötresie hna amamane hnyawa, ka hape, maine tro Adamu a drengethenge Nyidrëti, haawe, tro hë angeic a mele epine palua. (Gen. 2:9, 17; 3:22) Qa ngöne lai, thaa luelu kö së laka, hnene la itre pane matra i Adamu hna atre pë hë e thupen, ka hape, thaa pexeje hë la atr; nge nyimutre la itre ewekë hnei angatr hna öhn, ka amamane hnyawa lai. Ase hë thinge la jëne troa lö kowe la hlapa e Edena, nge kolo ha qatre trootro me meci la itre atr. (Gen. 3:23, 24) Kola tro la itre drai, nge mama hnyawa ha laka thaa qea ha la hna mel hnene la atr. Hnei Adamu hna mele uti hë la 930 lao macatre. Thupene lo Iwë, hnei Sema hna mele uti hi la 600 lao macatre, nge ame la neköi angeic, ene Afasada, tre, uti hë la 438 lao macatre. Kola e la 205 lao macatre ne mele la keme i Aberahama, ene Tera. Ame Aberahama, hnei nyidrëti hna mel uti hë la 175 lao macatre; ame Isaaka nekö i nyidrë, tre, traqa koi 180 lao macatre, nge ame Iakobo, tre, meci nyidrë nge 147 lao macatre i nyidrë. (Gen. 5:5; 11:10-13, 32; 25:7; 35:28; 47:28) Nyimutre jë hë lo itre atr ka atrehmekune la kepine matre thaa mel ahoeanyi hë la itre atr; eje hi, luuzi hë la mejiune troa mele epine palua! Hapeu, ijije pala kö tro angatr a mekun troa hetrenyi la mele ka thaa ase palua kö?

4. Nemene la mekun ka nyitrepen la mejiune ne la itre atr ka mele nyipici ekö, ene laka tro hmaca kö Akötresieti a hamëne la itre manathithi hna aluuzine hnei Adamu?

⁴ Kola qaja hnene la Wesi Ula i Akötresie, ka hape: “Hna apone la [atr] hna xupe kowe la ka tha nyipi ewekë . . . [hnene] la mejiun.” (Rom. 8:20) Nemene la mejiune cili? Kola amamane hnene la pane hna perofetane hnei Tusi Hmitrötr, laka, tro la ketre “matran” a ‘athe la he ne la un.’ (E jë la Genese 3:1-5, 15.) Ame la hna thingehnaeane göne lai Matrane cili, tre, celë hi la trepene la mejiune ne la itre atr ka mele nyipici, ene laka, thaa tro kö Akötresieti a thëthëhmine la aja i Nyidrë kowe la nöjei atr asë. Hnene ej hna hamëne kowe la itre atr, tui Abela me Noa, la ketre kepin matre ijije troa mejiun, ka hape, tro hmaca kö Akötresieti a hamëne la itre manathithi hna aluuzine hnei Adamu. Maine jë hnene la itre atr cili hna atrehmekune laka, ame la aliene la kola qaja, ka hape, troa ‘athe la tidröca ne la matran,’ tre, ene la troa anenine la madra.—Gen. 4:4; 8:20; Heb. 11:4.

5. Nemene la ka amamane laka, ka lapaune Aberahama kowe la mele hmaca?

⁵ Tro sa ce wange la tulu i Aberahama. Ame ngöne lo kola tupathi Aberahama, tre, hnei nyidrëti hna “hujë Isaaka, . . . la nekö i nyidëti ka cas.” (Heb. 11:17) Pine nemene matre hetre hni ne aja i nyidrë troa ujë tune lai? (E jë la Heberu 11:19.) Pine laka nyidrëti a mejiune kowe la mele hmaca! Hetre mekun ka nyitrepen la mejiune i Aberahama kowe la mele hmaca. Eje hi laka, hnei Iehova hna aijijë Aberahama me Sara föi nyidrë, troa hnahone la ketre nekö trahmany, ngacama qatre hë nyidro. (Gen. 18:10-14; 21:1-3; Rom. 4:19-21) Ketre, eje pala hi thei Aberahama lo trenge ewekë hnei Iehova hna ahnithe koi nyidrë. Öni Akötresie koi nyidrëti, ka hape: “Tro ha qaja la matra i ’ö qa thei Isaaka.” (Gen. 21:12) Qa ngöne lai, ka xeci hnyawa e kuhu hni Aberahama, laka, tro Akötresieti a amele Isaaka.

6, 7. (a) Nemene la isisinyikeu hnei Iehova hna kuca me Aberahama? (b) Hnene la hna thingehnaean hnei Iehova koi Aberahama, hna thue mejiune tune kaa kowe la nöjei atr asë?

⁶ Pine laka ka catre hnyawa la lapaune i Aberahama, ene pe hnei Iehova hna sisiny me nyidrë, göne la “matra” i nyidrë. (E jë la Genese 22:18.) Ame la götrane ka sisitria ne la “matrane” cili, tre, ene Iesu Keriso. (Gal. 3:16) Hnei Iehova hna qaja koi Aberahama, ka hape, tro ha mana la “matra” i nyidrë “tune la ite wëtesiji e hnengödrai, nge tune la ngöni ne ngöne gejë;” kolo lai a hape, thatreine kö troa e hnei Aberahama la etrun. (Gen. 22:17) Ngo ame e thupen, tre, mama hnyawa pi hi la etrune lai matrane cili. Iesu Keriso memine la ala 144 000 lao atr ka troa ce musi me nyidrë ngöne la Baselaia i nyidrë, la itre ka sine la ‘matrane’ cili. (Gal. 3:29; Hna ama. 7:4; 14:1) Eje hi, “tro ha manathithi . . . la nöjei nöje asëjëihë e celë fen” hnene la Baselaia ne la Mesia.

⁷ Ngacama thaa ijije ju kö tro Aberahama a trotrohnine la nyipi aliene la isisinyikeu hnei Iehova hna kuca me nyidrë, ngo kola qaja hnene la Tusi Hmitrötr, ka hape, “hnei [nyidrëti] hna teqene la lapa ka hete tepen.” (Heb. 11:10) Nge ame la lapa cili, tre, ene la Baselaia i Akötresie. Maine ajane Aberahama troa kapa la itre manathithi fene la Baselaia cili, haawe, loi e tro nyidrëti a mele hmaca. Celë hi matre tro nyidrëti a mele palua e celë fen, e troa amele nyidrëti hmaca. Nge ketre, ijije mina fe tro la itre atr ka mele pë hë thupei Amagedo maine pena lo itre atr hna amelen hmaca qa hna mec, a hetrenyi la mele ka thaa ase palua kö.—Hna ama. 7:9, 14; 20:12-14.

“Hna Musinë Ni Hnene La [Ua] e Kuhu Hning”

8, 9. Pine nemen matre, ame la tusi Iobu, tre, thaa itus ne edromë hmekuje kö?

⁸ Ame ngöne lo hneijine i Iosefa, xötre api Aberahama, memine la perofeta Mose, tre, hetrenyi la ketre trahmany, Iobu la ëjen. Kola qaja ngöne la tusi Iobu, lo hna cinyihane hnei Mose, la kepine matre hnei Iehova hna nue Iobu troa akötr, memine la aqane trongene la itre ewekë thupen la akötre cili. Ngo thaa kolo hmekuje kö a edromëne hnene la tusi Iobu, la itre jol hna cile kow hnene lai trahmanyi cili; ame la hnene ej hna pane ithanatan, tre, ene la itre ewekë ka ketr la nöjei atr me nöjei angela mina fe. Kola xatua së hnene la tusi cili troa trotrohnine la emekötine la musi cile i Iehova; nge eje mina fe a amamane laka, mele ka pë ethan ne la itre hlue i Akötresieti asë e celë fen me mejiune i angatr troa mele palua, la hna isenyin ekö e Edena. Ngacama thaa trotrohnine kö Iobu la jole celë, ngo thaa hnei angeice kö hna hane nue lo köni sinee i angeic troa uku angeice troa angazone la mele i angeic ka pë ethan. (Iobu 27:5) Loi e tro la ewekë celë a acatrene hnyawa la lapaune së me xatua së troa atrehmekune laka, ijije tro sa catre troa pë ethane pala hi la mele së, me hane sajuëne la musi cile i Iehova.

⁹ Thupene la hna ithanata koi Iobu hnene lo köni sinee i angeic, “hnei Elihu nekö i Barakela ate Buza, hna sa.” Nemene la ka uku angeic troa ithanata? Öni angeic, ka hape: “Tiqa ha ni hnei ite tenge ewekë. Nge hna musinë ni hnene la [ua] e kuhu hning.” (Iobu 32:5, 6, 18) Ngacama hna eatre la itre trenge ewekë i Elihu ngöne lo ijine Iehova a aloine la meci Iobu, ngo ka nyipi ewekë mina fe la itre trenge ithanata i angeic kowe la itre xan. Itre ej a nyi trepene hnyawa la mejiune ne la itre ka catre troa pë ethan la mel.

10. Nemene la ka amamane ka hape, ame la maca hnei Iehova hna hamëne kowe la ketre atr, tre, kolo mina fe a ketr la nöjei atr asë?

¹⁰ Ame itre xaa ijin, Iehova a hamëne la ketre maca kowe la ketre atr, ngo ka ketr mina fe la nöjei atr asë. Kola mama hnyawa lai ngöne la hna perofetane hnei Daniela, ngöne lo nyidrëti a qeje pengöne la pu i Nebukaneza Joxu ne Babulona; eje hi, hnei nyidrëti hna puje la kola sa la ketre sinöe ka draië. (Dan. 4:10-27) Ngacama hna eatre la pu cili hui Nebukaneza, ngo hetre ewekë ka tru catre kö hnene lai pu cili hna amaman. Ej a amamane laka, tro ha mama la aqane musi Akötresie hune la fene hnengödrai, jëne la ketre baselaia ka troa xulu qaathei Davita Joxu, thupene la 2 520 lao macatre; nge troa nyiqaane lai ngöne lo macatre 607 M.P.K.a Hna nyiqaane mama la musi Akötresie ngöne lo macatre 1914, ngöne lo kola acili Iesu Keriso troa Joxu e koho hnengödrai. Pane mekune ju së elany la aqane tro la musi ne la Baselaia a eatrëne la itre hna mejiune kow hnene la nöjei atr ka idrei!

“Nue Nyëne Jë Mate Tha Uti Kö Kow’ e Kuhu Hnaop!”

11. Nemene la hna amamane hnene la itre trenge ewekë i Elihu, göi Akötresie?

¹¹ Ame la Elihu a sa koi Iobu, tre, hnei angeice hna qaja la ketre “maca, ate amamai pengön, lo ka sisitia hune la ala thausan.” Nemene la thangane la hna “thithi koi Akötesie” hnene la atre tro fë maca cili? Öni Elihu, ka hape: “Nge tro [Akötresie] a hnimi angeic, me hape, ‘Nue nyëne jë mate tha uti kö kow’ e kuhu hnaop; ke öhnë hë ni la thupene mel! Tro ha pepeija la ngönetei angeice hune la nekönat; tro hmaca angeic’ a thupëtesij.’ ” (Iobu 33:23-26) Kola mama hnyawa ngöne la itre trenge ewekë celë la aja i Akötresie troa kapa la ketre “thupene mel” kowe la itre atr ka ietra.—Iobu 33:24.

12. Nemene mejiun la hna hamëne hnene la itre trenge ewekë i Elihu kowe la nöjei atr asë?

¹² Ceitui Elihu me Daniela perofeta, ke, thaa hnei angeice kö hna trotrohnine asë la nyipi aliene la thupene mel. (Dan. 12:8; 1 Pet. 1:10-12) Ngo ame pe, kola amamane hnene la itre trenge ewekë i Elihu, laka, tro Akötresieti elany a kapa la ketre thupene mel, ka troa nue amacane la atr qa ngöne la itre ethan la ngazo, ene la troa qatre trootro me mec. Ketre, itre eje mina fe a hamëne la ketre mejiune ka lolo, ene la mele ka thaa ase palua kö. Nge kola amamane fe hnene la tusi Iobu, laka, tro ha hetre mele hmaca.—Iobu 14:14, 15.

13. Nemene atrehmekune la hna kapa hnene la itre Keresiano qa ngöne la itre trenge ewekë i Elihu?

¹³ Ame enehila, tre, ka nyipi ewekë catre pala hi la itre trenge ewekë i Elihu kowe la itre milio lao Keresiano ka mejiune troa mel thupene la hna lepe apaatrene la fene ka ngazo celë. Ame la itre qatre ka mele pë hë, tre, tro hmaca hë angatr a thupëtresij. (Hna ama. 7:9, 10, 14-17) Ketre, ame la mejiune troa öhne hmaca la itre hna troa amelene qa hna mec, tre, eje pala hi a thue madrin kowe la itre atr ka mele nyipici. Ngo nyipici laka, tro ha mele palua e koho hnengödrai hnene la itre Keresiano hna iën, me hetrenyi la mele ka thaa ase palua kö e celë fen hnene la “ite xa mamoe” i Iesu, e hnei angatre hna lapaune kowe la thupene mele hna hamëne hnei Keriso.—Ioane 10:16; Rom. 6:23.

Tro Ha Cengöne Apaatrene La Meci Qa Celë Fen

14. Nemene la ka amamane laka, hetre ketre ewekë kö ka nyipi ewekë catr hune la Wathebo i Mose, matre ijije kowe la angetre Isaraela troa hetrenyi la mele ka thaa ase palua kö?

¹⁴ Thupene la hna isisinyikeu hnei Akötresie memine la matra i Aberahama, ketre nöje fe hë angatr. Ame lo kola hamë angatr la Wathebo, tre, hnei Iehova hna qaja, ka hape: “Tro nyipunie a thupëne la ite wathebong, memine la ite hnenge hna amekötin, ke ame la ate kuca it ’ej, tro angeic a mel hnen’ it ej.” (Lev. 18:5) Ngacama thaa ijiji angatre kö troa mele thenge la itre trepene meköti ka pexej ne la Wathebo, ngo ame pe, tre, hna ahnëjinë angatr hnene la Wathebo, nge nyipi ewekë troa nue amacanyi angatr qa ngöne la hnëjine cili.—Gal. 3:13.

15. Nemene manathithi lo hna upi Davita troa cinyihan, nge hna troa kapa elany?

¹⁵ Thupei Mose, hnei Iehova hna upe la itre xaa atr ka cinyihane la Tusi Hmitrötr, troa qaja la mejiune ke eje thei angatr, ene la troa mele epine palua. (Sal. 21:4; 37:29) Drei la ketre ceitun, hnei Davita hna nyipune la ketre salamo ka qaja la caasi ne la itre nyipi hlue i Akötresie e Ziona hnene la itre trenge ewekë celë, kola hape: “Hnei Iehova hna ahnith’ e cili la manathith, ene la mele epine palua.”—Sal. 133:3.

16. Nemene la hnei Iehova hna thingehnaean jëne Isaia, göne la mel elany ngöne “la fene hnengödrai asë”?

¹⁶ Hnei Iehova hna upi Isaia jëne la Uati Hmitrötr troa perofetane laka, hetre mele ka thaa ase palua kö e celë fen epin. (E jë la Isaia 25:7, 8.) Ceitun la ngazo me mec memine la ketre “nyine hakuth” maine ketre isiitre pena, laka, itre ej a nyihacene catrëne la mele ne la nöjei atr asë. Ngo Iehova a akeukawane la hni ne la itre hlue i Nyidrë, laka, tro ha cengöne apaatrene la ngazo me mec “qa la fene hnengodrai asë.”

17. Nemene hnëqa ne la Mesia, lo hna perofetane ekö, la ka troa fe gojeny kowe la mele ka thaa ase palua kö?

¹⁷ Ketre, tro mina fe sa ce wange la aqane troa hnëkëne la gootre i Azazele, thenge la hna amekötine hnene la Wathebo i Mose. Acaasi a kuca la ewekë celë ngöne la macatre, ngöne la Drai ne Nyi thupene Mel: tro la atre huuje ka sisitria a ‘atë la lue iwanakoime i angeice hune la he ne la gote ka mel, me qaja amamane hun’ eje la ite ngazo asë ne la ite nekö i Isaraela, memine la hnei angate hna shashaith, me ite menu i angat’ asë, nge tro angeic’ a atë it’ eje hune he ne la got, nge tro la got’ a ajöne la ite ngazo i angat’ asë kowe la nöje ga pa at.’ (Lev. 16:7-10, 21, 22) Hnei Isaia hna thingehnaeane la traqa ne la Mesia, ene lo ka troa xome la ketre hnëqa ka tune lai, me ajöne la “ite hleuhleu,” me “ite aköte,” memine “la ngazo ne la ka ala nyim;” ene pe, fe gojenyi ju hi kowe la mele ka thaa ase palua kö.—E jë la Isaia 53:4-6, 12.

18, 19. Nemene mejiune la ka mama hnyawa ngöne Isaia 26:19 me Daniela 12:13?

¹⁸ Hnei Iehova hna ulatine kowe la nöje Isaraela, jëne Isaia, ka hape: “Tro ha mele hmaca la ite ka meci cilie, tro ha mejë hmaca la ite meci angat; hlëjë, nge nyimajë nyipunie itete lapa ngöne la xaxau, ke tune la lepanyi hune la sinöe ka lapalapa la lepanyi ’ö, nge tro la hnadro a traqane la ite wezipo.” (Is. 26:19) Kola mama hnyawa ngöne la itre Hna Cinyihane qene Heberu, la mejiun ne la mele hmaca memine la mele e celë fen. Drei la ketre ceitun, ame lo kola caa hadredr lao macatre i Daniela, hnei Iehova hna akeukawane la hni nyidrë, me hape: “Tro eö a mano, me cile ngöne la edö i ’ö e tixenuë hë la ite drai.”—Dan. 12:13.

¹⁹ Pine laka Maretha a mejiune kowe la mele hmaca, ene pe öni nyiidro koi Iesu göne la trejine me nyiidro ka mec, ka hape: “Ate hë ni laka tro angeic’ a mele hmaca ngöne la ijine mele hmaca, ngöne la drai hnapin.” (Ioane 11:24) Hapeu saze ju kö la mejiune cili hnene la itre ini hna hamëne hnei Iesu memine la itre hna cinyihane hnene la itretre dreng? Hapeu, ka cile huti kö la mejiune hnei Iehova hna hamëne kowe la nöjei atr asë, ene la tro angatr a mele epine palua e celë fen? Tro pë hë së a sa la itre hnyinge celë ngöne la hna cinyihane ka troa xulu.

[Ithueamacany]

Ijije Kö Tro Epuni a Qeje Pengön?

• Hnei nemene mejiune matre kola “apone la [atr] hna xupe kowe la ka tha nyipi ewekë”?

• Nemene la ka amamane laka, ka lapaune Aberahama kowe la mele hmaca?

• Nemene mejiune la hnei Elihu hna qaja koi Iobu, nge hna hamëne mina fe kowe la nöjei atr asë?

• Kola amamane tune kaa hnene la itre Hna Cinyihan qene Heberu, laka hetre mejiun kowe la mele hmaca memine la mele ka thaa ase palua kö e celë fen?