Loi e Troa Hamëne Trongëne La Itre Zonale e Nöjei Ijin
1 Hetre kepine matre easë a kapa madrine La Tour de Garde, me Réveillez-vous! Hetre ketre zonale kö hnei epuni hna hane atre hna e ngöne la fene hnengödrai asë? Ame ngöne la treu celë, ke, kola troa trofë trongëne la itre zonale ngöne la hna cainöje trootro, nge ejehi laka, drei lai ithuemacanyi ka catrehnine ngöne la itre naba ne Okotropa! Hne së hna majemine hamëne la itre zonale së ngöne la easë a cainöje trootro ngöne itre hnalapa; ngo loi e tro fe së a hane hnëkë hnyawa matre tro së a hane hamën’itr’eje ngöne la nöjei ijine ka ijij.
2 E epuni a hamëne “La Tour de Garde” ne 1 Okotropa, nge epuni a ajane troa ahlëne la aja kowe la hna cinyihane ka hape “Ketre Fene Hnengödrai Gaa Pëkö Isi—Eu?” Qaja ju ka hape:
“Alanyimu la itre atr ka isa thele la kepine matre thatreine kö troa traqa kowe la fene hnengödrai ka pëkö isi, ngacama tru la itre trenge catre hna kuca hnene la atr thatraqane lai. Hapeue la hnei epuni hna mekune göne la itre mekune hna qaja ngöne la götrane 5 ne La Tour de Garde ne 1 okotropa? [E jë la pane xötre hnaewekë ngöne la lue pane paragarafe fene la hna cinyihane hna hape “Hmi—Ketre Ewekë Ka Thungejëne La Tingeting,” nge nue pi troa sa.] Ngo ejehi laka, tha tro jë kö la isi a jilapa palua. Pane mekune ju la hna thingehnaeane hnei Akötresie e celë ngöne Isaia 9:6, 7.” Epuni pë hë a e jë lai xötre ngöne la Tusi Hmitrötre i epun, maine pena lai kötre hna fejane hnine la hna cinyihane ngöne La Tour de Garde. Qejepengöne ju ka hape, ame La Tour de Garde, ke, ej’a cilëgöliine la Baselaia i Iehova, pine laka eje hmekujehi la mejiune kowe la ketre fene hnengödrai ka tingeting, nge thele jë la ajane thei angeice troa abone.
3 Ngöne la kola trofë la “Réveillez-vous!” ne 22 okotropa, ke, qaja ju ka hape:
“Hapeue la hnei nyipëti hna mekune göne la hnyinge hna fejane hune la icetröne ne la zonale celë: ‘Pine nemene matre ka xoxopatrehi la mel?’ [Nue pi troa sa.] Ame la itre hna cinyihane celë hna troa qejepengöne ngöne la itre xaa zonal, ke, kola amamane hnyawaane koi së la hna qaja hnene la itre siatifik enehila, me itre xane ju kö, göne la itre xötre macatre, nge thupene lai, kola amamane la hna thingehnaeane hnene la Atre Xupi së, ene la troa mele ka tha ase palua kö. Eni a ajane troa hane hamë nyipëti pe la zonale celë.” Nge, hane ju fe hnyingëne ka hape ajane kö troa hane abone.
4 E epuni a öhne la itre ka hmi, hnauëne laka tha amamane kö la ketre hna cinyihane qa hnine la “La Tour de Garde” ne 15 Okotropa? Tro la aqane trofë celë a nyijëne lai atr troa kapa:
“Eni a ajane troa atre la mekune i epuni ngöne la hnyinge celë: Ijije kö troa hnimi Akötresie, nge tro fe a xoue Nyidrë?” Nue pi troa sa, nge thupene lai, e jë lai mekune ngöne la iatr ne la hna cinyihane ka hape “Pine nemene matre troa xouene la nyipi Akötresie enehila?” (Ate Cai. 12:13) Qaja jë la ceitune ngöne la götrane 199 ne la itus Comment raisonner, nge hamëne ju la zonal, me hnyingëne ka hape ajane kö angeice troa hane abone.
5 E kola cainöje trootro ngöne itre hnalapa, ke, the tro kö a sasaithe la itre magazë, ngo loi e troa cile troa hane kuca itr’ej. Ame la itre ka kuca lapaane la itre magazë, ke, angatr’a qaja aloine la huliwa cili, kösë ketre huliwa ka ithue madrin, nge ka hetre thangane catr. Ijije tro epuni a tupathe la ketre aqane trofë ka tha jole kö, tune la troa trofë la “Réveillez-vous!” ne 8 okotropa:
“Atre hnyawa hi së laka ame la itre atr ka thele mani, ke, angatr’a ajane troa kapa la itre zonale ka qaja la itre ewekë ka traqa enehila, nge ka ketr la nöje i angatr. Ka xecie koi ni laka, tro la itre hna cinyihane celë a ketri epun.” Thupene lai, qaja ju la ketre mekune qa hnine la hna cinyihane ka hape “Keme hmekujehi, maine thine ngöne la fami—Troa mele ka loi tuneka?”
6 E ka hetre jolene lai atr hnei epuni hna ithahnata memin, ke, amamane ju la itre zonal, nge qaja ju ka hape:
“Atre hi ni laka tru la jole i nyipë enehila, hawe, tha tro kö ni a aqean. Eni a ajane troa hamë nyipëti la ketre ewekë nyine e ka nyipiewekë catr.” Amamane hnyawaane ju la ketre hna cinyihane hnei epuni hna iën, nge hamëne pi lai itre zonal.
7 Loi e troa fejane hnyawaane la itre mekune hna ithahnatane hë, me bëeke hmaca troa wange la itre atr ka kapa la itre zonal. E hna kapa hmekujehi la itre zonale hnene la atr, ke, ame la kola iwaihmaca, hnyingëne ju ka hape ajane fe kö angeice troa hane abone; maine ngöne caasi maine ngöne asë hi la lue zonal. Loi e tro së a hnëkë hnyawa, me xölehuje la nöjei ijine troa hamëne la itre zonale së.