Easë Kö a Lapa Hmek—Ene La Troa Neëne La Itre Iajolë?
1 Hnei Iesu hna ithuemacanyi ka hape: “Hmekëneju nyipunie, . . . mate ateine nyipunie troa kötene” la nöjei iajolë hnei epuni hna atre ka troa traqa. (Luka 21:36) Easë a melëne la ketre ijine ka ngazo catre kö hune la itre xaa hnedrai ngöne la mele ne la atr. Troa traqa la drai ngazo kowe la itre atr ka kucakuca ngöne la ua. Ketre ewekë lai nyine tro së a hmekën, easë isa alacas. Hnei Iesu hna qaja göne la xen, me ij, memine la itre hna kukehnine e nöjei drai ne la mel. Pine nemene matre Iesu a qaja la itre ewekë celë? Pine laka, tro la itre ewekë celë a xome la itre traeme së, nge tro itr’ej’a ajolë së, me huli së kowe la kucakuca ngöne la ua.
2 Itre Iajolë Hna Majemine Melëne e Celë Fen: Alanyimu la itre atr ka wangatrune palaha la itre nyine madrine, nge thatreine hë angatre nue la televizio. Ejehi laka, ame la troa pane thele la Baselaia, ke, tha kolo kö lai a hape troa neëne la nöjei pengöne nyine madrin. Maine tro së a inamacane me tuluthe la aqane tro së a melëne la itre nyine madrin, ke, tro së a öhnyi loi qa ngön. (wange ju fe la 1 Timoteo 4:8.) Ngo, ejehi laka, e tru hë la götrane cili ngöne la mele së, ke, tha nyine madrine hmacakö me nyine loi koi së, ngo nyine iajolë pëhë, pine laka kola troa xome la itre traeme së, me itre ewekë së, memine fe la itre ijine hne së hna hnëkëne troa cainöjëne la Baselaia.
3 Ame la ketre iajolë ka ihuli catre enehila matre kola kucakuca la itre xane ngöne la ua, ke, ene la aja mo ka tha nyipiewekë kö. Ej’a ukune la atr troa catre huliwa koi maseta, matre canga saqe ju hi paatre la itre aja ne la ua. Hnei itre xane hna aluzine la itre aja i angatre ngöne la ua hnene laka tru hë la hna thele mo matre mele ka loi. Ejehi laka, nyipiewekë koi së la “xeni me ixete,” ngo loi e tro palahi së a hmek, wanga kökötre pi the së la aja mani, nge nanyi pi së qangöne la lapaun. (1 Tim. 6:8-10) E maine tha hmeke kö së, nge tha wangatrune kö së la itre huliwa ne Baselaia, ke, tro së a genyi troa hamëne la xeni ne la ua kowe la fami së, nge tro hë së a nanazije troa aeatrëne la huliwa ne cainöje trootro.—1 Tim. 5:8; 2 Tim. 4:5.
4 Ame itre xan, ke, ‘angatr’a ahacene la itre hni angatre hnene laka angatr’a kuke hnine kowe la mel, utihë la angatr’a meköle ngöne la ua. (Luka 21:34) Ame enehila, ke, tha loi kö la mele ne la atr, hnene laka, nyimutre la itre mec, maine itre aqane mele ne la fami a tha loi kö. Ngo, tha tro pi kö së a nue la itre jole ka traqa koi së troa ameijë së ngöne la ewekë hne së hna atre, ene laka, easenyi catre hë matre nyipune pi hë la fene celë kola troa traqa nyimenyime.—Mareko 13:33.
5 Pëkö xaa madrine ka tru i Satana hune la tro angeic’a atreine thele troa amë e kuhu hni së la ketre pu ne jidr, ene la troa melëne la itre elolone me aja ne fen. Loi e tro së a ketre isi memine la sipu aja ne la ngönetrei së matre hmeke ngöne la ua. Atre hnyawa hi së laka ‘tro ha traqa la drai ne la Joxu tune la ate kë nö,’ nge sisitria catre koi së troa “hmekëne me inamacan.” (1 Thes. 5:2, 6) E maine easë a öhne la itre hatrene ne la kucakuca the së, ke, nyipiewekë catre tro së a “nue tije la huliwa ne jid.”—Rom. 13:11-13.
6 Itre Jëne Ixatua Nyine Tro Palahi a Hmek: Nemene la itre jëne cili? Thithi la ka sisitria. Loi e tro së a thithi lapa. (1 Thes. 5:17) E tro së a itrohnyi lapa memine la ekalesia ne la itre keresiano, ke, troa ‘aciane the së la ihnimi me ite huliwa ka loi.’ (Heb. 10:24) Maine hne së hna waipengö së palahi ngöne la meköt, ke, tro lai a xatua së troa canga hmekëne la itre hnepe jole the së, nge matre tro fe së a atreine cile kowe la kucakuca. (2 Kor. 13:5) E hne së hna majemine isa ini Tusi Hmitrötr, ke, tro lai a thupë së, me “hia së ngöne la nöjei wesi ula ne la lapaun.” (1 Tim. 4:6) E maine easë a catre trongëne lai, ke, nyipici laka, atreine tro së a neëne la itre jol, nge ijije tro fe së a ‘hmek, me cile huti ngöne la lapaun.’—1 Kor. 16:13.