Loi e Tro Së a Atrepengöne Hnyawa La Itre Trejine Me Easë
1 Kola qaja hnei Tusi Hmitrötre ka hape, ame la nyipi enehmu, ke ceitune memine la atre ihnimi kola fedre catre hune la trejin; angeice pala hi a mele nyipici me amamane hnyawa la ihnimi angeic, nge kola xatuane la sinatronge i angeice ngöne la itre ijine akötr. (Ite edomë 17:17; 18:24) Maine tro së a catre thele troa hane atre hnyawa la itre xaa atrene la ekalesia me amamane la ihnimi së koi angatr, haawe, thaa tro kö a jole koi së troa hane öhnyi enehmu së e cili.—Ioane 13:35.
2 Nyimutre la itre ijine ka lolo ka aijijë së troa porotrike me atrepengöne hnyawa la itre trejine me easë, ene e qëmekene me thupene la itre icasikeu. Hnauëne laka, thaa canga traqa kö epuni me lapa aqeanyi thupene la itre icasikeu, matre troa hane ce madrine me ce porotrike memine la itre ka ce icasikeu me epun? Tro jë nge porotrike jë memine la nöjei trejine asë, itre qatr me itre ka hekö hë melëne la nyipici, me itre ka co, maine itre ka lapa thaup.
3 Nyiqaane Jë Troa Porotrik: Thaa tro hmekuje kö a ibozu memine la itre trejin. Ngo loi e troa thele troa hane pane porotrikëne koi angatre lo itre aqane cainöje së kowe la itre xaa atr, me qaja la ketre mekune ka lolo hne së hna e hnine la ketre zonale hna xötrei kapa, maine tro pena a ithahnatane la ketre mekune hna hamëne hnine la icasikeu. Atreine hi tro epuni a atrepengöne hnyawa la itre trejine me epun, e hnei epuni hna hane drenge hnyawa la itre hnei angatre hna qaja, me ithuecatre koi angatre troa hane porotrikëne la itre hnei angatre hna melën, memine la itre ewekë hnei angatre hna inin. Maine jë tro hi a hane hnyingëne la qaane matre hane jë angatre atre Iehova. Hetrenyi la itre trejine ka cile huti ngöne la lapaun, ngacama tru la itre itupathi ka traqa koi angatr, ame itre xane ke, angatre a xomihnine ahoeane enehila la itre akötre ka tru, hna thatreine kö troa mekune hnene la ka ala nyim, pine laka, itre iaxösisi ka tru catre pala ha. Tro la itre ewekë cili a upi së itre nyipi enehmu, troa hane akötrehnine me hane hnehengazone la itre hna ajane hnene la itre xan.
4 Nyi Sinene Jë La Ketre: Thupene la hna meci hnene la neköi eahlo jajiny, kola öhne hnene la ketre trejine föe laka, jole catre hë koi eahlo troa hane thinge la itre nyima ne Baselaia ka qaja la melehmaca. Öni eahlo ka hape: “Ame ngöne la ketre ijin, kola öhnyi ni e treije hnene la ketre trejine föe ka lapa hutrö i eni. Ame hnei angeice hna utipi ni me ihehe me eni, me ce afenesine me eni la nyima. Atraqatre catre la ihniminge kowe la itre trejine trahmanyi me föe, nge eni a madrine laka, thaa sihngödre kö angatre ngöne la itre hna icasikeu; eni a trotrohnine hnyawa laka, e cili hi la hnë troa kapa la ixatua ka sisitria, ene lo uma ne Baselaia.” Maine easë a ajane troa nyi sinene la itre trejine me easë, loi e tro së a xatua angatre ngöne la itre ijine ngazo, me ithuecatre koi angatre o drai.—Heb. 10:24, 25.
5 Pine laka, kolo pala hi a ngazo catre trootro la fene enehila, haawe, loi e tro së a catre thele troa atre hnyawa la itre trejine me easë. Jëne manathithi koi së asë, la easë a ithuecatrekeu cememine la hni ka nyipici.—Rom. 1:11, 12.