Nyine Troa Qaja Kowe La Atre Iudra?

¹ Ame ngöne la hneijine i Iesu, nyimutre la “neköi Isaraela,” ka kapa hnyawa la cainöje i Iesu me itre aposetolo. (Ite Huliwa 10:36) Ketre tune mina fe, hetrenyi enehila la itretre Iudra ka hni ka menyik, angatre a hane kapa fe la nyipici​—thaa e Isaraela hmekuje kö, ngo ene mina fe e Russie me Etats-Unis, me ngöne la itre xaa nöj. Hapeu, aja i nyipunieti fe troa hane cainöje kowe la itretre Iudra? Hanawange cahu itre mekune nyine troa xatua nyipunie, troa atreine cainöje hnyawa kowe la itretre Iudra ka hmi maine ka thaa hmi pena.

² Loi e Troa Cainöje Kowe La Itretre Iudra Ka Hmi: Kola mama laka, eje thene la itretre Iudra ka hmi, la ajane troa xötrethenge la itre hna majemine kuca hnene la itre keme ne hmi i angatr, ngo thaa trongëne kö la itre ini ka meköt. Eje hi laka, hnei angatre pala hi hna xome la itre hna majemin, ceitune memine la Itre Hna Cinyihan. Qa ngöne lai, thaa eje kö thei angatre la ajane troa ce ithahnatane la itre mekune ka jui, hnine la Tusi Hmitrötr. Nge angatre a mekune ka hape, itusi thatraqai itre keresiano, la Tusi Hmitrötr. Celë hi matre, ame ngöne la kola qeje Tusi Hmitrötr, loi e tro së a xome la itre hnëewekë hna hape, “Itre Hna Cinyihane Qene Heberu,” “Tora,” maine “Itre Hna Cinyihan.” Hetrenyi la ketre itusi hna hnëkëne thatraqane la itretre Iudra, ene la boroshüre hna hape, Connaîtrons-nous un jour un monde sans guerre ?

³ Nemene la itre tane mekune hna ajane troa ithahnatane hnene la itretre Iudra ka hmi? Angatre a lapaune laka, caasi hi la Akötresie ka hetre ihnimine kowe la atr. Angatre mina fe a mejiune laka, tro Akötresieti a amekötine la itre atr. Loi e tro së a xome la itre mekune celë, matre nyi jë së troa porotrike me angatr. Ketre, ala nyimu la itretre Iudra ka mekune pala kö lo itre iakötrë hna kuca kowe la itre sine la madra i angatr, ngöne lo Hnaaluene Isi Ka Tru. Angatre a thele la kepine matre kola nue hnei Akötresieti la itre iangazo cili, me hnyingëne thele la ijine troa paatre la iakötrë. Atreine hi së troa sa thenge la itre hnyinge cili, maine troa qaja la itre ewekë hna melëne hnene la itre trejine me easë ngöne lo ijine ekö hna hape, Holocauste.

⁴ Eje hi laka, maine easë a ajane troa drei së hnene lai atr, thaa loi kö e tro së a canga nyiqaane ithahnatane me angeice la pengöi Iesu. Loi e tro pe a pane qaja la aqane xometrongëne Mose la nöje Isaraela, me hnyingë angeic, maine nyipi ewekë pala kö la itre ini hna hamëne hnei Mose kowe la hneijine së enehila. Nge e ijije hë troa qaja la Mesia, haawe, loi e troa pane e la Deuteronomi 18:15, ene lo hna qaja ka hape: “Tro Iehova Akötesi’ö a axulune thatraqai’ö la perofeta ka tunge qa thei’ö qa thene la ite tejine me eö; tro nyipunie a dei nyidë.” Hnyingëne jë ka hape, drei la hnei Mose hna mekune ngöne la nyidrëti a qaja la perofeta ka tui nyidrë. Thupene lai, xome jë la itre xaa hnepe mekune qa hnine la boroshüre Un monde sans guerre, götrane 14, paragarafe 17 me 18.

⁵ Isapengöne Kö La Aqane Waiewekë Ne La Itretre Iudra Ka Thaa Hmi Kö: Thaa Hna kapa kö hnene la itretre Iudra asë la itre ini ne la hmi Judaisme. Kola mama lai ngöne la aqane waiewekë i angatr, laka, thaa hnei angatre kö hna xome la hmi cili. Angatre pe kö a thele troa amamane hnyawa la pengöne la atre Iudra, memine la itre aqane mele i angeic, me qene nöje i angeic, me ini hna kapa, ngo thaa ene kö la troa xötrethenge la hmi, laka hape lai hmi i angeic, ene la Judaisme. Ka pë mejiune itre xan​—nge hetrenyi la itre ka thaa lapaune pi kö koi Akötresie. Ame ngöne la kola xötrei ithahnata, hetre thangane ka loi kö, e hna ithahnatane atrune la Itre Hna Cinyihane qene heberu. Nge troa sisitria catre kö la porotrike së memine la ketre atr ka thaa hmi kö. Maine jë ijije tro së a qeje pengöne la elolone la Tusi Hmitrötre kowe la hnedrai së enehila. Maine thaa ka lapaune kö la atr ka hape, qaathei Akötresieti la Tusi Hmitrötr, haawe, xome jë la itre xaa mekune nyine ixatua qa hnine la boroshüre Un monde sans guerre, ene lo itre hna hamëne ngöne la götrane 3, laka, ame la taan, ke hna hape, “ La Bible : inspirèe par Dieu ? ”

⁶ Maine kola cainöje kowe la atre Iudra, qaja jë ka hape:

◼ “Ala nyimu së itre ka hleuhleu ngöne la ijine kola meci la ketre e angatr, itre hne së hna hnim. Nemene la pengö së ngöne la easë a mec?” Nue pi troa sa. Tupene lai, amamane jë la itre mekune hna eköhagen, hnine la boroshüre Un monde sans guerre, götrane 22, kola hape, “ Que sont la mort et l’âme ? ” Kola troa amamane la hna qaja hnei Tusi Hmitrötre göi mele thupene la mec, me goeëne la hna inine hnene la itre hene hmi ne Iudra. Thupene lai, fe jë kowe la götrane 23, nge paragarafe 17 nge amamane jë laka, tune la hna qaja hnei Tusi Hmitrötr, tro ha mele hmaca la itre atr qa hna mec, me lapane la paradraiso e celë fen. Hamëne jë la boroshür. Ame ngöne la nyipunie a iwai hmaca, qaja ju ka hape, hetrenyi fe ekö thei Iobu la mejiune laka, troa mele hmaca la itre ka mec. Ce wange ju la itre xötre hna hamëne ngöne la pune la paragarafe 17, nge sipone jë troa bëeke matre troa ce ithahnatane hmaca itre ej.

⁷ Hna hane qaja fe ngöne la tusi Mataio, me Mareko, me Luka, me Ioane, me ngöne Itre Huliwa, la aqane mele ne la itretre Iudra ka drenge me trongëne la nyipici. Iehova pala kö a fe angangane la gojenyi ne tro kowe la mele ka thaa ase palua kö. Nyimutre pala kö la itretre Iudra ka ajane troa atrepengöi Iehova, lo nyipi Akötresie; jëne tro fe angatre lai, a hane mele epine palua ngöne la fene i Akötresie ka hnyipixe. —Mika 4:1-4.