Loi e Troa Hlemu La Ëje i Iehova e Cailo Fen
1 Ame ngöne lo Iesu a upe la itretre drei nyidrë troa cainöje “e cailo fen,” ase hë nyidrëti amamane la tulu nyine troa xötrethenge. (Ite Huliwa 1:8) Hnei nyidrëti pala hi hna qaja la aja i Akötresie kowe la itre atr, ngöne la nöjei götran, me nöjei ijine hnei nyidrëti hna öhnyi angatre ngön. Kola xötrethenge la tulu i nyidrë hnene la hlue ka nyipici, laka, angatre a thele la nöjei aqane troa cainöje matre “mama e cailo fene asë” la ëje i Iehova.—Is. 12:4, 5.
2 Drei La Itre Hna Kuca Ha Ekö: Ngöne la itre macatre ka ase hë, hna amamane la itre cainöje jëne la itre zonal; hna kuca fe la “Photo Drame de la Création” me amamane kowe la itre atr, itre milio la etrun; hna cainöje fe qa hune itre loto; nge tru catre mina fe la hna huliwane la itre phonographe; nge hetre hnepe ijine hna cainöje fe jëne radio—itre ewekë lai hna xome matre troa cainöjëne la maca ka loi. Ngo eje hi laka, hna ithuecatre pala hi tro sa sipu tro troa wange la itre atr, me hamëne la itre ixatua hnei angatre hna ajan. Qa ngöne lai, kola mama hnyawa laka, ka lolo catre la cainöje ngöne itre hnalapa trootro, ke kola aijijëne la nöjei atr asë troa atre la ëje i Iehova.—Ite Huliwa 5:42.
3 Nemene La Hna Kuca Ngöne La Hnedrai Së: Kola saze la itre hnedrai, nge kola tru catre hnei jole ne la itre atr, matre pëkö atrene la itre uma. Xalaithe hi la itre ka thele ijine troa e me mekune la itre ewekë ngöne la götrane la ua. Celë hi matre, loi e tro së a thele la aqane troa cainöje koi angatr. Maine easë pala hi a cainöje ngöne itre hnalapa trootro, kolo mina fe a ithuecatre koi së troa tro kowe la itre götrane hna tro kow hnene la itre atr, me “hnëkëne pala hi” troa qaja amamane la lapaune së. (1 Pet. 3:15) Kolo lai a hape, loi e tro së a cainöje kowe la itre sine ce huliwa me easë, me sine ini së, me itre hna iöhnyi memine ngöne la itre gojeny, me itre park, maine ngöne hna acili loto, maine hnine itre magazë, me ngöne la nöjei hne së hna tro. Jëne la ixatua qaathei Iehova, troa hetre thangane ka loi la huliwa së. Hane kö së thele troa cainöje kowe la itre atr ngöne la itre götran, easë a öhnyi angatre ngön?
4 Loi e thaa tro pi kö së a nue la ketre ijine ka ijije troa ithahnata memine la itre atr ne la teritoare së, matre tro angatre a hane atre la ëje i Iehova. Troa atraqatre la madrine së ngöne la easë a eatrëne hnyawa la huliwa së, ngöne laka, easë a mejiune koi Iehova troa ea la itre atr ka hni ka menyik, kowe la organizasio i Nyidrë.—Ioane 6:44.