Kuca Jë La Loi Me Ce Thawa Memine La Itre Xan
1 Ame Doreka, tre “tiqa [nyiidro] hnene la nöjei huliwa ka loi me ihnim.” (Ite hu. 9:36, 39) Hnene la aqane hame i nyiidro, kola nyipi ewekë nyiidro me hnimi nyidro hnene la itre atr ka atre nyiidro, nge kola kepe eahlo mina fe hnei Iehova Akötresie. Kola qaja ngöne Heberu 13:16 ka hape: “The thëthëhmine kö nyipunie troa kuca la loi me ihnim; ke celë hi ite huje nyine amadi Akötesie.” Tune kaa la aqane tro sa kuca la loi, me ce thawa memine la itre xan enehila?
2 Ame la ketre aqane tro sa kuca matre troa hane kepe thangane ka loi hnene la itre xan, tre, ene la troa ce thawa la “ite nyi” së. (Ite edomë 3:9) Jëne la itre ahnahna hne së hna hamën thatraqane la huliwa e cailo fen, ijije hë troa xupe e cailo fen la itre Uma Ne Baselaia, me itre Uma Ne Asabele, me itre Bethela. Jëne la aqane hame së, kola aijijën la itre atr, itre milio la etrun troa kepe thangane ka loi qa ngöne la ini qaathei Akötresie, me eköthe la mele ne la itre trejin ngöne la götrane la ua.
3 Loi e Troa Akeukawan Me Amanone La Itre Xan: Ame ngöne la kola traqa la ketre ngazo ka tru ngöne la ketre nöj, canga nyinyape hi hnene la Itretre Anyipici Iehova troa “kuca la loi” kowe la itre trejine me angatr, me kowe mina fe la itre atr ka thaa ce hmi kö me angatr. (Gal. 6:10) Ame ngöne lo thupene hna pane angazone lo ketre hnë kuci produit e Faras, hna qaja hnene lue trefën ka mele easenyine lai, ka hape: “Hna traqa nyimenyime la itre trejine Keresiano troa ixatua nyihnyawane la itre xaa hnahag ne la iuma hne huni hna mele ngön. Hna sesëkötre la itre atr ka lapa easenyi hun, qa ngöne laka nyimutre catre la itre ka traqa troa ixatua.” Hna qaja fe hnene la ketre trejine föe ka hape: “Hna traqa itronyi mina fe hnene la itre qatre thup matre troa xatua hun. Hnei angatr hna ithuecatre koi hun. Eje hi laka, ka nyipi ewekë catre koi huni la ithuecatre cili, hune la ixatua göi ewekë ne ngönetrei.”
4 Maine nyimutre la itre aqane tro sa kuca la loi kowe la itre atr ka lapa easenyi së, ngo ame la ka sisitria catr, tre ene la tro sa xatua angatr troa hane kapa la atrehmekun ne la nyipici, tune la “mejiune kowe la mele ka tha ase palua kö” hna sipu thingehnaean hnei Iehova. (Tito 1:1, 2) Kola hamë keukawa hnene la maca ne la Tusi Hmitrötr kowe la itre ka treij pine la itre ewekë ka ngazo ka traqa ngöne la fen enehila, nge pine mina fe la ngazo ka eje thei angatr. (Mat. 5:4) Epi tro pala hi së a kuca la loi me ce thawa memine la itre xan la itre hne së hna hetreny, maine ijije koi së troa kuca lai.—Ite edomë 3:27.