Ka Hetre Thangane La Troa Cainöj Jëne Telefon
1. Pine nemen matre nyipi ewekë tro sa wanga atrune la huliwa ne cainöj jëne telefon?
1 Pine nemen matre nyipi ewekë tro sa wanga atrune la huliwa ne cainöj jëne telefon? Pine laka ketre jëne tro së lai a xatuane la itre xaa atr troa kapa la nyipi atrehmekune ka troa amele angatr. (2 Pet. 3:9) Ngacama ame la pane huliwa hne së hna xome matre troa cainöjëne la maca loi ne la Baselaia i Akötresie, tre, ene la troa cainöje ngöne itre hnalapa trootro, ngo tro hë sa ketr la itre atr ka paatre ngöne la itre hnalapa i angatr hnene la hna xome la itre xaa aqane troa cainöj.—Mat. 24:14; Luka 10:1-7; Hna ama. 14:6.
2. Hna eköthe tune kaa la huliwa ne troa cainöj jëne telefon?
2 Aqane Eköthe La Huliwa Cili: Pine laka hetre hna amekötin thatraqane la huliwa ne cainöj ngöne itre hnalapa trootro, ketre hetrenyi mina fe la itre hna hnëkën kowe la itre trejin ka troa cainöj jëne telefon. Ijije troa xome la huliwa cili hnene la ala caas, maine hnene pena la luetre maine köni trejin. Loi e troa hnen la telefon ngöne la ketre göhnë ka xeut, nge pëkö ewekë ka troa ajolë së troa ithanata me cainöj. Nyimutre la itre ka kepe thangane la hna amë hune la laulau, qëmeke i angatr la itre hna cinyihan hnei angatr hna troa tro fë ngöne la kola cainöj ngöne itre hnalapa trootro.
3. Nemene la hne së hna troa hneheen ngöne la easa cainöj jëne telefon?
3 Aqane Troa Cainöj Jëne Telefon: Ame la easa nyiqaane ithanata jëne telefon, loi e troa ceitune memine la easa porotrik. Ijije hi troa e hnene la itre ka xötrei xome la huliwa cili, la ketre aqane troa nyiqaane ithanata hna cinyihane hë, ngo loi e troa ceitune me easa porotrik. Ijije troa xatua së hnene la itre mekune ka nyiqaane la itus Comment raisonner, me ngöne la Huliwa Ne Baselaia, me ngöne la tarak Ajane Kö Nyipunie Troa Atre La Nyipici? Ame ngöne la easa eköthe la aqane tro sa nyiqaane ithanata, loi e tro sa iëne la ketre taan mekun memine la ketre hnying, me canga hnëkë troa xome la Tusi Hmitrötr matre troa sa la hnyinge cili. Hamëne jë la itre itus hna hamën ngöne itre hnalapa trootro. Loi e tro sa wanga atrune la itre nyine iamekunë celë: The xou kö nge ithanata hmidra ju. Loi e troa thiina ka loi me xomihni ahoean me thiina ka menyik, ke, canga tro hi a atrehmekune lai hnene la atr hne së hna telefone kow. Drenge hnyawa ju la kola qeje mekun hnene la atr, nge thupene lai, olene jë koi nyidrë la itre mekune i nyidrë. The qaja kö la itre hna amekötin göne la itre ahnahna, ke, mekuhni menu jë angatr, ka hape, kola hë göi thele mani.
4. Tune kaa la aqane tro la huliwa ne cainöj jëne telefon a xatua së troa kuca asë la teritoare së?
4 Maine jë ame la itre atr hne së hna porotrike memin ngöne telefon, tre, kolo itre atr hne së hna thatreine troa cainöje kow ngöne la hna cainöj ngöne itre hnalapa trootro; maine jë kolo itre ka wezipo maine sinatr pena, maine ka cile kowe la nyimu jol. Hetrenyi mina fe la itre xan ka lapa ngöne la itre götrane hna hagën, maine pena ngöne la itre batima hna thupën. Qa ngöne lai, loi e tro sa catre troa xome hnyawa la huliwa ne cainöj jëne telefon, matre tro sa eatrëne hnyawa la huliwa ne cainöje së.