Köni Drai Ka Troa Akeukawane La Hni Së Ngöne La Götrane La Ua
1. Nemene la hne së hna troa kapa qa ngöne la kovasio ne distrik ne la macatre celë?
1 Ame ngöne la fene i Satana celë gaa qaqacil ngöne la götrane la ua, tre, Iehova pala hi a ithuane me akeukawane la hni ne la itre hlue i Nyidrë. (Is. 58:11) Ame la ketre hna amekötine hnei Iehova hna xome matre troa hamë trenge catre së, tre, ene la kovasio ne distrik hna kuca ngöne la nöjei macatre. Hnene laka calemi hë la kovasio ne la macatre celë, haawe, tune kaa la aqane tro sa hnëkë troa kapa me hane thawa fe la göxeni ne la ua ka troa akeukawane la itre hni së?—Ite edomë 21:5.
2. Nemene la itre ewekë nyine tro sa hnëkë amë?
2 Maine thaa hnei epuni pala kö hna hnëkë, haawe, enehila hi la ijine tro epuni a wange ngöne la sipu porogarame i epun me ngöne la hna huliwa i maseta, laka, ijiji epuni troa hane sine la köni drai asë ne la kovasio. Hapeu, hnei epuni kö hna e la hawa nyine troa xome qa ngöne la hnalapa i epun uti hë la hnë kovasio matre ijije tro epuni a canga traqa me thele göhnë qëmekene troa nyiqaane la porogaram? Eje hi laka, thaa ajane kö së troa triane la ketre igötranene la göxeni ne la ua hnei Iehova hna hnëkëne thatraqa së! (Is. 65:13, 14) Hapeu, hnei epuni kö hna canga wai hnalapa i epun me loto i epun, thatraqane la ijine kovasio?
3. Nemene la itre xaa mekune ka troa xatua së memine la hnepe lapa së troa kepe thangane hnyawa qa ngöne la porogaram?
3 Nemene la ka troa xatua epuni troa catre drenge hnyawa la porogarame ka pexej? Maine ijiji epun, loi e troa canga meköl e nöjei jidri ne kovasio. Catre jë troa drenge hnyawa la hna qaja hnene la atre cile fë cainöj. Xome jë la itre xötr ngöne la sipu Tusi Hmitrötre i epun. Xome jë la itre xaa hnepe mekun. Loi e troa ce lapa asë hnene la itre atrene la ketre fami, matre ijije hi kowe la itre keme me thine troa xatuane la itre la itre nekö i angatre troa hane drenge hnyawa. (Ite edomë 29:15) Ame hë e hej, maine jë tro epuni a ce ithanatane memine la hnepe lapa i epun, la itre mekune ka tru ne la porogaram. Maine epuni a ajane troa keukawa pala hi la fami epun e thupene la kovasio, haawe, ijije hi tro epuni a xomi ijin ngöne la heji ne la Hmi Ne La Hnepe Lapa i epun, matre troa ce ithanatane la itre mekune ka sisitria nyine troa trongëne hnene la fami epun.
4. Tune kaa la aqane tro sa xatuane la itre xaa atrene la ekalesia së, troa hane öhnyi keukawa ngöne la götrane la ua?
4 Xatuane Jë La Itre Xaa Atr Troa Hane Öhnyi Keukawa Qa Ngöne La Itre Kovasio: Easë mina fe a ajane tro la itre kovasio së a hane akeukawane la mele ne la itre xaa atr ngöne la götrane la ua. Hapeu, hetrenyi kö la itretre cainöj ka qatre hë me itre xane kö, ka aja ixatua troa hane sine la kovasio? Ijije kö tro epuni a xatua angatr? (1 Ioane 3:17, 18) Loi e tro la itre qatre thup, ene lo itretre thupëne la itre gurup, a wange hnyawa, maine hetrenyi kö la itre trejin ka aja ixatua.
5. Tune kaa la aqane tro sa tro fë la itre pepa ne ihë ngöne la hna kovasio? (Wange ju la itre mekune hna eköhagen ngöne la götrane 4.)
5 Tune kö ekö, ame ngöne lo köni wiik qëmekene troa kovasio, easa troa tro fë la itre pepa ne ihë kowe la itre atr. Loi e tro la itre ekalesia a thele troa eatrëne la aja celë, ene la troa tro fë la nöjei pepa ne ihë hna hamë angatr, me haöthe asë la götrane hna troa cainöje ngön. Maine ase hë la huliwa ne tro fë la itre pepa ne ihë, nge hetre munëne pala kö thene la fami epun, loi e troa traqa fë itre ej ngöne la hna kovasio, matre troa huliwane itre ej ngöne la kola cainöje ngöne la nöjei ijin. Tro pë hë a thuemacanyi së ngöne la götrane cili, ngöne la porogarame ne Drai Ka Tru. Ame la itre munëne pepa hna thaa tro fë pëhë hnene la fami epun ngöne la nöj hna hnen la kovasio, tre, loi e troa hamëne itre ej kowe la ketre trejin ka ikep ngöne la epuni a traqa ngöne la hna kovasio. Loi e isa hetrenyi së la ca pepa ne ihë, ke, kola troa huliwane ej ngöne la cainöje tixenuë e Sabath.
6. Tro sa amamane tune kaa la itre thiina së ka lolo ngöne la hna kovasio ?
6 Kola Iakeukawany Jëne La Itre Thiina Ka Lolo: Ngacama kola lapane la fene celë hnene la itre atr ka “hnimi angate kö” me ka wanga acone la itre aliene hni ne la itre xan, drei la kola akeukawane la hni së troa ce mele memine la itre Keresiano ka catre troa eëne la itre thiina ka lolo! (2 Tim. 3:2) Ame ngöne la kola thawa la itre qëhnelö e 8 h 00 e hmakany, tre, easa amamane la itre thiina së ka lolo hnene la hna lö hnyawa, nge thaa ithanata catre menu kö; loi e tro mina fe sa ami göhnene hi lo itre atrene la fami së, maine itre ka ce tro me easë, maine pena lo itre atr hne së hna ce ini Tusi Hmitrötr memin. Loi e tro sa trongëne la hna amekötine hnene la ciaman ngöne la kola upi së troa isa lapa göhnen matre troa drenge la miuzik ne la Baselaia ka troa nyiqaane la porogaram. Easa mina fe a amamane la itre thiina së ka lolo, hnene la hna thele matre thaa tro kö a ajolëne la itre atr hnene la itre mobilisi së maine itre xaa ewekë pena. Ketre, easa amamane la itre thiina së ka lolo hnene la hna lapa thaup ngöne la porogaram; ame ngöne la ijine cili, thaa tro pi kö sa iupi fë maca jëne telefon, maine xeni pena maine troa tro ngöne la itre varad.
7. Tune kaa la aqane tro sa öhnyi keukawa maine akeukawane pena la itre trejin hne së hna ce lapa memin?
7 Itre Ca Lapa Ka Iakeukawany: Kola aijijë së hnene la itre kovasio troa öhnyi keukawa qa ngöne la aqane casi ne la lapa ne la itre trejine Keresiano asë. (Sal. 133:1-3) Tune kaa matre troa thele ngöne la hna kovasio troa “atrune” me anyimutren la itre trejine trahmanyi me föe hnei epuni hna troa ithanata memin? (2 Kor. 6:13) Maine jë tro epuni a thele troa eatrëne la aja celë, ene la troa atrepengöne ngöne la nöjei drai la ketre atr maine ketre fami hnei epuni hna thatre. Ame la kola mano e hnaipajö, tre, ijije hi tro epuni a ujë tune lai. Haawe, traqa fë kemeje pi nge madrine jë troa ce xeni me ce lapa memine la itre trejin ngöne la hna kovasio; ngo the tro kö troa itö xeni maine xeni pena ngöne la itre hnë xen ka easenyi hi. Ketre manathithi ka tru lai, pine laka, epuni jë a troa eköthe memine la itre atr hnei epuni hna thatre, la ketre aqane imelekeu ka catr me ka cile hut.
8. Pine nemene matre loi e tro sa saen troa ixatua ngöne la hna kovasio, nge tro sa ujë tune kaa lai?
8 Drei la kola akeukawane la hni së troa ce huliwa memine la itre trejine me easë ngöne la ketre huliwa ka hmitrötr! Hapeu, ijije kö tro epuni a saen troa ixatua ngöne la ketre huliwa, maine xatuane pena la ekalesia i epun troa nyidrawane la uma ne asabele? (Sal. 110:3) Maine thaa ase pala kö thue hnëqa i epun, haawe, canga easenyine ju la ketre trejin atrekë hnëqane lai. Tro ha madrin me lolo la hna huliwa, e nyimutre la itre ka saen troa ixatua.
9. Pine nemene matre loi e tro sa thupëne hnyawa la aqane ujë së, me aqane heetr me iseji së ngöne la kola kovasio?
9 Kola Akeukawane La Hni Ne La Itre Atr Ka Goeë Së Hnene La Aqane Ujë Së: Ame la easa sine la kovasio, tre, nyipi ewekë tro sa thupëne hnyawa la aqane ujë së; thaa ene hmekuje kö ngöne la kola icasikeu, ngo ngöne fe lai köni drai ne la kovasio. Loi e tro la itre atrene la nöj hna hnen la kovasio së, a öhne laka isapengö së kö memine la itre atr ka thaa anyipici Iehova kö jëne la iakeukawanyi hne së hna hamën. (1 Pet. 2:12) Loi e troa atrunyi Iehova hnene la aqane heetr me iseji së ngöne la hnë kovasio, me ngöne la hnalapa së, me ngöne la itre hnë xen. (1 Tim. 2:9, 10) Maine tro sa amë lo itre badge së, eje hi lai laka, canga tro hi la itre atr a atre laka, easë la Itretre Anyipicine i Iehova. Nge ame hë e cili, ijiji së hi troa hane qeje pengöne koi angatr la kovasio së, me hane cainöje koi angatr.
10. Nemene la itre hna melën ka amamane la thangane ka lolo hna kapa qa ngöne la aqane ujë ne la itre Keresiano?
10 Nemene la thangane hna kapa hnene la itre xaa atr, qa ngöne la hna goeëne la aqane ujë së ka lolo ngöne la hna kovasio? Thenge la hna qaja ngöne la ketre zonal, hnene la maseta ne la ketre iuma hna xom matre troa kovasio ngön, hna qaja ka hape: “Ka lolo catr la thiina ne la itre atr cili. Eahuni pala hi a madrine troa kepe angatr ngöne la nöjei macatre.” Ame lo macatre ka ase hë, hna paatr la watrenge ne la ketre atr ka thaa hmi kö, ngöne la ketre otel hna lapane hnene la itre trejin ka traqa troa sine la ketre kovasio. Ame la kola bëeke fë hmaca lai watrenge cili kowe la maseta ne la otel cememine la nöjei ewekë asë, tre, öni nyidrëti jë hi kowe la atrekë ewekën, ka hape: “Manathithi nyipë, ke, nyimutre la Itretre Anyipicine i Iehova ka lapa hnine la otel, nge ka traqa troa sine la kovasio i angatr. Ke maine ju thaa tro hë nyipëti a öhne hmaca la watrenge i nyipë.”
11. Pine laka easenyi catre hë la kovasio së, nemene la nyine tro sa thele troa eatrën, nge pine nemen?
11 Easenyi catre hë la itre kovasio ne la macatre celë. Nyimutre la itre hawa me trenge catr hna nue matre troa hamë keukawa hnene la porogaram memine la hnë kovasio. Thele jë troa sine la köni drai asë, nge hnëkë jë troa kapa la hnei Iehova memine la organizasio i Nyidrë hna eköthe thatraqai epun. Catre pi troa akeukawane la hni ne la itre xan jëne la itre thiina i epun ka lolo, memine la hna ce madrine troa iöhny, memine fe la aqane ujë i epun ka lolo. Eje hi lai laka, tro hë epuni memine la itre xan a qaja la trenge ewekë hna cinyihan hnene la ketre trejin ka hane sine la ketre kovasio ngöne lo macatre hnapan, kola hape, “Pëkö ketre ijine ka tune la, laka, kola elitrauje la madrineng!”
[Hna cinyihan ne la götran 4]
Tune kö ekö, ame ngöne lo köni wiik qëmekene troa kovasio, easa troa tro fë la itre pepa ne ihë kowe la itre atr
[Hna cinyihan ne la götran 6]
Loi e tro atrunyi Iehova hnene la aqane heetr me iseji së ngöne la hnë kovasio, me ngöne la hnalapa së, me ngöne la itre hnë xen
[Hna cinyihan ne la götran 7]
Catre pi troa akeukawane la hni ne la itre xan jëne la itre thiina i epun ka lolo, memine la hna ce madrine troa iöhny, memine fe la aqane ujë i epun ka lolo
[Hna eköhagen ne la götran 4-7]
Nyine Amekunë Së Göi Kovasio Ne Distrik Ne 2011
◼ Hawa Ne Icasikeu: Troa nyiqane la porogaram e 8 h 20, ngöne la köni drai asë. Troa fe la itre qëhnelö e 7 h 30 e hmakany. Ame la kola nyiqaane elone la miuzik ne la Baselaia, tre, loi e tro asë hi së a ilapany, celë hi aqane tro së lai a amamane la metrötre së ngöne la kola nyiqaane la icasikeu. Troa nyipune la icasikeu e 15 h 55 e Drai Ka Tru, me Mecixen, nge 14 h 40 e Sabath.
◼ Hna Acili Loto: Ame ngöne la nöjei hnë kovasio, hetre göhnë hna acili loto, me thue göhnenen lo itre ka canga traqa. Troa acile ngöne la itre göhnë hna hnëkëne hë thatraqane la itre sine atr, ene hmekuje hi lo itre ka trene pepa nge hna aijijëne troa cile e cili. Pine laka thaa tru kö e itre xaa ijin la hnë acili loto, loi e troa nyi aliene hnyawa la itre loto.
◼ Göi Göhnë Hnine Iuma Ne Drai: Tro hmekuje hi a ami göhnene la itre ka ce tro me easë hnine la loto ka cas, maine ka ce mele me easë, maine pena lo hne së hna ini tusi memin.—1 Kor. 13:5.
◼ Xeni Hnaipajö: Ka lolo catr troa traqa fë kemej kowe la hnë kovasio, hune la troa tro trije la hnë kovasio matre troa xomi xen ngöne la ijine xeni me mano e hnaipajö. Ijije troa amë la ketre neköi ka lepany fene la icea. Thaa hna nue kö troa traqa fë ngöne la hnë asabele la itre glasier ka tru, me itre ver.
◼ Itre Ahnahna: Ijije hi tro sa amamane la hni ne ole së kowe la itre hna amekötine thatraqane la kovasio, hnene la hna hane hamë ahnahna thatraqane la huliwa e cailo fen, e hnine la hna kovasio. Maine kola hamë chèque, loi e troa sija la hna hape, “Association chrétienne les Témoins de Jéhovah de Nouvelle-Calédonie (A.S.T.J.).”
◼ Itre Eatr Me Itre Sine Mec: Maine kola traqa la ketre ewekë ngöne la ijine kovasio, canga wange ju lai ketre trene hnëqa easenyi së matre tro angeic a hëne nyimenyimëne lo Pane Ixatua troa wai së. Maine ketre eatr ka tru, haawe, hëne jë la 15 ene la numero i pital. Ketre hna amekötine lai matre thaa tro kö a tru menu hnei ka hëne la itre ka cilëne la hnëqa, hna hape Pane Ixatua.
◼ Itre Drösinöe: Maine hetre drösinöe nyine tro epuni a xom, haawe, loi e tro epuni a traqa fë itre ej, ke, pëkö drösinöe hna troa hamëne koi epun ngöne la hna kovasio.
◼ Itre Nyine Uku Medreng: Hna wathebone troa traqa fë la itre nyine uku medrenge ngöne la itre hna kovasio. Ngo thaa hna wathebone kö lo neköi cea i nekönatr matre tro la itre keme me thine a ati nyën ezi angatr.
◼ Itre Sine Pepa Hna Hape, Veuillez suivre l’intérêt (S-43): Loi e troa sija la sine pepa hna hape, Veuillez suivre l’intérêt, nyine hamë thuemacanyi göne la itre atr ka hetre hni ne ajan thupene la hna sine la kovasio ne distrik. Loi e tro la itre ka cainöj a mekune troa xome la cas maine lue sine pepa cili ngöne la hna kovasio. Thupene la hna sija apexejene lai sine pepa, ijije hi tro epuni a hamëne lai ngöne la hna Xomi Tus, maine pena kowe la seketere ne la ekalesia, ngöne la kola bëeke koi hnalapa.—Wange ju la Huliwa Ne Baselaia ne Nofeba 2009, götrane 4.
◼ Itre Hnë Xen: Atrune jë la ëje i Iehova ngöne la itre hnë xen. The cile kö troa nyithupen atrun.
◼ Itre Ka Ajane Troa Ixatua: Tro ha kökötre catre la madrine hne së hna kapa qa ngöne la hna sine la kovasio, e hne së hna saene troa ixatua. (Ite hu. 20:35) Ame la ka ajane troa ujë tune lai, tre, loi e tro angeic a thuemacane la itre trejin ka elemekene la huliwa cili ngöne la hna kovasio. Ame la itre nekönatr ka 16 lao macatre, tre, ijije fe hi tro nyudreni a hane ixatua ngo loi e troa ce tro me nyudren hnene la ketre keme maine thin, maine ketre atr ka ithupë pena hna kapa hnene la lue keme me thin.
[Hna eköhagen ne la götran 5]
Tune Kaa La Aqane Troa Tro Fë La Pepa Ne Ihë?
Maine easa ajane troa haöthe asë la teritoare së, haawe, thaa tro pi kö sa aqeane menune la nyine tro sa qaja. Maine jë tro hi sa hape: “Bozu së. Eahuni asë a catre troa thawa la pepa ne ihë celë. Hanawange la pepa i epun. Eje ngöne la pepa ne ihë cili la nöjei ithuemacanyi asë.” Hna kuca la pepa ne ihë cili matre troa ahlëne la aja ne la itre atr, haawe, loi e tro epuni a amamane hnyawa la pane götrane ngöne la kola hamëne ej kowe la atrene la hnalapa. Loi e tro epuni a madrin. Maine epuni a thawa la itre pepa ne ihë e mecixeni me sabath, haawe, thele jë fe troa tro fë la itre zonal.