Troa Huliwane Ej Ngöne La Nöjei Ijin
1. Pine nemene matre hna fejane la tarak, Ajane Kö Nyipunie Troa Atre La Nyipici?
1 Hna fejane la tarak Ajane Kö Nyipunie Troa Atre La Nyipici?, matre troa xatua së troa nyiqaane inine la Tusi Hmitrötr memine la itre atr. Ngo celë mina fe la ketre jia ne huliwa ka lolo nyine tro sa xom matre troa traane la itre itine feja ne la nyipici. (Ate cai. 11:6) Hanawange la itre xaa mekun ka troa xatua së troa huliwane hnyawa la tarake cili.
2. Tro sa xome tune kaa la tarak matre troa nyiqaane porotrik memine la ketre atr?
2 Troa Nyiqaane Porotrik Memine La Ketre Atr: Amamane jë la tarake kowe la atrene la hnalapa, me wanga atrune lo sikisi lao hnying ka eje ngöne la icetrön, nge hape jë: “Ame ngöne la itre hnyinge celë, nemene la ka ketri nyipëti hnyawa?” Thupene la nyidrëti a hamëne la mekuna i nyidrë, ce wange jë epon e hnine lai tarak la mekun ne la Tusi Hmitrötr ka sa lai hnyinge i nyidrë, nge e jë fe la ketre xötr hna hamën. E jë maine qaja pena la itre mekune ka tru ngöne la pune la tarak, nge hamë nyidrëti jë la itus Ini Tusi Hmitrötr. Nge maine thaa hna kapa kö la itus, ngo eje hi laka, hetrenyi hë thei nyidrëti la tarak, ene la ka troa aijijëne la nyipici troa cia wan e kuhu hni nyidrë.—Mat. 13:23.
3. Nemene la nyine tro sa kuca, e ka hetre jolen la atrene la hnalapa?
3 Maine Hetre Jolen Lai Atr: Qaja jë ka hape: “Pine laka hetre jole i nyipë enehila, tro hi ni a hamë nyipë la tarake celë. Eje a e wengëne la sikisi lao hnying hne së hna majemine xom, me amamane la itre mekun hna hamëne hnei Tusi Hmitrötr matre troa sa la itre hnyinge cili. Qanyinge hmaca pë hë matre troa atre la mekuna i nyipë.”
4. Nemene la nyine tro sa qaja ngöne la easa cainöj e cahu gojeny?
4 Ngöne La Easa Cainöj e Cahu Gojeny: Qaja jë ka hape: “Bozu së. Hapeu, hnei epuni hë hna hane isa hnyinge tune la? [Nue pi troa sa.] Ame la tarake celë, tre, eje a amamane la mekune qa hnine la Tusi Hmitrötr ka sa hnyawa la itre hnyinge cili.” Maine pëkö jole ne lai atr, loi e tro sa ce ithanatane me angeic la ketre hnying qa hnine la tarak, me hamë angeic la itus Ini Tusi Hmitrötr.
5. Ame e itre xaa ijin, tro sa xome tune kaa la tarak e pëkö atrene la uma?
5 E Pëkö Atrene La Uma: Ame ngöne la itre xaa götran hna cainöje ngön, hetrenyi la itretre cainöj ka nango amë acone la itre itus ngöne la itre uma ka pë atren. Maine hna majemine ujë tune lai hnene la ekalesia i epun, hapeu matre tro pena a amë la tarak Ajane Kö Nyipunie Troa Atre La Nyipici? Ame la epuni a bëeke hmaca, qaja jë ka hape: “Ame lo traqa ni e celë, ke pëkö atren la hnalapa; ngo hnenge pe hna amë la tarake celë ngöne la qene qëhnelö i epun. Ame ngöne la itre hnyinge celë, nemene la hnei epuni hna ajane troa pane sa?”
6. Nemene la eloine la tarak Ajane Kö Nyipunie Troa Atre La Nyipici?, ngöne la easa cainöj?
6 Jëne la tarak Ajane Kö Nyipunie Troa Atre La Nyipici?, hmaloi hi troa trotrohnine la nyipici, nge canga tro hi eje a ketr la hni ne la atr. Ketre, eje fe a ketr la itre atr ka isapengöne la itre hmi me itre hna majemine kuca. Thaa jole kö koi së me itre thöth memine la itre ka xötrei cainöj, troa tro fë ej. Hapeu, epuni kö a thele la nöjei ijin troa huliwane la tarake cili?