Kola Sa La Itre Hnyinge i Nyipunie

◼ Nemen la itre eloin la troa sin la ekalesia atrekë teritoaren la götran hne së hna lapa ngön?

Jëne la ekalesia, easë a kapa la itre ithuecatr, kola ‘acian la ihnimi me itre huliwa ka loi the së.’ (Heb. 10:24, 25) Jën la ekalesia, easë a inin la nyipici, nge hna hnëkë së troa eatrën la hnëqa së, ene la troa inin la itre atr. (Mat. 28:19, 20) Hna acatrene fe la lapaune së matre troa xomihnin la itre itupath, nge hetrenyi fe la itre atre thup ka ihnim, ka xatua së troa qëmek kowe la itre jol ka tru, me itre hne së hna hnehengazon. Eje hi lai laka, ka nyipi ewekë catr la ekalesia, maine easë a ajan troa mel ngöne la götrane la ua. Ngo hapeu, hetre eloine kö la troa sin la ekalesia atrekë teritoaren la götran hne së hna lapa ngön?

Eje hi laka easë a troa ce axeciën la mekun cili, thenge la itre ewekë ka nyimutre hne së hna melën, maine jë thenge la huliwa së thei maseta, maine qa ngöne laka, thaa ka hmi kö la fö i easë, maine hnei ejolene gojenyi pena. Ngo eje hi laka, hetrenyi la itre thangane ka lolo hna kapa hnene la atr ngöne la götrane la ua, me itre xaa götrane ju kö, e tro angeic a ce hmi memine la ekalesia atrekë teritoaren la götran hnei angeic hna lapa ngön. Canga atreine hi troa tro hnene la itre qatre thup troa wang la itre trejin asë, e traqa ju la ketre ngazo koi angatr. Hetrenyi lo itre hna cinyihan ka tune ekö, ene lo Kola Sa La Itre Hnyinge i Nyipunie, a hna qaja hnyawa la itre xaa eloin la aqane ujë cili.—Mei 1991, Maac 1976, me Januare 1967.

Kola mama hnyawa laka, ka lolo catre kö e troa sin la itre icasikeu, e ka easenyi la uma ne Baselaia, ngöne laka, kola aijijë së troa canga traqa troa hane porotrik memine la itre xan, troa hane wang la itre huliwa ka nyipi ewekë, me hane ce nyiqaan la icasikeu hnene la nyima me thith. Ame ngöne la kola mele hnene la ketre atr ka xötrei atre la nyipici, ngöne la götran hne së hna lapa ngön, easë hi lai ka ijij troa wai angatr me inin la Tusi Hmitrötr me angatr, me eatrongë angatr kowe la itre icasikeu ka hmaloi koi angatr troa hane sin.

Easë a mejiune laka, tro la itre hene hnepe lapa a mekune hnyawa la ewekë cili ngöne la thith, me wange hnyawa la nöjei götran asë, matre troa atrehmekun la ka nyipi ewekë catr kowe la mele ne la fami i angatr, ngöne la götrane la ua me ngöne la ngönetrei.—1 Tim. 5:8.