Mekene 7
Nemene Hë La Pune La Pitru?
1-3. Hna amamane tune kaa hnene la itre ijine ka paatre hë laka, nyipici Iehova?
THENGE lo mekune ka hape meköti kö tro Akötresie a mus, haawe nyimutre catre hë la itre macatre ne ketre musi la atr; matre nemene hë la itre thangan? Hapeu, sisitria kö la aqane musi angatre hui Akötresie? Ohe, maine tro së a goeëne la aqane akötrëne la itre atr hnene la itre xane ngöne la itre macatre ka ase hë, ijije tro së a qaja ka hape, ka ngazo catre la musi ne la atr.
2 Pine la hna thipe trije hnene la lue pane keme me thine së la itre hna amekötine hnei Akötresie, haawe, hna traqa koi nyidro la ketre hulö ka tru. Akötre la pune koi nyidro, nge kowe mina fe la itre matra i nyidro. Thatreine kö tro nyidroti a upe zöne la ketre atr, ke nyidroti hi la qaane la ngazo. Hnene la Wesi Ula i Akötresieti hna qaja ka hape: “Ngazo hë nyuden, tha ite neköi nyidrë hë, ngo ite etha i angat.”—Deuteronomi 32:5.
3 Hna hmekë Adamu hë me Eva hnei Akötresieti laka, maine tro nyidroti a hutrö kowe la itre hna amekötine hnei Nyidrë, haawe, tro ha ipië trootro la mele i nyidro, nge tro hë nyidroti lai a mec. Thaa thoi ju kö, pine laka, celë hi ewekë lai ka traqa ngöne la mele ne la lue pane atr. (Genese 2:17; 3:19) Hnei nyidroti hna thipe trije la mus i Akötresie, qaane ju hi lai, kola tro la itre drai nge kola ethitre trootro la mele i nyidro uti hë la meci nyidro.
4. Pine nemene matre, itre atr ka ngazo qaane la kola hnaho së, nge tai wezipo me meci asë hi së?
4 Kola qeje pengöne ngöne Roma 5:12, la ewekë ka traqa kowe la itre matra i nyidro, hna hape: “Traqa ha la ngazo kowe la fene hnengödrai hnene la ate ka cas [ene Adamu keme ne la nöjei atr asë], nge meci fe pine la ngazo; tune la hna traqa la meci kowe la nöjei ate asë.” Haawe, pine la hna icilekeu memine la musi Akötresie hnene la lue pane keme me thine së, ase hë löthi nyidro hnene la ngazo. Nge thenge la aqane xupi nyidro, haawe, tro fe hë a hane kapa la ngazo cili hnene la itre matra i nyidro. Celë hi kepine matre itre ka ngazo fe së qaane lo easë a mala, tro fe së a hane wezipo me mec.
5, 6. Ngacama hna thele hnene la atr troa hetrenyi la nyipi tingetinge memine la manathith, ngo nemene kö la ewekë hna öhne qaane ekö uti hë enehila?
5 Nyimutre la itre hadredre ne macatre ka paatre hë. Ketre tune mina fe la itre baselaia, laka, acile jë hi matre paatre hmaca pi. Ase hë tupathe asë la nöjei pengöne mus. Ngo pëkö thangane ka loi hna kapa, pine laka, kola akötre atraqatre pala hi la mele ne la atr. Öni së pena kö ka hape, sikisi thauzane hë lao macatre, ma tro ha hetre thangane la musi ne la itre atr, ene la troa tingetinge me meköt, me hmadradra la fene hnengödrai, nge atreine fe hë angatre troa melëne la itre thiina ka sisitria, tune la hni ka menyik, me ihnimi ipitö, me ixatuanekeun.
6 Ngo enehila, ketre pengöne la mel. Pë pi kö caa musi ne fene ka atreine axulune la nyipi tingetinge memine la mele ka loi kowe la nöjei atr asë. Maine tro hmekuje hi së a pane goeëne la hneijine së, ene la itre macatre 1 900, hne së hna öhne la kola humuthe la itre milio lao atr ngöne lo ijine iakötrë i itre nazi, hna hape Holocauste (huje ne dreuth), ketre tune mina fe la itre ka meci ngöne lo itre ijine isi, hna e la 100 milio nge sin la etrune lao atr hna humuth. Ame enehila, ala nyimu mina fe la itre atr hna axösisine me humuth, me akalabusine pine thatreine ixomihni, nge isazikeu la itre mekune göi politik.
Aqane Mele Ngöne La Hnedrai Së
7. Nemene la aqane melene la itre atr enehila?
7 Tro mina fe së a pane hane wange la pengöne la fami ngöne la hnedrai së enehila. Eje asë hi e cailo fen, la ihumuth, me iakötrë. Kola elë catre pala hi la xomi dorog. Nge tru catre fe hë hnei atr hna ketr hnene la itre meci ka solesol, qa ngöne la hna kuci ngazo. Kola ihamënekeune hnene la itre atr, itre milio la etrun, lo ketre meci ka pëkö nyin, ene lo SIDA. Hnënge trene milio lao atr ka meci e nöjei macatre, hnei jinë xen, maine pine pena la itre xaa mec; nge ame ngöne la ketre götran, ke elë catre la mo, ngo ala xalaithe hi la trene mani, angetrekë mon. Kola apoizinëne me huliwane menune la ihnadro. Ngöne la nöjei götran, pë hë mele ka loi thene la itre fami, nge thaa trongëne hë angatre la itre trepene meköti hna ihajine nyine loi ne la itre fami. Nyipici, ame la kola ngazo catre la aqane trongene la mele enehila, ke, pine laka, Satana la atre mus, angeice lo ‘haze ne la fen.’ Ka nanazij, me thaa imeku, nge ka ngazo catre la fene hna musinëne hnei Satana.—2 Korinito 4:4.
8. Pine nemene matre thatreine kö tro së a qaja ka hape, pëkö engazone la aqane kökötrene la itre huliwa ne la atr?
8 Hnei Akötresieti hna nue ijine kowe la atr matre elë trootro jë la inamacane i angeic, uti hë la traqa kowe la pune la hnei angeice hna atreine ngöne la götrane la sias, me nöjei pengöne ewekë tro angeice a kuca. Ngo, hapeu ijije kö troa selëne la inamacan, la kola nyihnane enehila la pehna me jo hnei itre mitrailleuse, me itre ikaatre ne isi, me itre avio ne isi, me itre missiles nucléaires? Hapeu, atreine kö troa qaja atrune la inamacan, ngöne laka, kola waja la itre xaa götrane ne la hnengödrai, ngo thatreine pe pane ce mele tingetinge e celë fen? Hapeu, ekaa lo loi trootro hna qaja, laka, ame enehila kola xou la itre atr troa tro jidri ngöne la itre traon, maine ngöne pena la itre xaa götrane e hnaipajö pangepang?
Nemene Hë La Ewekë Ka MamaNgöne La Mele Ne La Atr
9, 10. (a) Nemene la ewekë ka mama hnyawa ngöne lo itre hadredre lao macatre ka paatre hë? (b) Pine nemene matre, thaa tro jë kö Akötresieti a xome trije la inuegufa?
9 Kola jele nyipicine hnyawa jëne la mele ne la atr, laka, thatreine jë kö angeice troa mele ka loi e thaa hna lapa kö fene la mus i Akötresie. Ceitune hi lai memine la atr, laka, thatreine kö angeice troa mel, e thaa hna xeni kö me iji me manone la mano ne mel. Thaa sihngödre kö la nyipici: kola mama hnyawa laka, hna xupi së troa drenge thenge la hna amekötine hnene la Atre xupi së, ketre tune mina fe laka, hna xupi së matre troa mele e hna xen, me ij, me mano ne la mano ne mel.
10 Ame la Akötresieti a nue la iakötrë, ke, Nyidrëti a troa amamane hnyawa laka, maine tro la atr a xomiujine menune la mele i angeic, tro ha hetre pune ka ngazo koi angeic. Ngo pine laka, ketre ahnahna ka sisitria la Akötresieti a nue së troa isa ië ewekë, thaa hnei Nyidrëti kö hna cipane eje kowe la itre atr, ngo hnei Nyidrëti pe hna aijijë angatre troa atrepengöne la engazon, e troa huliwane menun. Meköti la hna qaja hnei Wesi Ula i Akötresie, hna hape: “Tha qa i ate troa amekötine la ite hna feke ca hnei angeic.” Ketre nyipici ne eje mina fe ngöne la kola qaja ka hape: “Kete ate a musinëne la kete mate angazo nyëne kö.”—Ieremia 10:23; Ate Cainöj 8:9.
11. Hapeu, hetrenyi hë ekö la ketre pengöne musi ne la atr, ka apaatrene la akötr?
11 Qa ngöne la hna nue la atr hnei Akötresieti troa musi ngöne la sikisi thauzane lao macatre, haawe, mama hnyawa ha laka, thatreine kö la atr troa apaatrene la akötr. Ewekë lai ka qaane kö ekö uti pala hi enehila. Hanawange la ketre ceitun, ngacama hetrenyi Solomona joxu ne Isaraela la inamacan, memine la mo, me trenge catr, ngo thatreine ju kö nyidrë troa apaatrene la hulö, thangane la musi ne la atr. (Ate Cainöje 4:1-3) Ketre tune mina fe la enehila hnedrai së enehila, ngacama tru la itre ewekë hna kuca nyine ahmaloeëne la mel, ngo thatreine pala hi la itre tane la itre mus, troa apaatrene la itre akötr. Nge kola mama hnyawa fe ngöne la mele ne la atr, laka, ame la itre ka thipe trije la musi Akötresie, haawe, angatre hi lai a nyixane hmaca la akötre i angatr, ngo thatreine pë hë troa apaatrene ej.
Canga Öhne Kö Akötresie La Itre Ewekë Ka Troa Traqa
12-14. Nemene la manathithi ka troa epine palua, hna troa kapa qa ngöne la hna nue hnei Akötresieti la akötr?
12 Pine la hnei Akötresieti hna nue la akötr, ene pe hleuhleu pi la mele së. Ngo thaa Nyidrëti kö a goeëne enehila, ngo epine pe, ke atre hnyawa kö Nyidrë la itre thangane ka loi kowe la atr. Tro la itre hnei Nyidrëti hna xupe a kepe thangane ka loi qa ngöne la aqane wai ewekë i Nyidrë, a thaa ngöne itre hnepe macatre ka xoxopatre kö, maine itre thauzane pena, ngo ngöne itre milio lao macatre, nyipici uti hë epine palua.
13 Maine tro hmaca la ketre atr epine a xome triane la iujine la mele i angeic, matre upe koi Akötresie la zön, haawe, thaa nyipi ewekë hmaca kö troa nue ijine koi angeice troa wange ka hape, ma nyipici angeice jë kö. Ame hi la kola nue enehila la itre atr ka pitru troa hane mele koi itre thauzane lao macatre, ke, kolo hi matre troa amë hutine la ketre tulu, matre thaa tro kö a sasaithe hnei itre ka mel e celë fene me e hnengödrai.
14 Pine laka, hnei Iehova hna nue la iangazo memine la akötr uti hë enehila, nyine tro hi lai a anyipicine laka, pëkö mele ka loi kowe la itre ka thele troa pitru koi Nyidrë. Ase hë amamane hnyawa laka, pëkö manathithi ka cile huti hna troa kapa qa ngöne la hna thele troa isa kuci mekun, maine hnei atr, maine hnene la ketre ua. Celë hi matre, nyipi meköti koi Akötresie troa canga humuthe la nöjei ka mekune troa icilekeu. “Tro Nyideti a apatene la nöjei ka ngazo asë.”—Salamo 145:20; Roma 3:4.
[Iatr ne la götran 15]
Thupene la hnene la lue pane keme me thine së hna iëne troa mele e tröne la musi Akötresie, qatre trootro pi hi nyidroti me mec
[Iatr ne la götran 16]
Kola mama hnyawa laka, ngazo la pune kowe lo nöjei musi ne fene ka triji Akötresie