Gbetakpɔxɔ—Gbɔgbɔmenuɖuɖu le Ɣeyiɣi Nyuitɔ Dzie Wònye
1 Gbetakpɔxɔ le nu xlɔ̃m exlẽlawo be woanɔ ŋudzɔ le gbɔgbɔ me ƒe 114 kloe nye sia. Eƒe kpeɖeŋutɔ si nye Nyɔ! hã dea dzi ƒo be woaka ɖe Wɔla la ƒe ŋugbedodo dzi be yeahe ŋutifafa kple dedienɔnɔ ƒe xexeme yeye vɛ le míaƒe dzidzimea me. Agbalẽ eve siawo nye dɔwɔnu siwo ŋu kakaɖedzi le si klẽna ɖe míaƒe mɔ dzi le xexe doviviti sia me. (Yes. 60:2) Mawu ƒe Nya ƒe nyateƒea metrɔna gbeɖe o, gake alesi míesea wo gɔmee la dzina ɖe edzi esi Yehowa le dɔwɔnu siawo kple bubuwo ŋudɔ wɔm be wòana gbɔgbɔ me “nuɖuɖu” mí “le ɣeyiɣi nyui dzi.”—Mat. 24:45; Lod. 4:18.
2 Wɔ Magazineawo Ŋudɔ Nyuie: Míate ŋu aɖe míaƒe akpedada ɖe gbɔgbɔmenumekɔkɔ si míexɔna la ta afia to dzi dede ƒo na amewo dzonɔamemetɔe me be woaxlẽ Gbetakpɔxɔ kple Nyɔ! siaa. Míate ŋu ana tata ɖekaɖekawo aƒemenɔlawo ne míeyi zi gbãtɔ ne míele tso aƒeme yi aƒeme dɔa wɔm alo ne míele vomeɖase ɖim. Ame geɖewo xɔa magazinewo ƒe tata ɖekaɖekawo edziedzi eye edze ƒã be exexlẽ doa dzidzɔ na wo. Amesiawo akpɔ dzidzɔ ɖe nudɔdɔxɔxɔ ƒe mɔnukpɔkpɔ ŋu. Gake enyo wu be nàna magazine ƒe tata ɖekaɖekawo aƒemenɔla siwo mate ŋu axɔ nudɔdɔa o.
3 Aleke nàwɔ anya ne amea tsɔ ɖe le eme? Ne èle nu ƒom tso nya ɖeka alo evea aɖewo ŋu le magazine, trakt, alo agbalẽ gbadza me la, de dzesi alesi aƒemenɔla la awɔ nui. Ðe wòɖoa to nyuiea? Ðe wòdea bubu Biblia la ŋu eye wòxlẽa mawunyakpukpui siwo míexlẽna la kpli wòa? Ðe wòɖoa nya siwo nèbianɛ be wòagblɔ eƒe susu la ŋua? Nenye nenemae la, àte ŋu awɔ ɖoɖo agbugbɔ yi ɖasrãe kpɔ le kwasiɖaa me alo ayi kaba wu ema ale be miayi dzeɖoɖoa dzi le ɣemaɣi me. Ne edze ƒã be aƒemenɔlaa le agbalẽ si nègblẽ ɖe egbɔ la xlẽm eye wòkpɔ dzidzɔ ɖe nuƒoƒo le gbɔgbɔmenuwo ŋu la, àte ŋu abiae ne adi be yeanɔ magazineawo xɔm edziedzi.
4 Woate ŋu ana magazine ɖekaɖekawo kple nudɔdɔwo xɔxɔ siaa ƒe mɔnukpɔkpɔ dɔwɔhatiwo, sukuhatiwo, kple ƒometɔwo. Woate ŋu ana magazineawo asisi nyanyɛwo kple le ablɔdziɖaseɖiɖi me.
5 Ele be woana gbeƒãɖelawo ƒe asi nasu magazine yeyewo dzi ne eka hamea si teti. Ne èxɔ tata yeye la, xlẽ emenyawo nyuie. Tanya kawoe ku ɖe amesiwo le wò nutoa me la ŋu vevie? Xexeame ƒe ŋutifafa kple dedienɔnɔ nyawoea? Ganyawoea? Dziɖuɖu nyui ŋu nyawoea? Nusiwo ƒo xlã mí ŋuti nyawoea? Enye nusi ɖe dzesi be Gbetakpɔxɔ la fiaa asi Mawu ƒe Fiaɖuƒea na amewo be enye kuxiwo gbɔkpɔnu mavɔ ɖeka kolia. (Dan. 2:44; Mat. 6:10) Nyateƒee, enye nunana xɔasi si tso ‘Nufiala Gãtɔ’ gbɔ.—Yes. 30:20.
6 May kple June ƒe ɣletiawo nye mɔnukpɔkpɔ tɔxɛ na mí be míazã ɣeyiɣi geɖe le gbeadzisubɔsubɔdɔa me. Esi wònye kwasiɖanuwuwu atɔ̃ ye le May ƒe ɣletia me ta la, ame geɖewo bia be yewoawɔ kpekpeɖeŋu mɔɖeɖedɔa. Mí katã míate ŋu aɖo taɖodzinu na mía ɖokui fifia be míadzi míaƒe gbeadzisubɔsubɔdɔa ɖe edzi le ɣleti eve siawo me eye míatsɔ dzonɔameme ade dzi ƒo na amesiame si míado goe be wòaxlẽ Gbetakpɔxɔ kple Nyɔ!