‘Paulo Da Akpe Na Mawu, Eye Dzi Ðo Eƒo’

Esi hame si le Roma se be Paulo gbɔna la, nɔvi aɖewo zɔ mɔ abe kilometa 64 sɔŋ ene be yewoava kpee. Aleke woƒe ɖokuitsɔtsɔsavɔ ƒe lɔlɔ̃ sia kpɔ ŋusẽ ɖe Paulo dzii? “Esi Paulo kpɔ wo la, eda akpe na Mawu, eye dzi ɖo eƒo.” (Dw 28:15) Togbɔ be wonya Paulo be edoa ŋusẽ hame siwo wòsrãna kpɔ hã la, fifia si eya ŋutɔ nye gamenɔlaa, eya boŋue wode dzi ƒo na.—2Ko 13:10.

Egbea, nutome sue dzikpɔlawo tsona hame ɖeka me yia bubu me be yewoado ŋusẽ nɔviawo. Abe Mawu subɔla ɖe sia ɖe ene la, ɣeaɖewoɣia, ɖeɖi tea wo ŋu, nu tena ɖe wo dzi, eye dzi ɖena le wo ƒo. Ne nutome sue dzikpɔla kple srɔ̃a gava miaƒe hamea me la, nu kae nàte ŋu awɔ be dzi naɖo wo ƒo, ale be ‘miade dzi ƒo na mia nɔewo’?—Ro 1:11, 12.

• 

  Kpe asi ɖe kpekpe hena gbeadziyiyi ŋu. Edea dzi ƒo na nutome sue dzikpɔlaa ne gbeƒãɖelawo tsɔ nanewo sa vɔe ale be woate ŋu akpe asi kwasiɖa tɔxɛa ƒe ɖoɖowo ŋu. (1Te 1:2, 3; 2:20) Kpɔe ɖa be yeate ŋu awɔ kpekpeɖeŋu mɔɖeɖedɔa le dzinu si me wòava srã mí kpɔ hã. Ðe nàlɔ̃ be yeazɔ kple eya ŋutɔ alo srɔ̃a le gbeadzi alo akplɔ wo dometɔ ɖeka ayi wò Biblia nusrɔ̃vi aɖe gbɔa? Edzɔa dzi na wo be yewoazɔ kple gbeƒãɖela vovovowo, ame siawo dometɔ aɖewoe nye ame yeyewo alo ame siwo mebi le gbeadzisubɔsubɔdɔa me tututu o.

• 

  Wɔ amedzro na wo. Ðe nàte ŋu ana dzeƒe alo nuɖuɖu woa? Esia ana nutome sue dzikpɔla kple srɔ̃a nakpɔe be èlɔ̃ yewo. Womekpɔa mɔ be esiawo nanye nu gãwo o.—Lk 10:38-42.

• 

  Se eƒe aɖaŋuɖoɖo kple mɔfiamewo eye nàwɔ ɖe wo dzi. Nutome sue dzikpɔlaa kpena ɖe mía ŋu lɔlɔ̃tɔe be míakpɔ nu siwo akpe ɖe mía ŋu be ale si míesubɔa Yehowa nanyo ɖe edzi. Ɣeaɖewoɣia, aɖo aɖaŋu sesẽ aɖewo na mí. (1Ko 5:1-5) Edzɔa dzi nɛ ne míebɔbɔ mía ɖokui eye míeɖo to.—Heb 13:17.

• 

  Da akpe na wo. Na nutome sue dzikpɔlaa kple srɔ̃a nanya ale si woƒe kutrikuku ɖe vi na wò. Àte ŋu agblɔe na wo tẽe loo alo aŋlɔ nya kpui aɖe aɖo ɖe wo.—Kol 3:15.