Ntọt M’ọkwọrọ Obio Ubọn̄
Mmọ Ẹma Ẹkpụhọde Usụn̄uwem Mmọ
EYỊGHE idụhe afo emesikụt mmọ ẹtịn̄de ikọ ye mmọ en̄wen ke mme efak, ẹwahade ke ufọk ke ufọk, m̀mê ẹdụkde mme mbonoesop Christian ke mme Ufọkmbono Obio Ubọn̄ mmọ. Nnyịn itịn̄ iban̄a mme uyen ẹdide Mme Ntiense Jehovah oro ẹkamade idem nte odotde. Ekeme ndidi afo okosịm ubiere nte ke mmọ ẹdi Mme Ntiense ke ntak emi mme ete ye eka mmọ ẹkekpepde mmọ ndidi, oro onyụn̄ edi akpanikọ aban̄a ediwak mmọ. Ke n̄kan̄ eken, odu ndusụk n̄kparawa owo ẹmi ẹnyenede ata isio isio idaha, emi n̄ko akani usụn̄uwem mmọ edide ata isio ye uwem oro mmọ ẹdude idahaemi. Ke akpanikọ, mbon oro ẹwụtde ke page etienede mi ẹdi mbon oro ẹkesibuanade ye mme otu oro ubiatibet ye uda n̄kpọsọn̄ ibọk ẹkesidide edinam ofụri usen mmọ. Nso ikanam mmọ ẹkpụhọde uwem mmọ ofụri ofụri? Ẹyak nnyịn inam isan̄ ika obio Norway kiet inyụn̄ ikosobo ye ndusụk n̄kparawa owo ẹmi ẹnamde mme utọ ukpụhọde oro.
Itiat Idakisọn̄ Kaban̄a Edinam Ukpụhọde
Ke ini Mme Ntiense iba ẹkesobode ye Annette ke utom eke ufọk-ke-ufọk, enye ekedi isua 19. Eyenan̄wan emi eti ete, “Ẹma ẹsisọn̄ọ ẹtịn̄ ẹnọ mi ẹte n̄kûdede nnyene nneme ye Mme Ntiense Jehovah, edi ami mma nnyene ọkpọsọn̄ udọn̄ nnyụn̄ n̄kot mmọ ẹdụk ẹdi.” Enye ekedi ada n̄kpọsọn̄ ibọk toto ke ini enye ekedide isua 11 onyụn̄ abuana ke ekese edibụn̄ ufọk mme owo ndụk nyịp n̄kpọ ye ediyịp moto.
Eti mbụk Obio Ubọn̄ ama omụm enye udọn̄. Idotenyịn ediset ke n̄kpa ama enen̄ede ọnọ enye ndọn̄esịt, koro eka esie akakpade ke ini enye ekedide isua ition ke emana. Ntre enye ama onyịme ukpepn̄kpọ Bible mfọn onyụn̄ ọtọn̄ọ ndidụk mme mbonoesop ke Ufọkmbono Obio Ubọn̄. Enye ama etịn̄ ọnọ ufan esie eren ye mmọ eken se enye ekpepde. Didie ke ẹkenam n̄kpọ? Mmọ ikenyeneke n̄kpọ ndomokiet ndinam ye se ededi oro abuanade ye utuakibuot akpanikọ ẹnyụn̄ ẹdori Annette ikọ ẹte ke ẹnyịk enye ọkpọn̄ akpa ukpepn̄kpọ esie. Edi, ndusụk mbon oro ẹkenen̄erede ẹbiọn̄ọ nte ini akade ẹma ẹtọn̄ọ ndikpep Bible.
Da Espen, akparawa emi edide isua 20 ke emana, nte uwụtn̄kpọ. Enye okokop aban̄a eti mbụk Obio Ubọn̄ oto ufan eren Annette ndien ke ndondo oro ama oyom ukpepn̄kpọ Bible. Nte ededi, enye ekebet edika n̄kpọkọbi ọfiọn̄ inan̄, koro enye ama abuana ke ndisision̄o mme n̄kpọsọn̄ ibọk n̄ka idụt efen ye ke edibụn̄ mme ufọk owo ndụk nyịp n̄kpọ ukem nte Annette. Enye n̄ko ekedi ada un̄wọn̄, ikọn̄ekpo, ye mme n̄kpọsọn̄ ibọk eken. Idahaemi, nso ikpekeme ndinam utọ owo oro akabuanade ke utọ mme n̄kpọ ẹmi oyom nditọn̄ọ ndikpep Bible? Espen ama ọtọn̄ọ ndikụt usụn̄uwem esie nte edide ukpọk onyụn̄ ananade uduak. Enye obụk ete: “Ami mma nnyene udọn̄ ke mme un̄wọn̄ọ Bible aban̄ade ini iso oro ọkọnọde mi uduak ke uwem. Ntre mma ntọn̄ọ ndikpep n̄kpọ man nse mme ẹketịn̄ akpanikọ ẹnọ mi.”
Mmọ En̄wen Ẹyom Ndikpep Bible
Etisịm ini emi, akparawa kiet emi otode ke otu n̄kparawa emi ama okop eti mbụk, ndien enye n̄ko ama otọn̄ọ ndikpep n̄kpọ nnyụn̄ ndụk mme mbonoesop. Ekem, ẹma ẹtọn̄ọ ukpepn̄kpọ ye owo efen ke otu mme uyen ẹmi, ndien enye ama ọtọn̄ọ ndidụk mme mbonoesop. Esisịt ini ke oro ebede, akparawa efen n̄ko ama adiana ye mme ufan esie ke ndikpep Bible ye ke ndinam n̄kọri ke n̄kan̄ eke spirit. Ekem uyen efen n̄ko kpa ke otu oro ama okop inemesịt aban̄a eti ukpụhọde oro mme ufan esie ẹkenamde, ndien ke ekpri ini, enye ama oyom ndikpep Bible.
Gilbert, akparawa ọkwọ ikwọ kpa ke otu emi, kemi ama ọtọn̄ọ ndikpep Bible. Ete ye eka esie ẹma ẹkpa ke udọn̄ọ cancer, ntre enye ama okop ndọn̄esịt ke idotenyịn ediset ke n̄kpa oro Bible ọnọde. (John 5:28, 29) Enye n̄ko ama esida ikọn̄ekpo onyụn̄ odu otịme otịme uwem, ndien enye ke ekenyene ọkpọsọn̄ udọn̄ ndidi ọwọrọiso owo ikwọ rock. Nte ededi, nte ini akade, enye ama anam eti n̄kọri ke n̄kan̄ eke spirit onyụn̄ anam usọp usọp ubiere ndikabade ndi Ntiense nnọ Jehovah. Ke akpatre, ekpri eyeneka eren Espen ama ọtọn̄ọ ndidụn̄ọde Bible nnyụn̄ mbuana ye Mme Ntiense.
Akpanikọ Bible Omokpụhọde Uwem
Akwa ukpụhọde ama ada itie ke idem n̄kparawa owo ẹmi ẹkesikamade idem nte mîdotke, enyenede nsuahade nsuahade idet, ẹnyụn̄ ẹbuanade ke edida n̄kpọsọn̄ ibọk, uyịpinọ, ye mme ubiatibet eken. Annette edi eti asuanetop Obio Ubọn̄ onyụn̄ anam utom nte asiakusụn̄ ke n̄kpọ nte isua kiet. Espen ye Gilbert ẹma ẹnam utom nte mme asiakusụn̄ unọ un̄wam, ndien mmọ n̄ko ẹdi mme asan̄autom unamutom. Mmọ mbiba ẹma ẹdọ ndọ ke esịt esop Christian. Inan̄ eken ke akani otu emi ẹdi n̄ko ifịk ifịk mme anditan̄a Obio Ubọn̄!
Nso kaban̄a n̄kpọkọbi ọfiọn̄ inan̄ oro akanade Espen aka? Ke ntak mme ukpụhọde oro enye akanamde ke uwem esie, ẹma ẹkpụhọde ubiereikpe esie ẹkenịm ke utom obio eke hour 80. Ke unyịme mme bodisi ye eke mbon efen, enye ama abiat hour ẹmi ndinam utom ke Ufọkmbono Obio Ubọn̄ eke Mme Ntiense Jehovah n̄kann̄kụk. Mme bodisi ẹma ẹnem esịt etieti ye ndutịm emi.
Ih, ediwak n̄kparawa owo eken ke ofụri ererimbot ẹnyene ifiọk n̄kpọntịbe ubiatibet. Edi akpanikọ Ikọ Abasi ọmọnọ mmọ mme ibọrọ ke mme akpan mbụme ye ata idotenyịn kaban̄a ini iso. Ntre, mmọ idịghe aba mme inọ m̀mê mme ada n̄kpọsọn̄ ibọk, ndien mmọ ikahaiso aba isịne ọfọn̄ ke usụn̄ oro mîdotke. Ke ẹma ẹkekpụhọde usụn̄uwem mmọ, mmọ ẹtie ukem ukem nte mme owo oro ẹsiakde ke enyọn̄ emi—n̄kparawa, ẹmi ẹkamade idem nte ọfọnde, ye Mme Ntiense Jehovah emi ẹnamde utom ọkpọsọn̄. Mmọ ẹyom ndinam mbon efen ẹdiọn̄ọ mme usọbọ Bible oro ẹbịghide kaban̄a mme mfịna oro ata ediwak n̄kparawa owo ẹnyenede mfịn.—Se 1 Corinth 6:9-11.
[Ndise ke page 8]
Espen, Annette, ye Gilbert