Mme Ntiense Jehovah ke Ofụri Ererimbot—Poland
KE INI idọk 1989, ukara Communism ọtọn̄ọde ke Baltic osịm Obubịt Inyan̄ ẹma ẹtọn̄ọ ndiwụre. Nte ẹkemende mme n̄kpọ ubiọn̄ọ efep, mme idụt ke Edem Usiahautịn Europe ẹma ẹtọn̄ọ ndiyom usụn̄ idemmọ. Poland ama odu ke otu mmọ, idụt emi mme ekara ekara obot, mme unaisọn̄, ye mme obot oro ẹtiede n̄kputụk n̄kputụk ẹyọhọde.a
Mbon Poland ẹdi mbon oro ẹnamde utom ọkpọsọn̄, ndien Poland enyene ndusụk mme anamusọ ye ntaifiọk oro ẹtịmde ẹdiọn̄ọ ke ererimbot. Nte ededi, akande oro, ediwak mme anditan̄a eti mbụk Obio Ubọn̄ Abasi ẹdu do idahaemi.
Ẹnyene Uko ke Ndiyarade Nsu
Ke Poland ediwak owo ẹdu oro ẹkpemade ndikpep akpanikọ otode Bible. Edi mme iman m̀mê mme mbọhọidụn̄ ẹbiọn̄ọ ndusụk. Ke uwụtn̄kpọ, ke mbọhọ Wrocław, n̄wan kiet oro ekenyenede udọn̄ ama etre ndikpep Bible ye Mme Ntiense Jehovah ke ini ubon ye mme ufan ẹkekọbọde enye. Edi, ekpri eyenan̄wan esie ama okot udịm udịm ibuotikọ Enyọn̄-Ukpeme oro ẹkeyararede nsunsu ido ukpono. Ẹmi ẹma ẹdemede udọn̄ esie ke akpanikọ.
Ke ama ekekpep Bible ke ọfiọn̄ itiokiet, ekpri n̄kaiferi emi ama ebiere ndisịbe kpukpru ebuana esie ye nsunsu ido ukpono. Enye ama aka ebịne ọkwọrọ ederi ufọkabasi esie ndikasian enye mban̄a ubiere esie. Enye ama ọdọhọ eyenan̄wan emi ewet se itienede mi: “Ami, K—— P——, mmọkpọn̄ ufọkabasi Catholic.”
Ke Sunday oro eketienede, ẹma ẹkot ikọ emi ke ufọkabasi. Eteeka eyenan̄wan emi ama osụhọ, ndien ekaeka esie ama atua eyet. Nte ededi, ama otụk mme aka ufọkabasi eken ndien ẹma ẹdọhọ ẹte: “Ke akpatre, owo enyene uko ekem nditịn̄ nte ke ekese nsu ẹdu ke ufọkabasi nnyịn.” Idahaemi enyene uko uyen emi edi eyenete an̄wan eke spirit oro ama akana baptism ama onyụn̄ ọtọn̄ọ ukpepn̄kpọ Bible itiaba ke obio-in̄wan̄ mmọ.
“Ẹyeda Mfri Mmọ”
Kujawy i Pomorze eke urua ke urua ama ewet ntọt emi “Mbufo Ẹyeda Mfri Mmọ Ẹfiọk Mmọ.” Ke ubak, ibuotikọ oro ọkọdọhọ ete ke mme andituak ibuot ke Christendom “ke ataata usụn̄ idaha mme edumbet ido ukpono oro mmọ ẹma ẹkenyịme ke ata akpan n̄kpọ. Mmọ ẹdi ata isio isio ye Mme Ntiense Jehovah ẹmi ẹnamde n̄kpọ ekekem ye se mmọ ẹtịn̄de, ndien mmọ ẹtịn̄ se Bible owụkde.”
Ke ama okowụt nte Mme Ntiense ẹdide isio ye mme inua-okot Christian, ntọt oro akaiso ete: “Eyenen̄ede edi nte ke mbon oro ẹsiakde akpatre mi ifiọkke, ndien ke ata ediwak ini isidaha, mme ata akpan akpanikọ ye mme edumbet mbuọtidem mmọ isịn ke edinam. . . . Ebede ke eduuwem mmọ, Mme Ntiense Jehovah ẹwụt n̄kemuyo oro odude ke mme ikọ ye mme edinam mmọ, ntem ẹwụtde ke mmimọ idịghe ‘prọfet abian̄a,’ utu ke oro, ẹkeme ndida mfri mmọ mfiọk mmọ. ‘Nte owo etet grape ke n̄kukịm, m̀mê etet fig ke mbarekpe?’ (Matthew 7:15-20).”
N̄wan kiet ama ewet leta ọnọ ẹsọk Przyjaciółka eke urua ke urua, esemede ete ke eyen esie ọkpọn̄ Ufọkabasi Catholic onyụn̄ akabade edi kiet ke otu Mme Ntiense Jehovah. Nso ikedi item ewetn̄wed oro? “Edieke eyen fo edide edibuana ye Mme Ntiense Jehovah, ekpepde n̄kpọ onyụn̄ onyịmede ukpepn̄kpọ mmọ, kpukpru ẹdi ubiere esiemmọ, emi ẹnyenede ndidiọn̄ọ nnyụn̄ n̄kpono. . . . Ẹdiọn̄ọ otu ido ukpono emi ke ediwak nti edu ye mme ido oro ẹmade ke n̄kaowo, utọ nte n̄wọrọnda edidianakiet mmọ ye ntotụn̄ọ mbọbọ eke otu, akwa edinam akpanikọ ye editiene mme ibet uwem obio oro ẹnyịmede ketket, ndien ke akpatre, ukeme edidu uwem ke n̄kemuyo ye akpanikọ mmọ, ẹnamde-nam nti n̄kpọ oro ẹtịn̄de. Mmọemi ẹdi nti ido oro ẹsọn̄de urua.”
[Ikọ idakisọn̄]
a Kaban̄a ntọt efen efen, se 1994 Calendar of Jehovah’s Witnesses.
[Ekebe ke page 9]
IDAHA IDỤT ORO
Isua Utom 1993
N̄WAKN̄KAN IBAT ẸMI ẸNỌDE IKỌ NTIENSE: 113,551
MBAHADE: Ntiense 1 ke owo 339
MME ANDIDỤK EDITI: 235,642
UKEM MBAHADE MME ASUANETOP ẸDIDE MME ASIAKUSỤN̄: 7,961
UKEM MBAHADE UKPEPN̄KPỌ BIBLE: 79,131
IBAT ẸKENADE BAPTISM: 8,164
IBAT ESOP: 1,397
ỌFIS N̄KỌK ITIEUTOM: Nadarzyn
[Ndise ke page 9]
Ọfis n̄kọk itieutom Poland ke Lodz ke 1948
[Ndise ke page 9]
Utom n̄wed idiọn̄ọ, June 1948, ke akani Edem Usiahautịn Prussia
[Ndise ke page 9]
Mme anamutom Bethel Poland owo 72, January 1993
[Ndise ke page 9]
Obufa n̄kọk itieutom ke Nadarzyn