Sọn̄ọ Du Ke “Obio Ubọhọ” Nyụn̄ Du Uwem!

“Enye [enyene] nditie ke obio ubọhọ esie tutu akamba oku oro akpa.”—NUMBERS 35:28.

1. Anie edi Osio Usiene iyịp, ndien nso edinam ke enye edisọp ndinam?

JESUS CHRIST, Osio Usiene iyịp Jehovah, ọmọn̄ ọtọn̄ọ en̄wan. Ye udịmekọn̄ angel esie, Osio Usiene emi eyesọp ndinam n̄kpọ mban̄a kpukpru mbon ẹmi ẹnyenede ubiomikpe iyịp emi mîkabakede esịt. Ih, Jesus edinam n̄kpọ nte Ebiereikpe Abasi ke ini “akwa ukụt” emi ekperede usọp usọp. (Matthew 24:21, 22; Isaiah 26:21) Adan̄aoro ubonowo eyebọ utịp ubiomikpe iyịp mmọ.

2. Nso edi n̄kukụre ata ebiet ubọhọ, ndien nso mme mbụme ẹyom ibọrọ?

² Usụn̄ ndibọhọ edi ndisan̄a ke usụn̄ oro akade ndamban̄a obio ubọhọ nnyụn̄ mfehe nyom uwem! Edieke ẹyakde owo odụk obio oro, oyom ubọhọ enyene ndidu do, koro emi edide n̄kukụre ata itie ubọhọ. Edi afo emekeme ndikere ete, ‘Sia ata ediwak nnyịn akananam mîwotke owo ndomokiet, nte nnyịn imenen̄ede inyene ubiomikpe iyịp? Ntak emi Jesus edide Osio Usiene iyịp? Nso idi obio ubọhọ eyomfịn? Nte owo ndomokiet ekeme ndiwọrọ ke enye ye uwem?’

Nte Nnyịn Imenen̄ede Inyene Ubiomikpe Iyịp?

3. Ewe ikpehe ke Ibet Moses edin̄wam nnyịn ndikụt nte ke ediwak biliọn owo ẹtiene ẹnyene ebuana ke ubiomikpe iyịp?

³ Ikpehe kiet ke Ibet Moses eyen̄wam nnyịn ndikụt nte ke ediwak biliọn owo ke isọn̄ ẹtiene ẹnyene ebuana ke ubiomikpe iyịp. Abasi ama anam nditọ Israel ẹtiene ẹnyene ebuana nduduọhọ uduọkiyịp. Edieke ẹkekụtde owo emi akpade ana ndien owo ifiọkke andiwot enye, mme ebiereikpe ẹkenyene ndidomo usụn̄ n̄kosịm mme obio oro ẹkande ẹkụk man ẹdiọn̄ọ obio emi ekperede akan. Man ẹsio ubiomikpe oro ẹfep, mbiowo obio emi etiede nte enyene ubiomikpe iyịp mi ẹkenyene ndiyọk itọn̄ abak enan̄ eke owo mîkadaha enye inam n̄kpọ ke ebeden̄ emi enyenede idịm eke owo mîfụn̄ke isọn̄. Ẹkenam emi ke iso mme oku Levite ‘koro Jehovah ama emek mmọ ndibiere kpukpru mfịna kaban̄a mme afai afai edinam.’ Mbiowo obio oro ẹma ẹyet ubọk mmọ ke enyọn̄ enan̄ emi ẹnyụn̄ ẹdọhọ ẹte: “Idịghe ubọk nnyịn ọkọduọk iyịp emi, enyịn nnyịn ikonyụn̄ ikwe: Dahado nọ ikọt fo Israel, emi afo, O Jehovah akafakde; kûnyụn̄ uda iyịp owo emi mîduehe isop udori ikọt fo Israel.” (Deuteronomy 21:1-9) Jehovah Abasi ikoyomke ẹda iyịp ẹsabade idụt Israel m̀mê ikọt esie nditiene mbuana ke ubiomikpe iyịp.

4. Nso mbụk uduọkiyịp ke Akwa Babylon enyene?

⁴ Ih, utọ n̄kpọ nte owo, m̀mê obio, nditiene mbuana ke ubiomikpe iyịp odu. Kere ban̄a akwa ubiomikpe iyịp oro odorode Akwa Babylon, kpa ukara ererimbot eke nsunsu ido ukpono, ke idem. Kamse, enye ọn̄wọn̄ iyịp mme asan̄autom Jehovah! (Ediyarade 17:5, 6; 18:24) Mme ido ukpono Christendom ẹdọhọ ke itiene Ọbọn̄ Emem, edi ekọn̄, ukara ufịk ido ukpono, ye mme akama-n̄kpa ekọn̄ ido ukpono ẹmenam enye enyene ubiomikpe iyịp ke iso Abasi. (Isaiah 9:6; Jeremiah 2:34) Ke akpanikọ, ana enye enyene akamba ubiomikpe kaban̄a n̄kpan̄a ediwak miliọn owo ke mme ekọn̄ ererimbot iba eke isua ikie 20 emi. Ke ntre, mme andibuana ke nsunsu ido ukpono ọkọrọ ye mme andinọ ibetedem ye mme andibuana ke ekọn̄ ẹmi owo ẹn̄wanade ẹnyene ubiomikpe iyịp ke iso Abasi.

5. Didie ke ndusụk owo ẹbiet mme owotowo ke ndudue ke Israel?

⁵ Ndusụk owo ẹmekokoi ẹwot owo mîdịghe ebe ke unana edinọ ntịn̄enyịn. Mmọ en̄wen ẹtiene ẹbuana ke uwotowo eke otu, ndusụk ẹdide se mme adaiso ido ukpono ẹkpekde ẹte ẹnam ke edi uduak Abasi. Edi mmọ eken ẹkọbọ ẹnyụn̄ ẹwot mme asan̄autom Abasi. Idem edieke edide nnyịn ikanamke mme utọ n̄kpọ oro, nte ededi, nnyịn imetiene inyene nduduọhọ eke otu kaban̄a uwem owo emi atakde koro nnyịn mîkọfiọkke ibet ye uduak Abasi. Nnyịn itie nte owotowo ke ndudue ‘oro mîkoho-koi iwot mbọhọidụn̄ esie, emi mîkaisuaha enye ke mbemiso.’ (Deuteronomy 19:4) Mme utọ owo oro ẹnyene ndiben̄e Abasi nyom mbọm ẹkpenyụn̄ ẹnyene ndifehe n̄ka ndamban̄a obio ubọhọ. Mîdịghe ntre Osio Usiene iyịp eyewot mmọ.

Mme Akpan Utom Jesus

6. Ntak emi ẹkemede ndidọhọ ke Jesus edi iman ubonowo emi ekperede akan?

⁶ Ke Israel osio usiene iyịp ekedi iman akpan̄kpa emi ekperede akan. Man ẹsio usiene ẹnọ kpukpru mbon ẹmi ẹkewotde ke isọn̄ ndien akpan akpan mme asan̄autom Jehovah ẹmi ẹwotde, Osio Usiene iyịp eyomfịn enyene ndidi iman ofụri ubonowo. Jesus Christ anam utom enyeoro. Enye akamana nte mfọnmma owo. Jesus ama ayak uwem esie emi mînyeneke idiọkn̄kpọ ọnọ ke n̄kpa nte uwa ufak, ndien ke enye ama ekeset ke n̄kpa odụk heaven, enye ama ọnọ Abasi ekọmurua esie ke ufọn mme anamidiọk andito ubon Adam ẹmi ẹkpan̄ade. Christ ke ntem ama akabade edi Andifak ubonowo, iman nnyịn emi ekperede akan—kpa Osio Usiene iyịp emi enyenede unen. (Rome 5:12; 6:23; Mme Hebrew 10:12) Ẹdiọn̄ọ Jesus nte edide eyenete ọnọ mme anditiene nde-ikpat esie ẹmi ẹyetde aran. (Matthew 25:40, 45; Mme Hebrew 2:11-17) Nte Edidem eke heaven enye amakabade edi “Nsinsi Ete” ọnọ mbon oro ẹdibọde ufọn ẹto uwa esie nte mme andidu ke idak esie eke isọn̄. Mmọemi ẹyedu uwem ke nsinsi. (Isaiah 9:6, 7) Ntre Jehovah nte odotde emek Iman ubonowo emi nte Osio Usiene iyịp.

7. Nte ata Akwa Oku, nso ke Jesus anam ọnọ mme owo?

⁷ Jesus n̄ko edi Akwa Oku emi mînyeneke idiọkn̄kpọ, oro ẹma ẹkedomo ẹse, onyụn̄ okopde mbọm. (Mme Hebrew 4:15) Ke itieutom oro enye ada ufọn uwa esie emi osiode isop idiọkn̄kpọ anam n̄kpọ ọnọ ubonowo. Ẹkenịm mme obio ubọhọ ẹnọ “nditọ Israel, ye eke esen owo, ye eke odudụn̄ ke otu mmọ.” (Numbers 35:15) Ntre ata Akwa Oku emi ekebem iso ada ufọn uwa esie anam n̄kpọ ọnọ mme anditiene enye oro ẹyetde aran, kpa “nditọ Israel.” Idahaemi ke ẹda enye ẹnam n̄kpọ ẹnọ ‘isenowo’ ye ‘mme odudụn̄’ ke ndamban̄a obio ubọhọ. Mme “erọn̄ en̄wen” eke Ọbọn̄ Jesus Christ ẹmi ẹnyene idotenyịn ndidu uwem nsinsi ke isọn̄.—John 10:16; Psalm 37:29, 34.

Obio Ubọhọ Mfịn

8. Nso idi ndamban̄a obio ubọhọ?

⁸ Nso idi ndamban̄a obio ubọhọ? Enye idịghe ndusụk ebiet ke isọn̄ nte Hebron, kiet ke otu obio ubọhọ eke Levite mbitiokiet emi ekedide ufọk akwa oku Israel. Obio ubọhọ odude mfịn edi ndutịm emi Abasi anamde ndikpeme nnyịn nsio ke n̄kpa emi otode edibiat ewụhọ esie aban̄ade nte iyịp edide edisana n̄kpọ. (Genesis 9:6) Edide ẹkokoi m̀mê ke ndudue, ana kpukpru mme andibiat ewụhọ oro ẹyom edifen nnọ Abasi ye edisọhi idiọkn̄kpọ esie mfep ebe ke edinyene mbuọtidem ke iyịp Akwa Oku, Jesus Christ. Mme Christian oro ẹyetde aran ẹmi ẹnyenede idotenyịn eke heaven ye “akwa otuowo” ẹmi ẹnyenede idotenyịn eke isọn̄ ẹmebọ mme ufọn ẹto uwa Jesus emi osiode isop idiọkn̄kpọ ke idemmọ ẹnyụn̄ ẹdu ke ndamban̄a obio ubọhọ.— Ediyarade 7:9, 14; 1 John 1:7; 2:1, 2.

9. Didie ke Saul eke Tarsus akabiat ewụhọ Abasi aban̄ade iyịp, edi didie ke enye okowụt ukpụhọde edu?

⁹ Mbemiso enye akakabarede edi Christian, apostle Paul ama abiat ewụhọ aban̄ade iyịp. Nte Saul eke Tarsus, enye ama ọkọbọ mme anditiene Jesus idem onyụn̄ onyịmede ete ẹwot mmọ. “Edi,” nte Paul ọdọhọde, “Abasi akatua mi mbọm koro n̄kanamde emi ke unana ifiọk, ke ini mmenịmke ke akpanikọ.” (1 Timothy 1:13; Utom 9:1-19) Saul ama enyene edu editua n̄kpọfiọk, ekem anam owụt ke ediwak utom mbuọtidem. Edi man owo odụk ndamban̄a obio ubọhọ oyom se ikande edinyene mbuọtidem ke ufak.

10. Didie ke ẹkeme ndinyene eti ubieresịt, ndien nso ke ana ẹnam man ẹmụm enye ẹkama?

¹⁰ Owotowo ke ndudue ekekeme ndidu ke kiet ke otu obio ubọhọ Israel n̄kukụre edieke enye ekemede ndiwụt nte ke imọ imenyene eti ubieresịt ye Abasi ke se iban̄ade uduọkiyịp. Man inyene eti ubieresịt, ana nnyịn iwụt mbuọtidem ke uwa Jesus, itua n̄kpọfiọk ke mme idiọkn̄kpọ nnyịn, inyụn̄ ikpụhọde usụn̄ edinam nnyịn. Oyom nnyịn iben̄e eti ubieresịt ke uyakidem emi inamde ke akam inọ Abasi ebe ke Christ, iyarade emi iwụt ebe ke baptism mmọn̄. (1 Peter 3:20, 21) Eti ubieresịt emi anam nnyịn inyene edisana itie ebuana ye Jehovah. N̄kukụre usụn̄ ndinyene eti ubieresịt edi ndinam n̄kpọ ke n̄kemuyo ye se Abasi oyomde nnyụn̄ nnam utom oro ẹnọde nnyịn ke ndamban̄a obio ubọhọ, kpa nte mme oyom ubọhọ ke mme obio ubọhọ eset ẹkenyenede ndinịm Ibet nnyụn̄ nnam utom ẹmi ẹkenọde mmọ ndinam. Akpan utom emi odude ọnọ ikọt Jehovah mfịn edi editan̄a etop Obio Ubọn̄. (Matthew 24:14; 28:19, 20) Ndinam utom oro eyen̄wam nnyịn ndidi nti mme andidụn̄ ke obio ubọhọ eyomfịn.

11. Nso ke ana ifep edieke anade idu ifụre ifụre ke obio ubọhọ odude mfịn?

¹¹ Ndiwọrọ ke obio ubọhọ mfịn edi ndisio idem nnyịn nnyan nnọ nsobo, koro ibịghike Osio Usiene iyịp eyetọn̄ọ en̄wan ye kpukpru mbon ẹmi ẹnyenede ubiomikpe iyịp. Idịghe ini edi emi ndimụm owo ke an̄wa obio emi enyenede ukpeme mi m̀mê ke idiọk ikpehe emi ekperede adan̄a ikọt esie emi ufene ẹsitade mbiet. Nnyịn iyetak ke an̄wa ndamban̄a obio ubọhọ edieke nnyịn iduọkde mbuọtidem ke uwa usio isop idiọkn̄kpọ Akwa Oku oro. (Mme Hebrew 2:1; 6:4-6) Nnyịn n̄ko idinyụn̄ inyeneke uwem edieke nnyịn iketienede mme usụn̄ ererimbot, idade ke mben esop Jehovah, m̀mê iwọn̄ọrede ikpọn̄ ndinen idaha Ete nnyịn eke heaven.—1 Corinth 4:4.

Ndiwọrọ ke Obio Ubọhọ

12. Akani enyene ubiomikpe iyịp edidu ke ndamban̄a obio ubọhọ ebịghi adan̄a didie?

¹² Owotowo ke ndudue ke Israel ekenyene ndidu ke obio ubọhọ “tutu akamba oku oro akpa.” (Numbers 35:28) Ntre n̄kani mme enyene ubiomikpe iyịp ẹnyene ndidu ke ndamban̄a obio ubọhọ mbịghi adan̄a didie? Tutu mmọ ẹtre ndiyom mme utom Akwa Oku oro, Jesus Christ. Paul ọkọdọhọ ete: “Enye onyụn̄ ekeme ndinyan̄a mmọ ẹmi ẹsan̄ade ke Enye ẹkpere Abasi ọyọhọ ọyọhọ.” (Mme Hebrew 7:25) Adan̄a nte ntọi idiọkn̄kpọ ye akani ubiomikpe iyịp akade iso ndidu, ẹyeyom mme utom Akwa Oku man mme anana mfọnmma owo ẹkeme ndinyene eti idaha ye Abasi.

13. Mmanie ẹdi “nditọ Israel” eyomfịn, ndien mmọ ẹnyene ndidu ke “obio ubọhọ” mbịghi adan̄a didie?

¹³ Ti ete ke ẹkenịm mme obio ubọhọ eset ẹnọ “nditọ Israel,” isenowo, ye mme odudụn̄. “Nditọ Israel” ẹdi Israel eke spirit. (Galatia 6:16) Mmọ ẹnyene ndidu ke ndamban̄a obio ubọhọ adan̄a nte mmọ ẹdude uwem ke isọn̄. Ntak-a? Koro mmọ ẹsụk ẹdu ke anana-mfọnmma ikpọkidem ndien ke ntre ẹyom ufọn usio-isop Akwa Oku eke heaven. Edi ke ini mme Christian ẹmi ẹyetde aran ẹkpade ẹnyụn̄ ẹsetde ẹnyene uwem ke heaven, mmọ iyomke aba mme utom usio-isop Akwa Oku; mmọ ẹyekpọn̄ obụkidem ke nsinsi idinyụn̄ inyeneke aba ubiomikpe iyịp. Ye utọ mbon ẹmi ẹnamde ẹset mi ẹmi ẹyetde aran, enyene ndidi Akwa Oku akakpa ke usụn̄ ọnọde usio-isop ye ukpeme.

14. Nso n̄kpọ efen oyom ete mbon oro ẹnyenede idotenyịn eke heaven idahaemi ẹsọn̄ọ ẹdu ke obio ubọhọ odude mfịn?

¹⁴ Edikam nnyene uduot eke owo oyom ete mbon ẹmi ẹdidide ‘nsan̄a mme ada udeme ye Christ’ ẹdu ke ndamban̄a obio ubọhọ tutu ẹkụre utom mmọ eke isọn̄ ke edinam akpanikọ ke n̄kpa. Ke ini mmọ ẹkpade, mmọ ẹyewa uduot eke owo ke nsinsi. (Rome 8:17; Ediyarade 2:10) Uwa Jesus enyene n̄kpọ ndinam n̄kukụre ye mbon ẹmi ẹnyenede uduot eke owo. Ntem, Akwa Oku akpa aban̄a mbon ẹmi ẹdide Israel eke spirit ke ini mmọ ẹsetde nte mme edibotn̄kpọ eke spirit ẹmi ẹdidụn̄de ke nsinsi ke heaven nte ‘mme andikabade mbuana ke uduot Abasi.’—2 Peter 1:4.

15. Mmanie ẹdi ‘isenowo’ ye ‘mme odudụn̄’ eyomfịn, ndien nso ke ata Akwa Oku edinam inọ mmọ?

¹⁵ Ini ewe ke Akwa Oku ‘edikpa’ kaban̄a ‘isenowo’ ye ‘mme odudụn̄’ eyomfịn, ayakde mmọ ẹwọrọ ke ndamban̄a obio ubọhọ? Mbon akwa otuowo ẹmi ikemeke ndiwọrọ ke obio ubọhọ emi ndondo oro akwa ukụt ebede. Ntak mîkemeke? Koro mmọ ẹdisụk ẹdu ke anana-mfọnmma, anam idiọkn̄kpọ ikpọkidem ndien ẹyeyom ẹdu ke idak ukpeme Akwa Oku. Ebede ke ndibọ ufọn nto mme utom usio-isop ke ini itie ubọn̄ ye itie oku esie eke tọsịn isua, mmọ ẹyesịm mfọnmma eke owo. Jesus adan̄aoro eyeyak mmọ ọnọ Abasi kaban̄a ata akpatre udomo nsọn̄ọnda mmọ ebe ke ndikpọhọde Satan ye mme demon esie nyak ke ekpri ibio ini. Sia mmọ ẹbede udomo emi ye unyịme Abasi, Jehovah eyebat mmọ ke ndinen. Ntem mmọ ẹyesịm ata mfọnmma eke owo ọyọhọ ọyọhọ.—1 Corinth 15:28; Ediyarade 20:7-10.a

16. Ini ewe ke mme andibọhọ akwa ukụt mîdiyomke aba mme ufọn utom usio-isop Akwa Oku?

¹⁶ Ntre, ndien, mme andibọhọ akwa ukụt ẹyemụm eti ubieresịt ẹkama ebe ke ndidu ke ndamban̄a obio ubọhọ oro tutu ke utịt Tọsịn Isua Ukara Christ. Nte mme owo ẹmi ẹnamde ẹfọn ẹma, ufọn ididụhe aba inọ mmọ ndiyom mme utom usio-isop Akwa Oku ndien ẹyewọrọ ke idak ukpeme esie. Jesus adan̄aoro eyekpa ọnọ mmọ nte Akwa Oku, koro enye mîdidaha aba iyịp uwa esie emi anamde owo asana inam n̄kpọ ke ibuot mmọ. Ke ini oro mmọ ẹyekpọn̄ ndamban̄a obio ubọhọ oro.

17. Ntak emi ufọn mîdidụhe inọ mbon ẹmi ẹnamde ẹset ke Tọsịn Isua Ukara Christ ndidụk ndamban̄a obio ubọhọ nnyụn̄ ndu do?

¹⁷ Nte ana mbon ẹmi ẹnamde ẹset ke ini Tọsịn Isua Ukara Jesus ẹdụk ndamban̄a obio ubọhọ emi ẹnyụn̄ ẹdu do tutu akwa oku akpa? Baba, koro ebede ke ndikpa mmọ ẹma ẹkpe utịp idiọkn̄kpọ mmọ. (Rome 6:7; Mme Hebrew 9:27) Nte ededi, Akwa Oku eyen̄wam mmọ ẹsịm mfọnmma. Edieke mmọ ẹbede akpatre udomo oro uforo uforo ke Tọsịn Isua ebede, Abasi n̄ko eyebat mmọ ke ndinen onyụn̄ ọnọ ubiọn̄ nsinsi uwem ke isọn̄. Nte ededi, nditre ndinam n̄kpọ ekekem ye se Abasi oyomde eyeda ubiomikpe ye nsobo ọsọk owo ekededi emi mîdibehe akpatre udomo nte mbon nsọn̄ọnda.

18. Kaban̄a itie ubọn̄ ye itie oku Jesus, nso ididu ye ubonowo ke nsinsi?

¹⁸ Mme akwa oku Israel ẹma ẹsikpan̄a ke akpatre. Edi Jesus “ama akabade edi Akwa Oku ke nsinsi, nte utọ Melchizedek asan̄ade.” (Mme Hebrew 6:19, 20; 7:3) Ntre itieutom Jesus nte Akwa Oku emi esịnede ufọt ọnọ ubonowo nditre itreke uwem esie. Nti utịp ẹmi utom esie nte Edidem ye Akwa Oku enyenede eyeka iso ndidu ye ubonowo ke nsinsi, ndien mme owo ẹyewụt esịtekọm ẹnọ enye ke nsinsi ke enye ndikanam utom ke mme itieutom ẹmi. Akan oro, Jesus eyeda iso ke edisana utuakibuot Jehovah ke nsinsi.—Philippi 2:5-11.

Nti Ukpepn̄kpọ Ẹdude Ẹnọ Nnyịn

19. Nso ukpepn̄kpọ aban̄ade usua ye ima ke ẹkeme ndikpep nto ndutịm aban̄ade mme obio ubọhọ?

¹⁹ Nnyịn imekeme ndikpep nsio nsio ukpepn̄kpọ nto ndutịm aban̄ade mme obio ubọhọ. Ke uwụtn̄kpọ, owo ikayakke owotowo ndomokiet emi ekenyenede idiọk usua aban̄a owo emi enye okowotde odụn̄ ke obio ubọhọ. (Numbers 35:20, 21) Ntre didie ke owo ekededi emi odude ke ndamban̄a obio ubọhọ akpayak usua ye eyenete edemede ke esịt esie? Apostle John ekewet ete: “Kpukpru owo eke asuade eyen-ete esie edi obom: ndien mbufo ẹfiọk ẹte, baba obom kiet inyeneke nsinsi uwem ke esịt esie.” Ẹyak nnyịn ke ntre “ima kiet eken; koro ima oto Abasi.”—1 John 3:15; 4:7.

20. Man ẹkpeme ẹsio ke ubọk Osio Usiene iyịp, nso ke ana mbon oro ẹdude ke ndamban̄a obio ubọhọ ẹnam?

²⁰ Man ẹkpeme ẹsio ke ubọk osio usiene iyịp, mme owotowo ke ndudue ẹkenyene ndidu ke obio ubọhọ ikonyụn̄ inaha ẹyo ẹbe ikọt mbiet ufene. Nso kaban̄a mbon ẹmi ẹdude ke ndamban̄a obio ubọhọ? Man ẹbọhọ akwa Osio Usiene iyịp, inaha mmọ ẹwọrọ ke obio oro. Ke akpanikọ, mmọ ẹnyene ndikpeme mbiọn̄ọ mme n̄kpọ etabi ẹdude ndika adan̄a ikọt mbiet ufene, yak idọhọ ntre. Ana mmọ ẹkpeme mbak ẹdiyak ima ererimbot Satan ọkọri ke esịt mmọ. Emi ekeme ndiyom akam ye ukeme, edi uwem mmọ ẹkọn̄ọ ke oro.—1 John 2:15-17; 5:19.

21. Nso utom oro akamade utịp ke mbon ẹmi ẹdude ke obio ubọhọ odude mfịn ẹnam?

²¹ Mme owotowo ke ndudue ke mme obio ubọhọ eset ẹkenyene ndidi mme anam nti utom. Ukem ntre, “nditọ Israel” ẹmi ẹyetde aran ẹnịm eti uwụtn̄kpọ nte mbon idọk ye mme anditan̄a Obio Ubọn̄. (Matthew 9:37, 38; Mark 13:10) Nte ‘isenowo’ ye ‘mme odudụn̄’ ke obio ubọhọ odude mfịn, mme Christian ẹmi ẹnyenede idotenyịn uwem ke isọn̄ ẹnyene ifetutom edisan̄a ye mbon ẹmi ẹyetde aran ẹmi ẹsụk ẹdude ke isọn̄ nnam utom unyan̄a uwem emi. Ndien nso utom emi ọnọde uyụhọ ke emi edi ntem! Mbon ẹmi ẹnamde utom ke edinam akpanikọ ke ndamban̄a obio ubọhọ ẹyebọhọ nsinsi n̄kpa ke ubọk Osio Usiene iyịp. Utu ke oro, mmọ ẹyebọ mme nsinsi ufọn ẹto utom esie nte ata Akwa Oku Abasi. Nte afo eyedu ke obio ubọhọ onyụn̄ odu uwem ke nsinsi?

[Mme Ikọ idakisọn̄]

Didie ke Afo Ọkpọbọrọ?

◻ Ntak ẹkemede ndidọhọ ke ediwak biliọn owo ẹdude ke isọn̄ ẹnyene ubiomikpe iyịp?

◻ Mme nso utom ke Jesus Christ anam kaban̄a ubonowo?

◻ Nso idi ndamban̄a obio ubọhọ, ndien didie ke owo odụk enye?

◻ Ini ewe ke mme owo ẹdiwọrọ ke ndamban̄a obio ubọhọ?

◻ Nso nti ukpepn̄kpọ ke nnyịn ikeme ndikpep nto ndutịm aban̄ade mme obio ubọhọ?

[Ndise ke page 16]

Nte afo ọmọfiọk mme akpan utom ẹmi Jesus Christ anamde?