Ntak Owụtde Esịtekọm?

EDISIAK ọkpọ asakedem ama enyịk Harley ndikpụhọ ubọkọkọ esie ekedide edidiọn̄ masịn n̄kabade ndi ewetn̄wed ọfis. Ke ini ẹkebụpde nte enye ekekerede aban̄a ukpụhọde emi, Harley ama ọdọhọ ete: “Mmataba ndinam utom ye masịn. Edi, ke ofụri akpanikọ, mmenem esịt ye utom nnamde idahaemi n̄kan utom n̄kanamde mbemiso.”

Ke ọnọde ntak uyụhọ esie, Harley obụk ete: “Edi edu edinam mbon ẹmi nnamde utom ye mmọ. Ke mîbietke mbon oro ẹdude ke akpa itie utom mi, eseutom mi ye mme nsan̄autom eke idahaemi ẹwụt esịtekọm ẹban̄a se nnamde, mmọ inyụn̄ itreke ndinọ itoro. Emi anam akwa ukpụhọde.” Ke ekerede nte inyenede ufọn inyụn̄ idide se ẹyomde, Harley idahaemi edi anamutom oro okopde inemesịt.

Mme ikọ itoro m̀mê esịtekọm, ke ini odotde, ẹnen̄ede ẹdi se inemde. Utịp unana esịtekọm, ke n̄kan̄ eken, ekeme nditie ndebe ndebe nte Shakespeare ọkọdọhọde: “Bara, bara, ofụm etuep, afo udiọkke nte unana esịtekọm owo.” Ke mfụhọ, ediwak owo ẹmekụt utọ unana mfọnido oro.

Kpeme Biọn̄ọ Unana Esịtekọm

Ke ererimbot mfịn mme ikọ esịtekọm ofụri esịt ke ẹsop. Ewetn̄wed kiet, ke uwụtn̄kpọ, ama edemede mbụme kiet ete: “Edieke n̄wanndọ ekenyenede ini ndiwet adres ke n̄wed ikot udianndọ 200, ntak emi enye mîkemeke ndinyene ini n̄wet n̄wed ekọm kaban̄a mme enọ 163?” Ediwak ini ẹsitre nditịn̄ idem ekpri ikọ nte “sọsọn̄ọ.” Edu ami-ndi-akpa ke ọkọri ada itie esịtekọm. Idaha emi edi kiet ke otu mme idiọn̄ọ ukperedem ini. Apostle Paul ama ọtọt ete: “Ana mbufo ẹfiọk ẹte ke mme ukperedem ini ẹdiyọhọ ye n̄kpọndịk. Mme owo ẹyenen̄ede ẹdi mme ama idem . . . Mmọ ẹyenen̄ede ẹnana esịtekọm.”—2 Timothy 3:1, 2, Phillips.

Ke mme idaha eken, nneminua ada itie esịtekọm. Mme ikọ esịtekọm ẹsito esịt ye unana ekikere udori idem owo. Nte ededi, nneminua, emi esidide abian̄a ye n̄kponinua, ekeme ndito idiọk uduak eke edinyene uwọrọiso m̀mê ndinyene ndusụk ọkpọkpọ ufọn. (Jude 16) Ke adianade ye edibian̄a andikop, utọ inem inem ndutịn̄ oro ekeme ndidi idiọn̄ọ ntan̄idem ye edida idem ke n̄kpọ n̄kan owo efen. Anie, ndien, okpoyom ndidi se abian̄a abian̄a nneminua ọnọmọde? Edi ata esịtekọm enen̄ede ọnọ nduọkodudu.

Owo emi owụtde esịtekọm ọbọ ufọn oto edinam ntre. Ufiop emi enye okopde ke ndiwụt esịtekọm ke esịt etịp esịn ke inemesịt ye emem esie. (Men Mme N̄ke 15:13, 15 domo.) Ndien sia edide in̄wan̄în̄wan̄ edu, esịtekọm ekpeme enye osio ke utọ etikwo etikwo ntụk nte iyatesịt, ufụp, ye utọk.

‘Mbufo Ẹnyene Esịtekọm’

Bible akpak nnyịn ndikọri edu esịtekọm, m̀mê edinọ ekọm. Paul ekewet ete: “Ẹnọ ekọm ke kpukpru n̄kpọ; koro emi edi se Abasi amade mbufo ẹnam ke Christ Jesus.” (1 Thessalonica 5:17, 18) Ndien Paul ama ọnọ mbon Colossae item ete: “Ẹyak emem Christ akara ke esịt mbufo . . . Mbufo ẹnyụn̄ ẹnyene esịtekọm.” (Colossae 3:15, 16a) Ediwak psalm ẹsịne mme ikọ ekọm, owụtde nte ke esịtekọm oro otode esịt edi edu Abasi. (Psalm 27:4; 75:1) Nte an̄wan̄ade, Jehovah Abasi enem esịt ke ini nnyịn iwụtde esịtekọm ke mme edinam ofụri usen ke uwem.

Edi nso mme n̄kpọ ke ererimbot unana esịtekọm emi anam edi ọkpọsọn̄ n̄kpọ ọnọ nnyịn ndikọri edu esịtekọm? Didie ke nnyịn ikpowụt edu esịtekọm ke uwem eke usen ke usen? Ẹyeneme mme mbụme ẹmi ke ibuotikọ oro etienede.