Mbụk Eyouwem
Imekpep Ata Akpan N̄kpọ ke Ndinam Edisana Utom Nnọ Jehovah
NTE OLIVIER RANDRIAMORA OBỤKDE
“Mmọfiọk ndinyene esisịt mmonyụn̄ mfiọk ndinyene uwak uwak. Ke kpukpru n̄kpọ ye ke kpukpru idaha mmọfiọk ndidia nyụhọ ndinyụn̄ ntie biọn̄ . . . Mmenyene ukeme ndinam kpukpru n̄kpọ ebe ke enye emi ọnọde mi odudu.”—Phil. 4:12, 13.
IKỌ apostle Paul emi enen̄ede an̄wam mi ye Oly an̄wan mi. Ukem nte Paul, nnyịn imekpep ata akpan n̄kpọ—oro edi, ndiberi edem ofụri ofụri ke Jehovah ke adan̄aemi inamde n̄kpọ Esie mi ke Madagascar.
Ami ye Oly ima idodụk ediomi ndọ ke ini Mme Ntiense Jehovah ẹketọn̄ọde ndikpep eka esie Bible ke 1982. Ami n̄ko mma ntọn̄ọ ndikpep Bible, Oly onyụn̄ etiene mi ekpep nte ini akakade. Ima inam ndọ ke 1983, ina baptism ke 1985, inyụn̄ itọn̄ọ usiakusụn̄ unọ un̄wam ke ndondo oro ikanade baptism. Ima itọn̄ọ usiakusụn̄ ofụri ini ke July 1986.
Ima ikabade idi mme akpan asiakusụn̄ ke September 1987. Akpa efakutom nnyịn ekedi ekpri obio kiet emi esop ndomokiet mîkodụhe, ke edere n̄kan̄ usoputịn Madagascar. N̄kpọ nte orụk 18 ye ata ediwak ekpụk ẹdu ke Madagascar, mmọ ẹnyụn̄ ẹnyene nsio nsio ido obio ye ido edinam. Akpan usem mmọ edi Malagasy, edi mmọ ẹnyene n̄kpri n̄kpri usem n̄ko. Ntre, ima itọn̄ọ ndikpep usem emi ẹsemde ke efakutom nnyịn, ndien emi ama anam mmọ ẹdara nnyịn.
Ke nsonso oro, mma nsinọ utịn̄ikọ an̄wa kpukpru Sunday, ndien n̄wan mi onyụn̄ akwak ubọk. Nnyịn mbiba kpọt ikesidụk mbono esop. Ima isinam kpukpru n̄kpọ ke Ufọkn̄wed Utom Ukara Abasi n̄ko, ndien n̄wan mi ama esinam nte etịn̄ ikọ ye owo ke ini anamde n̄kpọ ke ufọkn̄wed. Esịt ama enem nnyịn ke ini esenyịn circuit nnyịn ọkọdọhọde ikûsunam ntre aba.
Idịghe kpukpru ọfiọn̄ ke ikesibọ okụk ekpatọfọn̄ nnyịn sia ndutịm edida leta nsọk mme owo mîkọfọnke. Ntem, ima ikpep ndinyene esisịt. Isan̄ kiet, nnyịn ikenyeneke okụk ndida n̄kpe usụn̄ n̄ka mbono circuit emi ẹkenịmde ke ebiet emi okoyomde usụn̄ ke n̄kpọ nte kilomita 130. Ima iti eti item emi eyenete kiet ọkọnọde nnyịn ete: “Ẹtịn̄ mfịna mbufo ẹnọ Jehovah. N̄kọ utom esie ke mbufo ẹnam.” Ntre, ima ibọn̄ akam inyụn̄ ibiere ndisan̄a ke ukot n̄ka mbono oro. Edi mbemiso idahade, eyenete kiet ama edise nnyịn ke ini nnyịn mîkodorike enyịn onyụn̄ ọnọ nnyịn okụk—ata n̄kemn̄kem okụk ukpeusụn̄!
UTOM CIRCUIT
Ẹma ẹmek mi esenyịn circuit ke February 1991. Etisịm ini oro, mme asuanetop usụkkiet ẹkedu ke ekpri otu nnyịn, ndien ita ke otu oro ẹma ẹna baptism. N̄kpọ nte owo 50 ẹkesidụk mbono esop. Ke ẹma ẹkenọ mi ukpep ẹma, ami ye n̄wan mi ima ika ikanam utom circuit ke Antananarivo, ibuot obio Madagascar. Ke 1993, ẹma ẹnọ nnyịn ikanam utom ke n̄kan̄ edem usiahautịn Madagascar. Uwem ama ọsọn̄ do akan nte ekedide ke akwa obio.
Man ikeme ndika n̄kese mme esop ye mme otu emi ẹdude nsannsan, ima isisan̄a ke ukot ke ikpọ obot emi ẹtiede akai akai ke n̄kpọ nte kilomita 145. Nnyịn ikesikamake ediwak mbiomo. Ndusụk ini, ẹma ẹsisio ndise slide ini oro, ntre, mbiomo nnyịn ama esidobi ini ekededi oro akanade n̄wụt ndise slide ke utịn̄ikọ mi. N̄wan mi ekesikama ukwak uwụt ndise, ke ini ami n̄kamade batri moto.
Man ikeme ndito esop kiet n̄ka en̄wen, ima isisan̄a ke ukot ke n̄kpọ nte kilomita 40 ke usen. Ima isidọk inyụn̄ isụhọde obot, ibe mme akpa, inyụn̄ iwọk mbat. Ikesina ke mben usụn̄ ndusụk ini, edi ima isiyom ekpri obio-in̄wan̄ emi idikụtde ufọk, ina. Ndusụk ini, ikesidọhọ mbon emi nnyịn mîdiọn̄ọke akpa ite ẹnọ nnyịn ebiet ina. Ke ima ikokụt ebiet emi idinade, ima isitọn̄ọ nditem udia emi ididiade. N̄wan mi ama esiben̄e eso utem udia aka mmọn̄ ke akpa oro ekperede akan. Ndien ami nyeben̄e ekụri nsiak ifia nnịm nnọ enye edida etem udia. Kpukpru emi ama esida ini. Ndusụk ini, ima isidep unen iwot, inyụn̄ ifịp.
Ima isika ikokoi ediyere mmọn̄ ke ima ikadia udia ima. Ikesina ke itie utem udia ndusụk ini. Ke ini edịm edepde, ikesibere ke ibibene ide mbak mmọn̄ edidụt ọbrọde nnyịn idem.
Ima isikwọrọ ikọ inọ mbon oro ẹkenọde nnyịn ufọk ina. Ke ini isịmde ebiet emi ikade, nditọete ẹma ẹsinen̄ede ẹfọn ido ẹnyụn̄ ẹkama nnyịn esen. Nte mmọ ẹsinemde esịt ke ini ẹkụtde nnyịn isiyakke iti nte n̄kpọ eketiede ye nnyịn ke usụn̄.
Ke ini idụn̄de ye nditọete, ekesinenem nnyịn nditiene mmọ nnam n̄kpọ ke ufọk. Emi ama esinam emem mmọ utom nditiene n̄wọrọ an̄wautom. Nnyịn ikesiyomke ikpọ n̄kpọ m̀mê san̄asan̄a udia emi nditọete nnyịn mîkekemeke ndinọ.
NDIKA N̄KESE MME OTU ORO ẸDUDE NSANNSAN
Ekesinenem nnyịn ndika n̄kese mme otu oro ẹdude nsannsan, ndien nditọete do ẹma ẹsinyene ekese ndinọ nnyịn inam. Nnyịn ikesinyeneke ini ‘ndiduọk odudu esisịt.’ (Mark 6:31) Ke ebiet kiet, ebe ye n̄wan emi ẹdide Mme Ntiense ẹma ẹkot kpukpru nditọ ukpepn̄kpọ Bible mmọ—owo 40—ẹte ẹdi ufọk mmọ man nnyịn ikpetiene ikpep mmọ n̄kpọ. N̄wan mi ama etiene n̄wan eyenete oro ekpep n̄kpọ nte owo 20 n̄kpọ, ami ye eyenete oro ikpep n̄kpọ nte owo 20 eken. Ima ikụre ndikpep eyen ukpepn̄kpọ kiet n̄kpọ, itọn̄ọ ye en̄wen inikiet inikiet. Nte ini akakade usen oro, ima itre kan̄a ika mbono esop, ndien ekem ifiak itọn̄ọ ukpepn̄kpọ Bible. Imekeme nditre n̄kpọ emi ikesitọn̄ọde usenubọk do ke ama ekebe n̄kanika itiaita okoneyo!
Ke ini ikakade ikese otu en̄wen, kpukpru nnyịn ima ika obio-in̄wan̄ mbọhọ oro ke n̄kpọ nte n̄kanika itiaita usenubọk. Kpukpru nnyịn ikesịne n̄kani ọfọn̄. Ke ima ikasan̄a ke ata anyan ini ke akai, ima ikesịm ke n̄kpọ nte n̄kanika 12 uwemeyo. Ima ikpụhọ ọfọn̄ inyụn̄ itọn̄ọ ndikwọrọ ikọ ke ufọk ke ufọk. Mme asuanetop ẹma ẹwak ẹkan ufọk. Ntre, ikada n̄kpọ nte minit 30 kpọt ikwọrọ ofụri efakutom oro, inyụn̄ ibe ika obio-in̄wan̄ en̄wen. Ke ima ikọkwọrọ ikọ ima, ima iben̄e idem ndifiak nsan̄a ata anyan isan̄ nnyọn̄. Ke nsonso oro, eketie nnyịn nte ke se inamde oro edi ubiatini. Ima ibiat ekese ini inyụn̄ isịn ekese ukeme, edi ikwọrọ ikọ ke n̄kpọ nte hour kiet kpọt. Edi oro ikafịnake nditọete oro ẹtode do. Mmọ ẹkesụk ẹkokop inemesịt.
Otu kiet oro odude nsannsan ke Taviranambo okodu ke enyọn̄ obot. Ima ikụt eyenete nnyịn emi odụn̄de ye ubon esie ke ufọk emi edide ubet kiet do. Ẹkesinịm mbono esop ke ekpri ufọk kiet emi ekperede ufọk esie. Inikiet inikiet, eyenete oro nnyịn ikodụn̄de ke ufọk esie ama ofiori ete, “Nditọete!” Owo ama ada ke enyọn̄ obot en̄wen ọbọrọ “Brọda!” Eyenete oro ama afiak ofiori ete, “Esenyịn circuit edisịm-o!” Owo oro ọbọrọ ete, “Oh!” Etie nte ẹma ẹda ke mme obot en̄wen ẹfiori man mbon oro mîdụhe ikpere ẹkpetiene ẹkop. Ikebịghike, mme owo ẹma ẹtọn̄ọ ndiwọrọ ndi, ndien se ibede owo 100 ẹma ẹdisịm mbemiso mbono esop ọtọn̄ọde.
MME MFỊNA N̄KPỌISAN̄
Ke 1996 ẹma ẹnọ nnyịn ikanam utom ke circuit emi odude ekpere Antananarivo, ke ufọt ufọt Madagascar. Circuit emi n̄ko ama enyene mme mfịna esie. N̄kpọisan̄ ikesidụhe kpukpru ini ndida owo n̄ka mme obio emi ẹdude nsannsan. Akana ika ikese otu emi okodude ke Beankàna (Besakay), emi edide n̄kpọ nte kilomita 240 tọn̄ọ ke Antananarivo. Ke ima ikenyịme okụk ifan̄ emi idikpede, ima idụk ekpri ubomisọn̄ mbiomo emi akakade n̄kan̄ oro. N̄kpọ nte owo 30 ẹma ẹsesịne ke ubọmisọn̄ oro. Ndusụk mmọ ẹkenana ke enyọn̄ ubọmisọn̄ oro, ke adan̄aemi mbon eken ẹdade-da ke edem.
Nte esinyụn̄ awakde nditịbe, ubomisọn̄ oro ama abiara ndien nnyịn ikasasan̄a ika. Ke ima ikasan̄a ke ediwak hour, akamba ubomisọn̄ mbiomo ama awat edi. Mme owo ye mbiomo ẹkeyọyọhọ ubomisọn̄ emi, edi enye ama atuak ada. Nnyịn ima inyịme ndidada sia n̄kukụre ufan̄ oro okodude edi oro. Ima iwat ikesịm inyan̄, edi ẹkediọn̄ ebọp ke ubọk. Ima ifiak itọn̄ọ ndisasan̄a, ndien ima ikesịm obio-in̄wan̄ kiet. Mme akpan asiakusụn̄ ifan̄ ẹkedụn̄ do. Okposụkedi emi mmọ mîkọfiọkke ke nnyịn ke idi, ima idu ye mmọ ikwọrọ ikọ inyụn̄ itie ibet ini emi ẹdidiọn̄de ẹbọp oro ikụre ye ini emi n̄kpọisan̄ edibede.
Urua kiet ama ebe mbemiso n̄kpọisan̄ edi, ndien ima ifiak itọn̄ọ isan̄. Ikpọ ukpe ẹkeyọyọhọ usụn̄. Ima isinụk ubomisọn̄ ke mmọn̄ emi esịmde owo edọn̄, ndien ediwak ini, ima isiduọ idụk mmọn̄ emi nte isụk inụkde. Ima ikesịm obio-in̄wan̄ kiet ke n̄kpọusen ndien do ke ikọwọrọ. Ima ikpọn̄ usụn̄ mbakara isan̄a ke ukot ke in̄wan̄ edesi emi mmọn̄ esịmde owo isịn, ika ebiet emi ikakade.
Akpa nnyịn ikakade ebiet oro edi oro, ntre ima inọ ndusụk owo oro ẹkenamde utom ke in̄wan̄ edesi oro ikọ ntiense inyụn̄ idọhọ mmọ ẹteme nnyịn ebiet emi Mme Ntiense do ẹdụn̄de. Esịt ama enen̄ede enem nnyịn ndifiọk ke mbonutom oro ẹkekam ẹdi nditọete nnyịn.
NDISỊN UDỌN̄ NNỌ MBON EN̄WEN ẸDỤK UTOM UYỌHỌ INI
Ke ofụri ini emi, imenen̄ede ikop idatesịt ndikụt utịp edisịn udọn̄ nnọ mbon en̄wen ẹtiene ẹdụk utom uyọhọ ini. Ke ini ikakade ikese esop emi enyenede mme asiakusụn̄ ofụri ini usụkkiet, ima isịn udọn̄ inọ kpukpru mme asiakusụn̄ ite ẹnịm utịtmbuba ndin̄wam asuanetop kiet etiene odụk utom usiakusụn̄. Ke ini ikafiakde ika esop oro ke ọfiọn̄ itiokiet ẹma ẹkebe, ibat mme asiakusụn̄ ama ọsọsọp ekesịm 22. Nditọete iban iba emi ẹdide mme asiakusụn̄ ẹma ẹsịn udọn̄ ẹnọ mme ete mmọ emi ẹkedide mbiowo ẹte ẹtiene ẹdụk utom usiakusụn̄. Mbiowo mbiba emi ẹma ẹtiene ẹsịn udọn̄ ẹnọ ọyọhọ ebiowo ita ke esop oro ẹte etiene odụk utom usiakusụn̄. Esisịt ini ke oro ebede, ẹma ẹmek ọyọhọ ebiowo ita oro akpan asiakusụn̄. Ekem, enye ye n̄wan esie ẹma ẹtọn̄ọ utom circuit. Nso kaban̄a mbiowo iba eken? Kiet edi esenyịn circuit, enye eken anam utom unyịmesịt ye otu ubọp Ufọkmbono Obio Ubọn̄.
Imesikọm Jehovah kpukpru usen nte enye an̄wamde nnyịn, sia imọfiọk ke nnyịn ikpekemeke ndinam baba n̄kpọ kiet ke ukeme idem nnyịn. Edi akpanikọ ke ndusụk ini imesikpa mba inyụn̄ idọn̄ọ, edi imesikop inemesịt ke ini itide mme utịp utom nnyịn. Jehovah anam utom esie ọkọri. Imokop inemesịt nditiene nnam se ikemede; idi mme akpan asiakusụn̄ idahaemi. Ke akpanikọ, imekpep ata akpan n̄kpọ—oro edi, ndiberi edem ke Jehovah, “enye emi ọnọde [nnyịn] odudu.”
[Se ẹwetde ke ikpọ abisi ke page 6]
Imekpep ata akpan n̄kpọ—oro edi, ndiberi edem ke Jehovah
[Map/Mme ndise ke page 4]
Madagascar, emi ẹsikotde Akwa Ndatndat Isuo, edi ọyọhọ isuo inan̄ oro okponde akan ke ererimbot. Ntan esie edi ikoneto, ndien ediwak san̄asan̄a orụk unam ẹdu do
[Ndise ke page 5]
Esinem nnyịn nditiene n̄kpep mme owo Bible
[Mme ndise ke page 5]
Ukaisan̄ ekedi kiet ke otu akakan mfịna oro ikenyenede