Da Mme N̄wed Nnyịn Nam N̄kpọ ke Eti Ibuot

¹ Ndutịm nnyịn ndikama mme n̄wed nnam n̄kpọ ọkọtọn̄ọ ye edisuan idem 6,000 eke nsiondi magazine Enyọn̄-Ukpeme July 1, 1879. Ọtọn̄ọde ke ini oro, ẹmemịn̄ ẹnyụn̄ ẹsuan ata ediwak nsio nsio n̄wed ke akamba udomo.

² Ọyọhọ Ọyọhọ Ndutịm Etịbe: Ke December 1999, ẹma ẹnam an̄wan̄a nte ke ẹdinọ mme asuanetop ye mbon an̄wa oro ẹnyenede udọn̄ mme magazine ye n̄wed ofụri ofụri ke etịbe, oro edi, ye unana edisiak m̀mê edinọ ekikere nte ke ẹnọ akpan etịbe mbemiso ẹkemede ndibọ n̄wed. Ke ini ẹnọde n̄wed, ẹyebọ mme etịbe unyịmesịt man ẹn̄wam utom ofụri ererimbot eke edikwọrọ eti mbụk. Nnyịn imenyene mbuọtidem nte ke Jehovah ọyọdiọn̄ ndutịm emi.—Men Matthew 6:33 domo.

³ Ndise Mban̄a Mme Idaha ke An̄wautom: Nnyịn iyaka iso ikama mme ntọn̄ọikọ oro ẹma ẹketetịm nte ọfọnde ndida ndemede udọn̄. Ke ebiet owo mîwụtke udọn̄, ufọn idụhe ndinọ n̄wed. Nnyịn iyomke ndibaha n̄wed nnyịn ekededi ebe ke ndinọ mbon oro mîwụtke udọn̄. Ke n̄kan̄ eken, ke ebiet ẹwụtde udọn̄ ndien enyeneufọk enyịmede ndikot n̄wed oro, ẹkeme ndinọ enye. Nnyịn iyom ndida mme n̄wed nnyịn nnam n̄kpọ ke eti ibuot.

⁴ Se itienede mi ẹdi ikọ oro afo ekemede nditịn̄ ke ama okowụt n̄wed: “Edieke afo edimade ndikot n̄wed emi, ami n̄kpama ndiyak enye nnọ fi.” Enyeneufọk ekeme ndibụp ete: “Akpa okụk ifan̄?” Afo emekeme ndibọrọ ete: “Nnyịn inamke utom unyamurua. Nnyịn inyamke-nyam n̄wed emi. Ke ẹnam utom emi nnyịn inamde mi ke mbọhọ mbufo mfịn ke unyịmesịt ke idụt 234 ke ofụri ererimbot man ẹn̄wam mme owo ẹkpep usụn̄ nsinsi uwem. Edieke afo edimade ndinọ etịbe kaban̄a utom emi, ami nyadara ndibọ.”

⁵ Ke ini ọnọde mme magazine, afo emekeme ndidemede mme mbụme mban̄a akpan ibuotikọ ndien ekem ọdọhọ ete: “Ami n̄kpama afo etịm ọfiọk ọyọhọ ntọt ẹnọde ke ibuotikọ emi. Edieke afo edimade ndikot magazine iba ẹmi, ami nyenem esịt ndiyak mmọ nnọ fi.” Edieke ẹbọde mmọ, afo emekeme ndidian do ete: “Enem mi esịt ndikeme ndinam afo enyene ntọt emi. Mmekere ke afo oyokụt ke ibuotikọ emi enen̄ede enyene ufọn. Ke akpanikọ, ami n̄kpama ndifiak ndi urua efen man ndifiọk se idide ekikere fo. Afo oyokụt nte ke ẹmịn̄ Enyọn̄-Ukpeme ke usem 132 ẹnyụn̄ ẹsuan se ibede idem 22,000,000 ke ofụri ererimbot. Edi mme etịbe unyịmesịt ke ẹda ẹnọ utom emi ibetedem. Edieke afo n̄ko akpamade ndinọ ekpri etịbe kaban̄a utom unọ ukpep emi, nnyịn ikpama ndibọ enye.”

⁶ Ke ndusụk idaha, ekeme nditie etikwo etikwo nditịn̄ mban̄a edinọ etịbe ke utom ofụri ererimbot nnyịn. Ke uwụtn̄kpọ, enyeneufọk emi enyenede udọn̄ ekeme ndibụp nte: “Nte afo ọnọ enye ke mfọn?” Nnyịn imekeme ndibọrọ ite: “Edieke afo oyomde ndikot n̄wed emi ndien akpamade ndinyene enye, ih, enye edi okwo. Nyama ndiwaha mi urua en̄wen man nneme se nnyịn itịn̄de iban̄a nnyụn̄ ntịn̄ mme n̄kpọ efen efen nnọ fi mban̄a utom ofụri ererimbot nnyịn.” Ke mme mfiakn̄ka, ẹkeme ndisian enyeneufọk nte isinyenede okụk ndise mban̄a utom nnyịn.

⁷ Mîdịghe enyeneufọk ekeme ndisọsọp mbọ n̄wed oro onyụn̄ ọdọhọ, “Sọsọn̄ọ-o.” Afo emekeme ndibọrọ ntem: “Sọsọn̄ọ nde. Mmọfiọk ke afo ayama enye. Ediwak owo ẹsikere nte isisan̄ade inyene okụk ndise mban̄a utom emi, sia nnyịn inamde enye ke ofụri ererimbot. Ediwak owo ẹmi ẹbọde mme n̄wed nnyịn ẹmewụt esịtekọm ẹban̄a se mmọ ẹdikpepde ẹnyụn̄ ẹnọ ekpri etịbe unyịmesịt man ẹkeme ndika iso nsuan mmọ. Edieke mme owo ẹnamde ntre, nnyịn imesinem esịt ndibọ enye.”

⁸ Nte Ata Udọn̄ Odu? Nte an̄wan̄ade idịghe uduak nnyịn ndisuan mme n̄wed ntịme ntịme. Nnyịn iyom mme n̄wed ẹsịm uduak oro ẹkenamde mmọ, oro edi, ndin̄wam mbon esịt-akpanikọ ndikpep n̄kpọ efen efen mban̄a mme utịbe utịbe uduak Jehovah. Edidi edibaha n̄kpọ ndikpọn̄ n̄wed nnọ mbon oro mîwụtke esịtekọm inọ mme n̄kpọ eke spirit. (Heb. 12:16) Ndisuan n̄wed nte enyenede ufọn edikọn̄ọ ke ukeme fo ndidiọn̄ọ se ata udọn̄ edide. Didie ke utọ udọn̄ oro ediwụt idem? Edinyịme ndinyene nneme ye afo edi eti idiọn̄ọ. Mîdịghe ndinọ n̄kpan̄utọn̄ ke ini afo etịn̄de ikọ, edibọrọ mme mbụme, ye editịn̄ ekikere esie owụt editiene mbuana ke nneme. Nditịn̄ ikọ ye afo ke ukpono ukpono edu mbọhọidụn̄ owụt eti idaha ekikere. Nditiene nse nte afo okotde Bible owụt ukpono ẹnyenede ẹnọ Ikọ Abasi. Ediwak ini, ọyọfọn ndibụp m̀mê mmọ ẹyekot mme n̄wed ẹnọde. N̄ko, afo emekeme ndidọhọ ke iyafiak iwaha man ika iso ke nneme oro. In̄wan̄în̄wan̄ ibọrọ edi n̄kaiso uyarade udọn̄ mmọ. Ke ini afo okụtde mme utọ uyarade udọn̄ esịt akpanikọ oro, eyedi owo oro ayada mme n̄wed oro ọbọde anam n̄kpọ nte ọfọnde.

⁹ Ukpụhọde emi ke usụn̄ oro inamde utom nnyịn ọnọ n̄kaiso uyarade nte ke “nnyịn itiehe nte ediwak owo ẹmi ẹnyanyam ikọ Abasi ẹn̄wana udori.” (2 Cor. 2:17) Enye onyụn̄ owụt n̄ko nte ke nnyịn idịghe eke ererimbot.—John 17:14.

¹⁰ Nte nsobo Akwa Babylon asan̄ade ekpere, mfịghe oro ọkọride-kọri ke esịm kpukpru mbon ido ukpono. Akpan udọn̄ nnyịn edi akpan utom edikwọrọ Obio Ubọn̄ eke ofụri ererimbot ndika iso ye unana n̄kpọ ndibiọn̄ọ, anamde ediwak owo efen efen ẹnyene edinyan̄a.—Matt. 24:14; Rome 10:13, 14.