Nọ Mme Owo eke Kpukpru Isua Emana N̄wed Inemesịt Ubon
1 Eyeneren isua 11 oro otode California ama owụt esịtekọm oro enye enyenede ọnọ n̄wed Ukpọhọde Inemesịt Ubon. Enye ekewet ete: “Ami mmokop inemesịt mban̄a enye, mmonyụn̄ nsịn udọn̄ nnọ mme ubon eken ndikot n̄wed emi koro enye edide ata eti n̄wed. Enye . . . ke an̄wam ubon mi ndinyene emem ye inemesịt ke ufọk nnyịn.” Ifiọkutom uyen emi ekpenyene ndisịn udọn̄ nnọ nnyịn ndinọ mme owo eke kpukpru isua emana n̄wed Inemesịt Ubon. Mme ekikere ifan̄ ẹmi afo ekemede ndiyom ndidomo nse ke utom ukwọrọikọ fo ke February ẹdi ẹmi.
2 Ke ini osobode akparawa owo, afo emekeme ndidọhọ:
◼ “Ediwak n̄kparawa owo ke ẹkere ẹban̄a ndọ. Edi ke ini ẹbụpde m̀mê mmọ ẹben̄e idem ẹnọ ndọ m̀mê iben̄eke, n̄wakn̄kan ẹsidọhọ ke mmimọ itịmke ifiọk. Yak mbuana ye afo se n̄wed emi etịn̄de aban̄a ibuot nneme oro.” Kûbọde ka page 14 ke n̄wed Inemesịt Ubon, nyụn̄ kot ikpehe ekikere 3. Ndien wụt ekpri ibuotikọ kiet kiet emi odude ke ibuot oro. Nọ n̄wed ke etịbe oro ẹsinọde, nyụn̄ nam ndutịm ndifiak n̄ka.
3 Ke ini enemede nneme ye ete m̀mê eka, afo emekeme ndidọhọ:
◼ “Nnyịn ibuana ye mme ete ye eka ndusụk nti ndausụn̄ oro ẹnen̄ede ẹnyene ufọn ke ndibọk nditọ. Ẹwet mmọ ẹdọn̄ ke n̄wed emi Ukpọhọde Inemesịt Ubon.” Kûbọde ka page 55. Kot ikpehe ekikere 10, ekem kot Deuteronomy 6:6, 7, ke ikpehe ekikere 11. Ndien wụt mme udịmikọ oro ẹwetde ke sịghisịghi ubọkn̄wed ke ikpehe ekikere 12 esịm 16. Ka iso ke ndidọhọ ete: “N̄wed emi an̄wam ediwak owo ndikụt unen oro okponde nte mme ete ye eka. Edieke afo edimade ndikot enye, ami nyokop inemesịt ndinọ fi enye emi ke etịbe edide ₦55 (mmemmem ikpaedem, ₦50).”
4 Ke ini etịn̄de ikọ ye akani owo, afo emekeme ndidọhọ:
◼ “Ke mma n̄kokot ibio ibio utịn̄ikọ emi, mbọk tịn̄ nọ mi se afo ekerede.” Kûbọde n̄wed Inemesịt Ubon ka page 169, nyụn̄ kot akpa udịmikọ iba ke ikpehe ekikere 17. Ndien bụp se enye ekerede. Ọkọn̄ọde ke ibọrọ esie, afo emekeme ndikot ekpri ubak n̄kpọ efen efen nto n̄wed oro mbemiso ọnọde enye.
5 Ke afiakde aka mme itie oro ekenịmde n̄wed Inemesịt Ubon, nyene ke ekikere ndidomo nditọn̄ọ ukpepn̄kpọ Bible. Ukpepn̄kpọ 8 ke ediye uduot ekpri n̄wed Oyom m̀mê ibuot 15 ke n̄wed Ifiọk ekeme ndidi ebiet odotde ẹtọn̄ọ. Kan̄a ke emi, ẹyak nnyịn idomo ndin̄wam mme owo eke kpukpru isua emana ndidu inem inem uwem ubon Christian.