Kụt ete ke Amafiak Aka!
1 “Nso inem inem nneme ke oro ekedi ntem! Ana nti ndifiak n̄ka do.” Nte akanam afo emetịn̄ mme ikọ oro ndien ekem efre ebiet owo emi odụn̄de? Ke edide ntre, fiọk ete ke n̄kukụre usụn̄ emi afo ekemede ndikụt nte ke amafiak aka edi ndiwewet enye nnịm.
2 Wet Kpukpru N̄kpọ Nịm: Ke adan̄aemi nneme oro ekenemede ye owo oro enyenede udọn̄ osụk edide obufa ke ekikere fo, da esisịt ini wet kpukpru akpan n̄kpọ aban̄ade ediwaha oro. Wet enyịn̄ owo oro ye nte afo edisan̄ade ọdiọn̄ọ enye. Wet adres esie, edi kûkekere uwet—dụn̄ọde kụt ete ke se ewetde enen. Wet ibuot nneme oro mbufo ẹkenemede, mme itien̄wed ekededi oro afo okokotde, ye utọ n̄wed oro ekenịmde.
3 Edieke afo ọkọkpọn̄de owo oro ye mbụme akanade ọbọrọ ke mfiakn̄ka, wet mbụme oro nịm. Nte afo ama ọfiọk n̄kpọ aban̄ade owo oro, ubon esie, m̀mê ido ukpono esie? Ke edide ntre, wet emi nịm. Do ke ini afiakde aka, afo nditịn̄ mban̄a emi oyowụt ọkpọkpọ udọn̄ oro afo enyenede ke idem owo oro. Ke akpatre, sịn usen ye ini oro afo akanamde akpa ediwaha ye ini ọkọdọhọde ke iyafiak iwaha. Ebede ke ndinyene nnennen n̄wetnnịm n̄kpọ, afo eyeti in̄wan̄în̄wan̄ ndien udufreke en̄wọn̄ọ fo ndifiak n̄waha.—1 Tim. 1:12.
4 Ke ndondo oro okụrede n̄wetnnịm n̄kpọ fo, nịm enye ye mme n̄kpọutom an̄wautom fo eken—ekpat ukwọrọikọ, Bible, n̄wed Reasoning, ye mme n̄wed—man enye odu ekpere kpukpru ini. Mfọnn̄kan n̄kpọ edi ndiwet mbon oro mîdụhe ke ufọk ke san̄asan̄a n̄wetnnịm n̄kpọ oro edide isio isio ye enye emi esidade ewet mme mfiakn̄ka fo. Nte ededi, inamke n̄kpọ m̀mê ukeme oro afo esịnde ke ndiwet mme mfiakn̄ka nnịm okpon adan̄a didie, akpan n̄kpọ edi ndikụt nte ke amafiak aka!
5 Kere Ban̄a Owo Oro: Ke ini etịmde idem ọnọ utom ukwọrọikọ, dụn̄ọde mme n̄wetnnịm n̄kpọ mfiakn̄ka fo. Kere ban̄a owo kiet kiet ye usụn̄ edisobo oro ekemede ndidi mfọnn̄kan ndikama ke ini afiakde aka. Kere nte ọkpọwọn̄ọrede udọn̄ owo oro esịn ke ukpepn̄kpọ Bible. Utọ n̄kọkibuot oro ekeme ndinam utom fo nte ọkwọrọ eti mbụk enen̄ede on̄wụm mfri onyụn̄ anam ọkpọkpọ idatesịt fo okpon.—N̄ke 21:5a, NW.
6 Ntre ini efen oro afo okụtde owo oro akpan̄de utọn̄, kûkere ke afo emekeme nditi mfiakn̄ka oro mmemmem mmemmem. Utu ke oro, wet nịm, dụn̄ọde mme n̄wetnnịm n̄kpọ fo, ka iso ndikere mban̄a owo oro, ndien ekem kụt ete ke amafiak aka!