Mme N̄wed Emi Ẹsiakde ke N̄wed Mbono Esop Uwem ye Utom Nnyịn
APRIL 13-19
it-1-E 883 ¶1
Galeed
Jacob ye Laban ẹma ẹdụk ediomi man owụt ke mmọ ẹbiere mfịna oro mmọ ẹkenyenede. Ntem, Jacob ama ada itiat anam adaha onyụn̄ ọdọhọ “nditọete” esie ẹtan̄ itiat ẹdibok. Ekeme ndidi ẹkenam itiat emi etie nte okpokoro man ẹkpetie do ẹdia udia ediomi oro. Ekem, Laban ama osio itie oro enyịn̄ adian ebok itiat oro, okot enye “Jegar-sahadutha” ke usem Aramaic (Syrian), edi Jacob okokot itie oro “Galeed,” emi ọwọrọde ukem n̄kpọ ke usem Hebrew. Laban ama ọdọhọ ete: “Ebok itiat [Heb., gal] emi edi ntiense [Heb., ʽedh] ke ufọt mi ye afo mfịn emi.” (Ge 31:44-48) Ebok itiat oro (ye adaha itiat oro) ekedi n̄kpọ ntiense ọnọ kpukpru mbon oro ẹkụtde itiat oro. Enye ekedi “Enyọn̄-Ukpeme” [Heb., mits·pahʹ] nte ufan̄ikọ 49 ọdọhọde, sia emi okowụt ke Jacob ye Laban ẹma ẹnyịme ubon mmọ ẹka iso ẹdu ke emem. (Ge 31:50-53) Mme mbụk en̄wen ke Bible ẹwụt ke idịghe Jacob ye Laban kpọt ẹkeda itiat nte n̄kpọ ntiense.—Jos 4:4-7; 24:25-27.
it-2-E 1172
Enyọn̄-Ukpeme
Jacob ama anam ebok itiat onyụn̄ okot enye “Galeed” (emi ọwọrọde “Ebok Ntiense”) ye “Enyọn̄-Ukpeme.” Ekem Laban ama ọdọhọ ete: “Yak Jehovah ese mi ye afo ke ini nnyịn mîkwe kiet eken aba.” (Ge 31:45-49) Ebok itiat emi okowụt ke Jehovah ke ese m̀mê Jacob ye Laban ke ẹdu ke emem nte mmọ ẹken̄wọn̄ọde.
APRIL 20-26
it-2-E 190
Mbụn̄ọ, Owo Emi Ọkọn̄de-Kọn̄ Asan̄a
Jacob Ọkọkọn̄ Asan̄a. Ke ini Jacob ekedide n̄kpọ nte isua 97, enye ama an̄wana ofụri okoneyo ye angel Abasi, imaha ndisana enye nyak tutu angel oro ọdiọn̄ enye. Ini mmọ ẹkesụk ẹn̄wanade do, angel oro ama otụk Jacob ọkpọ ekikoi ndien enye efebede. Oro akanam Jacob ọkọkọn̄ asan̄a. (Ge 32:24-32; Ho 12:2-4) Oro ama anam enye ọdiọn̄ọ ke kpa ye angel oro ọkọdọhọde ke enye ‘an̄wana ye Abasi, (oro edi, angel Abasi) an̄wana ye owo onyụn̄ akan ke akpatre,’ ke idịghe nte enye ekenyenyene odudu akan angel Abasi; Abasi okonyụn̄ ayak n̄kpọ oro etie ntre. Abasi akayak Jacob an̄wana ye angel oro man owụt nte Jacob ekenen̄erede oyom Abasi ọdiọn̄ imọ.
it-1-E 1228
Israel
1. Abasi okosio Jacob Israel ini enye ekedide n̄kpọ nte isua 97. Okoneyo oro Jacob ekebede Itịghede Mmọn̄ Jabbok aka ndikụt Esau eyeneka esie ke enye ọkọtọn̄ọ en̄wan ye owo, idiọn̄ọke ke edi angel. Ke ntak emi Jacob ọkọsọn̄ọde ada an̄wana ye angel oro, ẹma ẹkpụhọ enye enyịn̄ ẹsio Israel man owụt ke Abasi ọdiọn̄ enye. Jacob okokot ebiet oro Peniel man akpada eti se iketịbede oro. (Ge 32:22-31) Nte ini akakade, Abasi ama ọdọhọ ke Bethel ete ke Jacob edikere Israel, ndien ẹkesiwak ndikot enye Israel tọn̄ọ usen oro tutu esịm usen emi enye akpade. (Ge 35:10, 15; 50:2; 1Ch 1:34) Enyịn̄ oro Israel odu ebe itie 2,500 ke Bible, edi ata ediwak ke otu emi aban̄a nditọ Jacob emi ẹkedide idụt Israel.—Ex 5:1, 2.
it-1-E 980
Abasi Edi Abasi Israel
Ke ini Jacob okosobode ye angel Jehovah ke Peniel, ẹma ẹkpụhọ enye enyịn̄ ẹkot Israel, ndien ke enye ama akanam emem ye Esau eyeneka esie, enye ama aka okodụn̄ ke Succoth ekem ọwọrọ okodụn̄ ke Shechem. Enye ama ọbọ nditọ Hamor isọn̄ edep onyụn̄ owụk tent esie do. (Ge 32:24-30; 33:1-4, 17-19) “Ekem enye [ama] anam itieuwa do onyụn̄ okot enye Abasi edi Abasi Israel.” (Ge 33:20) Enye ndikokot itieuwa oro “Abasi edi Abasi Israel” okowụt ke enye ama enyịme onyụn̄ ama obufa enyịn̄ oro Abasi okosiode enye, onyụn̄ ama nte Abasi ekekpemede enye emen edisịm Isọn̄ Un̄wọn̄ọ. Ikọ emi, “Abasi edi Abasi Israel,” odu itie kiet kpọt ke N̄wed Abasi.
APRIL 27–MAY 3
it-1-E 600 ¶4
Deborah
1. Edep Rebekah. Ke ini Rebekah ọkọkpọn̄de ufọk ete esie Bethuel aka Palestine ọkọdọ Isaac, Deborah ama etiene enye aka. (Ge 24:59) Ke Deborah ama okodụn̄ ke ufọk Isaac anam utom ediwak isua, enye ama edidụn̄ ke ufọk Jacob, ndien etie nte emi ekedi ke Rebekah ama akakpa. Etie nte Deborah akakpa n̄kpọ nte isua 125 ke Rebekah ama ọkọdọ Isaac, ndien ẹkebụk enye ke idak akamba eto kiet ke Bethel. Ẹkekot eto oro (Allon-bacuth, emi ọwọrọde “Akamba Eto Ntuan̄a”) ndien emi owụt ke Jacob ye ubon esie ẹma ẹma enye etieti.—Ge 35:8.