Mme N̄wed Emi Ẹsiakde ke N̄wed Mbono Esop Uwem ye Utom Nnyịn
MARCH 2-8
it-1-E 604
Ndikot Owo Edinen
Nso ikanam ẹkot Abraham edinen owo idem mbemiso Christ akakpade?
Ntre, n̄ko, Abraham ama enyene mbuọtidem oro akasan̄ade ye utom, ndien “ẹma ẹbat oro ẹnọ enye ke edinen ido.” (Ro 4:20-22) Edi emi iwọrọke ke enye ye nti owo eken oro ẹkedude uwem mbemiso eyo mme Christian ẹma ẹfọn ẹma inyụn̄ inamke idiọkn̄kpọ ndomokiet. Sia mmọ ẹkenịmde ke un̄wọn̄ọ Abasi oro aban̄ade “mfri” oyosu, ẹnyụn̄ ẹdomode ofụri ukeme mmọ ndinam se Abasi ọkọdọhọde, Abasi ikabatke mmọ isịn ke otu mme anamidiọk. (Ge 3:15; Ps 119:2, 3) Jehovah akada mmọ nte mbon emi mînyeneke ndudue sia mmọ ẹma ẹfọn ẹkan mbon ererimbot emi mîkanamke n̄kpọ Abasi. (Ps 32:1, 2; Eph 2:12) Mbuọtidem mmọ akanam Abasi enyịme ndinam n̄kpọ ye mmọ nnyụn̄ ndiọn̄ mmọ kpa ye oro mmọ mîkọfọnke ima, edi oro ikọwọrọke ke Abasi imaha aba se inende. (Ps 36:10) Mmọ ẹma ẹdiọn̄ọ ke imoyom ẹfak mmimọ ẹsio ke idiọkn̄kpọ, mmọ ẹma ẹnyụn̄ ẹtie ẹbet ini emi Abasi edinọde owo emi edifakde mmọ.—Ps 49:7-9; Heb 9:26.
MARCH 16-22
it-1-E 1242
Jacob
Jacob iketiehe nte Esau, emi ekedide eyen ima ete esie, okonyụn̄ edide atautop onyụn̄ amade ndisidu ke ikọt. Bible ọdọhọ ke Jacob ekedi “owo emi mînyeneke nduduọhọ [Heb., tam] onyụn̄ odụn̄ ke tent.” Enye ikedịghe owo ntịme, ekesibọk ufene, esinyụn̄ odu ke ufọk anam utom, ndien eka esie ama enen̄ede ama enye. (Ge 25:27, 28) Ikọ Hebrew oro tam odu n̄ko ke mme itien̄wed en̄wen, ndien ẹda enye ẹtịn̄ ẹban̄a owo emi Abasi amade. Ke uwụtn̄kpọ, Mme N̄ke 29:10 ọdọhọ ke “mbon emi ọdọn̄de mmọ ndiduọk iyịp ẹsasua owo emi mînyeneke nduduọhọ,” ndien Psalm 37:37 ọdọhọ ke “ini iso owo [eke mînyeneke nduduọhọ] editie emem emem.” Bible ọdọhọ n̄ko ke Job “ikenyeneke nduduọhọ, [Heb., tam] ke “enye ama enen” ke iso Abasi.—Job 1:1, 8; 2:3.
it-1-E 835
Akpan, Akpa Eyen
Toto ke eset, ẹsinen̄ede ẹkpono owo emi edide akpan ke ubon, ndien enye ekesidi ibuot ubon ete esie ama akpa. Ẹkesinọ enye mbak iba ke inyene ete esie. (De 21:17) Joseph ọkọdọhọ Reuben etie ke itie akpan ke ini mmọ ẹkeyomde ndidia udia. (Ge 43:33) Edi idịghe kpukpru ini ke Bible esibem iso asiak enyịn̄ owo emi edide akpan. Ẹsiwak ndibem iso nsiak eyen emi ọkọwọrọde etop akan m̀mê enye emi ekenen̄erede anam n̄kpọ Abasi, utu ke ndibem iso nsiak akpan.—Ge 6:10; 1Ch 1:28; men Ge 11:26, 32; 12:4 domo.
it-2-E 245 ¶6
Nsu
Bible ọdọhọ owo okûsu nsu, edi oro iwọrọke ke ana owo etịn̄ ofụri akpanikọ ọnọ mbon emi mînyenke unen ndifiọk se iketịbede. Jesus Christ ọkọdọhọ ete: “Ẹkûmen edisana n̄kpọ ẹnọ mme ebua, ẹkûnyụn̄ ẹtomo mme pearl mbufo ẹbono mme edi ke iso, mbak mmọ ẹdidịghi mmọ ke ikpat ẹnyụn̄ ẹwọn̄ọde ẹda ẹwai mbufo.” (Mt 7:6) Ntak edi oro Jesus mîkesibọrọke ndusụk mbụme nnennen nnennen m̀mê nditịn̄ ofụri se enye aduakde edieke enye okụtde ke oro ekeme ndida mfịna ndi. (Mt 15:1-6; 21:23-27; Joh 7:3-10) Nte ikponyụn̄ isede se Abraham, Isaac, Rahab, ye Elisha ẹkenamde edi oro ke ini mmọ ẹkebian̄ade m̀mê ẹtrede nditịn̄ ofụri akpanikọ nnọ mbon oro mîkokponoke Jehovah.—Ge 12:10-19; ib. 20; 26:1-10; Jos 2:1-6; Jas 2:25; 2Nd 6:11-23.
MARCH 23-29
it-1-E 341 ¶6
Edidiọn̄
Ke eyo Bible, ete ekesiwak ndidiọn̄ nditọ esie esisịt ini mbemiso enye akpade. Ẹkeda emi nte ata akpan n̄kpọ. Ntre Isaac ama ọdiọn̄ Jacob ekere ke Esau akpan imọ ke idiọn̄ oro. Isaac ọkọdọhọ ke n̄kpọ ọyọfọn Jacob akan Esau eyeneka esie. Anaedi Isaac ama eben̄e Jehovah anam se imọ itịn̄de oro, sia enye ama ọsọn̄ inyụn̄ ikwe usụn̄ aba. (Ge 27:1-4, 23-29; 28:1, 6; Heb 11:20; 12:16, 17) Nte ini akakade, Isaac ama okokoi ọdiọn̄ Jacob onyụn̄ etịn̄ n̄kpọ en̄wen adian ke akpa edidiọn̄ oro. (Ge 28:1-4) Mbemiso Jacob akpade, enye ama ọdiọn̄ nditọ Joseph iba ekem ọdiọn̄ nditọ esie. (Ge 48:9, 20; 49:1-28; Heb 11:21) Kpasụk ntre, Moses ama ọdiọn̄ ofụri idụt Israel mbemiso akpade. (De 33:1) Kpukpru mbon emi ẹkediọn̄de owo mi ẹketịn̄ se iditịbede ke ini iso. Ndusụk ini, owo emi ọdiọn̄de owo esidori owo emi enye ọdiọn̄de ubọk ke ibuot ke ini ọdiọn̄de enye.—Ge 48:13, 14.
MARCH 30–APRIL 5
it-2-E 341 ¶3
Ndọ
Usọrọ Ndọ. Kpa ye oro owo mîkesidianke ndọ ke Israel eset nte ẹdiande mfịn, ẹma ẹsinam usọrọ ndọ ke Israel ndien emi ekesidi ata ini idatesịt. Ke usen ndọ, n̄wanndọ ama esinen̄ede eben̄e idem ke ufọk mmọ. Akpa, enye esiyere mmọn̄ onyụn̄ ọfiọn̄ọ ata enem utebe aran. (Men Ru 3:3 ye Eze 23:40 domo.) Ndusụk ini, iban en̄wen ẹma ẹsin̄wam enye, enye ama esibọbọ ubọpisịn, onyụn̄ esịne afia ọfọn̄, ndien ediwak ini ẹkesidọdọk ọfọn̄ oro ẹdọn̄ fansi. Ẹkesinam emi ẹtiene nte owo enyenede okụk. (Jer 2:32; Edi 19:7, 8; Ps 45:13, 14) N̄wanndọ ama esida nsio nsio n̄kpọ abana idem, edieke enye ekemede ndinam oro (Isa 49:18; 61:10; Edi 21:2), ekem ofụhọ mfefere ọfọn̄, emi etiede nte ufụhọn̄kpọ emi ofụkde owo tọn̄ọ ke ibuot sịm ikpat. (Isa 3:19, 23) Emi akanam Laban ekeme ndibian̄a Jacob man Jacob ididiọn̄ọ ke Leah ke enye ọnọ imọ utu ke Rachel. (Ge 29:23, 25) Rebekah ama emen ufụhọn̄kpọ ofụhọ ke idem ke ini enye okụtde Isaac. (Ge 24:65) Emi okowụt nte n̄wan okposụkde ibuot ọnọ ebe esie sia ebe edide ibuot ọnọ n̄wan.—1Co 11:5, 10.
it-1-E 50
Ndida Eyen Nnyene
Rachel ye Leah ẹkebat nditọ emi ifịn iban mmọ ẹmande ẹnọ Jacob nte nditọ mmọ, emi ‘ẹmande ẹdori mmọ ke edọn̄.’ (Ge 30:3-8, 12, 13, 24) Ẹma ẹtiene ẹdeme n̄kpọ ẹnọ nditọ emi ukem nte ẹkenọde nditọ emi ata iban Jacob ẹmande. Jacob okobon nditọ emi ifịn iban emi ẹkemande, ndien Rachel ye Leah ẹma ẹnyene unen ndidọhọ ke mmimọ inyene nditọ oro sia mme eka nditọ oro ẹkedi ifịn mmọ.