Ibuot 11

John Ọdiọn̄ Usụn̄

ISUA efụteba ẹmebe tọn̄ọ nte Jesus ekedi eyen isua 12 emi obụpde mme andikpep mbụme ke temple. Edi ini-utọ eke isua 29 C.E., ndien etie nte kpukpru owo ke ẹtịn̄ ẹban̄a John, eyen eyeneka eka Jesus, oro ọkwọrọde ikọ ke kpukpru obio oro ẹdude ẹkanade Akpa Jordan.

John ke akpanikọ edi owo emi enyenede ndyọ, ke idem ye ke uyo ikọ. Edisịnen̄kpọ esie edi eke idet camel, ndien enye ọbọbọ ikpaunam ke isịn. Udia esie edi n̄kụkun̄pọyọriyọ ye aran ọkwọk. Ndien etop esie? “Mbufo ẹkabade esịt; koro Ubọn̄ Heaven ke ekpere.”

Etop emi anam mme andikpan̄ utọn̄ nnọ enye ẹkop nduaidem. Ediwak owo ẹkụt nte oyomde mmọ ẹkabade esịt, oro edi, ndikpụhọde edu mmọ ndinyụn̄ n̄kpọn̄ n̄kani usụn̄uwem mmọ nte se mîfọnke. Ntre ata uwak ibat owo ẹto ke ofụri n̄kann̄kụk Jordan oro, ye idem ke Jerusalem, ẹbịne John, enye onyụn̄ onịm mmọ baptism, obụkde mmọ ke esịt mmọn̄ Jordan oro. Ntak-a?

John onịm mme owo baptism ke idiọn̄ọ, m̀mê edinyịme, ọyọhọ edikabade esịt mmọ ke mme idiọkn̄kpọ oro ẹkenamde ẹdian Ibet ediomi Abasi. Ntem, ke ini ndusụk mme Pharisee ye mme Sadducee ẹwọrọde ẹdi ke Jordan, John obiom mmọ ikpe. Enye ọdọhọ ete, “Mbufo nditọ urụkikọt . . . Ẹsion̄o nan̄a mfri eke ekemde ye edikabade esịt: ẹkûnyụn̄ ẹkere ndidọhọ ke esịt mbufo, ẹte, N̄kọm nnyịn imenyene Abraham ke ete: koro ndọhọ mbufo nte, Abasi emekeme ndinam mme itiat ẹmi ẹdaha ẹdi nditọ Abraham. Edi kpa idahaemi ẹmenịm ekụri ke etak eto: ntre ke ẹkpi kpukpru eto eke mîn̄wụmke mfri eke eyede ẹduọk, ẹmen, ẹsịn ke ikan̄.”

Ke ntak ofụri n̄kpan̄utọn̄ oro ẹnọde John, mme Jew ẹdọn̄ mme oku ye mme Levi ẹbịne enye. Mmọemi ẹbụp ẹte: “Afo edi anie?”

John etịn̄ an̄wan̄wa ete, “Ndịghe Christ.”

Mmọ ẹbụp enye ẹte, “Edi anie ndien? Edi Elijah?”

Enye ọbọrọ ete, “Ndịghe.”

“Nte edi prọfet oro?”

“Baba.”

Ntre mmọ ẹyịre ọkpọsọn̄ ọkpọsọn̄ ẹte: “Ededi anie nan̄a? Sian nnyịn, man nnyịn imen ibọrọ isọk mmọemi ẹkedọn̄de nnyịn; onyịme nso ndien aban̄a idemfo?”

John anam an̄wan̄a ete: “Ami ndi uyo andifiori ke desert, ete, Ẹnen̄ede usụn̄ Jehovah, kpa nte Isaiah prọfet eketịn̄de.”

“Nsinam afo onịmde owo baptism nan̄a, edieke afo mûdịghe Christ, mûnyụn̄ udịghe Elijah, mûnyụn̄ udịghe prọfet oro?” ntre ke mmọ ẹbụp ẹyom ndifiọk.

Enye ọbọrọ mmọ ete, “Ami nda mmọn̄ nnịm owo baptism; edi owo emi mbufo mîdiọn̄ọke mmọ ke ufọt mbufo ada; edi Enye etiene mi ke edem.”

John ke ọdiọn̄ usụn̄ ke ndinam mme owo ẹnyene esịt eke ọfọnde man ẹnyịme Messiah, oro edikabarede edi Edidem. Kaban̄a Enyeemi, John ọdọhọ ete: “Enyeemi etienede Mi ke edem enyene odudu akam mi, emi mmendotke ndikama ikpaukot Esie.” Ke akpanikọ, John akam ọdọhọ ete: “Enyeemi etienede mi ke edem akabade ebem mi iso, koro Enye ekebemde mi iso odu.”

Ntre, etop John oro, “Ubọn̄ Heavan ke ekpere,” edi edinọ an̄wan̄wa ntọt nte ke utom Edidem oro Jehovah emekde, kpa Jesus Christ, ọmọn̄ ọtọn̄ọ. John 1:​6-8, 15-28; Matthew 3:​1-12; Luke 3:​1-18; Utom 19:⁠4.

▪ Nso orụk owo ke John edi?

▪ Ntak emi John onịmde mme owo baptism?

▪ Ntak emi John ekemede ndidọhọ ke Obio Ubọn̄ oro ke ekpere?