Ibuot 75
Se Inọde Inemesịt
KE INI utom ukwọrọikọ esie ke Galilee, Jesus ama anam mme utịben̄kpọ, ndien idahaemi enye afiak anam n̄kpọ ẹmi ke Judea. Ke uwụtn̄kpọ, enye ebịn demon efep ke idem eren oro demon akanamde enye edi imụm. Otuowo ẹdu ke n̄kpaidem, edi mbon nsụkuyo ẹdemede ukem eneni oro ẹkedemerede ke Galilee. Mmọ ẹdọhọ ẹte: “Enye ada Beelzebub, ọbọn̄ mme demon, ebịn mme demon ọduọk.” Mmọ eken ẹyom Jesus ọnọ n̄kpọ ntiense okponde akan ndinam ẹfiọk owo emi enye edide, ndien mmọ ẹdomo enye ke ndibụp mban̄a idiọn̄ọ emi otode heaven.
Sia ọfiọkde se mmọ ẹkerede, Jesus ọnọ mbon nsụkuyo eke Judea ukem ibọrọ oro enye ọkọnọde mbon oro ke Galilee. Enye ọdọhọ ete ke kpukpru obio ubọn̄ oro abaharede ada an̄wana ye idemesie eyeduọ. Enye obụp ete, “Edieke Satan n̄ko abaharede ada an̄wana ye idemesie, obio esie edikeme didie ndisọn̄ọ nda?” Enye owụt itie afanikọn̄ oro mme andisụk enye uyo ẹdude ke ndidọhọ: “Edieke ndade nnuenubọk Abasi mbịn mme demon nduọk, Ubọn̄ Abasi ama osịm mbufo.”
Mbon oro ẹkụtde mme utịben̄kpọ Jesus ẹkpenyene ndinyịme mmọ ke ukem usụn̄ emi mbon oro ẹkenamde, emi ke ediwak isua ikie ke mbemiso ẹkekụtde nte Moses anamde utịben̄kpọ. Mmọ ẹkefiori ẹte: “Nnuenubọk Abasi edi emi.” Ekedi “nnuenubọk Abasi” n̄ko ekewet Ibet Duop oro ke itiat n̄wed. Ndien “nnuenubọk Abasi”—kpa edisana spirit esie, m̀mê anamutom odudu—edi se in̄wamde Jesus ndibịn mme demon nduọk nnyụn̄ nnam mbon udọn̄ọ ẹkop nsọn̄idem. Ntre Obio Ubọn̄ Abasi ke akpanikọ osịm mbon nsụkuyo emi, koro Jesus, Edidem Obio Ubọn̄ oro ẹma ẹkemek, odu do nnennen ke otu mmọ.
Jesus ndien anam an̄wan̄a nte ke ukeme imọ ndibịn mme demon nduọk edi n̄kpọ ntiense ke odudu oro imọ inyenede ikan Satan, kpa nte esitịbede ke ini owo emi okopde odudu akan edide edikan owo emi okotịmde idem mfọn mfọn ye n̄kpọekọn̄ etie ekpeme ufọk ubọn̄ esiemmọ. Enye n̄ko afiak ọnọ uwụtn̄kpọ oro enye ọkọnọde ke Galilee aban̄a ndedehe spirit. Spirit oro ọwọrọ ke idem owo, edi ke ini owo oro etrede ndida nti n̄kpọ nyọhọ ke ukpọk ufan̄ oro, spirit oro aka akada itiaba en̄wen edi, ndien ukperedem itie owo oro ọdiọk akan mbemiso.
Ke adan̄aemi okopde ukpepn̄kpọ ẹmi, n̄wan kiet ke otuowo, sia otụkde enye ke idem, ofiori ete: “Ọfọfọn ọnọ idịbi eke akamande Fi, ye eba eke Afo akawapde.” Sia udọn̄ kpukpru iban Jew edide ndidi eka prọfet ye akpan akpan ndidi eka Messiah, ana in̄wan̄în̄wan̄ kemi n̄wan emi etịn̄de ntem. Eyedi enye ekere ke Mary ekpenyene ndikop inemesịt akpan akpan sia edide eka Jesus.
Nte ededi, Jesus ọsọsọp enen̄ede n̄wan emi kaban̄a se inọde ata inemesịt. Enye ọbọrọ ete: “Akam ọfọn akan ye mmọemi ẹkopde ikọ Abasi, ẹnyụn̄ ẹkpemede ndinam.” Akananam Jesus idọhọke ite ke akpana ẹnọ Mary, eka imọ san̄asan̄a ukpono. Utu ke oro, enye okowụt ete ke ẹkụt ata inemesịt ke ndidi anam-akpanikọ asan̄autom Abasi, idịghe ke ebuana obụk ekededi m̀mê se owo anamde.
Nte enye akanamde ke Galilee, Jesus n̄ko akaiso ndisua nnọ mme owo ke Judea oro ẹyomde idiọn̄ọ eke otode heaven. Enye ọdọhọ mmọ ete ke owo idinọhọ idiọn̄ọ ndomokiet ke mîbọhọke idiọn̄ọ Jonah. Jonah ama akabade edi idiọn̄ọ ke enye ndidu ke idịbi iyak ke usen ita ye ke uko uko ukwọrọikọ esie, oro akanamde mbon Nineveh ẹkabade esịt. Jesus ọdọhọ ete: “Ndien sese, Enyeemi okponde akan Jonah odu mi.” Kpasụk ntre, ọbọn̄-an̄wan Sheba ama odu ke n̄kpaidem ke ọniọn̄ Solomon. Jesus ọdọhọ n̄ko ete: “Ndien sese, Enyeemi okponde akan Solomon odu mi.”
Jesus anam an̄wan̄a ete ke ini owo odomode utuenikan̄, enye inịmke utuenikan̄ emi ke ubet unịm-n̄kpọ m̀mê ke idak aban̄, edi ọdiọk ke uwụk-utuenikan̄ man mme owo ẹkụt un̄wana. Iso-ọfọn enye anam ẹfiọk ẹte ke ndinọ ukpep nnyụn̄ nnam mme utịben̄kpọ ke iso mbon oro ẹsọn̄de obotitọn̄ mi ke otuowo emi etie nte ẹfofụk un̄wana utuenikan̄. Enyịn utọ mme andikpan̄ utọn̄ nnọ emi itịmke ise, mîdịghe itịmke iwụhọ, ntre owo inamke uduak oro ẹkekerede kaban̄a mme utịben̄kpọ esie.
Idahaoro ke Jesus osụk ebịn demon ọduọk onyụn̄ anam imụm etịn̄ ikọ. Akpana emi anam mme owo ẹnyene enyịn eke otịmde ese, m̀mê oro otịmde owụhọ, ke nditoro ubọn̄ ubọn̄ edinam emi nnyụn̄ ntan̄a eti mbụk! Edi, ye mbon nsụkuyo mi, emi idịghe se itịbede. Ntre Jesus eberi ete: “Kpeme ndien mbak un̄wana eke odude fi ke idem edidi ekịm. Edi edieke ofụri idem fo ọyọhọde ye un̄wana, baba n̄kịm-n̄kịm ubak kiet mînyụn̄ idụhe ke esịt, enye eyeyama ofụri ofụri, kpa nte emi utuenikan̄ ayamade ọnọ fi un̄wana.” Luke 11:14-36; Exodus 8:18, 19; 31:18; Matthew 12:22, 28.
▪ Nso ke ẹnam ẹban̄a Jesus ndikọk eren oro udọn̄ọ?
▪ Nso idi “nnuenubọk Abasi,” ndien didie ke Obio Ubọn̄ Abasi osịm mme andikpan̄ utọn̄ nnọ Jesus?
▪ Nso inọ ata inemesịt?
▪ Didie ke owo ekeme ndinyene enyịn oro enen̄erede ese?