Ererimbot Oro Mme Inọ Mîdụhe

ORO okotịbe ata usọp usọp. Eren kiet emi ekesịnede n̄kpọ nte ọfọnde ama anyan Antônioa ikan̄ ke ibuot ke iso ufọk esie ke São Paulo, Brazil, ọdọhọ enye ọnọ imọ ukpọhọde ye mme n̄wed oro ẹnọde unen nte andinyene moto esie, onyụn̄ awat adaha usọp usọp.

Ke Rio de Janeiro, irenowo inan̄ oro ẹkekamade ikan̄ ẹma ẹn̄wana ẹkan owo oro ekekerede Paulo ke iso eyen esie an̄wan emi ekedide isua duop ke emana. Ekem, ke ẹma ẹkewat ẹkesịm ufọk esie, mme inọ oro ẹma ẹdụk ẹnyụn̄ ẹyịp se mmọ ẹkeyomde, ẹdọn̄de n̄kpọ ẹyọhọ moto Paulo iba. Ke ẹdịghede ndiwot n̄wan Paulo, mmọ ẹma ẹmen enye ye owoutom kiet nte mbon oro ẹmụmde ke ukat ẹka ufọkurua unyam n̄kpọmbana Paulo emi okodude ke esịt obio, emi mmọ ẹkekwọkde kpukpru ọsọn̄urua n̄kpọ. Okposụkedi, owo mîkodorike enyịn, mme inọ oro ke ukperedem ẹma ẹnọ ikot ke urụk ukopikọ, ẹtịn̄de ebiet oro mmọ ẹkekpọn̄de mme moto oro.

Nso n̄kpọ mfụhọ ke edi ntem ndidi se ẹbọde okụk ye inyene oro ẹkebọde ufen ẹn̄wana ke n̄kanubọk! Okposụkedi nte Antônio m̀mê Paulo mîkabiatke ibet, mmọ en̄wen ẹma ẹbiat ibet. Mmọ ẹkeme ndiwot m̀mê ndibiomo inọ oro ndo, mîdịghe mmọ ẹkeme nditaba uwem mmọ. Ke uwụtn̄kpọ, ke ini akparawa kiet akawamarede n̄wan kiet emi otode Brazil n̄kanika itọn̄ubọk esie ọbọ, enye ke iyatesịt ama osio ikan̄ ke ekpat esie otop inọ oro, owotde enye. Nso ikedi utịp? O Estado de S. Paulo ọtọt ete: “Mbon oro ẹkekụtde n̄kpọntịbe oro ẹma ẹtoro edu emi n̄wan oro owo mîkọdiọn̄ọke mi ekenyenede, ndien owo ndomokiet ikoyomke ndinọ bodisi un̄wam ndiyom enye n̄kụt.” Okposụkedi mmọ ẹyomde ererimbot oro mme inọ mîdụhe, mme Christian isisioho usiene nte n̄wan oro akanamde. Sia usiene enyenede Abasi, mmọ ẹnam mme ikọ oro ke Mme N̄ke 24:19, 20: “Kûyat esịt ye oburobụt owo: kûnyụn̄ ufịbe mme idiọkowo ufụp: koro oburobụt owo mîdinyeneke eti utịt.”

Edi edieke ẹmụmde fi, nso ke afo ekeme ndinam? N̄kpọntịbe kiet ke Rio de Janeiro owụt nte edinam n̄kpọ sụn̄sụn̄ edide akpan n̄kpọ. Christian kiet, Heloísa, ama odụk bọs aka ndinịm ukpepn̄kpọ Bible. Irenowo iba ẹma ẹtọn̄ọ ndiyịp n̄kpọ mbonisan̄ oro. Ke ini okosịmde itiembehe bọs emi enye okoyomde ndiwọrọ, Heloísa ama etịn̄ ọnọ mmọ ete ke imọ idi kiet ke otu Mme Ntiense Jehovah ndien ke imọ ika ndinịm ukpepn̄kpọ Bible. Enye ama owụt Bible ye n̄wed un̄wam ukpepn̄kpọ esie. Ye unana edibọ enye mme n̄kpọ ke n̄kanubọk, inọ oro ẹma ẹyak enye ọwọrọ. Nte ededi, owo ikayakke owoisan̄ efen ọwọrọ. Awat bọs oro ke ukperedem ama ọdọhọ ete ke akananam imọ ikwe utọ n̄kpọ oro.

Regina n̄ko ama anam n̄kpọ sụn̄sụn̄ ke ini irenowo iba oro ẹkekamade ikan̄ ẹkedọhọde enye ete odụk moto esie. Ke owụtde ọkpọkpọ magazine Awake! esie, Regina ama ọnọ ikọ ntiense. Sia mme inọ oro ẹkedude ke nnyekidem, enye ama ọdọhọ mmọ ete ẹkụbọde itie udọn̄ n̄kpọ ke ebiet oro enye esidọn̄de sweet. Edi ke mmọ ẹkụtde mme kaset Kingdom Melodies, mmọ ẹma ẹtọn̄ọ ndikpan̄ utọn̄ nnọ ikwọ oro. Sia idaha oro akakabarede etie ufan ufan akan, mme inọ oro ẹma ẹbiere ndikpọn̄ Regina ke ọkpọusụn̄ ye unana edinọ enye unan, ẹnọde enye nsọn̄ọ nte ke enye eyekụt owo mfọnido oro edinọde enye un̄wam. Ke ama akasan̄a ke minịt duop, enye ama okụt ufọk, edi enyeneufọk oro ikonịmke mbụk esie ke akpanikọ, ọdọhọde ete: “Afo utiehe nte owo emi n̄kpọ anamde; afo etie ata sụn̄sụn̄.”

Okposụkedi ekemede ndidi owo idinọhọ owo unọmọ oro unan ke ikpọkidem, utọ ubiak ubiak n̄kpọntịbe oro ekeme ndikama ata idiọk utịp ke ukperedem. Nte O Estado de S. Paulo ọtọtde, ‘Owo unọmọ oro ekeme ndikabade anana ifụre, enyenede usua ọnọ mme andibuana ke ubon m̀mê mbon oro ẹdomode ndinọ enye un̄wam, ikemeke ndinyene mbuọtidem ke idem mmọ en̄wen, ke ekerede kpukpru ini aban̄a n̄kpọntịbe oro, ekeme nditie enye ke idem nte ke ererimbot ọyọhọ ye ukwan̄ido.’ Ke edide isio ye oro, owo unọmọ oro eberide edem ke Jehovah Abasi odu ke idaha ndibọhọ n̄kpọntịbe oro ye unana edida unan ke ikpọkidem ye ke ntụk. Edi, nte afo unyịmeke ke ekpedi edidiọn̄ edieke ubiatibet m̀mê n̄kpọ ekededi oro esịnde ndịk odu mîdụhe aba?

“Owo eke Esiyịpde Inọ, Okûyịp Aba”

Okposụkedi ediwak owo ẹmade usụn̄uwem idiọkitọn̄ mmọ ẹkan, Ikọ Abasi aman̄wam mme inọ ndikpụhọde mme udọn̄ ye mme edu mmọ. (Ephesus 4:23) Ke ẹnyenede ata uduak, oro ọkọn̄ọde ke Bible ke uwem, mmọ ẹnam mme ikọ ẹmi: “Ekpri n̄kpọ ke ido eke enende, ọfọn akan akamba mbun̄wụm ke ido eke mîfọnke.” (Mme N̄ke 16:8) Cláudio obụk ete: “Ekpere ndidi kpukpru owo ke ubon mi ẹkedi Mme Ntiense, edi akananam n̄kakpan̄ke utọn̄ nnọ se mmọ ẹnyenede nditịn̄ mban̄a Jehovah ye mme uduak esie. Ke nnyọn̄de isan̄ oro ekekperede ndiyom usụn̄ ke kilomita 2,000 (itiat 1,200) ke ekpri moto mbiomo oro n̄keyịpde, n̄kenyene ndibe ediwak itie oro mme bodisi ẹkedade ẹkpeme usụn̄. Ke edinam emi mma ndikụt nte ke n̄kenyene ndikpụhọde uwem mi. Mma ndodomo ndinam oro mbemiso edi n̄kekwe unen. Isan̄ enyeemi mma ntọn̄ọ ndikere mban̄a mme iman mi oro ẹdide Mme Ntiense Jehovah ye nte mmọ ẹnyenede ukpụhọde, ẹnyenede idatesịt, inemesịt, ye emem.” Nte utịp, Cláudio ama ọtọn̄ọ ndikpep Ikọ Abasi, ọkpọn̄de uda n̄kpọsọn̄ ibọk ye n̄kani ufan esie, onyụn̄ akabade edi Christian asan̄autom.

Mmọ eken n̄ko idahaemi ke ẹnam mme ikọ ẹmi: “Mbufo ẹkûbuọt idem ke ufịk, ẹkûnyụn̄ ẹbụre ke mbụme.” (Psalm 62:10) Ke ama ọkọnyọn̄ n̄kpọkọbi ke ntak okoyomde ndiwot owo ke ini akakade uyịpinọ, José, enyene mbumehe uda n̄kpọsọn̄ ibọk ye anyam n̄kpọsọn̄ ibọk, ama ọbọ ufọn oto ukpepn̄kpọ Bible oro ukot esie okonịmde. Enye ama etre uda n̄kpọsọn̄ ibọk ndien idahaemi enye edi enyene-ifịk Ntiense.

Nte ededi, obufa owo isidịghe ke mbuari m̀mê ke ndyọ ndyọ usụn̄. Oscar, emi ekesisịnde idem ekikak ekikak ke n̄kpọsọn̄ ibọk ye uyịpinọ, obụk ete: “Mma mbọn̄ akam ọkpọsọn̄ ọkpọsọn̄ nnọ Jehovah tutu isọn̄ufọk akabade etie nte ekpri n̄kpọdiọhọ mmọn̄ ke ntak ediwak mmọn̄eyet mi.” Ih, ke adianade ye ifịk ifịk edikpep Ikọ Abasi, oyom ẹkọbọ ke akam ofụri esịt. Tịmfiọk ọniọn̄ oro odude ke ekikere akam emi: “Kûnọ mi ubuene, kûnyụn̄ unọ mi inyene; bọk mi ke udia udeme mi: mbak ndiyụhọ, ndien n̄kan̄ fi, ndien ndọhọ nte, Anie edi Jehovah? Mbak ndinyụn̄ mbuene, ndien nyịp inọ, nnyụn̄ nsuene enyịn̄ Abasi mi.”—Mme N̄ke 30:8, 9.

Ẹnyene ndida ata ima n̄kpụhọ ye udọn̄ idemowo: “Owo eke esiyịpde inọ, okûyịp aba; edi yak enye akam anam ọkpọsọn̄ utom, ada ubọk esie anam eti utom, man enye enyene se adade ọnọ owo eke odude ke unana.” (Ephesus 4:27, 28) Kaban̄a mme Christian eke akpa isua ikie ẹmi ke akpa ẹkedide ‘mme inọ m̀mê mbon idiọkitọn̄,’ Jehovah ke mbọm, ebede ke ufak Jesus Christ, ama efen mbon oro ẹketuade n̄kpọfiọk. (1 Corinth 6:9-11) Didie ke edi n̄kpọ ndọn̄esịt ntem nte ke se ededi oro uwem nnyịn ekedide ke ini edem, nnyịn imekeme ndikpụhọde usụn̄uwem nnyịn inyụn̄ inyene mfọn Abasi!—John 3:16.

Ifụre ke Obufa Ererimbot Abasi

Kere ban̄a ererimbot oro mme inọ mîdụhe. Afo uduyomke ọsọn̄urua ndutịm eke mme ebiereikpe, mme lọya, mme bodisi, ye mme ufọk-n̄kpọkọbi man ẹnịm mme ibet! Enye edidi enyene-uforo ererimbot oro mme owo ẹdinyenede ukpono ẹnọ mmọ en̄wen ye mme inyene mmọ! Nte oro etie nte se owo mîkemeke ndinịm ke akpanikọ? Nte Abasi ke akpanikọ eyesịbe odụk ke mme mbubehe owo onyụn̄ etre ubiatibet? Nnyịn imesịn udọn̄ inọ fi ndidụn̄ọde uyarade oro nte ke Bible edi Ikọ Abasi ye nte ke ẹkeme ndiberi edem ke mme prọfesi esie. Afo eyekụt eti isọn̄ ndinyene mbuọtidem nte ke ukpụhọde ke edi ke iso. Owo ndomokiet ikemeke ndibiọn̄ọ Abasi ndida ubọhọ oro enye ọkọn̄wọn̄ọde nsọk mbon oro ẹmade edinen ido: “Kûyat esịt uban̄a mme oburobụt owo; kûfụbe ufụp ye mme anamidiọk. Koro ẹyewara ndisịbe mmọ nte mbiet, mmọ ẹyenyụn̄ ẹken̄e nte awawa ikọn̄.” (Psalm 37:1, 2) Mme ikọ oro ẹkewetde mi anyanini ko ẹyewara ndisu ọyọhọ ọyọhọ.

Obio Ubọn̄ Abasi eyetre nditaha ye ukwan̄ido, oro edide ntak ekese unana idotenyịn ye ndutịme. Owo ndomokiet ididụhe ke unana, odude ke idak mfịghe ndiyịp inọ. Ẹnọ nnyịn nsọn̄ọ ke prọfesi ete: “Uwak ibokpot ẹyedu ke isọn̄ ke nsom ikpọ obot; mfri esie eyenyen̄e nte Lebanon [eset]: ndien mbio-obio ẹyesehe nte mbiet in̄wan̄.” (Psalm 72:16) Ke akpanikọ, ke Paradise oro ẹfiakde ẹwụk, n̄kpọ ndomokiet ididụhe nditịmede emem mme owo oro ẹdiọn̄ọde ẹnyụn̄ ẹtuakde ibuot ẹnọ Abasi akpanikọ.—Isaiah 32:18.

Nso utịp ke oro edidi ntem ke ndikọbiọn̄ọ mme usụn̄ eke ererimbot idiọkitọn̄ emi! Mme N̄ke 11:19 ọdọhọ ete: “Nte eti ido asan̄ade ke uwem: kpa ntre n̄ko ke owo eke ebịnede idiọkido asan̄a etiene n̄kpa esie.” Ih, ke ẹma ẹkekpok mme idiọkowo ẹfep, owo ndomokiet idinyeneke ntak ndikop ndịk mban̄a uwem esie m̀mê inyene esie. Psalm 37:11 ọn̄wọn̄ọ ọnọ nnyịn ete: “Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.”

[Mme Ikọ idakisọn̄]

[Ekebe ke page 5]

Ndinam N̄kpọ ye Uyịpinọ Oro Odude

KE UFỌKIDỤN̄—Sia mme inọ ẹkemede ndidụk ye edide afo omodu ke ufọk m̀mê udụhe, beberi nyụn̄ kọkọbi usụn̄. Mme anam ndụn̄ọde ẹtoro ẹte ẹnyene n̄kanika m̀mê ebua. Tịn̄ nọ mbọhọidụn̄ oro ẹkemede ndiberi edem ini emi afo edikade nduọkodudu. Nam n̄kpọ sụn̄sụn̄—mme inọ ẹsinam n̄kpọ usọp usọp, ke usụn̄ oro owo mîdorike enyịn, ndien ẹkeme ndikpụhọde ekikere mmọ inikiet inikiet edieke idem enyekde mmọ. Edieke afo edide kiet ke otu Mme Ntiense Jehovah, nam ẹdiọn̄ọ fi nyụn̄ domo ndinọ ikọ ntiense. Afo emekeme ndinam mmọ ẹtie ufan ufan mîdịghe ẹwụt mbọm. Kûyom ndibiọn̄ọ ibọhọke ẹsiak en̄wan.

KE AN̄WA—Du ke edidemede ndidiọn̄ọ m̀mê owo ke etiene fi. Kûsan̄a ke ata mben ikọt. Fep mme efak oro ẹkịmde-kịm ẹnyụn̄ ẹtiede ndobo ndobo. Tịm kama ekpatokụk m̀mê mme ọsọn̄urua n̄kpọ fo. San̄a usọp usop nte n̄kpọ eke akade ebiet. Fep ndisịne ọsọn̄urua ọfọn̄ ye nsem nsem n̄kpọmbana. San̄a ye owo ka udep n̄kpọ edieke idaha oyomde oro. Kama okụk oro afo ediyomde kpọt, suan dọn̄ ke nsio nsio ekpatọfọn̄ m̀mê mme itie eken.

KE ESỊT MOTO—Edieke “ubọ owo moto ke n̄kanubọk” edide ọsọ n̄kpọ ke n̄kan̄ mbufo, kûsịne ke esịt moto fo oro adade-da. Kpụhọde usụn̄ oro asan̄ade aka onyụn̄ ọnyọn̄de utom. San̄a usụn̄ oro enyenede ifụre akan, idem ọkpọkọm oro etie nte oyom usụn̄ akan. Mbemiso onịmde moto adaha, se kanade m̀mê eyekụt n̄kpọ ekededi eke etiede eyịghe eyịghe. Fep edikụbọde itie udọn̄ mbiomo ke ebiet oro ẹtiede ndobo ndobo. Kûkpọn̄ mme ọsọn̄urua n̄kpọ ke esịt moto ke itie oro ẹkemede ndida n̄kụt. Ukpọhọde ukọbi moto oro ẹdade ẹkụt m̀mê n̄kpọ efen oro ekemede ndibiọn̄ọ inọ ekeme ndikpan mme ukeuke inọ.

[Ekebe ke page 6]

“Ẹkûbon n̄kpọuto ẹnịm ẹnọ idem ke isọn̄, ke ọtọ nte utan̄kpọ ye n̄karafan̄ ẹbiatde n̄kpọ, inọ ẹnyụn̄ ẹbụn̄de, ẹdụk, ẹyịp: edi ẹbon n̄kpọuto ẹnịm ẹnọ idem ke heaven, ke ọtọ nte utan̄kpọ ye n̄karafan̄ mîbiatke n̄kpọ, inọ mînyụn̄ ibụn̄ke, idụk, iyịp.”—Matthew 6:19, 20