Ini Ewe ke Ndịk Editre?
NTE afo okpokop n̄kpaidem ndifiọk nte ke ata ifụre enyene n̄kpọ ndinam ye owo emi okodude uwem ke isua 2,000 ẹmi ẹkebede? Ke owụtde ufọn edinyene ima, Jesus Christ ama otop n̄wọrọnda n̄ke kiet ete: “Owo kiet okoto Jerusalem osụhọde aka Jericho; ndien ọduọ ke otu mbon n̄wo, ẹmi ẹkpọkde enye edisịnen̄kpọ ke idem ẹfep, ẹmia enye, ẹnyụn̄ ẹdaha ẹkpọn̄ enye ẹkpere n̄kpa.” Okposụkedi mme akaisan̄ iba ẹkefụmide owo unọmọ emi, ọfọn-ido owo Samaria kiet ama owụt mbọm. Edi, anie, ekere aban̄a mbon unọmọ ubiatibet mfịn? Nso ubọhọ ndịk ke nnyịn ikeme ndidori enyịn ndikụt?—Luke 10:30-37.
Ke adan̄aemi ẹdọhọde ẹte ke imonịm Abasi ke akpanikọ, ediwak owo ẹkere ke owo enyene ndisọn̄ọ ibet ye ewụhọ. Edi nte uwak isua n̄kpọkọbi m̀mê mme bodisi efen efen oro ẹkpede okụk ọfọn ẹyeda utịt ẹsọk ubiatibet? Nte afo omotịm onịm ke akpanikọ ete ke mme itieutom usọn̄ọ ibet, kpa ye mme ukeme esịt akpanikọ ndinam ndusụk udomo ifụre odu, ẹyesio mme utọ n̄kpọ nte uda n̄kpọsọn̄ ibọk ke idiọk usụn̄, ubiatibet oro ẹdiomide-diomi, ye unana? Edi, nnyịn ndikop biọn̄ ye nsatitọn̄ edinen ido ikpenyeneke ndidi ke ikpîkpu.—Matthew 5:6.
Psalm 46:1 ọdọhọ ete: “Abasi edi ebiet ubọhọ nnyịn ye odudu nnyịn, Enye edi andinyan̄a eke ekperede nnyịn etieti ke nnanenyịn.” Nnyịn iyekụt nte ke mme ikọ ẹmi idịghe sụk ndinem uto.
Nte afo ọfiọkde, ke usen ke usen ndutịm usuanetop ẹsitọt ibak ibak uwotowo ke mme ekọn̄ mbio obio ye mme edinam mbon oyomonsia. Ke ndusụk ikpehe ererimbot, amakabade edi ọsọ n̄kpọ ndiwot mme uyen oro owo mîyomke m̀mê mbon oro ẹkedude ke itie ubiatibet. Ntak emi ẹdade uwem mfefere mfefere ntre? Okposụkedi utọ afai oro ekemede ndinyene nsio nsio ntak, ntak kiet odu emi nnyịn mîkpofụmike.
Nte ekemde ye Ikọ Abasi, kpa Bible, “ofụri ererimbot onyụn̄ esịne ke ubọk andidiọk.” (1 John 5:19) Ke akpanikọ, Jesus Christ ikowụtke Satan kpa Devil n̄kukụre nte osu nsu edi nte “owotowo.” (John 8:44) Ke enyenede odudu ke idem ubonowo ke nsio nsio usụn̄, okopodudu edibotn̄kpọ eke spirit emi ke esịn udọn̄ ọnọ n̄kọri afai eyomfịn. Ediyarade 12:12 ọdọhọ ete: “Mbọm isọn̄ ye inyan̄, koro andidori ikọt Abasi ikọ ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.” Edi n̄kpọ inemesịt, nte ededi, nte ke idiọk editịm n̄kpọ emi eyeyak itie ọnọ “obufa enyọn̄ ye obufa isọn̄ . . . ndien edi do ke edinen ido edidụn̄.”—2 Peter 3:13.
Ke adianade ye utịbe utịbe idotenyịn eke obufa ererimbot emi, nso un̄wam ke nnyịn inyene idahaemi?
Mbemiso iyomde in̄wan̄în̄wan̄ ibọrọ inọ mbụme oro, ọkpọfọn nditi nte ke idem mme ata Christian inyeneke ubiọn̄ nte ke ẹyekpeme mmimọ ẹsio ke afai. Apostle Paul ama etịn̄ aban̄a ndusụk n̄kpọndịk oro enye ke idemesie okosobode. Enye ama ‘okụt afanikọn̄ ke akpa, okụt afanikọn̄ ke otu mbon n̄wo, okụt afanikọn̄ ke ubọk orụk esie, okụt afanikọn̄ ke ubọk mme Gentile, okụt afanikọn̄ ke obio, okụt afanikọn̄ ke in̄wan̄, okụt afanikọn̄ ke inyan̄.’ (2 Corinth 11:26) Kpa ye oro Paul ama ọbọhọ kpukpru n̄kpọndịk ẹmi. Edi ukem oro mfịn; ebede ke ndidu ke ukpeme, nnyịn imekeme ndisụk n̄kaiso ndinam mme utom nnyịn adan̄a nte ikekeme nte isinamde. Ẹyak nnyịn ikere iban̄a ndusụk mme n̄kpọ oro ẹdin̄wamde.
Edieke owo odụn̄de ke n̄kann̄kụk oro ọyọhọde ye n̄kpọndịk, eti eduuwem ekeme ndidi n̄kpọ ukpeme, sia mme owo ẹsitịmde ẹse mmọ en̄wen. Okposụkedi mbon n̄wo ẹsidiomide ẹnyụn̄ ẹnamde ubiatibet, ediwak ẹda idemmọ nte mme ata owo. Fep nditịn̄ n̄kpọ mbiat se mmọ ẹnamde, kûnyụn̄ udomo ndiyom ndifiọk se mmọ ẹnamde. Ntem, afo emekeme ndisụhọde ifet edidi owo emi ẹsiode usiene. Nyene ke ekikere nte ke mme inọ ẹsiyom ndifiọk owo emi edepde obufa n̄kpọ m̀mê owo emi akade nduọkodudu ndien ke ntre mîdidụhe ke ufọk mmọ, ntre nnyene ọniọn̄ ke se afo ayarade ọnọ mmọ en̄wen.
Ediwak Mme Ntiense Jehovah ẹmekụt nte ke eti enyịn̄ oro mmọ ẹnyenede nte mme asan̄autom amanam mmọ ẹnyene ndusụk udomo ukpeme. Mme abiatibet ẹsiwak ndiwụt nte ke mmimọ imokpono utọ mme Christian oro, ẹmi ẹnọde idemmọ ke ndin̄wam mme owo ke obio ye unana asari. Mme Ntiense ke idemmọ idịghe mme owotowo m̀mê mme inọ, mmọ inyụn̄ idịghe ‘mme andinọhọ ke mbubehe owo en̄wen,’ ntem idịghe n̄kpọndịk.—1 Peter 4:15.
Ifụre ke Obufa Ererimbot Abasi
Nnyịn imeseme iban̄a ‘editọt ukwan̄ido’ emi Jesus Christ ekebemde iso etịn̄, edi utu ke nditịmede esịt n̄kaha, nnyịn imekeme ndinịm ke akpanikọ nte ke Abasi eyesọp ndibiat idiọk editịm n̄kpọ emi. Ke ẹsiode edibemiso ntịn̄ mban̄a edikwọrọ “gospel Ubọn̄ Abasi” ke ofụri ererimbot ẹfep, Jesus ama eti mme anditiene enye ete: “Ẹyenyan̄a owo eke edimede ime tutu osịm akpatre.”—Matthew 24:12-14.
Nnyịn imekeme ndinịm ke akpanikọ nte ke ẹyesobo mbon oro ẹwotde mmọ en̄wen, ndusụk ini ke enyene ndịk ibak ẹfep. Mme N̄ke 22:22, 23 ọdọhọ ete: “Kûdia ubuene, koro enye ebuenede: kûnyụn̄ utụk owo ukụt ke inuaotop: koro Jehovah eyekpe ikpe mmọ, onyụn̄ abiat mme andibiat ukpọn̄ mmọ.” Jehovah eyesobo mme anamidiọk, utọ nte mbon n̄wo, mme owotowo, ye mbon oburobụt ido idan̄. N̄ko-n̄ko, enye idifụmike mbon unọmọ orụk ubiatibet oro. Enye eyenam mmọ ẹnyene se ikatakde mmọ onyụn̄ afiak anam mmọ ẹnyene ọyọhọ nsọn̄idem.
Ke akpanikọ, mbon oro ‘ẹwọn̄ọrede ẹkpọn̄ idiọk, ẹnyụn̄ ẹnamde eti’ ẹyenyene nsinsi uwem edide ke ndibọhọ akwa ukụt m̀mê ebede ke ndinam ẹset ke n̄kpa. “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:27-29) Mme utọ ufọn oro ẹyedu ke ntak uwa ufak Jesus. (John 3:16) Edi uwem editie didie ke Paradise oro ẹfiakde ẹwụk?
Uwem ke idak Obio Ubọn̄ Abasi edidi ata inem n̄kpọ. Jehovah ebemiso etịn̄ ete: “Ndien ikọt mi ẹyedụn̄ ke ufọk emem, ye ke idụn̄ ifụre, ye ke ebiet nduọkodudu eke edide sụn̄sụn̄.” (Isaiah 32:18) Kpukpru mbon oro ẹnyenede nsinsi uwem ẹyekpụhọde eduuwem mmọ. Owo ndomokiet idinamke idiọk m̀mê se ikwan̄ade, owo ekededi idinyụn̄ idịghe se utọ owo oro edinọmọde. Prọfet Micah ọdọhọ ete: “Kpukpru mmọ ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe.” (Micah 4:4; Ezekiel 34:28) Didie ke emi okpụhọrede ntem ye n̄kann̄kụk oro ẹyọhọde ye n̄kpọndịk mfịn!
[Ekebe ke page 6]
DU KE UKPEME
Ediwak mme abiatibet ẹsidu ke utom kpukpru ini, ẹnamde ubiatibet edi ubọkọkọ. Mmọ ẹkeme ndinam utom ke mme otu ẹsịnede owo iba m̀mê ita, idem edieke edide owo kiet kpọt anyan fi ikan̄. Ototịm ana in̄wan̄în̄wan̄ nte ke adan̄a nte abiatibet ekpride ke isua emana, ntre ke enye ototịm etie afai afai akan. Nso ke afo ekeme ndinam edieke afo akabarede edi owo unọmọ?
Mụm idem kama man udûnam inọ oro enyek idem—ọkọi esie ekeme ndisịn owot fi. Edieke afo edide kiet ke otu Mme Ntiense Jehovah, nam ẹfiọk ntre. Edi, du ke mben̄eidem ndikpọn̄ se inọ oyomde nnọ. Edieke afo abiatde ini, ototịm ọdiọk akan. Ekem, afo emekeme ndikụt nte ọfọnde ndidọhọ ẹfiak ẹnọ fi mme n̄wed idiọn̄ọ moto m̀mê okụk ukpeusụn̄.
Afo uduwakke ndifiọk enyeemi abiatibet edide. Ndusụk inọ ẹdi mbon mbumehe uda n̄kpọsọn̄ ibọk m̀mê nta inọ, mmọ eken n̄kukụre ẹyom se ẹdiade. Ke idaha ekededi, kûkama ediwak okụk. Fep ndinam ẹkụt n̄kpọmbana, n̄kpanuen gold, m̀mê mme ọsọn̄urua n̄kanika ubọk. San̄a nyụn̄ ka isan̄ nte esinamde, ye unana edikop ndịk ndomokiet. Kûwụk enyịn use mme owo nte n̄kpọ eke oyomde ndinam ẹdiọn̄ọ mmọ. Ke mme idaha ẹtopde ikan̄ ke efak, kụbọ ke isọn̄; emekeme ndiyet ọfọn̄ ke oro ebede.—Akani owo bodisi ke Rio de Janeiro.
[Ndise ke page 5]
Mụm idem kama nyụn̄ kpọn̄ se ededi oro inọ oyomde nọ. Edieke abiatde ini, ototịm ọdiọk akan