Ikọ Abasi Ọnọ Ndausụn̄
1 Nnyịn idu uwem ke ererimbot emi ọyọhọde ye ata ediwak mfịna emi ata ibat ibat usọbọ ẹnyụn̄ ẹdude. Ediwak miliọn owo ẹsisan̄a biọn̄ kpukpru ini. Ibat owo oro ọkọride-kọri ke ẹnyene mbumehe uda n̄kpọsọn̄ ibọk. Ata ediwak ubon ke ẹwụre. Idan̄ iman ye afai ubon ẹdu ke mbụk kpukpru ini. Ke ẹsabade ofụm oro nnyịn ikotde ye mmọn̄ oro nnyịn in̄wọn̄de sụn̄sụn̄. Ke ukem ini oro, ubiatibet ke ọnọmọ ata ekese nnyịn.
2 Mme ikọ ẹmi ẹkebemde iso ẹtịm ẹnyene ebuana mfịn ẹkan nte ẹkedide idem ke isua ifan̄ ẹmi ẹkebede. Oyom mme owo ẹfiọk ẹte ke Ikọ Abasi ọnọ ndausụn̄ onyụn̄ ọnọ usọbọ ke kpukpru mfịna ẹmi ẹnọmọde mmọ. Nnyịn iyodomo ukeme ndin̄wam mme owo ke December ebe ke ndinọ mmọ n̄wed oro Akakan Owo Oro Akanam Odude Uwem m̀mê N̄wed Mi eke Mme Mbụk Bible. Nte ededi, ikpîkpu edinọ owo n̄wed inọhọ ubiọn̄ nte ke enye eyenyịme ndausụn̄ Abasi. Nnyịn inyene ndinam mme mfiakn̄ka ye utịtmbuba editọn̄ọ ukpepn̄kpọ Bible. Ẹn̄wọn̄ọ un̄wam ẹnọ nnyịn edieke isịnde utọ ukeme oro. (Matt. 28:19, 20) Ndusụk nneme ẹnọde ekikere ẹdi ẹmi:
3 Edieke afo osobode akwa owo, afo emekeme ndidomo usụn̄ enyeemi:
◼ “Yak mbụp ise: Ke ini afo ekedide akparawa, didie ke mme owo ke n̄kann̄kụk ẹkesinam n̄kpọ ye kiet eken? [Bet ibọrọ.] N̄kpọ ẹnen̄ede ẹkpụhọde idahaemi, nte ikpụhọkede? Afo ekere ke nso idi ntak ukpụhọde emi? [Bet ibọrọ.] Nnyịn ke inen̄ede ikụt edisu prọfesi kiet ke Bible. [Kot 2 Timothy 3:1-5.] Ke akande editịn̄ nnennen nnennen nte ererimbot etiede mfịn, Bible ọn̄wọn̄ọ ererimbot oro ọfọnde akan ke n̄kpet n̄kpet ini iso. Ke ntak oro nnyịn isịn udọn̄ inọ kpukpru owo ndikpep Bible.” Wụt n̄wed Akakan Owo nyụn̄ wụt ibuot 111, emi etịn̄de aban̄a prọfesi en̄wen oro nnyịn ikụtde nte osude. Nọ n̄wed ke etịbe oro ẹsinọde.
4 Ke ini afiakde aka ebịne akwa owo oro ọkọnọde n̄wed “Akakan Owo,” afo emekeme ndidọhọ:
◼ “Ke akpatre ini oro ikenyenede nneme, nnyịn ima inyịme ke n̄kaowo eyomfịn okpụhọde ke ekese usụn̄ ọdiọk akan ke ẹmende ẹdomo ye nte uwem eketiede ke isua ifan̄ kpọt ẹkebede. Nte ededi, n̄kpama ndiwụt fi nte ke Bible ọnọ idotenyịn kaban̄a ererimbot emi etịmde ọfọn akan ke ini iso. [Kot Ediyarade 21:3, 4.] Ndifiọk nte ke emi edi Ikọ Abasi ekpenyene ndisịn udọn̄ nnọ nnyịn ndinọ ntịn̄enyịn ke n̄kpọ efen emi Bible etịn̄de.” Kûbọde n̄wed Akakan Owo ka ibuot 133, nyụn̄ kot ikpehe ekikere 5-6. Dọhọ ke iyenịm ukpepn̄kpọ Bible mfọn.
5 Edieke afo enyenede nneme ye akparawa owo, afo emekeme ndidọhọ:
◼ “N̄kpama ndibụp fi mbụme ise: Nte akparawa owo, nte afo emekere ke emenyene ntak ndinyene idotenyịn mban̄a ini iso? Ini iso etie fi didie? [Bet ibọrọ.] Ke mfọniso, ata ntak odu ndinyene idotenyịn mban̄a ini iso. [Kot Psalm 37:10, 11.] Nnyịn isio n̄wed emi, Akakan Owo Oro Akanam Odude Uwem, ndin̄wam mme owo ẹbọ ufọn ebe ke ndikpep mban̄a Jesus nnyụn̄ n̄kpan̄ utọn̄ nnọ enye. Edieke afo amade ndikot n̄wed emi, nyokop inemesịt ndikpọn̄ idem kiet nnọ fi ke etịbe edide ₦240.”
6 Ke ini afo afiakde aka ebịne akparawa owo emi ọkọbọde n̄wed “Akakan Owo,” afo emekeme nditọn̄ọ ebe ke ndidọhọ:
◼ “Mma ndara ndikop fi etịn̄de nte ekerede aban̄a ini iso. Ti ete ke mma n̄wụt fi itien̄wed Bible oro ọnọde nnyịn un̄wọn̄ọ aban̄a inem inem ye ifụre ifụre ini iso. Efen edi emi. [Kot Ediyarade 21:3, 4.] N̄wed oro n̄kọnọde fi do ọnọ uyarade anamde ẹnịm nte ke ukara Jesus ayada mme edidiọn̄ ọsọk ubonowo. Tịm fiọk se enye ọdọhọde ke ikpehe ekikere 5 ke ibuot 133. [Kot.] Edieke edimade, nyama ndikpep Bible ke mfọn ye afo.” Edieke ẹnyịmede ukpepn̄kpọ, nam akpan ndutịm ndifiak n̄ka.
7 Owo emi mîfiọkke ebiet emi ọkpọwọn̄ọde aka kaban̄a ndausụn̄ man ọyọ mme mfịna uwem ekeme ndinam n̄kpọ mban̄a usụn̄ enyeemi:
◼ “Nnyịn idu uwem ke ini emi ekperede ndidi kpukpru owo ẹsobo n̄kpọsọn̄ mfịna. Ediwak owo ẹwọn̄ọde ẹbịne kpukpru orụk mme ọnọ item kaban̄a ndausụn̄. M̀mọ̀n̄ ke afo ekere ke nnyịn ikeme ndikụt eti item oro edinen̄ede ọfọn ye nnyịn? [Bet ibọrọ.] Bible etịn̄ akpan n̄kpọ emi oyomde kpukpru nnyịn ifiọk.” Kot Jeremiah 10:23. Kûbọde n̄wed Akakan Owo ka ntọn̄ọikọ nyụn̄ kot akpa ikpehe ekikere ke idak akpatre ekpri ibuotikọ. “N̄wed emi ayan̄wam fi ndifiọk nte ẹdisiode kpukpru mfịna ifep ke idak Obio Ubọn̄ Abasi. Nte afo akpama ndikot enye?” Ekem nọ n̄wed oro ke ekọmurua oro ẹsinọde.
8 Edieke ekenemede aban̄a nte owo oyomde ndausụn̄ ke akpa ediwaha, afo emekeme ndika iso ke nneme oro ke mfiakn̄ka ebe ke ndidọhọ:
◼ “Ke ini nnyịn ikosobode ke akpa ini, nnyịn ima inyịme ite ke imoyom ndausụn̄ ito Abasi edieke anade nnyịn iyọ mme mfịna uwem uforo uforo. Kaban̄a oro, n̄kere ke afo ayama mme ikọ oro ẹtịn̄de ke n̄wed oro n̄kọnọde fi. [Kot ibuot 35, ikpehe ekikere 8 ye 11, ke n̄wed Akakan Owo.] Mmokop inemesịt ndinịm ukpepn̄kpọ Bible mfọn ye afo, mmonyụn̄ mben̄e idem ndinam n̄wụt fi idahaemi.”
9 Edieke afo akamade N̄wed Mi eke Mme Mbụk Bible, afo emekeme nditịm mme nneme eke idemfo etiene mbon oro ẹnọde ekikere ke enyọn̄ emi. Jehovah ọyọdiọn̄ ukeme nnyịn nte nnyịn in̄wamde n̄kpri ye ikpọ ukem ukem ndikụt ufọn Ikọ Abasi ye ndausụn̄ esie ke uwem nnyịn.—Ps. 119:105.