Ndidot Nnyụn̄ Ntịm Idem Ndinọ Mbon En̄wen Ukpep
1 Ke ini ẹkemekde Moses nte andida ke ibuot Jehovah, enye ikekereke ke imodot nditan̄a ikọ Abasi nnọ Pharaoh. (Ex. 4:10; 6:12) Jeremiah ama ayarade unana uko esie ke ndikeme ndinam utom nte prọfet Jehovah, asiande Abasi ke imọ ifiọkke nditịn̄ ikọ. (Jer. 1:6) Kpa ye unana uko mmọ ke ntọn̄ọ ntọn̄ọ, prọfet mbiba ẹmi ẹma ẹwụt ke mmimọ idi mme ntiense Jehovah oro mîkopke ndịk. Abasi ama anam mmọ ẹtịm ẹdot.
2 Mfịn, ye un̄wam Jehovah, nnyịn imenyene se nnyịn iyomde man inam utom nnyịn ima ye uko. (2 Cor. 3:4, 5; 2 Tim. 3:17) Ukem nte ọdiọn̄ ukwakutom emi enyenede ọyọhọ otu n̄kpọutom, ẹtịm nnyịn idem mfọn mfọn man inam utom oro ẹnọde nnyịn ndinam mma ye usọ. Ke January idinọ n̄wed oro, Afo Emekeme Ndidu Uwem ke Nsinsi ke Paradise ke Isọn̄. Okposụkedi n̄kpọutom eke spirit emi mîdịghe obufa, ibuotikọ N̄wed Abasi esie osụk edi eke ndondo emi ndien enye ayan̄wam mme owo ẹkpep akpanikọ. Ẹkeme ndikama nneme ẹnọde ekikere oro ẹtienede mi ndinọ n̄wed oro.
3 Ẹkeme ndida ibuotikọ aban̄ade ubọ ukpep ndidemede udọn̄ ke Ikọ Abasi. Afo emekeme nditọn̄ọ nneme ke ndidọhọ:
◼ “Ẹdori ekese nsọn̄uyo mfịn ke ufọn edibọ eti ukpep. Ke ekikere fo, nso orụk ukpep ke owo ekpebịne man okụt ete imenyene akakan inemesịt ye unen ke uwem? [Bet ibọrọ.] Mbon oro ẹnyenede ifiọk Abasi ẹkeme ndinyene nsinsi ufọn. [Kot John 17:3.] N̄wed emi Afo Emekeme Ndidu Uwem ke Nsinsi ke Paradise ke Isọn̄, ọkọn̄ọ ke Bible. Enye anyan ubọk owụt n̄kukụre ebiet emi ifiọk oro ekemede ndida nsịm nsinsi uwem otode.” Wụt akpan uwụtn̄kpọ ke n̄wed emi ebe ke ndikụbọde n̄ka ndise oro odude ke page 128. Kot ikpehe ekikere 5. Nọ n̄wed oro ke etịbe ₦80 nyụn̄ nam ndutịm nọ mfiakn̄ka.
4 Ke ini afiakde ebịne enyeneufọk emi afo ekenemede aban̄a ufọn edibọ ukpep Bible, afo emekeme ndidọhọ:
◼ “Isan̄ oko n̄kedide, nnyịn ima ineme iban̄a Bible nte edide ebiet emi ukpep oro ekemede ndinọ nsọn̄ọ kaban̄a nsinsi ini iso nnyịn otode. Nte ededi, oyom ukeme man ikpep se oyomde nnyịn ifiọk ito N̄wed Abasi. [Kot Mme N̄ke 2:1-5.] Ọsọn̄ ediwak owo ndifiọk ndusụk ikpehe Bible. N̄kpama ndinam ibio ibio n̄wụt fi usụn̄ oro nnyịn ikamade ntatara ntatara ndin̄wam mme owo ẹkpep n̄kpọ efen efen ẹban̄a mme akpan ukpepn̄kpọ Bible.” Kûbọde ka ibuot 15 nyụn̄ nam ukpepn̄kpọ Bible ibio ibio wụt. Edieke enyeneufọk amade ndinyene ukpepn̄kpọ ofụri ini, nam an̄wan̄a nte ke iyafiak idi, isan̄ade ye un̄wam ukpepn̄kpọ nnyịn oro Ifiọk Oro Adade Osịm Nsinsi Uwem.
5 Ndutụhọ ediwak miliọn nditọwọn̄ ke ererimbot afịna ediwak owo. Ndusụk afo emekeme ndin̄wam enyeneufọk ndikụt nte Abasi esede nnanenyịn emi ke ndidọhọ:
◼ “Eyịghe idụhe nte ke afo omokot mbụk n̄kpọntịbe ẹban̄ade nditọwọn̄ ke ofụri ererimbot ẹmi ẹkopde biọn̄, ẹdọn̄ọde, ẹnyụn̄ ẹfụmide. Ntak emi mme esop ẹkerede ẹban̄a mîkemeke ndinam idaha ọfọn? [Bet ibọrọ.] Abasi oyom sụk se ifọnde ikan ọnọ mme owo. Tịm fiọk se enye ọn̄wọn̄ọde ọnọ nditọwọn̄ ye ikpọ owo, nte ẹwetde ke Bible. [Kot Ediyarade 21:4.] N̄wed emi ọnọ ọyọhọ ntọt efen efen aban̄a ererimbot emi Abasi anamde emi ndutụhọ editrede.” Edieke ekemede, kûbọde ka ndise oro odude ke page 12 ye 13 oro owụtde Paradise nyụn̄ neme enye. Nọ n̄wed oro ke etịbe ₦80, nyụn̄ nam ndutịm ndifiak n̄ka.
6 Edieke eketịn̄de ke akpa ini aban̄a ndutụhọ nditọwọn̄, isan̄ en̄wen awahade afo emekeme ndika iso ke nneme oro ke ndidọhọ:
◼ “Ke ini n̄kedide mi ke ndondo emi, afo ama etịn̄ editịmede esịt oro enyenede aban̄a nnanenyịn nditọwọn̄ ẹmi ẹbọde ndutụhọ ke ntak n̄wụre ubon, akan̄, udọn̄ọ, ye afai. Edi n̄kpọ ndọn̄esịt ndikot ke Bible mban̄a ererimbot emi nditọwọn̄ m̀mê ikpọ owo mîdidọn̄ọke, mîdikopke ubiak, m̀mê ndikpan̄a. Prọfesi ke n̄wed Isaiah etịn̄ aban̄a eti uwem oro edidude ke isọn̄.” Kot nyụn̄ neme Isaiah 65:20-25. Ebe ke ndida ikpehe ekikere ifan̄ ke ibuot 1 ke n̄wed Ndidu Uwem ke Nsinsi, wụt ndusụk akpan n̄kpọ ẹmi ẹdemede udọn̄ ẹnyụn̄ ẹnyenede ebuana.
7 Sia edibọn̄ akam edide ọsọ n̄kpọ ọnọ mbon ido ukpono, afo emekeme nditọn̄ọ nneme ke ibuotikọ emi ke ndidọhọ:
◼ “Ke ndusụk ini ke uwem nnyịn, ata ediwak nnyịn imesisobo mme mfịna oro ẹnụkde nnyịn ndibọn̄ akam nnọ Abasi nyom un̄wam. Ndien kpa ye oro, ediwak owo ẹkere ke owo isiyereke akam mmimọ. Akam etie nte ke owo isikopke akam mme ada iso ido ukpono ẹmi ẹsibọn̄de an̄wan̄wa ẹyom emem. Nnyịn itịn̄ emi koro ekọn̄ ye afai ẹka iso ndinọmọ ubonowo. Nte Abasi esinen̄ede okop mme akam? Ke edide ntre, ntak emi etiede nte ke owo isiyereke ata ediwak akam? [Bet ibọrọ.] Psalm 145:18 anam an̄wan̄a se ẹyomde edieke anade ẹyere akam nnyịn. [Kot itien̄wed Abasi.] Akpa n̄kpọ edi, ana akam oro ẹbọn̄de ẹnọ Abasi edi ke esịt akpanikọ onyụn̄ ekem ye akpanikọ oro odude ke Ikọ esie, kpa Bible.” Kûbọde ka ibuot 27 ke n̄wed Ndidu Uwem ke Nsinsi, nyụn̄ sio se enye etịn̄de aban̄a ufọn akam wụt. Nọ n̄wed ke etịbe ₦80.
8 Ke ini afiakde aka ndika iso ke akpa nneme ekenemede aban̄a akam, afo emekeme ndidomo usụn̄ nneme enyeemi nse:
◼ “Mma ndara nneme nnyịn ke ibuotikọ aban̄ade akam. Afo nte eyịghe mîdụhe oyokụt mme ekikere Jesus kaban̄a se ẹkpebọn̄de akam ẹban̄a nte ẹdide n̄kpọ un̄wam ẹmi ẹnọde ndausụn̄.” Kot Matthew 6:9, 10, osiode mme akpan udọn̄ oro Jesus okowụtde ke akam uwụtn̄kpọ esie owụt. Wụt ibuot 27, “Usụn̄ Ndibọ Un̄wam nto Akam,” ke n̄wed Ndidu Uwem ke Nsinsi, nyụn̄ bụp m̀mê imọ imekeme ndinam n̄wụt nte ẹkpepde n̄wed emi.
9 Ke ini edide edisịm ndinọ mbon en̄wen ifiọk Abasi, nnyịn imekeme ndibụp ete, “Anie ekeme ndinam utọ utom oro?” N̄wed Abasi ọbọrọ ete: “Nnyịn.”—2 Cor. 2:16, 17.