Ẹkop Idatesịt ke Ndinọ Ọyọhọ Ọyọhọ Ikọ Ntiense
1 Kpukpru nnyịn imesidara nditetịm nnam mme n̄kpọ oro inamde. Mark 7:37 ọdọhọ ke akwa udịm owo ẹma ẹtịn̄ ẹban̄a Jesus ẹte: “Enye etetịm anam kpukpru n̄kpọ.” Eyịghe idụhe Jesus okokopde idatesịt ke ndinam uduak Jehovah! (Men Psalm 40:8 domo.) Ebede ke ndikere mban̄a mme ekikere ẹtienede mi, nnyịn n̄ko iyokop idatesịt nte nnyịn inamde ewụhọ Jesus ‘ndikwọrọ ikọ nnọ mbio obio, nnyụn̄ [nnọ ọyọhọ ọyọhọ ikọ, NW] ntiense.’ (Utom 10:42) Ke January nnyịn idinọ n̄wed ekededi oro enyenede page 192 oro ẹkemịn̄de mbemiso 1985 emi esop ekemede ndinyene m̀mê n̄wed Ndidu Uwem. Didie ke nnyịn ikeme ndida mme n̄wed ẹmi nnọ ọyọhọ ọyọhọ ikọ ntiense?
2 Sia mme owo ẹsiwakde ndikere mban̄a mme n̄kpọ ẹban̄ade nsọn̄idem, afo emekeme ndidọhọ ete:
◼ “Kpa ye n̄wọrọnda unen oro ẹkụtde ke n̄kan̄ ibọkusọbọ, ekese ndutụhọ ẹdu ke ntak udọn̄ọ. Ke ekikere fo, nso idi ntak kaban̄a emi? [Bet ibọrọ.] Jesus Christ ọkọdọhọ ete ke udọn̄ọ edidi ubak ukperedem ini. (Luke 21:11) Edi Bible etịn̄ n̄ko aban̄a ini emi udọn̄ọ mîdidụhe aba. [Kot Isaiah 33:24.] Tịm fiọk nte n̄wed emi ọnọde idotenyịn ke akpan ukpepn̄kpọ Bible oro.” Wụt mme ikọ ẹdotde ke n̄wed oro oyomde ndinọ, nyụn̄ nọ enye ke usụhọde ekọmurua edide ₦40.
3 Ke ini ọnọde ikọ ntiense ido nneme ekpere mme ikpehe ufọkurua, afo emekeme ndikọm ndien ekem ọdọhọ ete:
◼ “Ndi etie fi nte ke mme n̄kpọ ẹsọn̄ urua ẹkaha idahaemi tutu edi ọkpọsọn̄ n̄kpọ ndinyene mme n̄kpọ udu uwem? [Bet ibọrọ.] Ndi afo emekere ke tutu amama oyodu ini emi ata ifụre ndutịm uforo edidude?” Bet ibọrọ. Ekem wụt itien̄wed Abasi emi odotde oro ẹkotde ẹsịn ke n̄wed oro afo ọnọde. Ka iso ke ndidọhọ: “N̄wed emi owụt nte Abasi, ebede ke Obio Ubọn̄ esie, edikọkde mme mfịna oro ẹnamde uwem edi ọkpọsọn̄ n̄kpọ ntre mfịn.” Nọ n̄wed ke usụhọde ekọmurua edide ₦40. Afo emekeme nditịn̄ adan̄a nte imọ imade nneme oro ndien ekem obụp ete: “Ndi odu usụn̄ emi nnyịn ikpakade iso ke nneme emi ini en̄wen?” Ke usụn̄ emi afo emekeme ndibọ enyịn̄ ye adres ufọk owo oro.
4 Afo emekeme ndinyene ifet ndidomo nneme enye emi aban̄ade emem ererimbot nse, adade n̄wed “Ndidu Uwem ke Nsinsi”:
◼ “Ke ekikere fo, ntak emi edide ọkpọsọn̄ n̄kpọ ntre ndinyene emem ofụri ererimbot? [Bet ibọrọ, ekem wụt ndise ke page 20-21.] Emi edi ndise n̄kpọntịbe Bible oro ẹbụkde ke Ediyarade. [Kot Ediyarade 12:7-9, 12 nnennen nnennen to ikpehe ekikere 17. Ekem kot uwetn̄kpọ ndise oro asan̄ade ye ndise oro.] Unana emem ererimbot edi kiet ke otu utịp eke edisio Devil nduọk ke isọn̄. N̄wed emi ọbọrọ ediwak akpan mbụme, ndien mmokop inemesịt ndinam fi enyene enye edieke afo edikotde enye.”—Man okụt mme enyene-uforo usụn̄ en̄wen ndinọ n̄wed Ndidu Uwem ke Nsinsi, se page edem nsiondi Utom Obio Ubọn̄ Nnyịn eke September 1995, February 1995, September 1994, September 1993, ye August 1992.
5 Ke ini afiakde aka ndikụt mbon oro ẹkewụtde udọn̄, afo emekeme ndidomo nditọn̄ọ ukpepn̄kpọ Bible ebe ke ndikpụhọ nda usụn̄ nneme enye emi:
◼ “Isan̄ oko ikenyenede nneme, afo ama etịn̄ inem inem n̄kpọ. [Siak se owo oro eketịn̄de.] Ami ke n̄kekere mban̄a oro, ndien n̄kpama ndibuana mme utịp ndusụk ndụn̄ọde oro n̄kanamde ke ibuot nneme oro. [Buana itien̄wed Abasi oro odotde.] Nnyịn imesinịm ukpepn̄kpọ mfọn oro an̄wamde ediwak miliọn owo ndidụn̄ọde mme akpan ukpepn̄kpọ Bible ke ekpri ibio ini. Utọ ndụn̄ọde oro ekeme ndinam mbuọtidem fo ke mme un̄wọn̄ọ Abasi ndisu ọkọri.” Wụt ndusụk mbụme oro edibọrọde. Edieke owo oro esịnde ukpepn̄kpọ Bible, nam an̄wan̄a nte ke nnyịn imenyene san̄asan̄a usọp usọp ukpepn̄kpọ n̄ko oro adade minit 30 kpọt ke urua ke ufan̄ urua 16. Wụt ediye uduot ekpri n̄wed Oyom, kụbọde ka ukpepn̄kpọ 1, nyụn̄ bụp m̀mê imọ imekeme ndinam akpa ukpepn̄kpọ n̄wụt.
6 Ti Ndida Mme N̄wedikot: Emekeme ndida mmọ uforo uforo ke ntọn̄ọikọ fo man edemerede udọn̄ ke mme n̄kpọ eke spirit, mîdịghe emekeme ndinọ mmọ edieke owo mîbọhọ n̄wed ndomokiet. Ke ebiet emi udọn̄ odude, da etop oro ẹmịn̄de-mịn̄ oro odude ke edem n̄wedikot ndisịn udọn̄ nnọ owo oro man enyịme ukpepn̄kpọ Bible onyụn̄ esidi mme mbonoesop.
7 Nyene usọ ke utom fo, ndien afo oyokop idatesịt ke enye. Tịn̄ enyịn nọ ọyọhọ ọyọhọ ikọ ntiense, nyụn̄ kop idatesịt ke nditịm nnam kpukpru ikpehe utom ukwọrọikọ.—1 Tim. 4:16.