Di Eneme Nneme!
1 Man inam utom ukwọrọikọ ye edinam mme mbet oro ẹdọn̄de nnyịn, ana nnyịn inọ mbon efen etop. (Matt. 24:14; 28:19, 20) Nneme ekeme ndidi ọkpọsọn̄ n̄kpọ idem ye mme ufan. Nso ikeme ndin̄wam nnyịn ndinọ isenowo eti mbụk?
2 To ke Esenowo Kabade Di Ufan: Domo ndinịm idemfo fo ke itie mbon oro afo osobode ke an̄wautom. Ke ererimbot mfịn, an̄wan̄a nte ke ndusụk owo ẹkeme ndinyene eyịghe, m̀mê idem ndikop ndịk mban̄a isenowo. Emi ekeme ndibiọn̄ọ nneme. Didie ke afo ekeme ndinam mbon oro afo osobode ẹkan ndịk oro mmọ ẹkenyenede ke akpa? Idem mbemiso isiorode uyo, usụn̄ kiet ndinyene nneme edi ukamaidem oro owụtde iso o-bụt. Eti usịnen̄kpọ nnyịn ye ukamaidem oro enyenede uku ẹn̄wam ndisụhọde ndịk.—1 Tim. 2:9, 10.
3 Un̄wam efen ke ndinyene nneme edi ifụre ifụre ye ufan ufan edu. Emi an̄wam ndinam mbon efen ẹdu ke ifụre onyụn̄ anam mmọ ẹyom ndinen̄ede n̄kpan̄ utọn̄. Emi oyom eti ntịmidem. Ke ini nnyịn inyenede se iditịn̄de in̄wan̄-in̄wan̄ ke ekikere, idem idinyekke nnyịn. Ndien ifụre ifụre edu nnyịn emi ekeme ndidụri mbon efen nnọ etop nnyịn. N̄wan kiet ama etịn̄ aban̄a ediwaha oro Ntiense kiet akawahade ete: “Se ntide ke imam imam iso esie ekedi emem. Ama edemede mi udọn̄.” Emi ama eberede usụn̄ ọnọ n̄wan oro ndikpan̄ utọn̄ nnọ eti mbụk.
4 Mme Edu Oro Ẹdụride Owo: Oyom nnyịn inyene ata ọkpọkpọ udọn̄ ke idem mbon en̄wen. (Phil. 2:4) Usụn̄ kiet ndinam emi edi nnyịn nditre ndimen nneme oro nneme ikpọn̄. Ke akpanikọ nneme abuana edikpan̄ utọn̄ n̄ko. Ke ini idọhọde mme andikpan̄ utọn̄ nnọ nnyịn ẹtịn̄ ekikere mmọ ndien nnyịn ikpan̄ utọn̄ ye ọkpọsọn̄ udọn̄ ke ikọ mmọ, mmọ ẹsikụt ke nnyịn imekere iban̄a mmimọ. Ntre ke ini mme andikpan̄ utọn̄ nnọ fi ẹtịn̄de ikọ, kûsọsọp usịbe udụk uyom ifet ndikụre nneme oro eketịmde. Toro mmọ edieke ekemede ndinam ntre ke esịt akpanikọ, nyụn̄ domo ndikpụhọde ikọ fo ntiene se mmọ ẹtịn̄de. Edieke ibọrọ mmọ owụtde se inen̄erede itịmede mmọ esịt, kpụhọ nneme fo nyụn̄ nneme ban̄a mme n̄kpọ oro ẹfịnade mmọ.
5 Nsụkidem ye ata nsụkesịt ẹnam nneme akaka iso. (N̄ke 11:2; Utom 20:18b) Mme owo ẹma ẹsịk ẹdiana Jesus koro enye ‘ekenyenede ifụre-ifụre ido onyụn̄ osụhọde idem ke esịt.’ (Matt. 11:29) Ke n̄kan̄ eken, edu edibat ke imedi n̄kpọ ikan owo efen ebebịn mme owo. Ntem, okposụkedi nnyịn inen̄erede inịm nte ke nnyịn imenyene akpanikọ, nnyịn ke ọniọn̄ iyefep nditịn̄ ikọ ye edu edisọn̄ọ nyịre ke n̄kpọ.
6 Nso edieke ibọrọ oro owo ọnọde owụtde edinịm ke akpanikọ oro mîdụhe ke n̄kemuyo ye se Bible ekpepde? Ndi ana nnyịn inen̄ede enye? Ih, nte ini akade, edi nnyịn ikpodomoke ndinam ntre ke akpa ediwaha. Ediwak ini esifọn ndika iso ye ekikere oro nnyịn ye andikpan̄ utọn̄ nnọ nnyịn inyịmede mbemiso ibuanade mme ukpepn̄kpọ Bible oro ẹkemede ndinen̄ede nsọn̄ enye ndinyịme. Emi oyom ime ye mbufiọk. Paul ama enịm eti uwụtn̄kpọ ke afan̄ emi ke ini ọkọnọde mme ebiereikpe Areopagus ikọ ntiense.—Utom 17:18, 22-31.
7 Ke akande kpukpru, ima unana ibụk ayan̄wam nnyịn ndidi mme eneme nneme oro ẹnyenede uforo. Kpa nte Jesus, ana nnyịn ikop mbọm iban̄a mme owo oro “ẹdude ke nnanenyịn ẹnyụn̄ ẹsuanade, nte erọn̄ eke mînyeneke andikpeme.” (Matt. 9:36) Emi oyonụk nnyịn nditịn̄ eti mbụk nnọ mmọ nnyụn̄ n̄n̄wam mmọ ẹdụk usụn̄ oro adade esịm uwem. Etop nnyịn edi etop ima, ke ntre ẹyak nnyịn ika iso nditịn̄ enye ke ima ima usụn̄. Ke ndinam ntre, nnyịn ikpebe Jehovah Abasi ye Jesus Christ—mme akakan Eneme Nneme ke ekondo.