Obufa Ndutịm Usen Akpan Mbono

Ibuotikọ ndutịm usen akpan mbono eke isua utom 2008 edi “Nnyịn Idi Mbateso—Jehovah Edi Andibot Nnyịn,” ọkọn̄ọde ke Isaiah 64:8. Item N̄wed Abasi oro ẹdinọde ke mbono emi ayanam ifiọk oro inyenede iban̄a ọniọn̄, unenikpe, odudu, ye ima Jehovah nte Akwa Oboteso, ọkọri.

Utịn̄ikọ esenyịn circuit emi, “Ndinam Utom Ukwọrọikọ nte Mme Eso Oro Ẹnyenede Ukpono,” oyowụt nte ata ediwak owo oro ibat mmọ ọkọride-kọri ẹbọde akpakịp edidiọn̄ ke ndidiọn̄ọ akpanikọ nnyụn̄ mbuana enye ye mbon en̄wen. Utịn̄ikọ emi “Nditie N̄kere N̄kpọ Eyekpeme Fi,” oyowụt nte edinen̄ede ntie n̄kere ndinen edumbet Jehovah ekemede ndikpeme nnyịn. Etịn̄ikọ oro otode-to edi eyeneme mme ibuotikọ emi “‘Ẹkûbiet Editịm N̄kpọ Emi’” ye “Yak Akwa Oboteso Ada Fi Usụn̄.” Mme ete ye eka ye mme uyen ẹyebọ nsịnudọn̄ ẹto mme ikpehe emi, “Mme Uyen Oro Ẹnyenede Ufọn Ẹnọ Jehovah” ye “Akpan Udeme Oro Mme Ete ye Eka Ẹnyenede ke Ndida N̄kpri Owo Usụn̄.” Nnyịn iyenem esịt ndise mme nnamn̄wụt nnyụn̄ n̄kop mme ndụn̄ọde emi ẹban̄ade se nditọete nnyịn ẹnamde ke an̄wautom. Mbon oro ẹyomde ndiyarade uyakidem mmọ nnọ Abasi ke baptism mmọn̄ ẹkpenyene ndisian esenyịn oro etiede ibuot usọp usọp nte ẹkekeme. Kụt ete ke ememen nsiondi Enyọn̄-Ukpeme oro ẹdikpepde ke urua usen akpan mbono oro edi.

Akwa Oboteso esinam se ededi oro enye aduakde. Edi obiomo nnyịn owo kiet kiet ndimek nte nnyịn idinamde n̄kpọ iban̄a ndausụn̄ oro enye ọnọde nnyịn. Ukem nte eboho mbat oro oboteso esidade obot n̄kpọ, ẹkeme ndin̄wam, ẹdiọn̄, ẹnyụn̄ ẹnam mbon oro ẹtienede ndausụn̄ ye mme edinen̄ede Jehovah ẹkabade ẹdi mme eso oro ẹnyenede ufọn. Ke ini nnyịn iberede ye Jehovah, nnyịn inọ ukara esie ubọn̄ inyụn̄ ibọ uwak edidiọn̄.