Ekebe Mbụme
◼ Edieke mbon oro ẹyomde ndidọ ndọ ẹduakde ndinam ndọ mmọ ke Ufọkmbono Obio Ubọn̄, nso ye nso ke oyom mmọ ẹneme ye mbiowo?
Ndọ emi ẹdiomide nte ekemde ye mme edumbet Bible esida ukpono ọsọk Jehovah. Emi enen̄ede edi ntre ke ini ẹnamde ndọ ke Ufọkmbono Obio Ubọn̄, sia mme owo ẹsede mme edinam emi ẹnamde do nte mme edinam esop Abasi nnyịn. Man “kpukpru n̄kpọ ẹda itie ke ido nte eyede ye ke ndutịm,” odot mbiowo ẹneme ndusụk n̄kpọ ye mbon oro ẹyomde ndinam ndọ ke ini mmọ ẹduakde ndida Ufọkmbono Obio Ubọn̄ nnam ndọ mmọ.—1 Cor. 14:40.
Mbon oro ẹyomde ndinam ndọ mmọ ke Ufọkmbono Obio Ubọn̄ ẹkpenyene ndiwet Kọmiti Utom Esop emi ẹsisopde idem ke ufọkmbono oro. Mmọ ẹkpenyene ndibabak nnọ leta emi ẹnyụn̄ ẹsiak usen ye ini oro mmọ ẹyomde ndida ufọkmbono oro nnam ndọ. Mmọ ẹkpenyene ndifiọk nte ke mbiowo idikpụhọkede ini mbono esop ke ntak ndọ. Adianade do, ana erenowo ye n̄wan emi ẹyomde ndidọ ndọ do ẹdu ke eti idaha ke esop, ẹdude uwem ẹkekem ye mme edumbet Bible ye ndinen idaha Jehovah.
Man ẹkụt ẹte ke ndutịm ndọ oro ayanam ẹtịn̄ nti ikọ ẹban̄a Abasi nnyịn oro enyenede uku, mbon oro ẹyomde ndidọ ndọ ẹkpenyene ndineme ndutịm ndọ mmọ ye kọmiti utom mbemiso ẹnamde ndutịm ndọ mmọ ẹma. Okposụkedi mbiowo mîdiyịreke ite ẹnam se mmimọ imade, edieke n̄kpọ ekededi odude emi mbon oro ẹyomde ndidọ ndọ ẹduakde ndinam emi etiede nte iditịmke ifọn, mmọ ẹkpenyene ndikop uyo mbiowo nnyụn̄ nnam ukpụhọde. Kingdom Melodies kpọt m̀mê ikwọ n̄wedikwọ nnyịn ke ẹkpebre m̀mê ke ẹkpekwọ. Ana ẹbọ unyịme mbemiso ẹbanade Ufọkmbono Obio Ubọn̄ m̀mê ẹfiakde ẹtịm n̄kpọitie. Edieke ẹdisiode ndise m̀mê ẹdimụmde edinam ẹsịn ke vidio, ẹkpenyene ndinam emi ukpono ukpono. Edieke osio ndise edidide owo ererimbot, ebe ndọ ekpenyene ndikụt nte ke imọdọhọ enye esịne ọfọn̄ ọfọn man owụt ukpono ọnọ edinam oro. Mbiowo ẹkeme ndinyịme ẹnam ndomonse ke Ufọkmbono Obio Ubọn̄ ama akam edi emi idituahake ye ndutịm eken ke esop. Owo ikpenyeneke ndidian n̄wedikot ndomokiet ke obukpọk ntọt. Nte ededi, mbiowo ẹkeme ndinọ ibio ibio ntọt ke Esoputom man ẹsian esop ke ẹyeda Ufọkmbono Obio Ubọn̄ oro ẹnam ndọ.
Okposụkedi emi owo mînịmke mbet nte ke ana kpukpru mbon oro edisịnede ke udịm isan̄ ndọ ẹdi mbon oro ẹma ẹkena baptism, ididotke ndimen mbon oro usụn̄ uwem mmọ atuahade ye mme edumbet Bible nsịn m̀mê mbon emi edu uwem mmọ edidemerede eyịghe ke ekikere mbon oro ẹdụkde. Edieke ebiowo odude, enye ekpenyene ndidi adianndọ. Sia mbiowo ẹdide mme andikpep Ikọ Abasi emi ẹdotde, mmọ ẹtịm ẹdot nditat mme edumbet N̄wed Abasi emi ẹnyenede ebuana ke utọ akpan edinam emi.—1 Tim. 3:2.
Sia ẹkemede nditịn̄ eti m̀mê idiọk ndian ebiowo oro adiande ndọ emi, ẹkpenyene ndibabak nneme kpukpru n̄kpọ oro aban̄ade ndọ emi nnọ enye. Enye oyosobo ye mbon emi ẹyomde ndidọ ndọ onyụn̄ obụp m̀mê mmọ ẹma ẹdu uwem nte ọfọnde ke ini uyomima; mbon oro ẹyomde ndidọ ndọ mi ẹkpenyene nditịn̄ akpanikọ nnọ enye. Edieke n̄wan m̀mê erenowo oro oyomde ndinam ndọ mi ọkọdọde ndọ ke ini edem, enye ekpenyene ndiwụt ke imọ imenyene ifụre oro ekemde ye N̄wed Abasi ye ibet ukara ndifiak ndọ ndọ. (Matt. 19:9) Emi esịne ndiwụt ebiowo oro uyarade ke imọ ima isio m̀mê iwọrọ ndọ.
Ke ini mbon oro ẹyomde ndidọ ndọ ẹtịn̄de se idude ifụre ifụre ẹnyụn̄ ẹberede ye mbiowo, ndọ oro eyenem kpukpru mme andidụk.—N̄ke 15:22; Heb. 13:17.