October

Ɔtɔ da a, ɔyɛ dzen ma wo dɛ ebɛyɛ setsie anaa? Nna dɛm na ɔtse wɔ Ɔhen David n’afamu. Dɛm ntsi ɔserɛɛ Nyankopɔn dɛ ɔmma onnya “ɔpɛ sunsum” a ɔdze betsie no. (Ndw. 51:12) Nna David dɔ Jehovah. Naaso nna ɔtɔ da a ɔyɛ dzen ma no dɛ ɔbɛyɛ setsie, na dɛmara na ɔtɔ da a ɔyɛ dzen ma hɛn so. Ebɛnadze ntsi a? Odzi kan, wɔammfa setsie annwo hɛn mu biara. Otsia ebien, adze rekye na adze resa nyina, Satan reyɛ dza obotum biara dɛ ɔbɛma yɛayɛ Jehovah no do asoɔdzen dɛ mbrɛ ɔyɛe no. (2 Cor. 11:3) Otsia ebiasa, nyimpa a woetwa hɛnho ehyia no da enyiammbɔho sunsum edzi, na dɛm sunsum yi na “ɔyɛ edwuma sesei wɔ hɔn a wɔyɛ asoɔdzen no mu.” (Eph. 2:2) Iyi ntsi, sɛ yebotum etsie Jehovah nye hɔn a ɔama hɔn tum no a, no ho hia paa dɛ yɛyer hɛnho dɛ yebedzi hɛn mberɛwyɛ do. Afei so, ɔsɛ dɛ yɛyer hɛnho dɛ yɛbɔko etsia Abɔnsam nye nhyɛdo a no wiadze no dze ba hɛn do no. w23.10 6 ¶1

Anwanwadze a Jesus yɛe a yɛaka ho asɛm yi, ebɛnadze na yebotum esua efi mu? Ɔno nye dɛ, ɔsɛ dɛ yɛbrɛ hɛnho adze. Jesus ammfa anwanwadze a ɔyɛe yi enntuw noho. Nokwasɛm nye dɛ, ndzɛmba ahorow a ɔyɛe nyina, ɔammfa no mu biara enntuw noho da! Mbom ɔbrɛɛ noho adze, na ɔkɔr do dze dza ɔyɛe nyina no ho enyimnyam nye ayɛyi maa n’Egya. (John 5:​19, 30; 8:28) Sɛ yesuasua Jesus na yɛbrɛ hɛnho adze a, biribiara nnyi hɔ a yɛbɛyɛ a yɛdze botuw hɛnho da. Mbom hokwan a yeenya dɛ yɛrosom Nyankopɔn a ne yamu ye no, ɔno na hom mma yɛmfa ntuw hɛnho. (Jer. 9:​23, 24) Ɔsɛ dɛ yɛdze enyimnyam nye ayɛyi a ɔsɛ fata Jehovah no ma no. Yɛreka yi ara, sɛ ɔammboa hɛn a, adze papa biara nnyi hɔ a yebotum ayɛ. (1 Cor. 1:​26-31) Sɛ yɛbrɛ hɛnho adze a, yɛrenngye ndzɛmba pa a yɛyɛ ma afofor no ho enyimnyam mmfa. Yenyim dɛ Jehovah hu dza yɛyɛ nyinara, na n’enyiwa sɔ. Iyi nkotsee mpo ma hɛn akoma tɔ hɛn yamu. (Fa toto Matthew 6:​2-4 ho; Heb. 13:16) Ampa, sɛ yesuasua Jesus na yɛbrɛ hɛnho adze a, yɛma Jehovah n’enyiwa gye paa.—1 Pet. 5:6. w23.04 4 ¶9; 5 ¶11-12

Nyankopɔn maa ɔsomafo Paul kyerɛwee kɛmaa Christianfo a nna wɔwɔ Philippi no dɛ wɔndwen afofor ho. Sɛ yɛwɔ adzesua ase a, yebesi dɛn dze dza ɔsomafo Paul kae no ayɛ edwuma? Ɔsɛ dɛ yɛkaa dɛ, dɛ mbrɛ yɛpɛ dɛ yɛma mbuae no, dɛmara na hɛn nuanom so pɛ dɛ wɔyɛ. Ɔwodze ma yɛnhwɛ no wɔ dɛm kwan yi do. Sɛ enye w’anyɛnkofo robɔ nkɔmbɔ a, ɔyɛ a wankotsee na ekasa anaa ema kwan ma hɔn so wɔkasa? Yɛgye dzi dɛ ema hɔn kwan ma wɔkasa. Dɛmara so na sɛ yɛkɔ asafo nhyiamu ase a, yɛpɛ dɛ yɛma hɛn nuanom dodow no ara kwan ma wɔma mbuae. Nokwasɛm nye dɛ, ndzɛmba etsitsir a yebotum ayɛ dze ahyɛ hɛn nuanom nkuran no, no mu kor nye dɛ yɛbɛma hɔn kwan ma wɔaama mbuae wɔ asafo nhyiamu ase. (1 Cor. 10:24) Ntsi yɛbɛma hɛn mbuae ayɛ tsia. Yɛyɛ dɛm a, ɔbɛma hɛn nuanom so enya kwan ama mbuae. Sɛ wo mbuae no yɛ tsia mpo a, mma nnka nsɛntsitsir a ɔwɔ mu no nyina ho asɛm. Dza nkyekyɛmu no reka ho asɛm no, sɛ eka ne nyina a, wo nuanom rinnya bi nnka. w23.04 22-23 ¶11-13

Ɔsɛ dɛ yɛkaa dɛ, adze a no ho hia paa nye dɛ yɛbɔboa afofor. Adze tsitsir a yebotum ayɛ dze aboa afofor nye dɛ yɛdze hɛnho bɛhyɛ asɛnka edwuma no mu. Sɛ yɛwɔ asɛnka mu a, ɔsɛ dɛ yɛdandan kwan a yɛfa do ka asɛm no mu. Siantsir nye dɛ yehyia nkorɔfo a ɔsor hɔn gyedzi, mbrɛ wosi yɛ hɔn adze, nye beebi a wofi. Yebotum esuasua ɔsomafo Paul wɔ hɛn asɛnka edwuma no mu. Nna ɔdandan ne nsɛm mu ma ɔnye hɔn a ɔka asɛmpa no kyerɛ hɔn no tsebea hyia. Jesus yii ɔsomafo Paul dɛ “amanamamfo somafo.” (Rom. 11:13) Ɔkaa asɛmpa no kyerɛɛ Jewfo, Greekfo, hɔn a wonyim nwoma, hɔn a wonnyim nwoma, aban mpanyimfo nye ahemfo. Mbrɛ ɔbɛyɛ a Paul botum aka asɛmpa no ma aka nyimpa ahorow a wɔtse dɛm no hɔn akoma no, ɔyɛɛ noho ‘adze nyina maa nyimpa nyina.’ (1 Cor. 9:​19-22) Paul emmbu n’enyi enngu nyimpa a wɔtse dɛm no hɔn amambra, beebi a wofi, nye dza wɔgye dzi do, mbom ɔdandaan kwan a ɔfa do ka asɛm no mu ma ɔnye hɔn tsebea hyiae. Hɛn so, sɛ asɛmpa a yɛka no botum aka nkorɔfo hɔn akoma a, ɔsɛ dɛ yɛhwehwɛ akwan ahorow a yebotum afa do aka ma ɔnye hɔn tsebea ehyia. w23.07 23 ¶11-12

Sɛ obi dwe a, ɔnnkyerɛ dɛ ɔyɛ mberɛw, na mbom ɔyɛ dzen ankasa. Siantsir nye dɛ, sɛ tsebea a no mu yɛ dzen soɛr a, obi a ɔyɛ dzen no tum hyɛ noho do na ogyina ano. Ɔdwe ka “sunsum no aba” no ho. (Gal. 5:​22, 23) Greek kasafua a wɔdze gyinaa hɔ maa “ɔdwe” wɔ Bible mu no, nna wɔdze dzi dwuma dze kyerɛ pɔnkɔ a n’enyi yɛ dzen naaso wɔatsetse no ma n’enyi aba famu. Ɔwodze, twa ho mfonyin hwɛ pɔnkɔ a n’enyi yɛ dzen na afei dze n’enyi aba famu. Ɔwɔ mu dɛ n’enyi aba famu dze, naaso ɔno nnkyerɛ dɛ n’ahoɔdzen no efi no mu. Hɛn so, ebɛnadze na ɔbɔboa hɛn ma yaakɔ do ada ɔdwe edzi na ber kor no ara yaayɛ nyimpa a yɛyɛ dzen? Hɛnankasa runntum nnyɛ. Mbom dza ɔbɔboa hɛn nye dɛ yɛbɛserɛ Jehovah hɔ sunsum krɔnkrɔn na aboa hɛn ma yaada su a no ho hia yi edzi. Nokwasɛm nye dɛ, nyimpa piinara na wɔabɛyɛ hɔn a wɔdwe. Dɛ nhwɛdo no, yɛwɔ enuanom pii a binom hyɛɛ hɔn ebufuw naaso wɔkyerɛɛ dɛ wɔdwe. Dza enuanom no yɛe no boaa hɔn a wohun dza ɔkɔr do no ma wonyaa enuanom no ho adwen pa.—2 Tim. 2:​24, 25. w23.09 14 ¶3

Ɔsomafo John nyaa enyido-adzehu bi, na ohun mpanyimfo 24 dɛ wɔrosom Jehovah wɔ sor. Nna woriyi Nyankopɔn ayɛw na wɔreka dɛ ɔfata dɛ ɔgye “enyimnyam nye enyidzi nye tum.” (Nyi. 4:​10, 11) Bible no ma yehu dɛ abɔfo anokwafo no so wɔ ndzɛmba pii a wobotum egyina do eyi Jehovah ayɛw na wɔahyɛ no enyimnyam. Wɔnye Jehovah wɔ sor na wonyim no yie. Ndzɛmba a Jehovah yɛ no ma abɔfo no hu no su ahorow. Na sɛ wɔhwɛ Jehovah no ndwuma a, okenyan hɔn ma woyi no ayɛw. (Job 38:​4-7) Hɛn so, sɛ yɛrobɔ mpaa a, ɔsɛ dɛ yeyi Jehovah ayɛw. Siantsir a yɛdɔ Jehovah, nye enyisɔ a yɛwɔ wɔ ndzɛmba a ɔyɛ ma hɛn no ho no, yebotum aka ho asɛm aber a yɛrobɔ mpaa no. Sɛ irusua Bible no a, ɔyɛ a hwehwɛ Jehovah no su ahorow bi a w’enyiwa gye ho paa no. (Job 37:23; Rom. 11:33) Afei, ka mbrɛ dɛm su ahorow no ma etse nka no ho asɛm kyerɛ no. Ɔno da nkyɛn a, mbrɛ Jehovah boa hɛn nye hɛn nuanom Christianfo a wɔwɔ wiadze nyina no so, yebotum eyi no ayɛw wɔ ho.—1 Sam. 2:​1, 2. w23.05 3-4 ¶6-7

Nyankopɔn no nkorɔfo gyee hɔnho fii Babylon Kɛse no nsamu wɔ 1919 mu. Dɛm afe no ara mu na “akowaa nokwafo nye nyansafo” no so yii ne tsir mbrɛ ɔbɛyɛ a ɔbɔboa nyimpa a wɔwɔ akoma pa no ma wɔaahyɛ ase anantsew ‘Kwan Krɔnkrɔn’ no do. (Matt. 24:​45-47; Isa. 35:8) Edwuma a hɔn a wodzii kan siesiee kwan no mu yɛe ntsi, aboa hɔn a wɔnam ‘Kwan Krɔnkrɔn’ no do no ma wosua dza Jehovah bɛyɛ ama adasamba no ho adze pii. (Mbɛ. 4:18) Afei so, nna obotum aboa hɔn ma wɔdze Jehovah ne mbra abɔ hɔn bra. Ofi tsetse besi ndɛ nyina, Jehovah nnhwɛ kwan dɛ n’asomfo bɛyɛ nsesa biara a ohia dɛ wɔyɛ no prɛko pɛ. Mbom ɔtsew no nkorɔfo ho nkakrankakra. Yɛdze enyigye rohwɛ ber a hɛn nyina botum asɔ Jehovah n’enyi wɔ biribiara mu no kwan dzendzenndzen! Kwan biara hia dɛ wɔtaa siesie. Ofi 1919 reba no, wɔakɔ do ayɛ nsiesie edwuma wɔ ‘Kwan Krɔnkrɔn’ no do mbrɛ ɔbɛyɛ a nyimpa pii botum atwe hɔnho efi Babylon Kɛse no ho na wɔabɛfa do. w23.05 17 ¶15; 19 ¶16

Akwankyerɛ Kuw no mufo ankasa dze ntsetsee ma hɔn aboafo a wɔsom wɔ egyinatukuw ahorow a ɔhyɛ Akwankyerɛ Kuw no ase no mu. Dɛm aboafo yi ridzi asodzi a no mu yɛ dur a wɔdze ahyehyɛ hɔn nsa wɔ Jehovah n’ahyehyɛdze no mu no ho dwuma pɛpɛɛpɛ. Wɔatsetse hɔn yie a ɔbɛma woetum ahwɛ Christ no nguan no yie. Sɛ aka kakra ma ahohiahia kɛse no aba n’ewiei na wɔbɛfa hɔn a wɔasera hɔn a wɔaka wɔ asaase yi do no nyina kɔ sor a, ɔno nnkyerɛ dɛ nokwar som bogu. Mbom, ɔbɔwɔ hɔ daa wɔ asaase yi do. Osiandɛ Jesus Christ yɛ kandzifo papa ntsi, biribiara nnyi hɔ a Nyankopɔn n’asomfo bɔhwer. Ɔyɛ nokwar dɛ dɛm aber no, Gog a ofi Magog a ɔyɛ aman ahorow a wɔbɛka hɔnho abɔ mu no bɔtow ahyɛ Nyankopɔn n’asomfo do. (Ezek. 38:​18-20) Naaso dɛm ber tsiabaa mu adzeyɛ yi rinnkesi hwee; Nyankopɔn no nkorɔfo bɔkɔ do ara asom no. Jehovah bɛgye no nkorɔfo efi dɛm atamfo yi nsamu! Ɔsomafo John hun “nyimpadodow kɛse” a wɔka Christ no nguan fofor no ho no wɔ enyido-adzehu mu. Wɔkaa kyerɛɛ John wɔ enyido-adzehu no mu dɛ, dɛm “nyimpadodow kɛse” yi, “wofi ahohia kɛse no mu.” (Nyi. 7:​9, 14) Iyi ma yehu paa dɛ Jehovah bɛgye hɔn nkwa! w24.02 5-6 ¶13-14

Yebesi dɛn enya sunsum krɔnkrɔn? Ɔsɛ dɛ yɛbɔ mpaa, yesua Nyankopɔn n’Asɛm a ɔdze no sunsum no kaa mbarimba binom ma wɔkyerɛwee no, na yɛnye n’ahyehyɛdze a no sunsum kyerɛ no kwan no nantsew. Sɛ yɛyɛ dɛm a, ɔbɔboa hɛn ma yaada “sunsum no aba” edzi. (Gal. 5:​22, 23) Hɔn a wɔkɔ do dwen dza ɔtsen ho, na hɔn abrabɔ ho tsew no nkotsee na Nyankopɔn dze no sunsum krɔnkrɔn no ma hɔn. Dɛm ntsi, sɛ yɛdwendwen ndzɛmba bɔn ho na yɛdze hɛnho hyɛ mu a, Jehovah ronnkɔ do mmfa no sunsum no mma hɛn. (1 Thess. 4:​7, 8) Afei so, sɛ yɛbɔkɔ do enya sunsum krɔnkrɔn a, ɔnnsɛ dɛ ‘yebu nkɔnhyɛsɛm enyimtsia.’ (1 Thess. 5:20) “Nkɔnhyɛsɛm” a kyerɛwsɛm yi reka ho asɛm no nye nsɛm a Nyankopɔn nam no sunsum no do dze ama hɛn no. Bi nye dza ɔfa Jehovah ne da no nye mber a yɛtse mu yi ho. Ɔnnsɛ dɛ yɛtow hɛn adwen mu wɔ Jehovah ne da no ho na yenya adwen dɛ Amagedon remmba wɔ hɛn aber yi mu. Mbom ɔsɛ dɛ yɛma Jehovah ne da a ɔreba no yɛ ntsɛm wɔ hɛn adwen mu, yɛbɔ bra pa, na yɛda “nyamesompa” edzi.—2 Pet. 3:​11, 12. w23.06 12-13 ¶13-14

Sɛ ponografi anaa ndwamansɛm ho mfonyin bi pue wɔ hɛn elɛktrɔnek efir do awerɛfir mu a, ɔsɛ dɛ yɛyɛ dɛn? Ɔsɛ dɛ yeyi hɛn enyi ntsɛmara. Sɛ yɛkaa dɛ anyɛnkofa a yɛnye Jehovah wɔ no, ɔno na ɔsom bo ma hɛn a, ɔbɔboa hɛn ma yeetum ayɛ dɛm. Mbrɛ ɔtse nye dɛ, mpɛn pii no mfonyin ahorow a ɔnnhyɛ da ara nnyɛ ndwamansɛm no mpo botum ekenyan nda ho akɔndɔ. Mfonyin a ɔtsetse dɛm no, ebɛnadze ntsi na ɔnnsɛ dɛ yɛhwɛ mpo? Osiandɛ yɛmmpɛ dɛ yɛyɛ biribi ketseketse bi mpo a ɔbɛma yɛasɛɛ awar wɔ hɛn akoma mu. (Matt. 5:​28, 29) Asafo mu panyin bi a wɔfrɛ no David a ɔwɔ Thailand kaa dɛ: “Ɔyɛ a mibisa moho dɛ: ‘Ɔwɔ mu dɛ mfonyin no nnhyɛ da ara nnyɛ ponografi dze, naaso sɛ mokɔ do hwɛ a, Jehovah n’enyi bɛgye ho anaa?’ Sɛ modwendwen ho dɛm a, ɔboa me ma monnhwɛ mfonyin a ɔtsetse dɛm no.” Sɛ yesuro dɛ yɛbɛyɛ biribi a Jehovah mmpɛ a, ɔbɛma yɛayɛ hɛn adze nyansa mu. Nyankopɔn ho suro nye “nyansa ahyɛse.” w23.06 23 ¶12-13

Obotum aba dɛ, “adankyir” a kyerɛwsɛm no ka ho asɛm no begyina hɔ ama hɛn asafo ahorow no. Jehovah ahyɛ hɛn bɔ dɛ, wɔ ahohiahia kɛse no mu no, sɛ yɛkɔ do nye hɛn nuanom bɔ mu som no a, ɔbɔbɔ hɛnho ban. Dɛm ntsi, ndɛ paa na ɔsɛ dɛ yɛbɔ mbɔdzen dɔ hɛn nuanom na yebu hɛn enyi gu hɔn sintɔ do. Bi a ɔno na ɔbɛma yeenya nkwa! ‘Jehovah ne da kɛse no’ bɛma adasamba nyina ho ehiahia hɔn. (Zeph. 1:​14, 15) Mbrɛ ɔtse nye dɛ, Jehovah n’asomfo mpo ho bɛkyer hɔn. Naaso sɛ yesiesie hɛnho ndɛ ma ndzɛmba a obesisi daakye no a, hɛn akoma runntu na yebotum aboa hɛn nuanom so. Sɛ yɛyɛ dɛm a, yebotum emia hɛn enyi egyina ɔhaw biara a yebehyia no ano. Sɛ hɛn nuanom kɔ ahokyer mu a, yɛbɛyɛ dza yebotum biara dze aboa hɔn, na yaama hɔn nsa aka dza wohia dze akyerɛ dɛ yɛwɔ ayamuhyehye. Afei so, yɛnye hɛn nuanom a yɛdɔ hɔn no bɔbɔ pampee. Iyi bɛma Jehovah agye hɛn nkwa akɔ wiadze fofor no mu. Hɔ dze atoyerɛnkyɛm na amandzehu a ɔretseetsee hɛn ndɛ no remmba hɛn adwen mu bio.—Isa. 65:17. w23.07 7 ¶16-17

Bible no taa ka mbarimba anokwafo bi ho asɛm dɛ nna wɔyɛ dzen. Naaso nna ɔnnyɛ aber nyina na wɔtse nka dɛ wɔyɛ dzen. Sɛ yɛfa Ɔhen David dɛ nhwɛdo a, mber bi wɔ hɔ a, nna ɔtse nka dɛ Nyankopɔn dze no etsim hɔ “dzendzen dɛ bepɔw.” Naaso ɔtɔ da a nna ɔbɔ hu. (Ndw. 30:7) Samson so, sɛ Nyankopɔn no sunsum ba no do a, nna noho yɛ dzen araa ma wɔnnka. Naaso obohun dɛ sɛ onnyi no do a ɔyɛ mberɛw, ‘na ɔyɛ tse dɛ nyimpa biara.’ (Atsɛ. 14:​5, 6; 16:17) Dɛm mbarimba anokwafo yi hɔn asɛm no ma yehu dɛ, nna Jehovah na ɔma hɔn ahoɔdzen. Ɔsomafo Paul so bohun dɛ ohia Jehovah no hɔ ahoɔdzen. (2 Cor. 12:​9, 10) Nna yarba retseetsee no. (Gal. 4:​13, 14) Ɔtɔ da so a, nna ɔyɛ dzen ma no dɛ ɔbɛyɛ dza ɔtsen. (Rom. 7:​18, 19) Ɔno da nkyɛn a, nna ɔyɛ a ɔbɔ hu, osiandɛ nna onnyim dza ɔbɔto no daakye. (2 Cor. 1:​8, 9) Naaso sɛ nna Paul yɛ mberɛw a na ɔyɛ dzen. Ebɛnadze ntsi na ɔkaa dɛm? Siantsir nye dɛ Jehovah maa Paul ahoɔdzen a ohia no, na ɔhyɛɛ no dzen. w23.10 12 ¶1-2

Sɛ ɔtɔ da na yɛtse nka dɛ yɛnnsɛ hwee a, ɔsɛ dɛ yɛkaa dɛ Jehovah nankasa na ɔtwee hɛn baa ne nkyɛn. (John 6:44) Suban pa a yɛwɔ a hɛnankasa mpo nnhu no, Jehovah hu ne nyinara na onyim dza ɔwɔ hɛn akoma mu. (2 Mber. 6:30) Dɛm ntsi sɛ Jehovah ka dɛ yɛsom bo ma no a, ɔnnyɛ ndaadaa. (1 John 3:​19, 20) Hɛn mu binom wɔ hɔ a, ansaana yerubosua nokwar no ho adze no, bi a yɛyɛɛ ndzɛmba ahorow bi. Na obotum aba dɛ ndɛ na ndɛ nyina ɔma hɛn tsibowa bu hɛn fɔ. (1 Pet. 4:3) Christianfo anokwafo mpo, ɔtɔ da a wɔyer hɔnho dɛ wɔbɔko etsia hɔn mberɛwyɛ ahorow. Woara so ɛ, ɔyɛ a etse nka dɛ Jehovah remmfa wo bɔn nnkyɛ wo anaa? Sɛ dɛm a, ka w’akoma to wo yamu, osiandɛ Jehovah n’asomfo anokwafo binom so tsee nka dɛmara. Dɛ nhwɛdo no, aber a ɔsomafo Paul dwendween ne mberɛwyɛ ahorow ho no, ɔtsee nka dɛ n’asɛm yɛ mbɔbɔr. (Rom. 7:24) Nokwasɛm nye dɛ, dɛm aber no nna Paul enu noho wɔ no bɔn ho na woenuma no. Naaso ɔkaa noho asɛm dɛ, ɔno nye “asomafo no mu ekumaba” nye ndzebɔnyɛfo mu “otsitsir.”—1 Cor. 15:9; 1 Tim. 1:15. w24.03 27 ¶5-6

Adze kor a yebotum esua efi gyinae bɔn a Ɔhen Jehoash sii no mu nye dɛ, ɔsɛ dɛ yɛfa hɔn a wɔdɔ Jehovah na wɔpɛ dɛ wɔyɛ dza ɔbɛma n’enyi agye no nyɛnko. Anyɛnkofo a wɔtse dɛm no bɔboa hɛn ma yaayɛ dza Jehovah pɛ. Nnyɛ hɛn etsipɛmfo nkotsee na ɔsɛ dɛ yɛfa hɔn nyɛnko. Kaa dɛ nna Jehoiada enyin kyɛn Jehoash koraa. Hwɛ anyɛnkofo a ewɔ no na bisa woho dɛ: ‘Wɔboa me ma menye Jehovah ntamu ebusuabɔ no mu yɛ dzen anaa? Wɔhyɛ me nkuran dɛ memfa Nyankopɔn ne mbra mbɔ me bra? Sɛ wɔrobɔ nkɔmbɔ a, ana wɔka Jehovah nye Bible mu nokwar a ɔsom bo no ho asɛm? Hɔn enyi gye ho dɛ wɔdze Nyankopɔn ne mbra bɔbɔ hɔn bra? Sɛ midzi mfomdo a, wonya akokodur ka ho asɛm kyerɛ me anaa?’ (Mbɛ. 27:​5, 6, 17) Asɛm no ara nye dɛ, sɛ w’anyɛnkofo nndɔ Jehovah a, worunntum mmboa wo, ntsi twe woho fi hɔnho. Naaso sɛ ewɔ anyɛnkofo a wɔdɔ Jehovah a, ɔno dze mma nntwe woho mmfi hɔnho da, osiandɛ hɔn na wobotum aboa wo ma aayɛ dza Jehovah pɛ!—Mbɛ. 13:20. w23.09 9-10 ¶6-7

Sɛ yɛhwɛ Greek akyerɛwamba no mu a, alpha nye akyerɛwaba a odzi kan na omega nye akyerɛwaba a otwa tun. Ntsi aber a Jehovah kaa dɛ ɔno nye “Alpha nye Omega” no, nna ɔrepɛ akyerɛ dɛ sɛ ɔhyɛ biribi ase a, ɔkwan biara do no obowie. Aber a Jehovah bɔɔ Adam na Eve no, ɔsee hɔn dɛ: “Hom nwo, na wɔndɔr, na wɔnhyɛ asaase do ma, na wɔnhom do.” (Gen. 1:28) Aber a Jehovah kaa dza ɔbɛyɛ ama adasamba na asaase no ho asɛm no, nna ɔtse dɛ mbrɛ ɔaka dɛ “Alpha” anaa ɔahyɛ ase. Ntsi nna ɔrohwɛ kwan dɛ Adam na Eve hɔn asefo a wɔyɛ setsie no bɛhyɛ asaase no do ma na woeesiesie do ma ɔadan Paradise. Ntsi sɛ nna dɛm asɛm no ba mu a, wɔ kwan bi do no nna Jehovah reka dɛ, “Omega.” Na aber a Jehovah wiee ‘sor nye asaase nye biribiara a ɔwɔ mu nyina yɛ no,’ Jehovah kaa biribi a ɔma yehu dɛ nna dza ɔabɔ ne tsirmu dɛ ɔbɛyɛ no bɛba mu ɔkwan biara do. Ɔmaa hɛn awerɛhyɛmu dɛ ɔmmfa ho dza obesi biara no, dza ɔabɔ ne tsirmu dɛ ɔbɛyɛ ama adasamba nye asaase yi nyina bɛba mu wɔ da a otsia esuon no n’ewiei.—Gen. 2:​1-3. w23.11 5 ¶13-14

Sɛ nna obi rutwa kwan efi Babylon akɔ Israel a, nna obedzi bɛyɛ abosoom anan, na no mu ɔhaw so dze, piigyan. Naaso Jehovah hyɛɛ Jewfo no bɔ dɛ, obeyi biribiara a obotum ahaw hɔn no efi kwan mu. Jewfo a nna wɔdɔ Jehovah no dze, nna wonyim dɛ sɛ wogyaa ndzɛmba a wɔwɔ wɔ Babylon no hɔ, na wɔsan kɔ Israel a, wobenya mfaso pii. Nna dɛm mfaso no mu kɛse paa fa ɔsom a wɔdze bɛma Jehovah no ho. Nna asɔrfi kor mpo nnyi hɔ a wɔsom Jehovah wɔ mu wɔ Babylon. Afei so, nna Moses Mbra no hwehwɛ dɛ Israelfo no bɔ afɔr. Naaso, nna wonnyi afɔrmbukyia biara anaa asɔfodzi nhyehyɛɛ a ɔbɛma woetum abɔ afɔr. Bio so, nna abosonsɔrfo a wommbu Jehovah na wɔmmfa ne mbra nnyɛ hwee no dɔɔ so kyɛn hɔn a wɔsom Jehovah no. Dɛm ntsi, nna Jewfo mpempem pii a wɔdɔ Nyankopɔn no rohwɛ kwan dɛ wɔbɛsan akɔ hɔn kurow mu na wɔdze nokwar som asan esi hɔ. w23.05 14-15 ¶3-4

Yehia Nyankopɔn no sunsum krɔnkrɔn no ama yeetum akɔ do abɔ hɛn bra “dɛ kan mba.” Ebɛnadze ntsi a? Osiandɛ ɔyɛ dzen paa dɛ obi bɔbɔ bra a no ho tsew wɔ wiadze a efifidze na ndwamansɛm ahyɛ mu ma yi mu. (1 Thess. 4:​3-5, 7, 8) Nyankopɔn no sunsum krɔnkrɔn no botum aboa hɛn ma yaapow wiadze adwen. Bi nye wiadze nyansapɛ nye nsusui ahorow a ɔnye Nyankopɔn ne dze nnhyia no. Afei so, sunsum krɔnkrɔn no botum aboa hɛn ma yaayɛ ‘papa nye dza ɔtsen’ aber nyina. (Eph. 5:9) Kwan kor a yebotum afa do enya sunsum krɔnkrɔn nye dɛ yɛbɛserɛ efi Nyankopɔn hɔ. Jesus kaa dɛ Jehovah ‘dze sunsum krɔnkrɔn bɛma hɔn a wobisa no no.’ (Luke 11:13) Afei so, sɛ yɛnye hɛn nuanom bɔ mu yi Jehovah ayɛw wɔ asafo nhyiamu ase a, yenya sunsum krɔnkrɔn. (Eph. 5:​19, 20) Nyankopɔn no sunsum krɔnkrɔn no bɔboa hɛn ma yaayɛ dza ɔsɔ n’enyi. w24.03 23-24 ¶13-15

Ihia abotar paa anaa? Sɛ dɛm a, serɛ Jehovah ma ɔmma wo bi. Abotar ka sunsum no aba no ho. (Gal. 5:​22, 23) Ntsi yebotum abɔ mpaa aserɛ Jehovah dɛ ɔmfa no sunsum krɔnkrɔn no mboa hɛn ma yennya dɛm su yi bi. Sɛ yehyia tsebea bi a ɔsɔ hɛn abotar hwɛ a, yɛbɔkɔ do aserɛ Jehovah dɛ ɔmfa no sunsum krɔnkrɔn no mboa hɛn ma yennya abotar. (Luke 11:13) Yebotum so aserɛ Jehovah dɛ ɔmboa hɛn ma yenhu ndzɛmba dɛ mbrɛ ohu no no. Sɛ yɛbɔ mpaa a ɔtse dɛm wie a, ɔsɛ dɛ yɛyɛ hɛn afamudze dze da abotar edzi da biara. Sɛ yɛkɔ do serɛ Jehovah dɛ ɔmma hɛn abotar, na yɛyɛ dza yebotum biara da abotar edzi a, ɔnodze ɔbɛgye ndwow wɔ hɛn akoma mu na ɔbɛba abɛyɛ hɛn suban. Afei so, sɛ edwendwen Bible mu nhwɛdo ahorow ho a, ɔbɔboa wo ma eenya abotar. Bible no ka nyimpa pii a wɔdaa abotar edzi ho asɛm. Sɛ yɛdwendwen dza wɔyɛe no ho a, ɔbɔboa hɛn ma yeehu akwan a hɛn so yebotum afa do ada abotar edzi. w23.08 22-23 ¶10-11

Jesus maa ɔsomafo Peter awerɛhyɛmu dɛ Jehovah bɛma ne nsa aka dza ohia no. Jesus no wusoɛr ekyir no, ɔsanee faa anwanwa kwan do maa Peter nye asomafo a nna wɔka no ho no paa nam. (John 21:​4-6) Ekyingye biara nnyi ho dɛ dɛm anwanwadze yi maa Peter hun dɛ Jehovah bɔhwɛ no. Nna Jesus edzi kan aka dɛ ‘hɔn a wodzi kan hwehwɛ Ahenman’ no, Jehovah bɔhwɛ hɔn. Obotum aba dɛ Peter kaa dɛm asɛm a Jesus kae no. (Matt. 6:33) Dɛm ntsi, Peter dze asɛnka edwuma no dzii kan wɔ n’asetsena mu na nnyɛ afar edwuma no. Pentecost 33 H.B. no, Peter dze akokodur kaa asɛmpa no kyerɛɛ nyimpa mpempem pii na ɔboaa hɔn ma wɔbɛyɛɛ agyedzifo. (Andw. 2:​14, 37-41) Ɔno ekyir no, ɔboaa Samariafo nye Amanamamfo ma wosuaa Christ ho adze na wodzii n’ekyir. (Andw. 8:​14-17; 10:​44-48) Ɔda edzi dɛ Jehovah dze Peter dzii dwuma paa dze boaa nyimpa ahorow nyina ma wɔbaa Christianfo asafo no mu. w23.09 20 ¶1; 23 ¶11

Aber a Babylonfo no sɛɛ Jerusalem no, bɛyɛ mfe ebien ekyir no, Babylonhen Nebuchadnezzar soo daa huhuuhu bi, na ohun ohonyi kɛse bi. Ɔhen Nebuchadnezzar kaa dɛ sɛ n’enyansafo no enntum annka daa a ɔaso no annkyerɛ no na wɔannkyerɛ no ase a, obokuku hɔn nyina; nna Daniel so ka ho. (Dan. 2:​3-5) Dɛm ntsi nna ɔsɛ dɛ ɔyɛ biribi fa asɛm no ho ntsɛmara, annyɛ dɛm a nyimpa pii na wobokuku hɔn. Daniel “kɛserɛɛ ɔhen no dɛ ɔmma no ber, na ɔbɛkyerɛ daa no ase akyerɛ no.” (Dan. 2:16) Nna iyi gye akokodur na gyedzi paa. Osiandɛ nna adanse biara nnyi hɔ a ɔkyerɛ dɛ Daniel akyerɛ daa ase pɛn. Naaso ɔkaa kyerɛɛ n’anyɛnkofo no dɛ wɔmbɔ mpaa na “wɔnserɛ ɔsor Nyankopɔn hɔ mbɔbɔrhu wɔ esumasɛm yi ho.” (Dan. 2:18) Jehovah so tsiee hɔn mpaa no. Nyankopɔn boaa Daniel ma otumii kyerɛɛ Nebuchadnezzar ne daa no ase. Dɛm ntsi woennku Daniel na n’anyɛnkofo no. w23.08 3 ¶4

Dwendwen mfaso a ibenya aber a ada abotar edzi no ho. Sɛ yɛwɔ abotar a, hɛn enyiwa gye paa na hɛn akoma so tɔ hɛn yamu. Iyi kyerɛ dɛ sɛ yenya abotar wɔ ndzɛmba ho a, ɔremma adwendwen nnhyɛ hɛn do na ɔbɛma hɛn apɔwmudzen so ayɛ papa. Sɛ yɛwɔ afofor so ho abotar a, ɔma yɛnye hɔn ntamu ebusuabɔ yɛ kama. Afei so ɔma koryɛ ba asafo no mu. Sɛ obi yɛ biribi a nkyɛ obotum ama hɛn bo efuw naaso yɛamma hɛn bo emmfuw a, ɔremma asɛm no nngye nsamu. (Ndw. 37:8; Mbɛ. 14:29) Dza ɔkyɛn ne nyina no, nna yerusuasua hɛn sor Egya no, na ɔma yɛbɛn no kɛse. Dza yeesusu ho yi ama yeehu dɛ ampa, abotar yɛ su a ɔyɛ fɛw, na mfaso a ɔwɔ do dze, wɔnnka! Ɔwɔ mu dɛ nnyɛ aber nyinara na ɔyɛ mberɛw dɛ yebenya abotar dze, naaso dze nam Jehovah no mboa do no, yebotum akɔ do ada dɛm su fɛɛfɛw yi edzi. Na ber a yɛdze abotar rotweɔn wiadze fofor no, yebotum enya awerɛhyɛmu dɛ ‘Jehovah n’enyiwa wɔ hɔn a wosuro no do, ɔwɔ hɔn a wɔrotweɔn no nokwar dɔ no do.’ (Ndw. 33:18) Hom mma hɛn nyinara nsi hɛn bo dɛ yɛbɔkɔ do ahyɛ abotar dɛ atar. w23.08 22 ¶7; 25 ¶16-17

James kaa dɛ obi botum aka dɛ ɔwɔ gyedzi, naaso dza ɔyɛ no nye dza ɔgye dzi no nnhyia. (Jas. 2:​1-5, 9) James sanee so kaa obi a ɔwɔ biribi a obotum dze aboa no nuanom ho asɛm. Ɔkaa dɛ dɛm nyimpa no hu dɛ ‘onua bi anaa akyerɛbaa bi dzi adagyaw anaa onnyi dza obedzi,’ naaso ɔmmfa dza ɔwɔ no bi mboa no. Sɛ dɛm nyimpa no ka dɛ ɔwɔ gyedzi mpo a, no ndwuma mpo nnkyerɛ dɛ ɔwɔ gyedzi, na mfaso biara nnyi gyedzi a ɔtse dɛm do. (Jas. 2:​14-16) James kaa Rahab ho asɛm dɛ ɔyɛ obi a ɔdze no ndwuma kyerɛɛ dɛ ɔwɔ gyedzi. (Jas. 2:​25, 26) Nna Rahab atse Jehovah ho asɛm na oehu mbrɛ ɔroboa Israelfo no. (Josh. 2:​9-11) Dɛm ntsi ɔdze no ndwuma kyerɛɛ dɛ ɔwɔ gyedzi. Ɔyɛɛ dɛn? Aber a ohun dɛ Israelfo akwanserafo beenu bi hɔn nkwa abɛda esian mu no, ɔdze hɔn sumae. Iyi ntsi, dɛ mbrɛ wobuu Abraham dɛ ɔtseneneenyi no, dɛmara so na wobuu Rahab a nna bɔn wɔ noho na ɔnnyɛ Israelnyi no so tseneneenyi. Dza yesua fi Rahab no nhwɛdo no mu nye dɛ ohia paa dɛ yɛdze ndwuma ka hɛn gyedzi ho. w23.12 5-6 ¶12-13

Hɛn Christianfo dze, yɛmmpɛ dɛ Bible mu mfitsiasesɛm no ara dɔɔ so ma hɛn. Hɛn enyi gye ho dɛ yebosua ‘Nyankopɔn adze a no mu dɔ no’ na sunsum krɔnkrɔn no so boa hɛn ma yɛyɛ dɛm. (1 Cor. 2:​9, 10) Ibotum dze esi w’enyi do dɛ ibosua ndzɛmba a no mu dɔ no na ɔbɔboa wo ma aabɛn Jehovah kɛse. Dɛ nhwɛdo no, ibotum esua mbrɛ osii daa ɔdɔ edzi kyerɛɛ n’asomfo wɔ tsetse mber mu no ho adze akɔ ekyir, na ɔno bɛma ehu dɛ ɔdɔ woara so. Afei so, ibotum esua kwan a Jehovah kyerɛɛ dɛ Israelfo no mfa do nsom no no ho adze, na edze atoto kwan a Christianfo fa do som no ndɛ no ho. Anaadɛ ibotum esua nkɔnhyɛ ahorow a Jesus maa ɔbaa mu aber a nna ɔreyɛ no som edwuma wɔ asaase do no ho adze akɔ ekyir. Sɛ edze Watch Tower Publications Index anaa Buukuu A Jehovah Adasefo Dze Yɛ Nhwehwɛmu no yɛ nsɛm a ɔtsetse dɛm ho nhwehwɛmu a, w’enyi bɛgye paa. Sɛ eyɛ Bible mu nsɛm a no mu dɔ ho nhwehwɛmu kɔ ekyir a, ɔbɛhyɛ wo gyedzi dzen na aboa wo ma eenya “Nyankopɔn no ho nyimdzee.”—Mbɛ. 2:​4, 5. w23.10 18-19 ¶3-5

Asɛm “no mu yɛ dzen” a ɔsomafo Peter dze dzii dwuma no, dza ɔkyerɛ ankasa nye “biribi a ɔatwe mu ma oesi.” Nyiyimu 8 ne fa a otsia ebien no so ma yehu dɛ sɛ yɛwɔ ɔdɔ a no mu yɛ dzen ma hɛn nuanom a, yɛdze bɛkata mfom a hɛn nuanom dzi tsia hɛn no do. Yebotum dze atoto pon bi a adze akeka do ho. Sɛ edze tam kata pon a ɔtse dɛm do a, irunnhu ndzɛmba a wɔakeka do no. Dɛmara so na sɛ yɛwɔ ɔdɔ a no mu yɛ dzen ma hɛn nuanom a, obotum akata mfom anaa “bɔn pii” a wɔdze yɛ hɛn no do, na ɔnnyɛ mfom kor anaa ebien bi pɛ. Sɛ yɛdɔ hɛn mfɛfo Christianfo paa a, ɔbɛka hɛn ma yɛdze bɔn biara a wɔyɛ tsia hɛn no akyɛ hɔn. Ɔwɔ mu ɔtɔ da a, iyi ne yɛ botum ayɛ dzen paa. (Col. 3:13) Sɛ yetum dze hɛn nuanom hɔn bɔn kyɛ hɔn a, ɔkyerɛ dɛ yɛdɔ hɔn paa na ɔbɛma Jehovah apɛ hɛn asɛm. w23.11 10-11 ¶13-15

Ɔhen Josiah dzii mfe 26 no, ɔyɛɛ nhyehyɛɛ ma wɔhyɛɛ ase siesiee asɔrfi no. Aber a wɔreyɛ edwuma no, wohun Jehovah “ne Mbra nwoma no a wɔdze nam Moses do mae no.” Wɔkenkaan nwoma no mu asɛm kyerɛɛ ɔhen no, dza ɔtsee no kenyaan no ma ɔyɛɛ dza nna wɔakyerɛw wɔ Mbra no mu no. (2 Mber. 34:​14, 19-21) Ana w’enyi gye ho dɛ ebɛkenkan Bible no dabaa? Sɛ dɛm a, ɔrokɔ dɛn? Sɛ erekenkan na ihu asɛm bi a obotum aboa wo a, ana ehyɛ no nsew? Aber a Josiah dzii bɛyɛ mfe 39 no, osii gyinae bɔn bi, na ɔno dze no kɔr owu mu. Dza ɔyɛe nye dɛ ɔannhwehwɛ Jehovah hɔ akwankyerɛ na mbom ɔdze noho too nankasa noho do. (2 Mber. 35:​20-25) Ebɛnadze na yebotum esua efi mu? Ɔmmfa ho mfe a yeedzi anaa mfe dodow a yɛdze esua Bible no, ɔsɛ dɛ yɛkɔ do hwehwɛ Jehovah. Iyi kyerɛ dɛ ɔsɛ dɛ yɛbɔ mpaa hwehwɛ Jehovah hɔ akwankyerɛ aber nyina, yesua Bible no, na yetsie afotu a enuanom a wɔasom akyɛr dze bɛma hɛn no. Sɛ yɛyɛ dɛm a, obotum aboa hɛn amma yeennsisi gyinae bɔn, na iyi botum ama hɛn enyi agye.—Jas. 1:25. w23.09 12 ¶15-16

Bible no ka mbaa anokwafo pii a nna wɔdɔ Jehovah na wɔsoom no no ho asɛm. Nna dɛm mbaa yi ‘enyi da hɔ na wodzi nokwar wɔ adze nyina mu.’ (1 Tim. 3:11) Mbaa a Bible no aka hɔnho asɛm no da nkyɛn a, enuanom mbabaa botum esuasua Christianfo mbaa a hɔnho akokwaa na wɔyɛ nhwɛdo pa wɔ hɔn asafo mu no. Enuanom mbabaa, hom mfa hom enyi nto famu nhwehwɛ Christianfo mbaa a hɔnho akokwaa a hom botum esuasua hɔn. Hom nhyɛ suban pa a wɔwɔ no nsew na hom nhwɛ kwan a hom botum afa do esuasua hɔn. Ahobrɛadze yɛ suban a Christiannyi biara hia ama noho akokwaa. Sɛ ɔbaa bi brɛ noho adze a, ɔma ɔnye Jehovah nye afofor ntamu yɛ papa. Dɛ mfatoho no, sɛ ɔbaa bi dɔ Jehovah a, ɔbɛbrɛ noho adze edzi tsiryɛ ho mbra a Jehovah ahyehyɛ no do. (1 Cor. 11:3) Dɛm mbra yi yɛ edwuma wɔ asafo no nye ebusua no nyina mu. w23.12 18-19 ¶3-5

Jehovah pɛ dɛ okun dɔ ne yer, ɔhwɛ no, ɔma n’enyi gye na ɔboa no ma ɔsom Jehovah yie. Sɛ w’enyi da hɔ, ibu mbaa, ema afofor tum dze hɔnho to wo do, na isua ndzɛmba bi a obotum aboa wo wɔ asetsena mu a, ɔbɔboa wo ma aayɛ okun pa. Sɛ ewar a, bi a ebɔwo. Ntsi, ebɛnadze na ibotum esua efi Jehovah hɔ ama aayɛ egya pa? (Eph. 6:4) Jehovah kae ma obiara tsee dɛ ɔdɔ ne Ba Jesus na ɔpɛ n’asɛm. (Matt. 3:17) Sɛ ebɛyɛ egya a, ɔyɛ a taa ka kyerɛ wo mba dɛ edɔ hɔn. Sɛ wɔyɛ adze pa bi a, ɔyɛ a fa ho nkamfo ma hɔn aber biara. Egyanom a wosuasua Jehovah no boa hɔn mba ma wonyin bɛyɛ Christianfo a hɔnho akokwaa. Ntsi seseiara a ennwaree yi, fa hokwan a ewɔ no boa w’ebusuafo na enuanom a wɔwɔ asafo no mu no ma wonhu dɛ edɔ hɔn. Afei so, ɔyɛ a ka kyerɛ hɔn dɛ edɔ hɔn na wɔsom bo ma wo.—John 15:9. w23.12 28-29 ¶17-18

Ɔwɔ mu dɛ yɛdze nokwardzi rosom Jehovah dze, naaso dza ɔto nyimpa nyina no bi tum to hɛn so. Yarba tum bɔ hɛn na yehyia ɔhaw ahorow so. Ɔno da nkyɛn a, ɔsɛ dɛ yegyina ɔsoɛrtsia na ɔtaa a hɔn a wɔtan Nyankopɔn no nkorɔfo dze ba hɛn do no ano. Ɔwɔ mu dɛ Jehovah mmbɔ hɛnho ban mmfi ɔhaw a ɔtsetse dɛm ho dze, naaso ɔahyɛ hɛn bɔ dɛ ɔbɔboa hɛn ma yeetum egyina ano. (Isa. 41:10) Osian mboa a yenya fi Jehovah hɔ ntsi, yebotum akɔ do enya enyigye, yeesisi gyinae pa, na yaakɔ do edzi nokwar aber mpo a yerihyia tsebea a no mu yɛ dzen no. Jehovah aka dɛ ɔbɛma hɛn dza Bible no frɛ no “Nyankopɔn n’asomdwee” no. (Phil. 4:​6, 7) Nyankopɔn n’asomdwee yi yɛ asomdwee na akomatɔyamu a anyɛnkofa a no mu dzen a yɛnye no wɔ no ma yenya. Dɛm asomdwee yi ‘tra ntseasee nyina do.’ Iyi kyerɛ dɛ Nyankopɔn n’asomdwee no bor biribiara a yebotum dze hɛn adwen ebu no do. Dɛ nhwɛdo no, efi w’akoma mu abɔ Jehovah mpaa ma iwiei no etsee nka dɛ w’akoma atɔ wo yamu anaa? Dɛm atsenka no nye “Nyankopɔn n’asomdwee.” w24.01 20 ¶2; 21 ¶4

Ɔdɔ a nokwar asomfo wɔ ma Nyankopɔn no na okenyan hɔn ma wofi hɔn akoma nyina mu yi ne dzin no ayɛw. Nna Ɔhen David nyim dɛ sɛ oyi Jehovah ne dzin no ayɛw a, nna oriyi Jehovah nankasa ayɛw. Sɛ yɛtse Jehovah ne dzin a, dza ɔba hɛn adwen mu nye nyia dɛm dzin no da no do no, na iyi ma yɛdwendwen no su ahorow a ɔyɛ fɛw nye n’anwanwa ndwuma ho. Nna David bu n’Egya ne dzin no dɛ ɔyɛ krɔnkrɔn. Afei so, nna ɔpɛ dɛ oyi dzin no ayɛw. Nna ɔpɛ dɛ ɔdze ‘dza ɔwɔ no mu nyinara,’ kyerɛ dɛ, ofi n’akoma nyinara mu yi Jehovah ne dzin no ayɛw. Levifo no so, wodzii ɔmamfo no enyim ma woyii Jehovah ayɛw. Wofi ahobrɛadze mu gyee too mu dɛ ayɛyi a wɔdze ma Jehovah ne dzin krɔnkrɔn no, onndu ayɛyi a ɔsɛ fata Jehovah ne dzin no ho beebiara. (Neh. 9:5) Ekyingye biara nnyi ho dɛ, ahobrɛadze a wɔdaa no edzi nye hɔn akoma nyinara mu a wofii yii Jehovah ne dzin no ayɛw no maa n’enyi gyee. w24.02 9 ¶6

Sɛ edze botae bi si w’enyi do na enntum enndu ho a, Jehovah rennka dɛ annyɛ no yie koraa. (2 Cor. 8:12) Mbom no ibotum mpo esua biribi efi mu. Mma wo werɛ mmfir dza etum ayɛ dada no. Bible no ka dɛ: “Nyankopɔn nnyɛ nyia ɔnntsen na no werɛ efir hom ndwuma.” (Heb. 6:10) Ntsi woara so ɔyɛ a mma wo werɛ mmfir dza etum ayɛ no. Dwendwen botae ahorow a etum edu ho no ho. Bi nye dɛ enye Jehovah enya ebusuabɔ a no mu yɛ dzen, ekɔ asɛnka, na woenuma wo so. Dɛ mbrɛ etum edu dɛm botae ahorow yi ho no, dɛmara so na ibotum ayer woho dɛ ibodu dza edze esisi w’enyi do no ho. Jehovah bɔboa wo ma eetum edu wo botae ho. Fa w’adwen si mbrɛ Jehovah roboa wo no do. Sɛ eyɛ dɛm a, ɔbɛma w’enyi agye aber a ereyɛ ndzɛmba a ɔbɛma edu wo botae ho no. (2 Cor. 4:7) Sɛ yɛammpa abaw a, ewiei koraa no yebenya nhyira pii.—Gal. 6:9. w23.05 31 ¶16-18

Jehovah n’enyi gye ho dɛ ɔbɛka akyerɛ n’asomfo dɛ ɔdɔ hɔn na ɔgye hɔn to mu. Kyerɛwnsɛm no ma yehu mber ebien bi a Jehovah kaa kyerɛɛ Jesus dɛ ɔyɛ no Dɔba, na ɔgye no to mu. (Matt 3:17; 17:5) W’enyi bɛgye ho dɛ ebɛtse dɛ Jehovah reka akyerɛ wo dɛ ɔgye wo to mu anaa? Ɔwɔ mu dɛ Jehovah nye hɛn nnkasa tsenn dze, naaso ɔnam n’Asɛm Bible no do kasa kyerɛ hɛn. Sɛ yɛkenkan Jesus ne nsɛm a ɔwɔ Nsɛmpa no mu no a, “yɛbɛtse” dɛ Jehovah reka akyerɛ hɛn dɛ ɔgye hɛn to mu. Jesus suasuaa n’Egya no suban pɛpɛɛpɛ. Ɔmaa n’ekyirdzifo anokwafo a nna wɔtɔ sin no hun dɛ ɔgye hɔn to mu. Ntsi sɛ yɛkenkan nsɛm a ɔtse dɛm wɔ Nsɛmpa no mu a, ɔbɛyɛ tse dɛ mbrɛ Jehovah reka akyerɛ hɛn dɛ ɔgye hɛn to mu. (John 15:​9, 15) Sɛ yehyia ɔhaw a, ɔno nnkyerɛ dɛ Nyankopɔn nngye hɛn nnto mu. Mbom ɔma yenya hokwan dze kyerɛ mbrɛ yesi dɔ Nyankopɔn, nye ahotodo a yɛwɔ wɔ no mu no.—Jas. 1:12. w24.03 28 ¶10-11