Sɛ yebotum atse Bible mu nkɔnhyɛ ase a, gyedɛ yɛhwehwɛ mboa. Ɔwodze ma yɛnyɛ dɛm mfatoho yi. Fa no dɛ enye wo nyɛnko bi rokɔ beebi a innyim hɔ. Naaso wo nyɛnko no dze, onyim hɔ paa. Onyim beebi pɔtsee a hom wɔ, na onyim beebi a akwan a ɔdeda hɔ no mu biara so kɔ. Ekyingye biara nnyi ho dɛ w’enyi bɛgye paa dɛ wo nyɛnko no nye wo kɔree! Jehovah tse dɛ dɛm nyɛnko no, osiandɛ onyim mber pɔtsee a yɛwɔ mu nye dza obesi daakye. Dɛm ntsi sɛ yebotum atse Bible mu nkɔnhyɛ ase a, ɔsɛ dɛ yɛbrɛ hɛnho adze na yɛserɛ Jehovah dɛ ɔmboa hɛn ma yɛntse ase. (Dan. 2:28; 2 Pet. 1:​19, 20) Ɔwofo pa biara pɛ dɛ osi ne mba yie daakye. Dɛmara so na Jehovah pɛ dɛ osi hɛn yie daakye. (Jer. 29:11) Naaso Jehovah nntse dɛ awofo a wonnyim dza obesi daakye no. Ɔnodze, onyim dza obesi daakye na dza ɔka biara so ba mu pɛpɛɛpɛ. Ɔama wɔakyerɛw nkɔnhyɛ ahorow wɔ n’Asɛm no mu mbrɛ ɔbɛyɛ a yebohu ndzɛmba etsitsir bi a obesisi ansaana woesisi.—Isa. 46:10. w23.08 8 ¶3-4

Nyankopɔn ama Jesus tum a ɔdze beyi adasamba haw nyina efi hɔ. Anwanwadze ahorow a Jesus yɛe no da no edzi dɛ ɔwɔ tum a ɔdze beyi ɔhaw ahorow a ɔbor nyimpa n’ahoɔdzen do nyina efi hɔ. Dɛ nhwɛdo no, ɔwɔ tum a ɔdze beyi ɔhaw a bɔn a wɔdze woo hɛn no dze aba hɛn do no nyina efi hɔ. Ɔhaw no mu bi nye yarba nye owu. (Matt. 9:​1-6; Rom. 5:​12, 18, 19) Anwanwadze ahorow a ɔyɛe no ma yehu dɛ obotum asa yarba ahorow “nyina,” na oeenyan hɔn a woewuwu mpo. (Matt. 4:23; John 11:​43, 44) Afei so, Jesus botum ama ehum akɛse ayɛ dzinn na obotum so etu esunsum fi. (Mark 4:​37-39; Luke 8:2) Nyim a yenyim dɛ Jehovah dze tum a ɔtse dɛm ama ne Ba no ma hɛn akoma tɔ hɛn yamu paa! Yebotum enya awerɛhyɛmu a osi pi dɛ ndzɛmba pa a Bible no ahyɛ ho bɔ dɛ Nyankopɔn n’Ahendzi no dze bɛba no, ne nyina bɛba mu kwan biara do. Anwanwadze ahorow a Jesus yɛe ber a ɔwɔ asaase do no ma yehu dɛ, dɛ Nyankopɔn n’Ahendzi no do Hen no, ɔbɛyɛ ndzɛmba akɛse pii wɔ asaase do nyina daakye. w23.04 3 ¶5-7

Sɛ ewɔ asafo a enuanom a wɔwɔ mu dɔɔ so mu na sɛ etse nka dɛ ema wo nsa do a wɔmmfrɛ wo a, annhwɛ a dza ebɛka ara nye dɛ ma mentsena hɔ bi dɛmara. Naaso, mma w’abaw mu mmbu atse. Bɔ mbɔdzen dɛ ebɛma mbuae. Sua mbuae beberee ma adzesua biara a ebɔkɔ no. Dɛm no, sɛ adzesua no n’ahyɛse no ara mpo wɔammfrɛ wo a, ebɛsan enya hokwan bio aber a adzesua no rokɔ do no. Sɛ irusua Ɔweɔn-Aban no a, ɔyɛ a susu mbrɛ nkyekyɛmu biara nye asɛntsir no hyia no ho. Sɛ eyɛ dɛm a, ɔfa biara a wobodu no, ibotum ama mbuae a ɔhyɛ nkuran. Afei so, sua nkyekyɛmu ahorow a ɔka Bible mu nokwasɛm a no mu dɔ ho asɛm no yie ama sɛ odu hɔ a eetum ama mbuae. Ebɛnadze ntsi na yɛreka dɛm? Osiandɛ, sɛ odu nkyekyɛmu ahorow a ɔtse dɛm no a, enuanom pii nntaa mma hɔn nsa do. Sɛ ɔba no dɛ akɔ adzesua mpɛn dodow bi na innyaa hokwan mpo mmaa mbuae so ɛ? Ka kyerɛ onua a ɔbɔhwɛ adzesua no do no ma onhu beebi a epɛ dɛ ema mbuae no ansaana wɔahyɛ adzesua no ase. w23.04 21-22 ¶9-10