E Yaga Beka na Noda Dina?
“SA RUI sivia na ilavo ni inisua o sauma tiko ina kabani oqori me baleta na nomu qaravi vakavuniwai,” e kaya o Karl, na vakailesilesi ni dua na kabani ni inisua.a “Ke o veisau ina noqu kabani, o na vakabula kina e 20 na dola na ilavo ni Mereke ena dua na vula, oqori e dua na ilavo levu.”
“Ena rairai dina beka oqori,” e kaya o Jens. “Ia, sa oti oqo e vica na yabaki na noqu lewena tu na kabani vata ga oya. Eratou dau vukei au vinaka ena veigauna sa sivi, oqori na vuna au via dina tiko ga kina vei ratou.”
“E itovo talei na noda dina,” e sauma o Karl. “Ia, e macala ni nomu via dina tiko ga vei ratou o na vakalusia kina e levu na ilavo!”
Io, e dina o Karl. Vakavuqa, na noda dina se yalodina vua e dua tale ena rairai vakalusi ilavo.b De na kania vakalevu tale ga na noda gauna, kaukaua, qai vakaocai keda. E yaga beka na noda dina?
Vakacaucautaki Vakalevu ia Era le Lailai na Bulataka
E laurai ena dua na vakatataro a cakava mai Jamani na Allensbach Opinion Research Institute, ni 96 na pasede vei ira na vakatarogi era okata na yalodina me itovo talei. Ena ikarua ni vakatataro a cakava na tabana vata oqori, era a vakatarogi kina o ira na yabaki 18 ina 24. Laurai gona ni le 2 mai na 3 era vakatarogi oqori era okata na yalodina me itovo vakasakiti e dodonu me bulataki.
Io, e dau vakacaucautaki vakalevu na dina, se yalodina, ia e dredre toka na kena bulataki. Me kena ivakaraitaki, ena vica na veivanua e Urope, e sega soti ni kune vakalevu na yalodina ena kedra maliwa na lewenivuvale, se veiwatini. Vakavuqa, e dau sega tale ga ni kune vei ira na veitokani na yalodina, vaka kina na kena e vauci rau na itaukei ni cakacaka kei ira na tamata cakacaka, se o ira na daunibisinisi kei ira na dauvolivoli ena veigauna sa sivi. Na cava e vakavuna?
So na gauna, na bula osooso e kania vakalevu na noda gauna kei na noda kaukaua e lai dredre kina meda dina. O ira era a sotava ena nodra bula veimaliwai na veivakaisini, era na rairai ririko ena gauna oqo mera yalodina vua e dua tale. So tale era rairai na veitaliataka ga na nodra bula nira vakabauta ni lekaleka wale. Macala ni sega ni gadrevi kina na dina.
Ia se mani cava e vakavuna, e dau vakacaucautaki vakalevu na dina, ia era le lailai sara na bulataka. O koya gona, na taro e votu: E yaga beka na noda dina? Ke vaka kina, meda dina vei cei, kei na sala cava eda na vakaraitaka kina? Na cava e so na kena yaga?
[iVakamacala e ra]
a Sa veisau e so na yaca ena ulutaga oqo, kei na kena e tarava.
b Vuqa na gauna e sega ni dau vakayagataki vata na vosa e rua oqo na “dina” kei na “yalodina,” ia erau vakayagataki vata tiko ena ulutaga oqo kei na kena e tarava.
[Tikina bibi ena tabana e 3]
E dau vakacaucautaki vakalevu na dina, ia era le lailai sara na bulataka