Sa Dodonu me Vakacaucautaki Vakalevu o Jiova
Ena Caka na iVakayakavi ni Turaga ena 16 Epereli
1 Sa dua na ka na noda nanamaki ni sa roro voleka mai na 16 Epereli, 2003. Eda na vakananuma ena bogi oqori na mate i Jisu. Eda na duavata kei ira na vica vata na milioni eda sokalou vata meda vakacaucautaka kina na yaca i Jiova. Sa dodonu ga me vakalagilagi o Jiova ena vuku ni ivoli talei e vakarautaka. Oqori na yavu ena sovaraka kina vei ira na tamata talairawarawa na veivakalougatataki e uasivi dina. Eda duavata mai vu ni yaloda kei na daunisame ena noda tukuna: “Sa levu ko Jiova, a sa dodonu me vakavinavinakataki vakalevu.”—Same 145:3.
2 E gauna veiganiti oqo meda vakasamataka kina vakatitobu na vinaka ni Kalou kei na vakavinavinaka e dodonu meda dolea lesu vei Jiova baleta ni “tala ki vuravura na Luvena e dua bauga, . . . ka vakatubura ko koya, me da bula e na vukuna.” (1 Joni 4:9, 10) Ke da vakananuma na iVakayakavi ni Turaga me vaka ga nida vakaroti kina, oqori ena dei kina e lomada ni “sa daulomasoli ko Jiova, ka yalololoma; . . . a sa levu na nona loloma.” (Same 145:8) Io, na ivakaraitaki levu duadua ni nona lomani keda o Jiova na nona vakarautaka na ivoli. (Joni 3:16) Eda na via vakacaucautaki Jiova ga nida vakasamataka na nona loloma, nida vakananuma tale ga na yalodina i Jisu. Eda na vakacaucautaki koya me tawamudu ena vuku ni nona loloma tawavakaiyalayala, ni vakarautaka vei keda na bula e sega ni mudu.—Same 145:1, 2.
3 Vukea e So Tale Mera Vakacaucautaki Jiova: Ke da doka na ivoli, na isolisoli uasivi ni Kalou, eda na via sureta e so tale mera tomani keda ena vakacaucautaki Jiova. A uqeti ena yalo tabu na daunisame me vola: “Era na daucavuta tikoga na ka me nanumi kina na nomuni yalololoma levu, ka seretaka na nomuni cakacaka dodonu.” (Same 145:7) Ena yabaki sa oti, e sivia na duanabilioni na aua na levu ni gauna era vakayagataka na iVakadinadina i Jiova ena cakacaka vakavunau. Na cava na vua ni nodra sasaga? E veimacawa, me kena ivakatautauvata, era papitaiso kina e sivia na 5,100 me ivakaraitaki ni nodra yalayala vei Jiova. Namaki tu me levu tale era toso mai! E laurai oqori ena kedra iwiliwili na tiko ena iVakananumi, e 15,597,746, wili kina na 9 na milioni vakacaca era se sega ni dautukutuku ni itukutuku vinaka. Nida dautukutuku ni Matanitu ni Kalou, eda vakamareqeta na noda itavi ni kacivaka na itukutuku vinaka kei na noda vagolea mai na lomadra e so tale mera galeleti Jiova, na Luvena, kei na Matanitu ni Kalou.
4 Dua na sala totoka meda uqeta kina e so tale mera vakacaucautaki Jiova na noda sureti ira mera mai tomani keda ena kena vakananumi na iVakayakavi ni Turaga. O sa vola na yacadra kece o nanuma mo na sureta kei ira tale ga ena gadrevi mera vakadreti ena vuku ni kena siga kei na kena gauna? O sa solia beka na ivola ni veisureti vei ira kece o sa vola na yacadra? Ke sega, cakava oqori ena vo ni gauna e se tiko. Vukei ira mera kila na inaki ni soqo oqo. Ena bogi ni iVakananumi, tu vakarau ni kidavaki ira na vulagi. Vakabula vei ira, veikilaitaki ira kei na so tale, vakavinavinakataki ira ena nodra tiko rawa.
5 Na nona tiko rawa ena iVakananumi e dua na ka vou e rawa ni uqeti koya me toso vakayalo. A lako ina iVakananumi e dua e vuli iVolatabu, e tauvi koya e dua na mate ni vakasama e dredre kina vua me lakova na vanua e levu kina na tamata. Ni sa tarogi se cava e nanuma me baleta na soqoni, e kaya: “Sa dua dina na soqo bibi oqo, au qai tiko rawa kina.” Tekivu mai na gauna oya, sa dau lakova na soqoni.
6 Oti na iVakananumi: Na cava me caka mera vukei kina na tataleitaki mera mai vakacaucautaki Jiova? Era na vakaraici ira na ka vou era lakova na iVakananumi na qase ra qai kerea e so na dautukutuku matua mera sikovi ira ena kena totolo duadua mera lai taleva vata na ka veivakauqeti era sa vulica ra qai raica tale ga. De na vinakata e so vei ira oya mera vuli iVolatabu. Mera sureti tale ga mera dau tiko ena soqoni ni ivavakoso e veimacawa, ni na levu cake kina na ka era vulica mai na iVolatabu.
7 Sa navuci tiko na ituvatuva mera uqeti kina na sega ni dautukutuku e veigauna kei ira na sa mate tu vakayalo mera tekivu lakova tale na soqoni. Tu vakarau ni ciqoma nodratou kerekere na qase ke ratou sureti iko mo vukea e dua na dautukutuku mate me lakova tale na cakacaka vakavunau. Noda kauaitaki ira vakayalololoma vaka oqori na tacida e salavata kei na veivakadreti i Paula: “O koya oqo, ni sa rawa me da caka vinaka vei ira na tamata kecega, ka vakalevu vei ira era veitokani e na vakabauta.”—Kala. 6:10.
8 Meda saga mada ga meda na tiko kece ena iVakananumi ena 16 Epereli. Meda kua sara ni calata na soqo bibi oqo meda na vakacaucautaki Jiova kina. Io, meda vakacaucautaki koya ena gauna oqo me sega ni mudu ena vuku ni nona cakacaka lelevu!—Same 145:21.