Vakatotomuria na iVakaraitaki i Apakuki
1. Na cava eda tautauvata kina kei na parofita o Apakuki?
1 Sa qai torosobu tiko ga na ivakarau ni vuravura qo, de dua eda na vakataki Apakuki ni tarogi Jiova: “Na cava oni vakatara kina meu raica na ka ca? Na cava oni vakatara kina na veivakasaurarataki?” (Apak. 1:3; 2 Tim. 3:1, 13) Nida vakasamataka vakatitobu na itukutuku e vakasavuya o Apakuki kei na nona yalodina, ena vakacegui keda nida waraka tiko na siga ni lewa i Jiova.—2 Pita 3:7.
2. Eda vakaraitaka vakacava nikua na vakabauta?
2 Bula ena Nona Vakabauta: E sega ni lomalomani koya o Apakuki, e yadra qai ogaoga tiko ga vakayalo. (Apak. 2:1) E vakadeitaka vua o Jiova ni na vakayacori na nona vosa ena kena gauna, na “yalododonu [tale ga] ena bula ena nona yalodina [vakabauta, vmr].” (Apak. 2:2-4) Na cava meda kauaitaka kina qori na lotu vaKarisito? Eda sega ni kauaitaka vakabibi na gauna ena yaco kina na icavacava, eda kila ga ni na yaco dina. E uqeti keda noda vakabauta meda yadra tiko ga da qai vakaliuca na cakacaka vakaitalatala.—Iper. 10:38, 39.
3. Na cava meda marautaka tiko ga kina noda qaravi Jiova?
3 Rekitaki Jiova: Ena vakatovolei noda vakabauta ni valuti keda o Koki mai Mekoki. (Isik. 38:2, 10-12) Ena dredre na bula ni oti na ivalu, era vakila tale ga qori o ira na qaqa. E rawa ni lailai na kakana, vakarusai na itikotiko, lutu na ivakatagedegede ni bula. Na cava eda na cakava ena ituvaki qo? E namaka o Apakuki na ituvaki dredre, ia e nakita me marautaka tiko ga nona qaravi Jiova. (Apak. 3:16-19) Ena yaga tale ga na “marau e solia o Jiova” meda vosota kina na veivakatovolei se bera mai.—Niem. 8:10; Iper. 12:2.
4. Na cava eda na marautaka ena gauna qo kei na gauna se bera mai?
4 Sa roro mai na siga ni lewa i Jiova, o ira na vakabulai era na vulica tiko ga na sala vakalou. (Apak. 2:14) O ira tale ga na vakaturi era na vulica na veika me baleti Jiova. Meda saga gona ena gauna kece meda tukuni Jiova kei na nona cakacaka veivakurabuitaki!—Same 34:1; 71:17.