Avril

Wuvɛ̌ syɛnsyɛn ɖé mɛ gbɔn dín wɛ a ɖè à? Bɔya, mɛ e ɖò agun towe mɛ é ɖé wà nǔ nyi dò dó we. (Ja. 3:2) Alǒ azɔ̌gbɛ́, kabǐ wemaxɔmɛvígbɛ́ lɛ nɔ cá we ko ɖó Jehovah e sɛn wɛ a ɖè é wu. (1 Pi. 4:3, 4) Alǒ mɛ e ɖò xwédo towe mɛ lɛ é sixu ɖò tintɛnkpɔn wɛ bo na sú ali dó we bonu a ni ma yì kplé lɛ ó, alǒ ma ɖekúnnu ó. (Mat. 10:35, 36) Enyi wuvɛ̌ e mɔ wɛ a ɖè é syɛn ɔ, a sixu lin ɖɔ é na nyɔ́ hugǎn ɖɔ emi ni jó Jehovah sinsɛn dó. Amɔ̌, enyi wuvɛ̌ e mɔ wɛ a ɖè é na bo tlɛ syɛn ɔ, a sixu kúdeji ɖɔ Jehovah na na we nǔnywɛ e na d’alɔ we bɔ a na ɖí xwi xá é kpo hlɔnhlɔn e na zɔ́n bɔ a na dɛ é kpo. Jehovah tinmɛ lee gbɛtɔ́ hwɛhutɔ́ lɛ ɖí xwi xá wuvɛ̌ syɛnsyɛn lɛ gbɔn é hlɛ́nhlɛ́n ɖò Xó tɔn mɛ. Etɛwu? Bonu ye ni kplɔ́n nǔ mǐ. Enɛ wɛ zɔ́n bɔ Jehovah sísɛ́ mɛsɛ́dó Pɔlu bɔ é wlán. Enyi mǐ xà tan enɛ lɛ ɔ, ye sixu dó gbɔ nú mǐ, bo lɛ́ na mǐ nukúnɖiɖó ɖó bǎ ɖé mɛ. Amɔ̌, enyi mǐ jló na ɖu tan enɛ lɛ sín lè ɔ, mǐ ɖó na wà nǔ hú Biblu xixa kpowun. Mǐ ɖó na na tɛn Xó Mawu tɔn, b’ɛ na huzu linlin mǐtɔn kpo lee nǔ nɔ cí nú mǐ é kpo. w21.03 14-15 akpá. 1-2

A ka nɔ mɔ mɛ e a nɔ jlá wɛnɖagbe ɔ lɛ é dó mɔ jinukún e ko sù yiya é ɖɔhun à? Enyi mɔ̌ wɛ ɔ, nǔ atɔn elɔ lɛ wɛ na xlɛ́: Nukɔntɔn, wɛn ɔ jijla na nɔ mya nukún nú we hugǎn. Táan e è na ya jinukún na é ɖó dogbó, enɛ wu ɔ, è ɖó na gú hwenu ǎ. Wegɔ́, enyi a mɔ bonu mɛ lɛ ɖótó wɛnɖagbe ɔ ɔ, é na nɔ víví nú we. Biblu ɖɔ: “Ye ɖò awǎ jɛ wɛ . . . mɛ e jì jɛ na é ɖɔhun.” (Eza. 9:2) Atɔngɔ́, a na nɔ mɔ ɖɔ mɛɖé lɛ sixu wá huzu ahwanvu, enɛ na zɔ́n bɔ a na nɔ ɖyɔ alɔ bo na nɔ zán nǔxwlémɛ e dɔn mɛ lɛ é. Ahwanvu Jezu tɔn lɛ sixu ko nɔ lin ɖɔ nukúnɖiɖó ɖě kún sɔ́ ɖè nú Samalíinu lɛ ó, Jezu ka nɔ lin mɔ̌ ǎ. Mǐɖesunɔ ɖó na nɔ mɔ ɖɔ mɛ e ɖò fí e mǐ nɔ ɖekúnnu ɖè lɛ é sixu wá huzu ahwanvu Klisu tɔn. Mɛsɛ́dó Pɔlu sɔ́ kpɔ́ndéwú jiwǔ ɖé ɖ’ayǐ nú mǐ bonu mǐ na xwedó. É kplɔ́n nǔɖe lɛ dó nǔ e mɛ e é jlá wɛn ɔ lɛ é ɖi nǔ na lɛ é wu, é mɔ nǔ jɛ nǔ e nɔ dɔn ye lɛ é mɛ, é kpɔ́n ye ɖi mɛ e sixu wá huzu ahwanvu Jezu tɔn lɛ é. w20.04 8-9 akpá. 3-4

Ma nɔ dá hwɛ nú mɛɖé ɖó nǔwiwa tɔn lɛ wu kpowun ó, loɔ, nɔ tɛ́n kpɔ́n bo nɔ mɔ nǔ jɛ lee nǔ cí n’i é mɛ. Mɛ ɖokpo e mɔ nǔ jɛ ninɔmɛ mǐtɔn lɛ mɛ bǐ mlɛ́mlɛ́ é wɛ nyí Jehovah. Enɛ wu ɔ, byɔ ɛ ɖɔ é ni d’alɔ we bonu a na nɔ kpɔ́n mɛ ɖevo lɛ éɖɔhun, bo na lɛ́ tuùn lee a na sè wuvɛ̌ xá ye gbɔn é. A sixu ɖɔ ɖɔ mɛ lě wɛ jɛxa ɖò nɔví lɛ mɛ bɔ emi na sè wuvɛ̌ xá ǎ. Ye mɛ bǐ wɛ nɔ ɖí xwi xá tagba lɛ, bɔ tagba yetɔn lɛ gegě cí ɖěɖee Jonasi, Elíi, Hagáa kpo Lɔti kpo ɖí xwi xá lɛ é ɖɔhun. Ðò ninɔmɛ gegě mɛ ɔ, tagba yetɔn lɛ sín yeɖesunɔ wu. È na ɖɔ ɔ, mǐ bǐ wɛ é ko xá kpɔ́n. Enɛ wu ɔ, é sɔgbe ɖɔ Jehovah ni byɔ mǐ ɖɔ nǔ nɔví mǐtɔn lɛ tɔn ni nɔ ɖu ayi mɛ nú mǐ. (1 Pi. 3:8, nwt) Enyi mǐ setónú nú Jehovah ɔ, mǐ nɔ gɔ́ sò nú bǔninɔ xwédo mǐtɔn e jiwǔ bo gbɔn gbɛ̀ ɔ bǐ mɛ, bɔ gbɛtɔ́ alɔkpa vovo lɛ ɖ’emɛ é tɔn. Enɛ wu ɔ, nú mǐ ɖò nǔ wà xá nɔví mǐtɔn lɛ wɛ hǔn, mi bonu mǐ ni kánɖeji bo na nɔ ɖótó ye, mɔ nǔ jɛ ninɔmɛ yetɔn mɛ, lobo lɛ́ sè wuvɛ̌ xá ye. w20.04 18-19 akpá. 15-17

Jezu zé kpɔ́ndéwú tónúsíse nú Jehovah tɔn e nǔ bǐ vɔ ɖ’ewu é ɖ’ayǐ. Enɛ wu ɔ, ali taji e nu mǐ nɔ setónú nú Jehovah ɖè é ɖokpo wɛ nyí ɖɔ mǐ nɔ sɔ́ afɔ dó afɔdo Jezu tɔn lɛ mɛ télélé lee é nyɔ́ bló gbɔn é bǐ. (Jaan 8:29) Bonu mǐ na kpò ɖò gbɛ̀ zán wɛ ɖò nǔgbo ɔ mɛ ɔ, mǐ ɖó na kúdeji ɖɔ Jehovah nyí Mawu e nɔ ɖɔ nǔgbo é, bɔ nǔ e é ɖɔ ɖò Xó tɔn Biblu ɔ mɛ lɛ é bǐ nyí nǔgbo. Mǐ ɖó na lɛ́ ganjɛwu ɖɔ Jezu wɛ nyí Mɛsiya e sín akpá è dó é. Mɛ gegě nɔ xò nǔ kpɔ́n égbé ɖɔ è kún ko sɔ́ Jezu Axɔ́su Axɔ́suɖuto Mawu tɔn tɔn ó. Jaan gb’akpá nú mɛ ɖɔ “adingbannɔ gegě” tíìn bo sixu flú mɛ ɖěɖee ma sɔnǔ ɖ’ayǐ bo na jɛhun dó nǔgbo e kúnkplá Jehovah kpo Jezu kpo é jí ǎ lɛ é. (2 Jaan 7-11) Jaan wlán ɖɔ: “Mɛ̌ ka ɖò nǔvúɖótɔ́ ɔ nyí wɛ? Mɛ e ɖɔ Jezu kún nyí Klisu ɔ ó é wɛ.” (1 Jaan 2:22) Xó Mawu tɔn kplɔnkplɔn jɛn sixu zɔ́n bɔ mǐ na lɔn nú mɛɖé na flú mǐ ǎ. Enɛ ɔ, mǐ na wá tuùn Jehovah kpo Jezu kpo. (Jaan 17:3) Mɔ̌ mɛ ɔ, mǐ na ganjɛwu ɖɔ mǐ mɔ nǔgbo ɔ. w20.07 21 akpá. 4-5

Ali e nu mǐ na bló bɔ wezunkantɔ́ gbɛ̌ mǐtɔn lɛ ma na “klɛ́n afɔ” ǎ ɖè é ɖokpo wɛ nyí ɖɔ, mǐ na nɔ yí gbè nú nǔjlomɛ yetɔn lɛ hweɖebǔnu e é nyɔ́ bló é, bo na nɔ zyan vǎ dó acɛ mǐtɔn lɛ jí ǎ. (Hlɔ. 14:19-21; 1 Kɔ. 8:9, 13) Mɔ̌ mɛ ɔ, mǐ cí wezunkantɔ́ agbahwlɛntɔ́ e ɖò tintɛnkpɔ́n wɛ bo na yí ajɔ ɔ éɖokponɔ é ɖé ɖɔhun ǎ. Ðagbe yeɖesunɔ tɔn wɛ nyí nǔ e nɔ ɖu ayi mɛ nú ye jɛ nukɔn é. Enɛ wu ɔ, ye sixu tɛ́n kpɔ́n bo sísɛ́ wezunkantɔ́ ɖevo lɛ dó zɔ bo na dó jɛ nukɔn. Amɔ̌, mǐdɛɛ lɛ ɖò agba hwlɛn xá mǐɖée wɛ ǎ. (Ga. 5:26; 6:4) Nǔ e gbé nya wɛ mǐ ɖè é wɛ nyí ɖɔ, mǐ na d’alɔ mɛ gegě lee é nyɔ́ bló gbɔn é bonu ye na d’asá xwi gudo tɔn ɔ xá mǐ lobo mɔ ajɔ gbɛ̀ tɔn ɔ yí. Enɛ wu ɔ, mǐ nɔ tɛ́n kpɔ́n bo nɔ xwedó wěɖexámɛ Mawu tɔn e ɖɔ mǐ ni ma ‘nɔ ba ɖagbe mǐɖesunɔ tɔn ó; loɔ, mǐ ni nɔ ba ɖagbe mɛ ɖě lɛ tɔn’ é. (Fili. 2:4) Ðò gbɛ̀ wezun ɔ mɛ ɔ, kpo xomɛnyínyɔ́ kpo wɛ Jehovah na ganjɛwu togun tɔn ɖɔ enyi é kánwezun ɔ kaka jɛ vivɔnu ɔ, emi na d’ajɔ ɛ; enɛ wɛ nyí gbɛ̀ mavɔmavɔ ɖò jixwé alǒ ayikúngban jí. w20.04 28-29 akpá. 10, 12

Klisanwun sunnu kpo nyɔnu kpo livi mɔ̌kpan na gán bo na byɔ gbɛ̀ yɔyɔ̌ ɔ mɛ. Mɛ enɛ lɛ e na gán ɖò ayikúngban jí lɛ é na nyí kúnnuɖetɔ́ nú ɖuɖeji ɖevo e è na ɖó ɖò kú jí é, enɛ wɛ nyí fínfɔ́n sín kú gbɛtɔ́ liva mɔ̌kpan e ko kú wá yì lɛ é tɔn. Kpɔ́n lee awǎjijɛ mǐtɔn na syɛn sɔ hwenu e ɖuɖeji enɛ na tíìn é! (Mɛ. 24:15) Bɔ mɛ ɖěɖee nɔ gbeji nú Jehovah bǐ mlɛ́mlɛ́ lɛ é bǐ na ɖu ɖò kú e sín gǔ ye ɖu ɖò Adamu gɔ́n é jí. Ye na kpéwú bo nɔ gbɛ̀ kaka sɔyi. Gbɔdónúmɛxó e kúnkplá fínfɔ́n sín kú bɔ mɛsɛ́dó Pɔlu wlán sɛ́dó Kɔlɛntinu lɛ é ɖó na sù Klisanwun e ɖò gbɛ̀ dìn lɛ é bǐ nukúnmɛ. Mǐ ɖó hwɛjijɔ e wu mǐ na setónú nú wěɖexámɛ Pɔlu tɔn e ɖɔ ɖɔ mǐ ni wà nǔ e wu mǐ kpé é dìn ɖò “Aklunɔ sín azɔ̌ ɔ” mɛ é. (1 Kɔ 15:58) Enyi mǐ nɔ ɖ’alɔ ɖò azɔ̌ enɛ mɛ kpo kanɖodónǔwu kpo ɔ, mǐ sixu ɖó nukún sɔgudo awǎjijɛnɔ ɖé. Sɔgudo enɛ na nyɔ́ tawun hú nǔ ɖebǔ e mǐ sixu ɖó nukún é. É ɖò wɛn ɖɔ enɛ na dó zǒgbe jí ɖɔ Aklunɔ sín azɔ̌ e wà wá yì é kún nyí nǔ yayǎ ó. w20.12 13 akpá. 16-17

Nú mǐ gbéjé nǔɖɔɖ’ayǐ e ɖò Ezekiyɛli 38:10-23; Daniyɛli 2:43-45; 11:44–12:1 kpo Nǔɖexlɛ́mɛ 16:13-16, 21 kpo mɛ, bo ɖɔ xó dó nǔ ɖokpo ɔ lɛ jí lɛ é kpɔ́n ɔ, mǐ sixu ɖó nukún ɖɔ nǔ elɔ lɛ e bɔ d’ewu é na jɛ. Ya ɖaxó ɔ bɛ́ bonu é ɖó táan ɖé gudo ɔ, “axɔ́su e ɖò ayikúngban ɔ bǐ jí lɛ” é na sò bǔ dó glo ɖokpo ɔ mɛ, bo na huzu kplékplé akɔta lɛ tɔn. (Nǔɖe. 16:13, 14) Kplékplé enɛ wɛ Biblu ylɔ́ ɖɔ ‘Gɔgu Magɔgi tɔn.’ (Ezek. 38:2) Ye na tɔ́n ahwan togun Mawu tɔn, bo na ba na sú kún dó n’i bǐ mlɛ́mlɛ́. Ðò nǔɖɔɖ’ayǐ e ɖɔ xó dó hwe enɛ nu wu é mɛ ɔ, mɛsɛ́dó Jaan mɔ kɛ́njí ɖaxó ɖaxó ɖé lɛ ja kɔn nyi kɛntɔ́ Mawu tɔn lɛ jí. Kɛ́njí enɛ lɛ sixu nɔte nú wɛn hwɛɖónúmɛ tɔn agbɔ̌nnɔ e togun Jehovah tɔn na jla é. Enɛ wɛ na zɔ́n bɔ Gɔgu Magɔgi tɔn na tɔ́n ahwan togun Mawu tɔn kpo linlin ɔ kpo ɖɔ emi na za ye sín ayikúngban ɔ jí.—Nǔɖe. 16:21. w20.05 14-15 akpá. 13-14

Gbigbɔ mímɛ́ Mawu tɔn nyí nǔnina ɖé bo ɖó na xɔ akwɛ nú mǐ. Enyi mǐ nɔ lin tamɛ dó nǔ e wà wɛ gbigbɔ mímɛ́ ɔ ɖè ɖò hwe mǐtɔn nu lɛ é jí ɔ, nǔnina e gbigbɔ ɔ nyí é na lɛ́ sù nukún mǐtɔn mɛ d’eji. Cobonu Jezu na lɛkɔ yì jixwé ɔ, é ɖɔ nú ahwanvu tɔn lɛ ɖɔ: “Mi na mɔ acɛ yí hwenu e [gbigbɔ mímɛ́] na jɛte wá mi jí é, bɔ mi na nyí kúnnuɖetɔ́ ce . . . kaka yì jɛ fí e gbɛ̀ ɔ kponu ɖó é.” (Mɛ. 1:8) Kpo alɔdó gbigbɔ mímɛ́ ɔ tɔn kpo ɔ, è ko xò Jehovah sɛntɔ́ livi 8,6 jɛji kplé gbɔn gbɛ̀ ɔ bǐ mɛ. Gɔ́ na ɔ, mǐ ɖò palaɖisi gbigbɔ tɔn ɖé sín vivǐ ɖu wɛ, ɖó gbigbɔ Mawu tɔn nɔ d’alɔ mǐ bɔ mǐ nɔ sɔnǔ nú jijɔ ɖagbe lɛ, ɖi wanyiyi, awǎjijɛ, fífá, suúluɖiɖó, xomɛnyínyɔ́, ɖagbewiwa, nǔɖiɖi, xomɛfífá kpo mɛɖéejiɖuɖe kpo. Jijɔ enɛ lɛ wɛ kplé bo nyí “nǔ e [gbigbɔ mímɛ́] nɔ na mɛ [é]”. (Ga. 5:22, 23) Nǔnina xɔ akwɛ ɖé wɛ gbigbɔ mímɛ́ ɔ nyí nǔgbo! w20.05 28-29 akpá. 10; 29-30 akpá. 13

Hwɛjijɔ gegě wu wɛ mǐ sixu ɖɔ ɖɔ mɛ ɖěɖee na dó kúabɔ nú mɛ e è na fɔ́n sín kú lɛ é na kpéwú bo na tuùn mɛvívɛ́ yetɔn lɛ. Ði kpɔ́ndéwú ɔ, nú mǐ zɔn dó fínfɔ́n sín kú e ko wá yì lɛ é jí ɔ, é cí ɖɔ Jehovah na vɔ́ mɛ lɛ dá bɔ ye na nɔ mɔ nǔ, ɖɔ xó, bo lɛ́ lin tamɛ kpɔ́n lee ye ko nɔ bló gbɔn ɖ’ayǐ cobo kú é ɖɔhun. Flín ɖɔ Jezu jlɛ́ kú dó amlɔ wu, bo lɛ́ jlɛ́ fínfɔ́n sín kú dó amlɔ mɛ fínfɔ́n sín wu. (Mat. 9:18, 24; Jaan 11:11-13) Enyi mɛɖé fɔ́n sín amlɔ mɛ ɔ, lee é nɔ mɔ nǔ, bo nɔ sè nǔ gbɔn cobo yì mlɔ́ ayǐ é ɔ, mɔ̌ wɛ é nɔ lɛ́ mɔ nǔ bo nɔ lɛ́ sè nǔ gbɔn hwenu e é fɔ́n é, é ka nɔ lɛ́ flín nǔ xóxó lɛ. Mǐ ni kpɔ́n kpɔ́ndéwú Lazáa tɔn. É kú é ɔ, é ko bló azǎn ɛnɛ, bɔ agbaza tɔn jɛ nyinyɔ jí. É ɖò mɔ̌ có, hwenu e Jezu fɔ́n ɛ é ɔ, nɔví tɔn nyɔnu lɛ tuùn i tlolo, bɔ Lazáa flín ye ganji.—Jaan 11:38-44; 12:1, 2. w20.08 14-15 akpá. 3; 16 akpá. 8

Vogbingbɔn e ɖò nɔví yí ami dó ɖè lɛ kpo lɛngbɔ̌ ɖevo lɛ kpo tɛntin é wɛ nyí lee ye xɔ akwɛ gbɔn ɖò Mawu nukúnmɛ é ǎ. Gbɛ̌ta we lɛ bǐ wɛ xɔ akwɛ n’i. È na ɖɔ ɔ, akwɛ ɖokpo ɔ wɛ é dó xɔ ye bǐ, é wɛ nyí gbɛ̀ Vǐ vívɛ́ná tɔn tɔn e é sɔ́ jó dó xɔ gbɛ̀ nú mɛ yí ami dó ɖè lɛ kpo lɛngbɔ̌ ɖevo lɛ kpo é. Nukúnɖiɖó vovo e gbɛ̌ta we lɛ ɖó é wɛ ɖè vogbingbɔn e ɖò tɛntin yetɔn é xlɛ́. Gbɛ̌ta we lɛ bǐ ɖó na kpò ɖò gbeji nú Mawu kpo Klisu kpo. (Ðɛh. 31:24) Flín ɖɔ gbigbɔ mímɛ́ Mawu tɔn sixu xlɛ́ ali ye ɖó bǎ ɖokpo ɔ mɛ. Enɛ xlɛ́ ɖɔ Jehovah nɔ na gbigbɔ mímɛ́ tɔn mɛ ɖokpo ɖokpo, lee é ɖó hudo tɔn gbɔn é. Jehovah sɔ́ nukúnɖiɖó jiwǔ ɖé ɖó te nú mɛ e zé yeɖée jó n’i lɛ é ɖokpo ɖokpo. (Jel. 29:11) Flǐn Kú Klisu tɔn tɔn hun ali taji ɖé nú mǐ mɛ ɖokpo ɖokpo bonu mǐ na kpa susu nú Mawu kpo Klisu kpo nú nǔ e ye wà nú mǐ, b’ɛ zɔ́n bɔ mǐ sixu ɖu vivǐ gbɛ̀ mavɔmavɔ tɔn é. Flǐn ɔ wɛ nyí kplé taji hugǎn e Klisanwun nǔgbo lɛ nɔ bló xwewu xwewu é. w21.01 18 akpá. 16; 19 akpá. 19

Mɛ e nɔ wá Flǐn ɔ domɛ lɛ é gegě ɖó nukúnɖiɖó ayikúngban jí tɔn. Bɔ Etɛwu ye ka nɔ yì dò tɔn mɛ lo? Hwɛjijɔ e wu mɛ lɛ nɔ yì xɔ́ntɔn yetɔn ɖé sín alɔwliwli domɛ é ɖokpo ɔ wu wɛ ye nɔ yì. Ye nɔ jló na ɖè wǎn e ye yí nú mɛ e jló na wlí alɔ lɛ é xlɛ́ ye, bo lɛ́ jló na nɔ gudo nú ye. Nǔ ɖokpo ɔ wɛ é nɔ lɛ́ nyí nú lɛngbɔ̌ ɖevo e nɔ yì Flǐn ɔ domɛ lɛ é lɔ, ɖó ye jló na ɖè wǎn e ye yí nú Klisu kpo mɛ yí ami dó ɖè lɛ kpo é xlɛ́, bo lɛ́ jló na nɔ gudo nú ye. Lɛngbɔ̌ ɖevo lɛ nɔ lɛ́ yì dò tɔn mɛ dó ɖexlɛ́ ɖɔ vɔ̌ e Jezu sá é sù nukún emitɔn mɛ, ɖó é wɛ zɔ́n bɔ emi na nɔ gbɛ̀ kaka sɔyi ɖò ayikúngban jí. Hwɛjijɔ taji e wu lɛngbɔ̌ ɖevo lɛ nɔ yì Flǐn ɔ domɛ é ɖevo wɛ nyí ɖɔ ye jló na setónú nú gbeɖiɖe Jezu tɔn. Hwenu e Jezu ɖó nǔwiwa bǔnɔ enɛ ayǐ kpo mɛsɛ́dó tɔn gbejinɔtɔ́ lɛ kpo é ɔ, é ɖɔ nú ye ɖɔ: “Mi na nɔ bló gbɔn lě dó flín mì na.” (1 Kɔ. 11:23-26) Enɛ wu ɔ, enyi mɛ yí ami dó ɖè lɛ kpò ɖò gbɛ̀ ɖò ayikúngban jí jɛn wɛ nyí ɔ, lɛngbɔ̌ ɖevo lɛ na kpò ɖò Aklunɔ Sín Nǔɖuɖu ɔ domɛ yì wɛ. w21.01 17-18 akpá. 13-14

Bonu wanyiyi na jɛ wě ganji ɔ, è ɖó na ɖexlɛ́ gbɔn nǔwiwa lɛ gblamɛ. (Sɔ́ jlɛ́ dó Jaki 2:17, 26 wu.) Ði kpɔ́ndéwú ɔ, Jehovah yí wǎn nú mǐ. (1 Jaan 4:19) Gɔ́ na ɔ, é nɔ ɖè wanyiyi tɔn xlɛ́ gbɔn xó ɖagbeɖagbe e ɖò Biblu mɛ lɛ é gblamɛ. (Ðɛh. 25:10; Hlɔ. 8:38,39) É ɖò mɔ̌ có, mǐ kúdeji ɖɔ é kún nyí xó e Mawu nɔ ɖɔ lɛ é kɛɖɛ mɛ wɛ é nɔ ɖè wǎn e é yí nú mǐ é xlɛ́ ɖè ó, loɔ, é nɔ lɛ́ ɖexlɛ́ ɖò nǔ e é nɔ wà lɛ é mɛ. Jehovah yí gbè bɔ vǐ vívɛ́ná tɔn jiya bo kú dó ta mǐtɔn mɛ. (Jaan 3:16) Kpo enɛ kpo ɔ, è ka sixu xò nǔ kpɔ́n ɖɔ Jehovah ka yí wǎn nú mǐ nǔgbo à jí à? Mǐ nɔ ɖexlɛ́ ɖɔ mǐ yí wǎn nú Jehovah kpo Jezu kpo gbɔn tónúsíse nú ye gblamɛ. (Jaan 14:15; 1 Jaan 5:3) Jezu ɖegbe nú mǐ tlɔlɔ ɖɔ mǐ ni yí wǎn nú mǐɖée lɛ. (Jaan 13:34, 35) Mǐ ɖó na nɔ ɖè wǎn e mǐ yí nú nɔví mǐtɔn lɛ é xlɛ́ ɖò xó kɛɖɛ mɛ ǎ, loɔ, mǐ ɖó na nɔ lɛ́ ɖexlɛ́ ɖò nǔwiwa mǐtɔn lɛ mɛ.—1 Jaan 3:18. w21.01 9 akpá. 6; 10 akpá. 8

Mɛ ɖěɖee gbigbɔ ɖè lɛ é ɖó nukúnɖiɖó ɔ bo na nɔ kpɔ́ xá Jezu kaka sɔyi, bo na kp’acɛ xá ɛ ɖò Axɔ́suɖuto Mawu tɔn mɛ. Ye na nɔ kpɔ́ xá Klisu cɔɔ lě, bo ɖɔ xó xá ɛ, bo lɛ́ zán hwenu ɖó kpɔ́ xá ɛ. (Jaan 14:2, 3) Mɛ e ɖó nukúnɖiɖó ayikúngban jí tɔn lɛ é lɔ na mɔ ɖɔ Jezu yí wǎn nú emi, bo ɖò nukún kpé emi wu wɛ. Ye na mɔ Jezu ǎ có, kancica e ye ɖó xá ɛ é na syɛn tawun hwenu e ye na ɖò gbɛ̀ e Jehovah kpo Jezu kpo na ye é sín vivǐ ɖu wɛ é. (Eza. 9:5, 6) Enyi mǐ sɔ ylɔ̌ Jezu tɔn, bo huzu xɔ́ntɔn tɔn lɛ ɔ, mǐ nɔ mɔ nyɔna gegě. Ði kpɔ́ndéwú ɔ, é nɔ yí wǎn nú mǐ, bo nɔ d’alɔ mǐ dìn. Ali lɛ́ hun nú mǐ, bɔ mǐ na nɔ gbɛ̀ kaka sɔyi. Bɔ taji hugǎn ɔ wɛ nyí ɖɔ xɔ́ntɔn e mǐ zun xá Jezu é na zɔ́n bɔ mǐ na ɖó nǔ xɔ akwɛ hugǎn bǐ ɔ; é wɛ nyí ɖɔ mǐɖesunɔ na ɖó kancica syɛnsyɛn ɖé xá Jezu sín Tɔ́, Jehovah. Wǔjɔmɛ ɖaxó ɖé wɛ é nyí ɖɔ è ni ylɔ́ mǐ ɖɔ xɔ́ntɔn Jezu tɔn lɛ! w20.04 25 akpá. 15-16

Mɛsɛ́dó Pɔlu wlán wema tɔn sɛ́dó Klisanwun yí ami dó ɖè e ɖò Kɔlɛnti bo na fɔ́n sín kú dó jixwé lɛ é. Klisanwun enɛ lɛ wɛ nyí “mɛ e Mawu ylɔ́ bɔ ye na nɔ gbɛ̀ n’i, ɖò bǔ e ye ɖè xá Klisu Jezu ɔ mɛ lɛ” é. Pɔlu lɛ́ ɖɔ xó dó “nɔví ɖò Klisu mɛ e ko kú lɛ” é wu. (1 Kɔ. 1:2; 15:18; 2 Kɔ. 5:17) Pɔlu wlán ɖò wema Biblu tɔn ɖevo mɛ ɖɔ: “Mɛ e ko ɖò bǔ xá Klisu bo kú xá ɛ lɛ ɔ,” na nɔ “bǔ xá ɛ, bo . . . fɔ́n sín kú xá ɛ.” (Hlɔ. 6:3-5) È fɔ́n Jezu sín kú b’ɛ nyí nǔɖiɖó gbigbɔ tɔn ɖé, bɔ enɛ gudo ɔ, é yì jixwé. Nǔ ɖokpo ɔ wɛ é na nyí nú “mɛ e ko ɖò bǔ xá Klisu” lɛ é bǐ, enɛ wɛ nyí Klisanwun yí ami dó ɖè lɛ bǐ. Pɔlu wlán ɖɔ: “Klisu wɛ nyí mɛ nukɔntɔn e fɔ́n sín kú é.” (1 Kɔ. 15:20) Jezu wɛ nyí mɛ nukɔntɔn e fɔ́n sín kú bo nyí nǔɖiɖó gbigbɔ tɔn lobo mɔ gbɛ̀ mavɔmavɔ é. w20.12 5-6 akpá. 15-16

Afɔjiafɔji wɛ è nɔ fɔ́n mɛ yí ami dó ɖè ɖěɖee nɔ fó gbɛzán ayikúngban jí tɔn yetɔn lɛ é dó jixwé. Xó mɛsɛ́dó Pɔlu tɔn e ɖò 1 Kɔlɛntinu lɛ 15:51, 52 mɛ é dó zǒgbe enɛ jí. Hwenu e è na fɔ́n nɔví Klisu tɔn enɛ lɛ é ɔ, ye bǐ na ɖó awǎjijɛ susunɔ; Biblu ɖɔ azɔ̌ e mɛ yí ami dó ɖè lɛ na wà ɖò jixwé é nú mǐ. Jezu ɖɔ nú ye ɖɔ: “Mɛ e na ɖu ɖ’eji, bo na wà nǔ e un jló ɔ kaka yì vivɔnu ɔ, un na na ɛ acɛ e nyɛɖesunɔ un yí ɖò tɔ́ ce sí é: un na na bɔ é na kp’acɛ nú akɔta lɛ. Acɛkpikpa tɔn na syɛn gankpo ɖɔhun, bo na gbà ye hánnyá lee è nɔ gbà kozɛ́n hánnyá gbɔn é.”—Nǔɖe. 2:26, 27. w20.12 12 akpá. 14-15

Ee mɛsɛ́dó Pɔlu ɖɔ ɖɔ Jezu wɛ nyí mɛ “nukɔntɔn” ɔ é ɔ, ɖiɖɔ wɛ é ɖè ɖɔ è na lɛ́ fɔ́n mɛ ɖevo lɛ wá gbɛ̀ ɖò gudo tɔn. Mɛsɛ́dó lɛ kpo mɛ ɖevo e “ɖò bǔ xá Klisu” lɛ é kpo na bɔ dó Jezu wu. (1 Kɔ. 15:18) Hwetɔnnu sù ɔ, è na fɔ́n ye lɔmɔ̌ sín kú, Jezu ɖɔhun. Fínfɔ́n sín kú dó jixwé mɛ e “ɖò bǔ xá Klisu” lɛ é tɔn ko bɛ́ hwenu e Pɔlu wlán wema sɛ́dó Kɔlɛntinu lɛ é ǎ. É nyɔ́ wà ɔ, Pɔlu xlɛ́ ɖɔ nǔ na wá nyí mɔ̌ ɖò sɔgudo, é ɖɔ: “Mɛ ɖokpo ɖokpo na nɔ tɛn éɖesunɔ tɔn mɛ; Klisu wɛ jɛ nukɔn nú mɛ bǐ, bɔ mɛ e nyí étɔn lɛ na bɔ dó wǔ tɔn hwenu e é na wá dó é.” (1 Kɔ. 15:23; 1 Tɛ. 4:15, 16) Égbé ɔ, hwenu e Klisu “na wá dó” bɔ è ɖɔ ɖ’ayǐ é wɛ mǐ ɖè. Mɛsɛ́dó lɛ kpo Klisanwun yí ami dó ɖè ɖevo e ko kú lɛ é kpo na nɔte kaka jɛ hwenu e Klisu na wá dó é bo na dó mɔ ajɔ jixwé tɔn yetɔn yí lobo nɔ “bǔ xá [Jezu], bo . . . fɔ́n sín kú xá ɛ.”—Hlɔ. 6:5. w20.12 5 akpá. 12; 6 akpá. 16-17

Mɛ ɖěɖee è fɔ́n bɔ ye sixu nɔ gbɛ̀ ɖò jixwé lɛ é wu ɖɔ xó dó wɛ mɛsɛ́dó Pɔlu ɖè, enɛ wɛ nyí “agbaza jixwé” tɔn. (1 Kɔ. 15:43, 44) Hwenu e Jezu ɖò ayikúngban jí é ɔ, gbɛtɔ́gbáza wɛ é ɖó. Amɔ̌, hwenu e é fɔ́n sín kú é ɔ, é huzu “[gbigbɔ] e nɔ na gbɛ̀ mɛ é,” bo lɛkɔ yì jixwé. Mɔ̌ ɖokpo ɔ, è na fɔ́n Klisanwun yí ami dó ɖè lɛ sín kú kpo agbaza e sixu zɔ́n bɔ ye na nɔ gbɛ̀ ɖò jixwé é kpo. Pɔlu tinmɛ ɖɔ: “Lee mǐ cí mɛ e è sɔ́ kɔ́ dó bló na ɔ ɖɔhun ɔ, mɔ̌ ɖokpo ɔ wɛ mǐ na wá cí mɛ e gosin jixwé ɔ ɖɔhun.” (1 Kɔ. 15:45-49) Flín ɖɔ è kún fɔ́n Jezu dó gbɛtɔ́ gbáza mɛ ó. Hwenu e Pɔlu ɖò tasunaxó tɔn lɛ kɔn wá wɛ ɔ, é tinmɛ hwɛjijɔ ɔ gbɔn lě: “Nǔ e è sɔ́ agbaza kpodo hun kpo dó bló ɔ sixu ɖó mimǎ ɖò axɔ́suɖuɖu Mawu tɔn mɛ ǎ.” (1 Kɔ. 15:50) È na fɔ́n mɛsɛ́dó lɛ kpo mɛ yí ami dó ɖè ɖevo lɛ kpo dó jixwé kpo gbɛtɔ́gbáza kpo hun kpo ɖěɖee nɔ nyɔ lɛ é kpo ǎ. w20.12 10-11 akpá. 10-12

Mawu sɔ́ d’ayi mɛ nú ahwanvu Jezu tɔn xwè kanweko nukɔntɔn ɔ tɔn ɖé lɛ bɔ ye wlán nǔ dó fínfɔ́n sín kú jixwé tɔn ɔ wu. Mɛsɛ́dó Jaan tinmɛ ɖɔ: “Dìn ɔ, Mawu-ví wɛ mǐ nyí; amɔ̌, è ko ɖè nǔ e [mǐ] na wá nyí ɔ xlɛ́ céɖécéɖé ǎ. Loɔ, nǔ e mǐ tuùn kpowun ɔ wɛ nyí ɖɔ hwenu e Klisu na lɛkɔ wá ɔ, mǐ na cí éɖɔhun.” (1 Jaan 3:2) Enɛ wu ɔ, Klisanwun yí ami dò ɖè lɛ tuùn lee ye na wá cí hwenu e è na fɔ́n ye dó jixwé é ǎ. É ɖò mɔ̌ có, ye na mɔ Jehovah hwenu e ye na yí ajɔ yetɔn é. Biblu ɖɔ nǔɖe lɛ d’ewu. Mɛ yí ami dó ɖè lɛ na ɖò kpɔ́ xá Klisu hwenu e “é na gblé gbɛ̀ dó nú gǎn lɛ bǐ, bo na gbidí acɛkpikpa lɛ bǐ kpo hlɔnhlɔn e ɖò yɛswímɛ lɛ é bǐ kpo” é. “Kɛntɔ́ gudo tɔn e . . . nyí kú” é lɔ sɔ́ na ɖè ǎ. Gudo mɛ ɔ, Jezu kpo mɛ e na kp’acɛ xá ɛ lɛ é kpo na hwíhwɛ́ yeɖée kpo nǔ bǐ kpo dó Jehovah glɔ́. (1 Kɔ. 15:24-28) Hwenu ɖaaɖagbe ɖé wɛ na nyí enɛ! w20.12 8 akpá. 2

Klisanwun gbejinɔtɔ́ ɖěɖee ma ɖó nukúnɖiɖó ɔ bo na yì nɔ gbɛ̀ ɖò jixwé xá Klisu ǎ lɛ é lɔ ɖó nukúnɖiɖó fínfɔ́n sín kú tɔn. Biblu ɖɔ ɖɔ mɛ ɖěɖee yì jixwé lɛ é wɛ nyí mɛ ɖěɖee “ɖó mimǎ ɖò fínfɔ́n sín kú nukɔn nukɔntɔn” ɔ mɛ lɛ é. (Nǔɖe. 20:6) Enɛ ɖò xíxlɛ́ wɛ ɖɔ fínfɔ́n sín kú ɖevo na bɔ d’ewu nɛ à cé? Enɛ sɔgbe xá nǔ e Jɔbu ɖɔ dó sɔgudo wu é. (Jɔb. 14:15) Mɛ yí ami dó ɖè lɛ na ɖò jixwé xá Jezu hwenu e é na ɖó nǔ acɛkpikpa kpo hlɔnhlɔn lɛ bǐ kpo nu é. È na tlɛ sú kún dó nú “Kɛntɔ́ gudo tɔn” ɔ, enɛ “wɛ nyí kú.” É ɖò wɛn ɖɔ mɛ ɖěɖee na fɔ́n sín kú dó jixwé lɛ é bǐ sɔ́ na kú gbeɖé ǎ. (1 Kɔ. 15:23-26) Mɛ ɖěɖee ɖó nukúnɖiɖó bo na nɔ ayikúngban jí lɛ é sín nukúnɖiɖó sixu jinjɔn nǔ e Pɔlu ɖɔ, bɔ é ɖò wemafɔ e jí tɛ́si mǐtɔn égbé tɔn jinjɔn é mɛ é jí. É ɖò wɛn ɖɔ mɛ nyanya ɖě kún sixu yì jixwé ó, hǔn xó enɛ lɛ kúnkplá fínfɔ́n sín kú sɔgudo tɔn ayikúngban jí tɔn. w20.12 6-7 akpá. 18-19

Mǐ sixu kanbyɔ mǐɖée ɖɔ: ‘Nɛ̌ un ka sixu wà gbɔn bo kánɖeji ɖɔ Jehovah kún ɖè alɔ sín kan ce mɛ ó?’ Enyi a nɔ kan nǔ mɔ̌hun byɔ hǔn, é xlɛ́ ɖɔ Jehovah sixu sɔ́ hwɛ kɛ we. Xwè ɖé lɛ ɖíe wá yì ɔ, Atɔxwɛ ɖɔ: “Mǐ sixu mɔ ɖɔ mǐ nɔ fɔ́n bo nɔ ɖò hwɛ ɖokpo ɔ lɛ hu wɛ azɔn mɔ̌kpan, bɔ é sixu cí nú mǐ ɖɔ mǐ kún na jó nǔwalɔ nyanya e dó ɖɔ dò ɖò gbɛzán mǐtɔn mɛ lɛ é dó gbeɖé ó wɛ ɖɔhun. . . . Ma lin ɖɔ hwɛ e emi hu é ɔ, è kún sixu sɔ́ kɛ emi gbeɖé ó ó. Lee Satáan ba ɖɔ a ni lin nǔ gbɔn é pɛ́ɛ nɛ. Lee hwɛ e a hu é vɛ́ nú we sɔ é kɔ́kɔ́ɖɔ́kɔ́ ko xlɛ́ ɖɔ a kún ko zɛ gbě ó. Nɔ sɔ́ hwiɖée hwe, bo kpò ɖò ɖɛ vívɛ́ xò sɛ́dó Mawu wɛ ɖɔ é ni sɔ́ hwɛ kɛ we, bo bló bonu a ni lɛ́ ɖó ayixa mímɛ́ ɖé, lobo lɛ́ d’alɔ we nú a ni gɔn nǔ ɖokpo ɔ wà nyi dò.” Cobonu mɛsɛ́dó Pɔlu na huzu Klisanwun ɔ, é hu hwɛ syɛnsyɛn gegě. Pɔlu flín nǔ e é wà wá yì lɛ é, amɔ̌, é nɔ sɔ́ ayi ɖ’eji ǎ. (1 Tim. 1:12-15) Amɔ̌, é nɔ kpɔ́n dó mɔ nǔnina e Mawu na ɛ é ɖé. Mɔ̌ mɛ ɔ, Pɔlu jɛ hwɛ didó mɛɖée zɛ xwé wu sín mɔ ɔ mɛ ǎ, loɔ, é sɔ́ ayi tɔn ɖó nǔ e é sixu wà ɖò sinsɛnzɔ́ Jehovah tɔn mɛ é jí. w20.11 27 akpá. 14; 29 akpá. 17

Satáan nɔ lɛ́ tɛ́n mǐ kpɔ́n ɖò ali gegě nu, bonu mǐ na wà nǔ nyanya. Nɛ̌ mǐ ka na wà nǔ gbɔn? É bɔwǔ bɔ mǐ na ba hwɛjijɔ. Ði kpɔ́ndéwú ɔ, mǐ sixu nɔ lin nǔ gbɔn lě: ‘È na ɖè mì sín agun mɛ ɖó enɛ wu ǎ; é ko syɛn ɖě sɔmɔ̌ ǎ.’ Linlin mɔ̌hun nyla tawun. É na nyɔ́ ɖɔ mǐ ni kan nǔ lěhun lɛ byɔ mǐɖée: ‘Tintɛnkpɔn wɛ Satáan ɖè bo na gbɔn mɛtɛnkpɔn elɔ sín yɛkan mɛ bo na má ayi ce à? Nú un jó nyiɖée dó nú jlǒ nyanya lɛ ɔ, un na kɔn cí dó nyikɔ Jehovah tɔn wu à cé? Nǔwalɔ enɛ na bló bɔ un na sɛkpɔ́ Mawu wɛ à, alǒ é na zɔ́n bɔ un na jɛ zɔ n’i?’ Nɔ lin tamɛ dó nǔkanbyɔ mɔ̌hun lɛ jí. Nɔ xoɖɛ bo byɔ nǔnywɛ, bo na dó na xósin jɔ xósin lɛ. Mɔ̌ wiwa sixu cyɔn alɔ jǐ we tawun. Enɛ sixu d’alɔ we, bɔ a na gbɛ́ nǔ e xwlé we wɛ è ɖè é bǐ gbídígbídí lee Jezu wà gbɔn hwenu e é ɖɔ: “Satáan, bǔ dó mì!” é. (Mat. 4:10) Flín ɖɔ ayi e má é kún xɔ akwɛ kaka ɖé ó. w20.06 12-13 akpá. 16-17

Mǐ nɔ sɔ́ mǐɖée hwe, bo nɔ xwedó nǔgbododó Jehovah tɔn lɛ, ɖó mǐ mɔ nǔ jɛ wu ɖɔ Jehovah tuùn nǔ e nyɔ́ nú mǐ hugǎn é hwebǐnu. (Efɛ. 4:22-24) Mɛɖéesɔ́hwe nɔ sísɛ́ mǐ, bɔ jlǒ Jehovah tɔn nɔ mya nukún nú mǐ hú mǐɖesunɔ tɔn, bɔ mǐ nɔ lɛ́ mɔ ɖɔ mɛ ɖevo lɛ hugǎn mǐ. Wǎgbɔ tɔn ɔ, mǐ nɔ ɖó kancica ɖagbe ɖé xá Jehovah kpo nǔɖitɔ́ hatɔ́ mǐtɔn lɛ kpo. (Fili. 2:3) Enyi mǐ ma cɔ́ mǐɖée ǎ ɔ, goyitɔ́ kpo cejɛnnabinɔ kpo e ɖò gbɛ̀ Satáan tɔn mɛ lɛ é sixu wà nǔ dó mǐ wu. É cí ɖɔ enɛ wà nǔ dó mɛɖé lɛ wu ɖò xwè kanweko nukɔntɔn ɔ mɛ ɖɔhun, ɖó mɛsɛ́dó Pɔlu wlán sɛ́dó Hlɔmanu lɛ ɖɔ: “Un ɖò ɖiɖɔ nú mi mɛ ɖokpo ɖokpo wɛ ɖɔ mɛɖé ni ma nɔ mɔ éɖée zɛ nǔ e é nyí ɔ wu ɖò linlin éɖesunɔ tɔn mɛ ó; loɔ, linlin e é nɔ ɖó dó éɖesunɔ wu ɔ ni nɔ nɔ jlɛ̌mɛ.” Pɔlu tuùn ɖɔ mǐ ɖó na ba wi mǐtɔn. É ɖò mɔ̌ có, mɛɖéesɔ́hwe na d’alɔ mǐ, bɔ mǐ na ɖó linlin e ɖò jlɛ̌ jí é dó mǐɖée wu, bo na lɛ́ d’alɔ mǐ, bɔ mǐ na nyi alɔ nú ayi sísɔ́ ɖó mǐɖée jí zɛ xwé wu. w20.07 2-3 akpá. 1-2

Ðò Axɔ́su Asa hwenu ɔ, fífá sín táan ɔ wá wá vivɔnu. Ahwankpá ɖaxó e mɛ ahwanfuntɔ́ hlɔnhlɔnnɔ livi ɖokpo jɛji ɖè é ɖé gosin Etiopíi bo wá. Ahwangán Zelaxi kúdeji ɖɔ emi kpo ahwankpá emitɔn kpo na ɖu ɖò Judáa jí. Amɔ̌, Asa ɖeji dó ahwanfuntɔ́ tɔn lɛ wu ǎ, é nyɔ́ wà ɔ, é ɖeji dó Mawu tɔn Jehovah wu. Asa xoɖɛ ɖɔ: ‘Wǎ gɔ́ alɔ nú mǐ, Jehovah, Mawu mǐtɔn! Ðó hwi wu wɛ mǐ ganjɛ, nyikɔ towe mɛ wɛ mǐ wá kpé ahwan xá ahwan wɔbuwɔbu elɔ ɖè.’ (2 Tan 14: 10) Ahwanfuntɔ́ Etiopíi tɔn lɛ ɖibla yì Asa tɔn lɛ donu we có, Asa ka ɖeji dó hlɔnhlɔn gɔ́ nú nǔwukpíkpé e Jehovah ɖó bo na hwlɛn togun Tɔn gán é wu. Jehovah ka flú i ǎ, bɔ ahwankpá Etiopíi tɔn ɖu winnya. (2 Tan 14:7-12) Mǐ tuùn nǔ e sɔgudo hɛn nu nú mǐ mɛ ɖokpo ɖokpo é hlɛ́nhlɛ́n ǎ có, mǐ ka tuùn ɖɔ táan fífá tɔn ɖebǔ e sín vivǐ togun Mawu tɔn na ɖu é kún na nɔ ayǐ kaka sɔyi ó. Flín ɖɔ Jezu ɖɔ ɖ’ayǐ ɖɔ ɖò azǎn gudogudo tɔn lɛ mɛ ɔ, “mɛ bǐ na gbɛ́ wǎn nú” ahwanvu emitɔn lɛ.—Mat. 24:9. w20.09 17-18 akpá. 14-16

Mǐ mɛ ɖě nɔ ba ɖɔ è ni zun mǐ ǎ. É ɖò mɔ̌ có, enyi kɛntɔ́ mǐtɔn lɛ ɖò mǐ zun wɛ, bɔ nǔ e ɖɔ wɛ ye ɖè lɛ é ɖó adohu adohu nú mǐ zɛ xwé wu ɔ, awakanmɛ sixu gbɔjɔ mǐ. (Nǔx. 24:10) Amɔ̌, nukún tɛ mǐ ka na sɔ́ dó kpɔ́n zun e zun mǐ wɛ kɛntɔ́ mǐtɔn lɛ ɖè é? Mɛsɛ́dó Pɔlu ɖɔhun ɔ, ‘è ɖò zunzun mǐ wɛ ɔ, xomɛ nɔ hun mǐ.’ Etɛwu? Ðó mɛzunzun kpo gbeklánxámɛ lɛ kpo nyí wuntun ɖé, bo xlɛ́ ɖɔ mǐ nyí ahwanvu Jezu tɔn lɛ nǔgbo. (1 Pi. 4:14) Jezu ɖɔ è na dóya nú ahwanvu emitɔn lɛ. (Jaan 15:18-20) Nǔ nyí mɔ̌ ɖò xwè kanweko nukɔntɔn ɔ mɛ. Ðò hwe ɔ nu ɔ, mɛ e wu aca Glɛki tɔn wà nǔ dó lɛ é nɔ kpɔ́n Klisanwun lɛ dó mɔ mɛ e ma bí ǎ, bo ma lɛ́ ɖó gǎn ǎ lɛ é. Ðò Jwifu lɛ tɛntin ɔ, è nɔ kpɔ́n Klisanwun lɛ dó mɔ “gbɛtɔ́ yayǎ,” ee ma ‘sè wema ǎ’ é, mɛsɛ́dó Piyɛ́ɛ kpo Jaan kpo ɖɔhun. (Mɛ. 4:13) Klisanwun lɛ cí mɛ e ma ɖó gǎn ɖé ǎ é ɖɔhun, ɖó ye nɔ ɖ’alɔ ɖò toxóɖiɖɔ mɛ bonu è na tuùn ye ǎ, ye ka nɔ lɛ́ ɖ’alɔ ɖò ahwan mɛ bo na dó jɛhun dó yeɖée jí ǎ; bɔ gbɛtɔ́ lɛ nɔ mɔ yɛ ɖě ɖò ta yetɔn ǎ. Klisanwun nukɔntɔn lɛ lɔn nú linlin masɔgbe gbeklánxámɛtɔ́ yetɔn lɛ tɔn zɔ́n bonu ye xò nǔ kplá wɛ à? Eǒ. w20.07 14-15 akpá. 3-4

Mɛsɛ́dó Jaan yí wǎn nú nɔví tɔn lɛ tawun, bɔ ganjininɔ yetɔn ɖò gbigbɔ lixo nɔ ɖu ayi mɛ n’i. Wanyiyi enɛ kpo lee nǔ yetɔn nɔ ɖu ayi mɛ n’i gbɔn é kpo tɔ́n céɖécéɖé ɖò wema-sɛ́dó-mɛ tɔn atɔn lɛ mɛ. Tuùn e mǐ tuùn ɖɔ Jehovah sɔ́ sunnu kpo nyɔnu kpo mɛsɛ́dó Jaan ɖɔhun lɛ, bɔ ye na kp’acɛ xá Klisu é dó wusyɛn lanmɛ nú mɛ kpɔ́n! (1 Jaan 2:27) Mi nú mǐ ni hɛn wěɖexámɛ e jí mǐ ɖɔ xó dó dìn lɛ é ayi mɛ. Mi nú mǐ ni nɔ setónú nú Jehovah ɖò ali lɛ bǐ nu ɖò gbɛzán mǐtɔn mɛ; enɛ wɛ nyí ɖɔ mǐ ni kánɖeji bo na zán gbɛ̀ ɖò nǔgbo ɔ mɛ. Mǐ ni nɔ kplɔ́n Xó Mawu tɔn, lobo lɛ́ ɖeji dó nǔ e mǐ kplɔ́n lɛ é wu. Mǐ ni syɛnlǐn ɖò nǔɖiɖi e mǐ ɖó nú Jezu é mɛ. Mǐ ni nyi alɔ nú tamɛ-núkplɔnmɛ gbɛtɔ́ tɔn lɛ kpo gǔfɔndómawujitɔ́ lɛ sín nǔkplɔnmɛ lɛ kpo. Mǐ ni gbí dɔn ɖò kɔ e gbidí nú mǐ wɛ è nɔ ɖè bonu mǐ na zán gbɛ̀ we, lobo wà nǔ nyanya é nukɔn. Mǐ ni zán gbɛ̀ sɔgbe xá nǔgbododó walɔ ɖagbe tɔn Jehovah tɔn lɛ. Mǐ ni nɔ sɔ́ hwɛ kɛ nɔví mǐtɔn ɖěɖee dó xomɛ sin nú mǐ lɛ é, bo nɔ lɛ́ d’alɔ ye mɛ ɖěɖee ɖò hudo mɛ lɛ é, enɛ ɔ, mǐ na bló bɔ ye na syɛnlǐn. Mɔ̌ mɛ ɔ, nú mǐ na bo mɔ wuvɛ̌ ɖebǔ ɔ, mǐ na kpò ɖò gbɛ̀ zán wɛ ɖò nǔgbo ɔ mɛ. w20.07 24-25 akpá. 15-17

Wanyiyi sísɛ́ Jehovah bɔ é sɔ́ mɛsɛntɔ́ tɔn gbejinɔtɔ́ lɛ ɖokpo ɖokpo ɖó tɛn ɖé mɛ ɖò agun tɔn mɛ. Azɔ̌ mǐtɔn gbɔn vovo có, mǐ bǐ wɛ ka xɔ akwɛ, bo lɛ́ ɖó hudo mǐɖée tɔn. Mɛsɛ́dó Pɔlu ɖɔ ɖɔ mǐ mɛ ɖebǔ kún sixu ɖɔ ɖɔ mɛsɛntɔ́ Jehovah tɔn ɖevo lɛ sín nǔ kún hudo mǐ ó ó. (1 Kɔ. 12:21) Enyi mǐ ba ɖɔ fífá ni tíìn ɖò agun ɔ mɛ ɔ, mǐ ɖó na nɔ ɖó sísí nú mǐɖée bo na lɛ́ wà azɔ̌ ɖó kpɔ́. (Efɛ. 4:16.) Enyi mǐ nɔ nɔ bǔ bo nɔ w’azɔ̌ ɖó kpɔ́ ɔ, agun ɔ na yì nukɔn bo na lidǒ ɖò wanyiyi mɛ. Gbigbɔ mímɛ́ Jehovah tɔn wɛ nɔ sɔ́ mɛxo agun tɔn lɛ bǐ. É ɖò mɔ̌ có, ye mɛ ɖokpo ɖokpo ɖó nǔwukpíkpé vovo lɛ. (1 Kɔ. 12:17) Mɛɖé lɛ sixu nyí mɛxo agun tɔn yɔyɔ̌, bo ko mɔ nǔ kpɔ́n sɔ mɛxo agun tɔn ɖevo lɛ ǎ. Xwè kpo azɔn kpo sixu ɖó dogbó nú mɛ ɖevo lɛ. É ɖò mɔ̌ có, mɛxo ɖě ɖó na kpɔ́n mɛxo gbɛ̌ tɔn ɖevo bo ɖɔ ɖɔ “nǔ tɔn kún hudo emi ó ǎ.” É nyɔ́ wà ɔ, mɛxo lɛ ɖokpo ɖokpo ɖó na xwedó wěɖexámɛ Pɔlu tɔn e ɖò Hlɔmanu lɛ 12:10 mɛ é. w20.08 26 akpá. 1-2; 27 akpá. 4

Jehovah nɔ gbɔn tutoblonunu tɔn sín akpáxwé e ɖò ayikúngban jí é jí dó xlɛ́ ali mǐ bonu mǐ na gbɔn gbɛ̀ li ɔ jí. É ɖò wɛn ɖɔ mǐ nɔ yawǔ xwedó alixlɛ́mɛ ɖěɖee jinjɔn Biblu jí bɔ mǐ nɔ mɔ b’ɛ kúnkplá walɔ ɖagbe ɖiɖó lɛ é. Amɔ̌, enyi tutoblonunu Mawu tɔn bló huzuhuzu ɖé b’ɛ kúnkplá akpáxwé gbɛzán mǐtɔn tɔn ɖevo lɛ, ɖi Kpléxɔ Axɔ́suɖuto ɔ tɔn e mɛ mǐ nɔ yí é sísá mɔ̌ ɔ, ka lo? Enyi mǐ nɔ flín ɖɔ Jehovah w’azɔ̌ na wɛ mǐ ɖè, bɔ é wɛ lɛ́ ɖò ali xlɛ́ tutoblonunu tɔn wɛ ɔ, mǐ na kpò ɖò awǎ jɛ wɛ. (2 Kɔ. 6:1.) Hwenu e é byɔ ɖɔ è ni na akwɛ dó gbá tɛmpli ɔ é ɔ, Axɔ́su Davidi sɔ́ kpɔ́ndéwú ɖagbe ɖé ɖ’ayǐ. É ɖɔ: “Ðó un nyí nǔtí ǎ, togun ce lɔmɔ̌ nyí nǔtí ǎ. Enyi mǐɖesunɔ sín acɛ wɛ mǐ zé dó na nǔ enɛ lɛ we ǎ. Hwi wɛ ɖó nǔ bǐ; hwi wɛ na nǔ e mǐ na we lɛ mǐ.” (1 Tan 29:14) Nú mǐ lɔ nɔ na nǔnina ɔ, nǔ e Jehovah na mǐ lɛ é na ɛ wɛ mǐ lɛ́ ɖè mɔ̌ nɛ. Amɔ̌, enyi mǐ nɔ zán hwenu mǐtɔn, hlɔnhlɔn mǐtɔn kpo akwɛ mǐtɔn kpo dó nɔ gudo nú azɔ̌ Jehovah tɔn ɔ, é nɔ dó xomɛhunhun n’i tawun.—2 Kɔ. 9:7. w20.11 22-23 akpá. 14-16

Mǐ mɛ Kúnnuɖetɔ́ Jehovah tɔn lɛ ɔ, mɛ nabi e mǐ dɔn wá tutoblonunu Mawu tɔn mɛ é jí wɛ mǐ nɔ zɔn dó bo nɔ ɖɔ ɖɔ azɔ̌ ɔ kpa mǐ ǎ. (Luk. 8:11-15) Nú mǐ kpò ɖò didɛ wɛ ɖò wɛnɖagbe jijla kpo nǔ kplɔnkplɔn mɛ ɖevo lɛ kpo sín azɔ̌ ɔ kɔn ɔ, Jehovah na mɔ ɖɔ azɔ̌ ɔ ɖò mǐ kpa wɛ. Etɛwu? Ðó mǐ ɖò tónú sè nú É kpo Vǐ tɔn kpo wɛ wutu. (Mak. 13:10; Mɛ. 5:28, 29) Hwɛjijɔ ɖevo e wu wɛnjijlazɔ́ ɔ na mya nukún nú mǐ dìn é wɛ nyí ɖɔ vivɔnu gbɛ̀ elɔ tɔn ko sɛkpɔ́ bǐ. Táan e kpò bɔ mǐ na ɖ’alɔ ɖò azɔ̌ gbɛhwlɛngán tɔn ɔ mɛ é vɔ bǐ. Ma nɔte bonu nǔ lɛ bǐ ni ɖò tɔnfinnɔɔ ɖò gbɛzán towe mɛ cobo wà azɔ̌ taji enɛ ó. Blǒ bonu akpakpa ni nɔ lɛ́ sɔ́ we hugǎn dìn, blǒ bonu nukúnnúmɔjɛnǔmɛ e a ɖó dó Biblu wu é ni gɔ́ngɔ́n, kpan akɔ́n, bo nɔ lɛ́ gbɛ́ nǔ nú hwiɖée. Gɔ̌ nú gbɛtɔ́ livi tantɔn jɛji e nɔ dɔn mɛ hweví ɖɔhun lɛ é, bo na dó ɖu vivǐ awǎjijɛ e Jehovah sinsɛn nɔ hɛn wá é tɔn. (Nɛɛ. 8:10; Luk. 5:10) Kánɖeji bo na ɖ’alɔ ɖò azɔ̌ enɛ mɛ bǐ mlɛ́mlɛ́ kaka jɛ hwenu e é na fó dó é. w20.09 7 akpá. 18-20

Mǐ ɖó na jó mǐɖée dó bonu wǎn yí nú nǔ agbaza tɔn lɛ na fɛ́ ayi mǐtɔn ǎ. “Dɔkun gbɛmɛ fí tɔn sín mɛdindɔn lɛ” sixu zɔ́n bɔ wǎn e mǐ yí nú Jehovah é na bú, Xó tɔn sɔ́ na nɔ xɔ akwɛ nú mǐ ǎ, bɔ jlǒ e mǐ ɖó bo na má Xó tɔn xá mɛ ɖevo lɛ é lɔ na blí bú. (Mat. 13:22) Enyi mǐ na nya xɛ ɖò nǔ ɖěɖee Jehovah sɔ́ dó así nú mǐ lɛ é jí ɔ, mǐ ɖó na yawǔ wà nǔ hwenu e mǐ mɔ awovínú ɖé sɛ́dó é. Cobonu nǔbliblí, adakaxixo alǒ gǔfɔndómawujitɔ́ lɛ sín nǔɖe na wá xwetɔ́n ajijimɛ hwenu e mǐ na ɖò Ɛntɛnɛti jí, ɖò fímu ɖé kpɔ́n wɛ, alǒ ɖò tuto televiziɔn jí tɔn ɖé kpɔ́n wɛ é ɔ, mǐ sixu bló tuto nǔ e mǐ na wà ɖò ninɔmɛ mɔ̌hun mɛ é tɔn jɛ nukɔn. Enyi mǐ nɔ sɔnǔ ɖ’ayǐ nú nǔ e sixu wá jɛ é ɔ, mǐ sixu yawǔ wà nǔ, bo nya xɛ ɖò kancica e ɖò mǐ kpo Jehovah kpo tɛntin é jí, lobo kpò ɖò mɛ mímɛ́ nyí wɛ ɖò Jehovah nukúnmɛ. (Ðɛh. 101:3; 1 Tim. 4:12) Mǐ ɖó na hɛn nǔ xɔ akwɛ e Jehovah na mǐ lɛ é wu ganji, ye wɛ nyí nǔgbo xɔ akwɛ Biblu tɔn lɛ kpo wǔjɔmɛ e mǐ ɖó bá kplɔ́n ye mɛ ɖevo lɛ é kpo. Nú mǐ wà mɔ̌ ɔ, mǐ na ɖó ayixa mímɛ́ ɖé, gbɛ̀ mǐtɔn na ɖó nu, bɔ mǐ na lɛ́ mɔ awǎjijɛ e ɖò alɔ didó mɛ ɖevo lɛ bonu ye na tuùn Jehovah mɛ é. w20.09 30 akpá. 16-19

A ko bló baptɛm à? Enyi mɔ̌ wɛ ɔ, a ko ɖè nǔ e a ɖi nú Jehovah é xlɛ́ ɖò agbawungba, bo lɛ́ ɖexlɛ́ ɖɔ emi jló na sɛn ɛ xá tutoblonunu tɔn. Égbé ɔ, Jehovah nɔ xlɛ́ ali tutoblonunu tɔn ɖò ali ɖé nu bɔ é nɔ ɖè mɛ alɔkpa e é nyí é, linlin tɔn, kpo nǔgbododó tɔn lɛ kpo xlɛ́. Ð’ayi jijɔ Jehovah tɔn e tutoblonunu tɔn nɔ ɖexlɛ́ é atɔn wu. Nukɔntɔn ɔ, ‘Mawu nɔ ɖè mɛɖé ɖó vo ɖò mɛɖé mɛ ǎ.’ (Mɛ. 10:34) Wanyiyi sísɛ́ Jehovah bɔ é sɔ́ Vǐ tɔn jó dó “xɔ gbɛ̀ nú mɛ bǐ.” (1 Tim. 2:6; Jaan 3:16) Jehovah nɔ zán togun tɔn bɔ é nɔ jlá wɛnɖagbe ɔ mɛ e jló na ɖótó lɛ é bǐ, bɔ mɔ̌ mɛ ɔ, ali na hun nú mɛ gegě bɔ ye na ɖu lè gbɛxixɔ ɔ tɔn. Wegɔ́ ɔ, Jehovah nyí Mawu e nɔ nɔ tuto jí, bo nɔ lɛ́ nɔ fífá mɛ é ɖé. (1 Kɔ. 14:33, 40, nwt) Enɛ wu ɔ, mǐ ɖó na ɖó nukún ɖɔ mɛsɛntɔ́ tɔn lɛ na nɔ tuto jí, bo na lɛ́ nɔ fífá mɛ dó sɛn ɛ. Atɔngɔ́ ɔ, Jehovah wɛ nyí “Mɛ̌si Ðaxó” ɔ. (Eza. 30:21, nwt) Nǔ e wu tutoblonunu tɔn nɔ w’azɔ̌ syɛnsyɛn dó kplɔ́n Xó tɔn Biblu ɔ mɛ ɖevo lɛ ɖò agun ɔ kpo sinsɛnzɔ́ ɔ kpo mɛ é nɛ. w20.10 20 akpá. 1-3