août

Jezu ná ko ɖo gesí dó sɔ́ja Hlɔ̌ma tɔn ɖěɖěe xwe hǔnjɛ́n dó alɔ tɔn lɛ́ kpó afɔ tɔn lɛ́ kpó mɛ lɛ́ é wɛ. Jezu lɔn bónú nǔagɔwaxámɛ e sín wǔvɛ́ se wɛ é ɖe é zɔ́n bónú é sin xomɛ, alǒ hɛn mɛ dó xomɛ ǎ. (1 Pi. 2:23) Jezu ɖɔhun ɔ, mǐ ɖó ná sɔ́ jlǒ dó sɔ́ hwɛ kɛ mɛ ɖěvo lɛ́. (Koló. 3:13) Mɛɖé lɛ́, káká jɛ hɛ̌nnumɔ mǐtɔn lɛ́ jí sixú klán gbe xá mǐ ɖó yě mɔ nǔ jɛ nǔ e mǐ ɖi nǔ ná lɛ́ é kpó lěe mǐ nɔ zán gbɛ gbɔn é kpó mɛ ǎ wútu. Yě sixú ɖ’adingban dó mǐ kɔ, dó winnyá mǐ ɖo mɛ ɖěvo lɛ́ nukɔn, vún wěma mǐtɔn lɛ́, alǒ tlɛ gblɔ́n adǎn nú mǐ ɖɔ yě ná xo dǎka mǐ wú. Mǐ ɖó ná hɛn mɛ dó xomɛ ǎ, é nyɔ́ wa ɔ, mǐ sixú byɔ́ Jexóva ɖɔ é ní d’alɔ mɛ ɖěɖěe klán gbe xá mǐ lɛ́ é bónú yě ná yí nǔgbó ɔ. (Mat. 5:44, 45) Hweɖélɛ́nu ɔ, é sixú vɛ́ wǔ nú mǐ tawun bɔ mǐ ná sɔ́ hwɛ kɛ mɛ, tají ɔ, ényí è wa nǔ agɔ syɛ́nsyɛ́n ɖé xá mǐ ɔ nɛ́. Amɔ̌, ényí mǐ ná tɛn xomɛsin alǒ mɛhɛndóxomɛ bónú é dó ɖɔ do ɖo ayi mǐtɔn mɛ ɔ, mǐ ná wa nǔ dó mǐɖée wú. (Ðɛh. 37:8) Ényí mǐ wá gbeta ɔ kɔn bo sɔ́ hwɛ kɛ mɛ ɔ, énɛ́ xlɛ́ ɖɔ mǐ kún ba ɖɔ nǔ nyanya e xá mǐ lɛ́ é ní zɔ́n bónú mǐ ní lɛ́ kpo ɖo xomɛsin wɛ ó.—Efɛ́. 4:31, 32. w21.04 8-9 akpá. 3-4

È ɖe mɛ vívɛ́ná towe ɖé sín agun mɛ wɛ a? É nɔ ɖó wǔvɛ́ nú mɛ tawun! Hwenu e wɛnsagun e ɖo xwédo Jexóva tɔn mɛ é ɖé lɛ́ jó Jexóva dó é ɔ, dǒ nukún lě do é ná ko vɛ́ n’i sɔ é mɛ kpɔ́n! (Ju. 6) Bo lɛ́ dó nukún lěe xomɛ ná ko sin i sɔ é mɛ kpɔ́n, hwenu e Izlayɛ́li-ví e é yí wǎn ná lɛ́ é fɔ́n gǔ dó jǐ tɔn azɔn mɔ̌kpán é. (Ðɛh. 78:41) A sixú ɖeji ɖɔ ényí mɛvívɛ́ towe ɖé jó Tɔ́ mǐtɔn jǐxwé tɔn wǎnyíyínɔ ɔ dó ɔ, é nɔ lɛ́ vɛ́ n’i tawun. É mɔ nǔ jɛ wǔvɛ́ e mɛ a ɖe é wú. É ná dó wǔsyɛ́n lanmɛ nú we, bo lɛ́ nɔ gǔdo nú we dó kú nǔbláwǔ nú we. Ényí vǐ súnnu alǒ vǐ nyɔ̌nu vívɛ́ ɖé jó Jexóva dó ɔ, hwɛhwɛ wɛ mɛjitɔ́ lɛ́ nɔ kan nǔ e yě sixú ko wa hú gǎn bo ná d’alɔ vǐ ɔ bɔ é ná kpo ɖo Jexóva sɛn wɛ é byɔ́ yěɖée. Nɔví súnnu ɖé ɖɔ: “Un dó hwɛ nyiɖée. Un tlɛ nɔ kú dlɔ̌ nyanya lɛ́ dó ninɔmɛ ɔ wú.” Nɔví nyɔ̌nu ɖé gbɔn ninɔmɛ mɔ̌hun mɛ, bɔ hwɛhwɛ ɔ, é nɔ lin nǔ gbɔn lě: “Étɛ́ un ka wa nyi do? É nɔ cí nú mì ɖɔ un kún kplɔ́n nǔgbó ɔ vǐ ce ganjí ó.” w21.09 26-27 akpá. 1-2, 4

Mɛɖé lɛ́ nɔ lin ɖɔ togun Jexóva tɔn kún sixú kplɔ́n nǔ mɛ dó Biblu wú ó, ɖó yě kún yi wěmaxɔmɛ sinsɛn tɔn nukúnɖéjí lɛ́ ó. Amɔ̌ yě ɖó ná nɔ gbéjé xó lɛ́ kpɔ́n ganjí. Nǔ énɛ́ wɛ Wɛnɖagbe-Wéma wlántɔ́ Luki dó gǎn bo wa. É w’azɔ̌ syɛ́nsyɛ́n bo ba do nú “nǔ énɛ́ lɛ́ bǐ céɖécéɖé sín bǐbɛ́mɛ yětɔn.” É ba ɖɔ mɛ e ná xa nǔ e émí wlán lɛ́ é ní “tuun nǔgbó ɔ” dó nǔ e yě se dó Jezu wú lɛ́ é wú. (Luk. 1:1-4) Luki ɖɔhun wɛ Jwifu ɖěɖěe ɖo toxo Belée hwexónu tɔn ɔ mɛ lɛ́ é cí. Ée yě se wɛn ɖagbe ɔ dó Jezu wú azɔn nukɔntɔn ɔ é ɔ, yě kíjé Akpáxwé Biblu Tɔn E È Wlán Dó Ebléegbe Mɛ é, bo ná dó kú d’é jí ɖɔ nǔ e è ɖɔ nú émí lɛ́ é sɔgbe. (Mɛ. 17:11) Ðo ali ɖokpó ɔ nu ɖo égbé ɔ, mɛ lɛ́ lɔ ɖó ná nɔ gbéjé nǔ lɛ́ kpɔ́n. Yě ɖó ná nɔ jlɛ́ nǔ e togun Mawu tɔn ɖɔ nú yě é dó Mawuxówéma ɔ wú. Yě ɖó ná nɔ lɛ́ kplɔ́n nǔ dó nǔ e togun Jexóva tɔn wa égbé lɛ́ é wú. Ényí yě nɔ gbéjé nǔ e ko jɛ wá yi lɛ́ é kpɔ́n ganjí ɔ, yě ná lɔn nú linlin masɔgbe lɛ́, alǒ yěɖɔyěɖɔ lɛ́ ná va nukún nú yě ǎ. w21.05 3 akpá. 7-8

Mɛɖé ka ɖo agun towe mɛ bɔ a sixú yí jǒnɔ tɔn a? É sixú wá jɛ hweɖélɛ́nu bɔ klisánwun hǎtɔ́ lɛ́ ná ba tawun ɖɔ mǐ ní zán hwenu ɖó kpɔ́ xá yě. É sixú vɛ́ wǔ nú mɛɖé lɛ́ bɔ yě ná nɔ kpɔ́ xá mɛ e ɖo xwédo yětɔn mɛ bo ma ɖi nǔ ǎ lɛ́ é ɖo xweɖuɖu lɛ́ hwenu. Wǔ sixú kú mɛɖé lɛ́ tawun ɖo azǎn ɖé lɛ́ jí, ɖi xwe kpé xwe nu kú mɛvívɛ́ ɖé tɔn tɔn. Ényí mǐ nɔ zán hwenu ɖó kpɔ́ xá nɔví súnnu kpó nɔví nyɔ̌nu kpó mǐtɔn e ɖo ninɔmɛ mɔ̌hun lɛ́ mɛ lɛ́ é ɔ, mǐ nɔ xlɛ́ yě ɖɔ ‘nǔ yětɔn ɖo ayi mɛ nú mǐ titewungbe.’ (Filí. 2:20) Nǔ gěgé wɛ sixú zɔ́n bɔ klisánwun ɖé mɔ ɖɔ émí ɖo émíɖokpó hweɖélɛ́nu. Amɔ̌, mǐ ɖó ná hɛn dó ayi mɛ ɖɔ Jexóva nɔ tuun lěe nǔ nɔ cí nú mǐ é hlɛ́nhlɛ́n. É nɔ sú nǔ e sín hudó mǐ ɖó lɛ́ é sín do, bo nɔ wa mɔ̌ hwɛhwɛ gbɔn klisánwun hǎtɔ́ lɛ́ gblamɛ. (Mat. 12:48-50) Gɔ́ ná ɔ, ényí mǐ nɔ wa nǔ e wú mǐ kpé é bo nɔ nɔ gǔdo nú xwédo gbigbɔ tɔn mǐtɔn ɔ, mǐ nɔ xlɛ́ Jexóva ɖɔ tuto wǎnyíyí tɔn énɛ́ e é sɔ́ ɖ’ayǐ é su nukún mǐtɔn mɛ. Ényí nǔ ná bo tlɛ cí gbɔn ɖěbǔ nú mǐ hweɖélɛ́nu ɔ, mǐ tuun ɖɔ mǐ kún ɖo mǐɖokpó ó, ɖó Jexóva ɖo akpá mǐtɔn hwebǐnu! w21.06 13 akpá. 18-20

Jezu kpo ɖo linlin e sɔgbe é ɖó wɛ, bo nɔ lɛ́ jlá Mawuxó ɔ, é ná bo tlɛ nyí hwenu e mɛ lɛ́ gbɛ́ wɛn tɔn é ɔ nɛ. Aniwú? É tuun lě do mɛ lɛ́ ɖó hudó nǔgbó ɔ tɔn sɔ é, bo jló ná dó wɛn Axɔ́súɖuto ɔ tɔn mɛ gěgé lěe é kpé wú gbɔn é. É lɛ́ tuun ɖɔ mɛ e gbɛ́ wɛn ɔ ɖo bǐbɛ́mɛ é ɖé lɛ́ ná wá yí wɛn ɔ ɖo nukɔnmɛ. Ðǒ ayi nǔ e jɛ ɖo xwédo éɖésú tɔn mɛ é wú. Ðo xwe atɔn adaɖé e Jezu zán dó ɖɔ Mawuxó ná lɛ́ é mɛ ɔ, nɔví tɔn ɖokpó lě húzú ahwanvú tɔn ǎ. (Jaan 7:5) Amɔ̌, ɖo fínfɔ́n sín kú tɔn gúdo ɔ, yě húzú klisánwun. (Mɛ. 1:14) Mǐ tuun mɛ e ná wá sɛn Jexóva lɛ́ é ǎ. Mɛɖé lɛ́ nɔ yá wǔ yí wɛn mǐtɔn, mɛ ɖěvo lɛ́ ka nɔ wa mɔ̌ ǎ. Mɛ ɖěɖěe ma tlɛ nɔ ba ná se xó mǐtɔn ǎ lɛ́ é nɔ ɖó ayi walɔ ɖagbe kpó linlin ɖagbe e mǐ ɖó é kpó wú, bo sixú wá ‘jɛ susu kpa nú Mawu jí.’ w21.05 18 akpá. 17-18

Hwenu e Jezu ɖo ayǐkúngban jí é ɔ, é zɔ́n azɔ̌ weɖobǔ ɖé ahwanvú tɔn lɛ́. É ɖɔ nú yě ɖɔ yě ní jlá wɛn ɖagbe Axɔ́súɖuto ɔ tɔn mɛ lɛ́, bo lɛ́ xlɛ́ yě lěe yě ná wa mɔ̌ gbɔn é. (Luk. 8:1) Ði kpɔ́ndéwú ɔ, Jezu sɔ́ nǔ nú ahwanvú tɔn lɛ́ nú lěe yě ná wa nǔ gbɔn hwenu e mɛ lɛ́ ná yí wɛn Axɔ́súɖuto ɔ tɔn, alǒ gbɔ é. (Luk. 9:2-5) Hwenu e é ɖɔ ɖɔ wɛn ɖagbe ɔ ná nyí “kúnnuɖiɖe nú gbɛtɔ́ lɛ́ bǐ” é ɔ, ɖiɖɔ ɖ’ayǐ wɛ é ɖe ɖɔ ahwanvú émítɔn lɛ́ ná jlá wɛn ɔ mɛ gěgé gbɔn fí gěgé. (Mat. 24:14; Mɛ. 1:8) Gɔ́ ná ɔ, é ɖɔ nú yě ɖɔ yě ní kplɔ́n nǔ mɛ e sixú wá húzú ahwanvú sɔ lɛ́ é bónú yě ní se tónú nú nǔ e émí kplɔ́n yě lɛ́ é bǐ. Jezu ɖe xlɛ́ ɖɔ azɔ̌ gbɛhwlɛ́ngán tɔn énɛ́ ná vunkan káká jɛ égbé; énɛ́ wɛ nyí “káká yi jɛ gbe e gbe gbɛ ɔ ná vɔ dó é.” (Mat. 28:18-20) Nukɔnmɛ ɖo nǔ e Jezu ɖe xlɛ́ Jaan é mɛ ɔ, é xlɛ́ nyi wɛn ɖɔ émí ɖo nukún ɖó wɛ ɖɔ ahwanvú émítɔn lɛ́ bǐ ní d’alɔ mɛ ɖěvo lɛ́ bónú yě ná kplɔ́n nǔ dó Jexóva wú.—Nǔɖe. 22:17. w21.07 2-3 akpá. 3-4

Égbé ɔ, agbahwlɛnhwlɛ́n nɔ sísɛ́ mɛ gěgé bɔ yě nɔ húzú cejɛ́nnábínɔ. Ajɔ̌watɔ́ ɖé sixú zán ayi wínníwínní lɛ́ dó jɛ nukɔn nú mɛ e kpó é kpó ɖo agba hwlɛ́n wɛ lɛ́ é. Lɔ̌nyijǐ-fɔnkan-yihúndatɔ́ ɖé tlɛ sixú sɔ́ jlǒ dó gblé wǔ lɔ̌nyijǐ-fɔnkan-yihúndatɔ́ e ɖo gbɛ̌ta ɖěvo mɛ é bá dó ɖu ɖ’é jí. Wěmaxɔmɛví e ɖo tɛ́nkpɔ́n ɖé bló wɛ, bónú è na yí i dó wěmaxɔmɛ ɖaxó ɖé é sixú fin nǔ kpɔ́n ɖo tɛ́nkpɔ́n ɔ hwenu. Ðó mǐ nyí klisánwun wútu ɔ, mǐ tuun ɖɔ zǐnzán mɔ̌hun lɛ́ kún sɔgbe ó; akpáxwé “nǔ nyanya e gbɛtɔ́ nɔ wa lɛ́” é tɔn ɖé wɛ. (Ga. 5:19-21) É ɖo mɔ̌ có, é ka sixú jɛ bɔ mɛsɛntɔ́ Jexóva tɔn ɖé lɛ́ sixú ɖó linlin agbahwlɛnhwlɛ́n tɔn ɖo agun ɔ mɛ cóbó ka dɛ́ɛn a? Nǔkanbyɔ́ tají ɖé wɛ, ɖó linlin agbahwlɛnhwlɛ́n tɔn sixú wa nǔ dó bǔninɔ kplékplé nɔví lɛ́ tɔn mǐtɔn tɔn wú. Nǔ ɖagbe wɛ é nyí ɖɔ mǐ ní lɛ́ gbéjé kpɔ́ndéwú súnnu kpó nyɔ̌nu kpó gbejínɔtɔ́ e xó Biblu ɖɔ, bɔ yě ma yí gbe bɔ linlin agbahwlɛnhwlɛ́n tɔn wa nǔ dó yě wú ǎ é ɖé lɛ́ tɔn kpɔ́n. w21.07 14 akpá. 1-2

Xomɛnyínyɔ́ nɔ sísɛ́ mǐ bɔ mǐ nɔ nyɔ́ xomɛ dó mɛ ɖěɖěe awakanmɛ kú lɛ́ é wú. Égbé ɔ, nɔví súnnu lɛ́ kpó nɔví nyɔ̌nu lɛ́ kpó gěgé nɔ nɔ gǔdo nú mɛ ɖěɖěe ɖo agun ɔ mɛ, bɔ awakanmɛ kú yě lɛ́ é kpó xomɛnyínyɔ́ kpó. Yě yí wǎn nú nɔví súnnu kpó nɔví nyɔ̌nu kpó yětɔn lɛ́ bǐ, bɔ akpakpa nɔ lɛ́ sɔ́ yě bónú yě ná wa nǔ e wú yě kpé lɛ́ é bǐ dó d’alɔ yě. (Nǔx. 12:25; 24:10) Énɛ́ sɔgbe xá wǔsyɛ́n dó lanmɛ nú mɛ xó Mɛsɛ́dó Pɔ́lu tɔn élɔ́: “Mi ɖɔ xó e ná dó gbɔ nú mɛ lɛ́ é nú mɛ ɖěɖěe awakanmɛ kú lɛ́ é, mi nɔ gǔdo nú mɛ e ma ɖó gǎn ǎ lɛ́ é, mi ɖó suúlu dó mɛ bǐ wú.” (1 Tɛ. 5:14, nwt) Hwɛhwɛ ɔ, tó ɖíɖó nɔví súnnu kpó nɔví nyɔ̌nu kpó e awakanmɛ kú é ɖé kpódó gǎnjɛwú níná ɛ ɖɔ émí yí wǎn n’i kpó nyí ali ɖagbe hú gǎn e nu a sixú d’alɔ ɛ ɖe bɔ é ná kpa we é. Gǎn e dó wɛ a ɖe bo ná d’alɔ lɛ̌ngbɔ́ Jexóva tɔn ɖé é nɔ su nukún tɔn mɛ. Eblée lɛ́ 6:10 ɖɔ: “Mawu nɔ dó hwɛ agɔ ǎ; é ná wɔn . . . Wǎnyíyí e mi ɖe xlɛ́ ɛ” é ǎ. w21.11 10 akpá. 11-12

Étɛ́ mǐ ka sixú wa din, bo ná dó sɔ́ nǔ ɖ’ayǐ nú sɔgúdo? Nǔ e mǐ ɖó é ɖó ná nɔ kpé mǐ, bɔ kancícá e mǐ ɖó xá Jexóva é wɛ ɖó ná nyí nǔ e nɔ dó awǎjijɛ nú mǐ hú gǎn é. Bǎ e mɛ mǐ tuun Mawu mǐtɔn ganjí yi ɖó é ɔ, bǎ énɛ́ mɛ wɛ mǐ ná kúdéjí ɖɔ, é ɖó nǔwúkpíkpé e ná nya xɛ ɖo mǐ jí, hwenu e Gɔ̌gu Magɔ́gi tɔn ná wá tɔ́n ahwan mǐ é yi ɖó. Xó e ɖo tɛ́si égbé tɔn mɛ lɛ́ é xlɛ́ nǔ e wú Davídi tuun ɖɔ émí sixú gán jɛ alɔdó Jexóva tɔn wú é. Hwɛhwɛ wɛ Davídi nɔ gán jɛ Jexóva wú, bɔ Mawu tɔn ka flú i kpɔ́n ǎ. Hwenu e Davídi ɖo wǐnnyáwínnyá mɛ é ɔ, é kpé hun xá nya jinganjingan e nɔ nyí Goliyáti, bo nyí Filisitɛ́ɛn ɖé é, bo ɖɔ xó agbɔ̌nnɔ élɔ́ lɛ́ n’i: ‘Jexóva ná jó we nú mì égbé.’ (1 Sam. 17:46) Nukɔnmɛ, hwenu e Davídi jɛ azɔ̌ wa nú Sawúlu jí é ɔ, Sawúlu tɛ́n kpɔ́n azɔn mɔ̌kpán bo ná hu i. Amɔ̌, ‘Jexóva ɖo kpɔ́ xá’ Davídi. (1 Sam. 18:12) Ðó Davídi ko ɖu alɔdó Jexóva tɔn sín le wá yi wútu ɔ, é tuun ɖɔ É ná lɛ́ d’alɔ émí ɖo mɛtɛ́nkpɔ́n émítɔn din tɔn lɛ́ mɛ. w22.01 6-7 akpá. 14-15

Ðo nǔ e Jexóva nɔ wa lɛ́ é bǐ mɛ ɔ, é nɔ xwe sɔ bo nɔ zán hwenu e kpé é ɖ’é kɔn dó wa yi fó. bo ná dó sɔ́ nyǐkɔ tɔn su, lobo lɛ́ d’alɔ mɛ ɖěvo lɛ́ wú wɛ é nɔ wa mɔ̌. Ði kpɔ́ndéwú ɔ, mǐ ní kpɔ́n lěe Jexóva bló ayǐkúngban ɔ nú gbɛtɔ́ lɛ́ gbɔn kpɛɖé kpɛɖé é. Biblu tínmɛ lěe è bló è gbɔn é, bo ɖɔ ɖɔ é ‘ɖó dogbó lɛ́ ná’ bo sɔ́ ɛ ‘jínjɔ́n dotín tɔn lɛ́ jí,’ lobo “dó awǐnnya e ɖo tají ɔ do.” (Jɔb. 38:5, 6) É tlɛ lɛ́ ba hwenu bo lin tamɛ dó azɔ̌ e é wa lɛ́ é jí. (Bǐb. 1:10, 12) Dǒ nukún mɛ bo kpɔ́n lěe nǔ ná ko cí nú wɛnsagun lɛ́, hwenu e yě ná mɔ nǔ yɔ̌yɔ́ e dá wɛ Jexóva ɖe lɛ́ é é. Akpakpa ɖó ná ko sɔ́ yě tawun! Nǔ e wú é wá su hweɖénu bɔ wɛnsagun lɛ́ jɛ “xó sú [jí] kpó xomɛhunhun kpó” é nɛ́. Étɛ́ ka nyí nǔkplɔ́nmɛ ɔ? Xwe afatɔ́n mɔ̌kpán wɛ nǔɖíɖó lɛ́ dídá ɖu nú Jexóva, amɔ̌, hwenu e Jexóva kpɔ́n nǔ e é ko xwe sɔ bo dá lɛ́ é bǐ é ɔ, é ɖɔ ɖɔ “nǔ ɖagbe wɛ yě nyí tawun.”—Bǐb. 1:31. w21.08 9 akpá. 6-7

Ðo lǒ Jezu tɔn mɛ ɔ, nya ɖé xwe tomɛ. Cóbónú é ná yi ɔ, é ylɔ́ mɛsɛntɔ́ tɔn lɛ́ bo sɔ́ sikágankwɛ́ ɖé lɛ́ nú yě mɛ ɖokpó ɖokpó nú yě ná dó w’ajɔ̌ ná. Nya ɔ tuun nǔwúkpíkpé mɛsɛntɔ́ tɔn lɛ́ ɖokpó ɖokpó tɔn, énɛ́ wú ɔ, é sɔ́ sikágankwɛ́ atɔ́ɔ́n nú mɛ ɖě, we nú mɛ ɖěvo, bo sɔ́ ɖokpó nú mɛ atɔngɔ́ ɔ. Mɛsɛntɔ́ we nukɔntɔn lɛ́ w’azɔ̌ syɛ́nsyɛ́n, bɔ akwɛ́ e gǎn yětɔn zé nú yě é ji vǐ. Amɔ̌, mɛsɛntɔ́ atɔngɔ́ ɔ sɔ́ akwɛ tɔn dó wa nǔɖe ǎ, énɛ́ zɔ́n bɔ gǎn ɔ nya ɛ. Mɛsɛntɔ́ nukɔntɔn ɔ ɖɔhun ɔ, mɛsɛntɔ́ wegɔ́ ɔ wa nǔ e wú é kpé é bǐ bo kpé nukún dó nǔ e è sɔ́ d’así n’i é wú, bo w’azɔ̌ syɛ́nsyɛ́n dó sɛn gǎn tɔn. Wǎgbɔ tɔn ɔ, sikágankwɛ́ we e gǎn tɔn sɔ́ n’i é ji vǐ, bo húzú sikágankwɛ́ ɛnɛ. Gǎn ɔ d’ajɔ mɛsɛntɔ́ ɔ ɖó azɔ̌ syɛ́nsyɛ́n tɔn wú. Xomɛ hun gǎn ɔ tawun, b’ɛ lɛ́ dó azɔ̌ azɔ̌ jí nú mɛsɛntɔ́ ɔ. w21.08 21 akpá. 7; 22 akpá. 9-10

Jexóva xlɛ́ ɖɔ émí ɖó suúlu tawun ɖo azǎn gǔdogúdo tɔn élɔ́ lɛ́ mɛ. É ba ɖɔ mɛ ɖebǔ ní dɔn ǎ. (2 Pi. 3:9) É hun ali ɖé nú mɛ bǐ, bónú è ná húzú. Amɔ̌, suúlu tɔn ɖó dogbó. Mɛ ɖěɖěe gbɛ́ ali énɛ́ e é hun nú yě lɛ́ é ɔ, nǔ e gbo Falawɔ́ɔn ɖo Mɔyízi hwenu é ɖɔhun wɛ ná gbo yě. Jexóva ɖɔ nú Falawɔ́ɔn ɖɔ: “Nú un ko wa nǔ xá we, bo dɔn azɔn baɖabaɖa dó hwi kpó togun towe kpó tɛ́ntin din ɔ, mi bǐ ná kú sín ayǐkúngban ɔ jí. Loɔ, un jó we dó nyi gbɛ bo ná ɖe hlɔ̌nhlɔ́n ce xlɛ́ we, lobɔ nyǐkɔ ce ná gba kpé ayǐkúngban ɔ bǐ jí.” (Tín. 9:15, 16) Akɔta lɛ́ bǐ wɛ ná wá tuun ɖɔ Jexóva ɖokpó géé wɛ nyí Mawu nǔgbó ɔ. (Ezek. 38:23) Nǔ hunhún éé xó è ɖɔ ɖo tɛ́si égbé tɔn mɛ é ɔ, lěe é nyí gbɔn nú Falawɔ́ɔn é ɔ, kún e è ná sú dó nú mɛ ɖěɖěe gbɛ́ ɖɔ Jexóva kún ɖó acɛ, bo ná kpa acɛ ó bǐ mlɛ́mlɛ́ lɛ́ é dó gesí wɛ é ɖe. w21.09 18-19 akpá. 17-18

A ɖo wǔvɛ́ se wɛ ɖo ayi mɛ, ɖó è ɖe mɛvívɛ́ towe ɖé sín agun mɛ wútu wɛ a? Ényí mɛ ɖěɖěe ɖo agun ɔ mɛ é ɖé lɛ́ ka jɛ nǔ ɖěɖěe sixú zɔ́n bɔ a ná mɔ ɖɔ émí kún vó nǔɖé ó lɛ́ é ɖɔ jí ɔ, étɛ́ a ka sixú wa? É ɖo wɛn ɖɔ mǐ kún sixú ɖó nukún ɖɔ mɛ lɛ́ bǐ ní nɔ ɖɔ xó ɖagbe nú mǐ hwebǐnu ó. (Ja. 3:2) Hwɛhutɔ́ wɛ nú mǐ mɛ bǐ, énɛ́ wú ɔ, ényí mɛɖé lɛ́ ma tuun nǔ e yě ná ɖɔ é ǎ, alǒ tlɛ ɖɔ nǔ e ɖó wǔvɛ́ nú we lɛ́ é nú we ɖo manywɛ́ mɛ hǔn, ma nú é kpácá we ó. Nɔ flín wěɖexámɛ mɛsɛ́dó Pɔ́lu tɔn élɔ́: “Mi nɔ mɔ miɖée gbɔ; ényí mɛɖé wa nǔ nyi do nú mɛɖé ɖo mi mɛ hweɖěbǔnu hǔn, mi nɔ sɔ́ kɛ miɖée. Mi ɖó ná nɔ sɔ́ hwɛ kɛ miɖée lěe Aklúnɔ sɔ́ kɛ mi é ɖɔhun.” (Koló. 3:13) Kpo ɖo gǔdo nɔ nú mɛ ɖěvo e kpo ɖo gbejí ɖo xwédo ɔ mɛ lɛ́ é wɛ. Yě ɖó hudó wǎnyíyí kpó wǔsyɛ́n dó lanmɛ nú mɛ kpó tɔn towe din tawun hú ɖ’ayǐ tɔn. (Ebl. 10:24, 25) Hweɖélɛ́nu ɔ, mɛ ɖěvo e kpo ɖo xwédo e mɛ è ɖe mɛɖé sín agun mɛ ɖe lɛ́ é nɔ ɖ’ayi wú ɖɔ mɛɖé lɛ́ kún sɔ́ nɔ ɖɔ xó xá émí ɖo agun ɔ mɛ ó, cí nǔ ɖɔ è ɖe émí lɔ sín agun mɛ wɛ ɖɔhun. Mǐ ba ɖɔ nǔ ní cí mɔ̌ nú yě ǎ. Mǐ ɖó ná nɔ kpa mɛ wínnyáwínnyá ɖěɖěe mɛjitɔ́ yětɔn lɛ́ ma sɔ́ kpo ɖo Jexóva sɛn wɛ ǎ lɛ́ é, bo ná nɔ lɛ́ dó wǔsyɛ́n lanmɛ nú yě. w21.09 29 akpá. 13-14; 30 akpá. 16

Nú mɛ wínnyáwínnyá ɖé kpó mɛxómɔ ɖé kpó ɖo xó ɖɔ ɖó kpɔ́ wɛ ɔ, yě mɛ we lɛ́ bǐ wɛ é nɔ hɛn le wá ná. (Hlɔ̌. 1:12) Hwi mɛ wínnyáwínnyá ɔ ná ɖeji hú gǎn ɖɔ Jexóva nɔ kpé nukún dó togun tɔn wú, bɔ mɛxómɔ ɔ ná mɔ ɖɔ è wlí yɛ̌yi nú émí. Lěe Jexóva dó n’i gbɔn é ɖiɖɔ nú we ná víví n’i. Ðo kpaa mɛ ɔ, xwe ɖo xwe jí jɛ wɛ ɔ, ɖɛkpɛ wěxo tɔn nɔ wá cá, amɔ̌, mɛ ɖěɖěe ɖo gbejí nú Jexóva lɛ́ é nɔ ɖo ɖɛkpɛ nyɔ́ d’é jí wɛ ɖo nukún tɔn mɛ ɖo xwe lɛ́ vlamɛ. (1 Tɛ. 1:2, 3) Étɛ́wú énɛ́ ka nyí nǔgbó? Ðó ɖo xwe lɛ́ vlamɛ ɔ, yě jó yěɖée dó, bɔ gbigbɔ Mawu tɔn w’azɔ̌ ɖo yě wú, bɔ yě sɔ́ nǔ nú jijɔ ɖaaɖagbe gěgé. Bǎ e mɛ mǐ tɛ́n kpɔ́n bo tuun mɛxómɔ xɔ akwɛ́ mǐtɔn lɛ́, bo lɛ́ kplɔ́n nǔ ɖo yě gɔ̌n yi ɖó é ɔ, bǎ énɛ́ mɛ wɛ mǐ ná wlí yɛ̌yi nú yě, bo lɛ́ kpɔ́n yě dó mɔ dɔkun xɔ akwɛ́ lɛ́ yi ɖó! Ényí mɛxómɔ lɛ́ xɔ akwɛ́ ɖo mɛ wínnyáwínnyá lɛ́ nukúnmɛ, bɔ mɛ wínnyáwínnyá lɛ́ lɔmɔ̌ xɔ akwɛ́ ɖo mɛxómɔ lɛ́ nukúnmɛ ɔ, agun ɔ nɔ lí dǒ. w21.09 7 akpá. 15-18

Mǐ ɖó ná wa nǔ e wú mǐ kpé é bǐ bo ná nɔ syɛ́n nukún dó mɛɖé wú ǎ, loɔ, mǐ ní nɔ ‘nyɔ́ xomɛ’ alǒ kú nǔbláwǔ nú mɛ Mawu ɖɔhun. (Efɛ́. 2:4) Wǔvɛ́ kɛ́ɖɛ́ wɛ mɛ e nɔ kú nǔbláwǔ nú mɛ é ɖé nɔ se xá mɛ ǎ. Mɛ e nɔ kú nǔbláwǔ nú mɛ é nɔ wa nǔɖé lɛ́ dó d’alɔ mɛ ɖěvo lɛ́. Énɛ́ wú ɔ, mǐ mɛ bǐ sixú kpɔ́n ɖɔ mɛɖé ka ɖo xwédo mǐtɔn mɛ, agun mǐtɔn mɛ, alǒ kplékplé nɔví lɛ́ tɔn mǐtɔn mɛ bo ɖó hudó alɔdó tɔn a jí. É ɖo wɛn ɖɔ mǐ na mɔ ali e nu mǐ ná kú nǔbláwǔ nú mɛ ɖe lɛ́ é gěgé. Mɛɖé ka ɖó hudó gbɔdónúmɛ tɔn wɛ a? Mǐ ka sixú d’alɔ tawun tawun ɖé lɛ́ ɛ, vlafo gbɔn nǔɖuɖu hinhɛn yi jó n’i, alǒ nǔ ɖěvo lɛ́ wiwa n’i gblamɛ a? Bɔ́yá mɛ e è yí dó agun mɛ é ɖé ka ɖó hudó xɔ́ntɔn ɖagbe e ná dó wǔsyɛ́n lanmɛ n’i lɛ́ é tɔn wɛ a? Mǐ sixú lɛ́ jlá wɛn ɖagbe gbɔdónúmɛ tɔn mɛ ɖěvo lɛ́. (Jɔb. 29:12, 13; Hlɔ̌. 10:14, 15; Ja. 1:27) Ényí mǐ se ɖɔ mɛɖé lɛ́ ɖo hudó e xó mǐ ɖɔ wá yi lɛ́ é ɖě mɛ ɔ, mǐ ná kpɔ́n ɖɔ ali ɖé ka hun nú mǐ bɔ mǐ ná gbɔn yɛkan énɛ́ mɛ dó kú nǔbláwǔ nú yě a jí. Ényí mǐ nɔ kú nǔbláwǔ nú mɛ ɔ, xomɛ nɔ hun Tɔ́ mǐtɔn jixwé tɔn ɔ, ɖó é ‘nɔ nyɔ́ xomɛ’ alǒ kú nǔbláwǔ nú mɛ titewungbe! w21.10 13 akpá. 20-22

Ðo Ðɛhan 23gɔ́ ɔ mɛ ɔ, Davídi ɖɔ xó dó nǔ xɔ akwɛ e nɔ nɔ ayǐ káká sɔ́yi lɛ́ é wú, yě wɛ nyí nyɔ̌ná gbigbɔ tɔn wɔ̌búwɔ́bú e sín vǐví é ɖu, ɖó é sɔ́ Jexóva dó ɖó Lɛ̌ngbɔ́nyitɔ́ tɔn wútu lɛ́ é. Jexóva kplá Davídi “gbɔn ali ɖagbe jí,” bo nɔ gǔdo n’i kpó gbejínínɔ kpó ɖo hwenu ɖagbe lɛ́ kpó hwenu vɛ́ wǔ lɛ́ kpó mɛ. Davídi tuun ɖɔ hwenu e Jexóva ná ɖo émí kplá wɛ gbɔn “fí e ama zɔ́n ɖe” é, ɖo gbɛzán émítɔn mɛ é ɔ, tagba lɛ́ kún ná hán ó. Awakanmɛ sixú nɔ kú i hweɖélɛ́nu, cí nǔ ɖɔ é “ɖo tɔdo mɛ gbɔn wɛ ɖo ablu gɔngɔn mɛ” ɖɔhun; gɔ́ ná ɔ, kɛntɔ́ lɛ́ ná lɛ́ lɛ́lɛ̌ dó è. Amɔ̌, ɖó Jexóva wɛ nyí Lɛ̌ngbɔ́nyitɔ́ Davídi tɔn wútu ɔ, é ná “ɖi xɛsi nú nǔɖé ǎ.” Ali tɛ nu “nǔɖé” ma “hwedó” Davídi ɖe a? É ɖó nǔ e hudó è lɛ́ é bǐ bo ná dó kpo ɖo xɔ́ntɔn Jexóva tɔn nyí wɛ. Awǎjijɛ tɔn sín nǔ agbaza tɔn lɛ́ wú ǎ. Nǔ e Jexóva ná Davídi lɛ́ é kpé è. Nyɔ̌ná e Jexóva nɔ kɔn dó jǐ tɔn lɛ́ é kpó xɛ e é nɔ nya ɖo jǐ tɔn é kpó wɛ ɖo tají hú gǎn n’i. Xógbe Davídi tɔn lɛ́ d’alɔ mǐ bɔ mǐ mɔ nǔ jɛ nǔ e wú é ɖo tají ɖɔ mǐ ní ɖó linlin e sɔgbe é dó nǔ agbaza tɔn lɛ́ wú é mɛ. w22.01 3-4 akpá. 5-7

Mɛ e Kúnnuɖetɔ́ Jexóva tɔn bǐbɛ́mɛ tɔn lɛ́ ɖekúnnú ná lɛ́ é bǐ wɛ yí wɛn ɔ ǎ. Ði kpɔ́ndéwú ɔ, nú xwe gěgé ɔ, Nɔwée ‘ɖɔ lěe Mawu ba ɖɔ è ní zán gbɛ gbɔn é sín xó nú mɛ lɛ́.’ (2 Pi. 2:5) É ɖo wɛn ɖɔ, é ná ko ɖó nukún ɖɔ mɛ ɖěvo lɛ́ ná yí gbe nú wɛn émítɔn, amɔ̌, Jexóva ɖɔ nǔɖé n’i dó ali énɛ́ nu ǎ. É nyɔ́ wa ɔ, hwenu e Mawu ɖɔ nú Nɔwée ɖɔ é ní bló tɔjíhún ɖé é ɔ, é ɖɔ n’i ɖɔ: “A ná byɔ́ tɔjíhún ɔ mɛ, hwi kpó vǐ towe lɛ́ kpó, kpó asi towe kpó, kpódó vǐ towe lɛ́ sín asi lɛ́ kpó.” (Bǐb. 6:18) Gɔ́ ná ɔ, ényí Nɔwée lin tamɛ dó gblǒ e tɔjíhún e Mawu ɖɔ é ní bló é ɖó é jí, kpó nǔ e tɔjíhún ɔ sixú hɛn é kpó jí ɔ, é sixú mɔ nǔ jɛ wú ɖɔ mɛ káká ɖé kún ná yí wɛn émítɔn ó. (Bǐb. 6:15) Lěe mǐ ko tuun gbɔn é ɔ, mɛ ɖokpó vɔ́vɔ́ ɖótó Nɔwée ǎ. (Bǐb. 7:7) Jexóva mɔ ɖɔ Nɔwée hwe dó nǔ wú wɛ a? Ðěbǔ ǎ! Nú Jexóva ɔ, wɛnɖagbejíjlázɔ́ ɔ kpa Nɔwée, ɖó é bló nǔ e è zɔn ɛ é kpó gbejíninɔ kpó.—Bǐb. 6:22. w21.10 26-27 akpá. 10-11

Dǒ nukún lěe nǔ ná ko cí nú Hwliti hwenu e é se xó énɛ́ lɛ́ é mɛ kpɔ́n! Hwliti ko wa nǔ e wú é kpé é bǐ bo d’alɔ Nɔemíi. Hwliti ko y’avǐ xá ɛ, dó gbɔ n’i, bo lɛ́ nɔ kpɔ́ xá ɛ nú azǎn mɔ̌kpán. É wa nǔ énɛ́ lɛ́ bǐ có, Nɔemíi ɖɔ: ‘Jexóva ka kplá mì wá asígbá alɔgbá.’ Hwliti kpó Nɔemíi kpó ɖo kpɔ́ hwe ɔ nu có, xó énɛ́ lɛ́ e Nɔemíi ɖɔ é cí ɖɔ alɔ e dó è wɛ Hwliti ɖe é kún su nukún tɔn mɛ ó ɖɔhun. Kpɔ́n lěe énɛ́ ná ko vɛ́ nú Hwliti sɔ é! É ɖo mɔ̌ có, Hwliti ka jó Nɔemíi dó ǎ. (Hwliti 1:3-18) Égbé ɔ, mǐ sixú ko ɖo gǎn e wú mǐ kpé é bǐ dó wɛ bo ná d’alɔ nɔví nyɔ̌nu e ɖo aluwɛ mɛ é ɖé có, é sixú lɛ́ ɖɔ xó e ná d’akpɔ nú mǐ é ɖé nú mǐ. Amɔ̌, mǐ ɖó ná hɛn ɛ dó xomɛ ǎ. É nyɔ́ wa ɔ, mǐ ná kpo ɖo kpɔ́ xá nɔví nyɔ̌nu mǐtɔn e ɖo hudó mɛ é; bo lɛ́ byɔ́ Jexóva ɖɔ é ní d’alɔ mǐ bónú mǐ ná mɔ ali e nu mǐ ná dó gbɔ n’i ɖe é. (Nǔx. 17:17, nwt) Nɔví nyɔ̌nu e ɖo hudó mɛ é ɖé sixú gbɛ́ alɔdó mǐtɔn ɖo bǐbɛ́mɛ. É ɖo mɔ̌ có, xomɛnyínyɔ́ ná sísɛ́ mǐ bɔ mǐ ná wa nǔ e wú mǐ kpé é bǐ bo ná kpo ɖo alɔdó è wɛ.—Ga. 6:2. w21.11 11-12 akpá. 17-19

Ényí Biblu zán xógbe “mɛ mímɛ́,” alǒ xókwín “mǐmɛ́” ɔ, é nɔ xlɛ́ tawun ɖɔ è mɛ́ ɖo walɔ kpó Mawu sinsɛn kpó lixo. Xógbe ɔ sixú lɛ́ xlɛ́ ɖɔ è ɖe mɛɖé ɖó vo bónú é ná sɛn Mawu. Ðo xógbe ɖěvo mɛ ɔ, ényí mǐ ɖó walɔ ɖagbe, bo nɔ sɛn Jexóva lěe é ba gbɔn é, lobo lɛ́ ɖó kancícá mɛɖésúnɔ tɔn syɛ́nsyɛ́n ɖé xá ɛ ɔ, é ná nɔ kpɔ́n mǐ dó mɔ mɛ mímɛ́. Ðɔ e è ɖɔ ɖɔ mǐ sixú ɖó kancícá mɛɖésúnɔ tɔn ɖé xá Mawu mímɛ́ ɔ é kɔ́kɔ́ɖɔ́kɔ́ jí wǔ tawun, tají ɔ, ényí mǐ lin tamɛ dó nǔ e Biblu kplɔ́n mǐ dó mɛ mímɛ́ e Jexóva nyí é wú é jí ɔ nɛ́. Ali lɛ́ bǐ nu wɛ Jexóva mɛ́ ɖe. Nǔ e Selafɛ́ɛn éé nyí wɛnsagun ɖěɖěe sɛkpɔ́ axɔ́súzinkpo Jexóva tɔn lɛ́ é ɖɔ é nɛ́. Mɛɖé lɛ́ ɖo yě mɛ bo dó zǒgbe jí ɖɔ: ‘Mǐmɛ́, mǐmɛ́, mǐmɛ́ wɛ Jexóva Nǔbǐwúkpétɔ́ ɔ nyí.’ (Eza. 6:3) Nǔgbó ɔ, cóbónú wɛnsagun lɛ́ ná ɖó kancícá syɛ́nsyɛ́n ɖé xá Mawu mímɛ́ yětɔn ɔ, yěɖésúnɔ ɖó ná tó mɛ́ hwɛ̌, yě ka mɛ́ nǔgbó. w21.12 3 akpá. 4-5

Hwɛhwɛ ɔ, nǔ e nɔ ɖu ayi mɛ nú mɛ wínnyáwínnyá lɛ́ é wɛ nyí lěe yě ná zán gbɛ yětɔn ganjí gbɔn é. Ðo alɔ ɖěvo mɛ ɔ, mɛ̌si e nɔ ɖe wě xá mɛ lɛ́ é kpó hɛ̌nnumɔ yětɔn e ma nyí nǔɖitɔ́ ǎ lɛ́ é kpó sixú nɔ dó wǔsyɛ́n lanmɛ nú yě ɖɔ yě ní nya wěma kplɔ́nkplɔ́n ɖaxó ɖaxó lɛ́ gbé, énɛ́ ná zɔ́n bɔ yě ná ɖó azɔ̌ ɖagbe ɖé, bo ná nɔ ɖu akwɛ́ gěgé. Wěma kplɔ́nkplɔ́n alɔkpa énɛ́ ka sixú ɖu hwenu gěgé ɖo yě sí. Ðo alɔ ɖěvo mɛ ɔ, mɛjitɔ́ lɛ́ kpó xɔ́ntɔn e ɖo agun ɔ mɛ lɛ́ é kpó sixú nɔ dó wǔsyɛ́n lanmɛ nú mɛ wínnyáwínnyá lɛ́ ɖɔ yě ní zán gbɛ ɖo sinsɛnzɔ́ Jexóva tɔn mɛ. Étɛ́ ka sixú d’alɔ mɛ wínnyáwínnyá e yí wǎn nú Jexóva é ɖé, b’ɛ ná wá gbeta ɖagbe hú gǎn ɔ kɔn? Efɛ́zinu lɛ́ 5:15-17 xixa kpó tamɛ linlin d’é jí kpó ná d’alɔ ɛ. Ényí mɛ wínnyáwínnyá ɖé xa wěmafɔ énɛ́ lɛ́ gúdo ɔ, é sixú kanbyɔ́ éɖée ɖɔ: ‘Étɛ́ Jexóva ka ‘jló ɖɔ má wa’? Gbeta tɛ́ kɔn è ka sixú wá, b’ɛ ná dó xomɛhunhun n’i? Gbeta tɛ́ kɔn un ka ná wá, b’ɛ ná zɔ́n bɔ un ná zán hwenu ce ganjí hú gǎn?’ Flín ɖɔ, “hwenu e mǐ ɖe ɔ nyɔ́ ǎ,” bɔ gbɛ élɔ́ e nu kp’acɛ dó wɛ Satáan ɖe é ná wá vivɔnu zaanɖé din. w22.01 27 akpá. 5

Hwetɛ́nu Jaki ka húzú ahwanvú Jezu tɔn gbejínɔtɔ́ ɖé? Ée Jezu fɔ́n sín kú gúdo é ɔ, “é sɔ́ éɖée xlɛ́ Jaki, bo wá sɔ́ éɖée xlɛ́ mɛsɛ́dó lɛ́ bǐ.” (1 Kɔ. 15:7) Ée Jezu sɔ́ éɖée xlɛ́ Jaki gúdo é ɔ, Jaki wá gbeta ɔ kɔn bo ná húzú ahwanvú tɔn. Hwenu e mɛsɛ́dó lɛ́ ɖo te kpɔ́n gbigbɔ mímɛ́ e sín akpá è dó nú yě é ɖo xɔ ɖaxó ɖé mɛ ɖo Jeluzalɛ́mu é ɔ, Jaki lɔ ɖo fínɛ́. (Mɛ. 1:13, 14) Nukɔnmɛ ɔ, é víví nú Jaki ɖɔ é wá nɔ hǎgbɛ́ alixlɛ́mɛtɔ́ xwe kanweko nukɔntɔn ɔ tɔn mɛ. (Mɛ. 15:6, 13-22; Ga. 2:9) Gɔ́ ná ɔ, táan kléwún ɖé jɛ nukɔn nú xwe 62 H.M. tɔn ɔ, gbigbɔ mímɛ́ sɔ́ d’ayi mɛ n’i, bɔ é wlán wěma sɛ́dó klisánwun yí ami dó ɖe lɛ́. Mǐ lɔ ɖo wěma énɛ́ sín le ɖu wɛ ɖo égbé, nú mǐ ná bo tlɛ ɖó nukúnɖíɖó ayǐkúngban jí tɔn, alǒ jǐxwé tɔn ɔ nɛ́. (Ja. 1:1) Sɔgbe xá nǔ e hwenuxó-wlantɔ́ xwe kanweko nukɔntɔn ɔ tɔn e è nɔ ylɔ́ ɖɔ Josephus é ɖɔ é ɔ, Jwifu lɛ́ sín Vɔ̌sánúxwlémawutɔ́ Ðaxó e è nɔ ylɔ́ ɖɔ Ananiyási Kpɛví ɔ é wɛ ɖe gbe bɔ è hu Jaki. Jaki nɔ gbejí nú Jexóva káká jɛ hwenu e é fó gbɛzán tɔn ayǐkúngban jí tɔn ɔ é. w22.01 8 akpá. 3; 9 akpá. 5

Nǔ e tɛ́si égbé tɔn sixú kplɔ́n mǐ lɛ́ é ɖokpó wɛ nyí ɖɔ mǐ ɖó ná ɖó nukún ɖɔ Jexóva ná cyɔ́n alɔ mǐ jí, bɔ mǐ ná gɔn mɛtɛ́nkpɔ́n e ná tɛ́n nǔɖiɖi mǐtɔn kpɔ́n lɛ́ é mɔ ǎ. Lěe è tɛ́n Jezu kpɔ́n jɛ bǎ gǔdogúdo tɔn ɔ mɛ gbɔn é ɔ, mǐ lɔ ɖó ná ɖo gbesisɔmɛ bo ná xlɛ́ ɖɔ mǐ yí gbe bo ná nɔ gbejí káká jɛ kú, ényí é byɔ́ ɖó mɔ̌ ɔ nɛ́. (Mat. 16:24, 25) É ɖo mɔ̌ có, mǐ sixú ɖó gǎnjɛwú ɖɔ Mawu kún ná lɔn bónú è ná tɛ́n mǐ kpɔ́n zɛ nǔ e nu mǐ sixú dɛ ɖe é wú ó. (1 Kɔ. 10:13) Nǔ ɖěvo e mǐ kplɔ́n é wɛ nyí ɖɔ, Jezu ɖɔhun ɔ, mǐ lɔ sixú se wǔvɛ́ nǔagɔwaxámɛ tɔn. (1 Pi. 2:19, 20) Mɛ e nɔ klán gbe xá mǐ lɛ́ é nɔ wa mɔ̌, amɔ̌, é ka nyí ɖɔ mǐ wa nǔ nyanya wútu wɛ ǎ, loɔ, ɖó mǐ nyí gbɛ ɔ tɔn ǎ, bo nɔ lɛ́ ɖekúnnú nú nǔgbó ɔ wútu wɛ. (Jaan 17:14; 1 Pi. 4:15, 16) Jezu mɔ nukúnnú jɛ nǔ e wú Jexóva yí gbe bɔ é se wǔvɛ́ é wú. Amɔ̌, mɛsɛntɔ́ Jexóva tɔn gbejínɔtɔ́ ɖěvo e ɖo wǔvɛ́ se wɛ lɛ́ é nɔ kanbyɔ́ yěɖée hweɖélɛ́nu ɖɔ, étɛ́wú Jexóva ka yí gbe bɔ nǔɖé lɛ́ nɔ jɛ a jí. (Xab. 1:3) Mawu mǐtɔn nǔbláwǔkúnúmɛtɔ́ kpó suúluɖótɔ́ ɔ kpó nɔ mɔ nǔ jɛ mɛ ɖɔ é kún nyí nǔɖiɖi wɛ hwedó mɛ énɛ́ lɛ́ ó, loɔ, hudó gbɔ e éɖokpónɔ géé sixú dó nú yě é tɔn wɛ yě ɖó.—2 Kɔ. 1:3, 4. w21.04 11 akpá. 9-10

Jexóva ná yí gbe nú sɛn e sɛn ɛ wɛ mǐ ɖe é ényí é sɔgbe xá linlin tɔn, bɔ mǐ lɛ́ wa mɔ̌ kpó wǎnyíyí kpó, bɔ sísí lɛ́ ɖ’é kɔn ɔ nɛ́. Mǐ tuun ɖɔ é jɛxá ɖɔ è ní sɛn ɛ, bɔ mǐ ba ná sɛn ɛ ɖo ali ɖagbe hú gǎn ɔ nu. Ali e nu mǐ nɔ sɛn Jexóva ɖe é ɖokpo wɛ nyí ɖɛ xixo sɛ́dó è. Mawuxówéma ɔ jlɛ́ ɖɛ e mǐ nɔ xo lɛ́ é dó zǎlínkpɔ́n e è xwe sɔ bó sɔ́ nǔ ná, bɔ è nɔ xwlé Mawu ɖo Goxɔ ɔ mɛ, b’ɛ wá yá é ɔ, è wá xwlé è ɖo tɛ́npli ɔ mɛ é wú. Zǎlínkpɔ́n énɛ́ nɔ nyɔ́ Mawu nukún mɛ. Mɔ̌ ɖokpó ɔ, ényí mǐ ná bó tlɛ nɔ zán xógbe e bɔkun lɛ́ é dó xo ɖɛ sɛ́dó è ɔ, é nɔ se ɖɛ vívɛ́ mǐtɔn. (Nǔx. 15:8; Sɛ́n. 33:10) Ényí mǐ ɖe wǎnyíyí kpó nǔsumɛnukúnmɛ kpó mǐtɔn xlɛ́ Jexóva ɔ, xomɛ nɔ hun i tawun lɛ́ é. É nɔ ba ɖɔ mǐ ní ɖɔ nǔ e ɖo linkpɔ́n ɖó nú mǐ wɛ lɛ́ é, nǔ e ɖó nukún wɛ mǐ ɖe lɛ́ é kpó nǔjlómɛ mǐtɔn lɛ́ kpó nú émí. Cóbónú a ná xo ɖɛ sɛ́dó Jexóva hǔn, xwe sɔ, bó lin tamɛ dó nǔ e ná ɖɔ wɛ a ɖe lɛ́ é jí. Mɔ̌ wiwa ná zɔ́n bɔ a ná xwlé “zǎlínkpɔ́n” wǎnɖagbenɔ hú gǎn ɖé Tɔ́ towe jǐxwé tɔn ɔ. w22.03 20 akpá. 2; 21 akpá. 7

Mǐdɛɛ lɛ́ ná sixú ɖɔ mɛ e Jexóva ná kú nǔbláwǔ ná lɛ́ é kpó mɛ e é ma ná kú nǔbláwǔ ná ǎ lɛ́ é kpó ǎ. (Mat. 25:34, 41, 46) Mǐ ka ná kpé wú bó ɖeji dó hwɛɖiɖɔ Jexóva tɔn lɛ́ wú a, alǒ yě ná nyí afɔklɛ́nnú nú mǐ? É ɖo wɛn ɖɔ mǐ ɖó ná ná hlɔ̌nhlɔ́n jiɖe e mǐ ɖó dó Jexóva wú é din, bɔ énɛ́ ná zɔ́n bɔ mǐ ná ɖeji dó wǔ tɔn bǐ mlɛ́mlɛ́ ɖo sɔgúdo. Dǒ nukún lěe nǔ ná cí nú mǐ ɖo gbɛ yɔ̌yɔ́ Mawu tɔn mɛ é mɛ kpɔ́n. Sinsɛn nǔvú sɔ́ ná ɖe ǎ, bɔ ajɔ̌wiwa e mɛ nukúnkɛndídó ɖe lɛ́ é sín xó ná fó; mɔ̌ jɛ́n acɛkpikpa e nɔ kp’acɛ gannaganna nú mɛ lɛ́, bó nɔ lɛ́ xo dǎká yě wǔ lɛ́ é lɔ sín xó ná fó bǐ gbídígbídí gbɔn é nɛ́. Azɔn, kpikpo kpó kú e mɛ vívɛ́ná mǐtɔn lɛ́ nɔ kú é kpó ɖě sɔ́ ná tíin ǎ. Satáan kpó awǒvi tɔn lɛ́ kpó sɔ́ ná sixú kpé wú bó wa nǔ dó gbɛtɔ́ lɛ́ wú ǎ nú xwe afatɔ́n. Nǔ nyanya e yě dɔn kɔn nyi ayǐ ɖó gǔfínfɔ́n yětɔn wútu lɛ́ é ɖě sɔ́ ná tíin ǎ. (Nǔɖé. 20:2, 3) É ná su nukún mǐtɔn mɛ tawun ɖɔ mǐ ɖeji dó lěe Jexóva nɔ wa nǔ lɛ́ gbɔn é wú! w22.02 6-7 akpá. 16-17

Jezu nɔ ɖe afɔ nukɔntɔn ɔ bó nɔ xo fífá kan, bó nɔ lɛ́ dó wǔsyɛ́n lanmɛ nú mɛ ɖěvo lɛ́ ɖɔ yě ní dó hwɛ gbɔ. É kplɔ́n mɛ lɛ́ ɖɔ yě ɖó ná nɔ xo fífá kan xá nɔví yětɔn lɛ́, ényí yě ba ɖɔ Jexóva ní yí gbe nú sɛn e sɛn ɛ wɛ yě ɖe é ɔ nɛ́. (Mat. 5:23, 24) Gɔ́ ná ɔ, azɔn gěgé wɛ é d’alɔ mɛsɛ́dó tɔn lɛ́ bónú yě ná gɔn nǔ dɔn dó mɛ e ná nyí nǔɖaxó ɖo tɛ́ntin yětɔn é wú. (Luk. 9:46-48; 22:24-27) Bó ná dó nyí fífákanxotɔ́ ɔ, mǐ ɖó ná wa nǔ hú alɔ nyinyi nú tagba lɛ́ dindɔn nyi ayǐ kpowun. Mǐ ɖó ná nɔ ɖe afɔ nukɔntɔn ɔ bó xo fífá kan xá mɛ ɖěvo lɛ́, bó lɛ́ dó wǔsyɛ́n lanmɛ nú nɔví súnnu kpó nɔví nyɔ̌nu kpó mǐtɔn lɛ́, bɔ yě ná nɔ ɖe ɖɛ gbemanɔkpɔ́ yětɔn lɛ́. (Filí. 4:2, 3; Ja. 3:17, 18) Mǐ sixú kan byɔ́ mǐɖée ɖɔ: ‘Un ka nɔ ɖo gbesisɔmɛ bá xo fífá kan xá mɛ ɖěvo lɛ́ a? Ényí nɔví súnnu alǒ nɔví nyɔ̌nu ɖé dó xomɛsin xomɛ nú mì ɔ, un ka nɔ hɛn ɛ dó xomɛ wɛ a? Un nɔ ɖó nukún ɖɔ mɛ wegɔ́ ɔ ní ɖe afɔ nukɔntɔn ɔ bó xo fífá kan wɛ a, alǒ nyi wɛ nɔ ɖe afɔ nukɔntɔn ɔ, é ná bó tlɛ nyí ɖɔ é cí ɖɔ é wɛ dɔn tagba ɔ nyi ayǐ ɔ nɛ́?’ w22.03 10-11 akpá. 10-11

É ko lín tawun din bɔ Biblu ɖɔ ɖ’ayǐ ɖɔ mɛ e ɖo togun Mawu tɔn mɛ lɛ́ é ná zé “yěɖée jó kpó jlǒ kpó” bá sɛn Jexóva ɖo alixlɛ́mɛ Vǐ tɔn tɔn glɔ́. (Ðɛh. 110:3, nwt) É ɖo wɛn ɖɔ nǔɖɔɖayǐ énɛ́ ɖo jijɛnu wɛ ɖo égbé. Xwewú xwewú ɔ, mɛsɛntɔ́ Jexóva tɔn kanɖódónǔwútɔ́ lɛ́ nɔ zán ganxixo lǐvi mɔ̌kpán ɖo wɛnɖagbejíjlázɔ́ ɔ mɛ. Yě nɔ wa mɔ̌ kpó jlǒ kpó, kpó akwɛ́ yěɖésúnɔ tɔn lɛ́ kpó. Yě nɔ lɛ́ ba hwenu dó nɔ gǔdo nú nǔɖitɔ́ hǎtɔ́ yětɔn lɛ́ ɖo agbaza, lěe nǔ nɔ cí nǔ mɛ é kpó gbigbɔ kpó lixo. Mɛxó agun tɔn lɛ́ kpó devízɔ́watɔ́ sinsɛnzɔ́wiwa tɔn lɛ́ kpó nɔ zán ganxixo gěgé dó sɔ́ nǔ nú kplé lɛ́ sín akpáxwé lɛ́, lobo nɔ lɛ́ yi ba nɔví súnnu kpó nɔví nyɔ̌nu kpó yětɔn lɛ́ kpɔ́n, bó ná dó dó wǔsyɛ́n lanmɛ nú yě. Aniwú togun Mawu tɔn ka nɔ wa azɔ̌ tootóbú énɛ́ lɛ́? Wǎn e mǐ yí nú Jexóva kpó nɔzo mǐtɔn lɛ́ kpó é wú wɛ é nɔ sín. (Mat. 22:37-39) Jezu sɔ́ kpɔ́ndéwú tají ɖé ɖ’ayǐ, ɖó hudó mɛ ɖěvo lɛ́ tɔn nɔ ɖu ayi mɛ n’i. Mǐ ɖo nǔ e wú mǐ kpé é bǐ wa wɛ bá sɔ́ afɔ dó afɔdo tɔn lɛ́ mɛ. (Hlɔ̌. 15:1-3) Mɛ ɖěɖěe nɔ wa nǔ éɖɔhun lɛ́ é ná ɖu le gěgé. w22.02 20 akpá. 1-2

Ðo Izlayɛ́li ɔ, mɛ gěgé wɛ nɔ wa glezɔ́, bɔ azɔ̌watɔ́ ɖěɖěe yě nɔ yí dó gle mɛ lɛ́ é ɔ, è ɖó ná sú axɔ́ yě ɖo azɔ̌ gúdo ɖo gbadanu. Nú è ma sú akwɛ́ azɔ̌watɔ́ ɖé ɖo fífónu azǎn ɖé tɔn ǎ ɔ, é sixú gɔn akwɛ́ e sín hudó é ɖó bo ná ná nǔɖuɖu xwédo tɔn é mɔ. Jexóva tínmɛ ɖɔ: “É ɖó nǔɖe ǎ, bɔ énɛ́ mì kɔtán dó wɛ é ɖe.” (Sɛ́n. 24:14, 15; Mat. 20:8) Égbé ɔ, mɛ e è yí dó azɔ̌mɛ é gěgé wɛ è nɔ sú axɔ́ azɔn ɖokpó, alǒ we ɖo sun ɖokpó mɛ, é nɔ nyí gbe bǐ gbe ǎ. É ka ɖo mɔ̌ có, nǔgbódodó e ɖo Levíi-ví lɛ́ 19:13 mɛ é kpo ɖo nǔ ɖu wɛ. Mɛ e yí mɛ d’azɔ̌mɛ é ɖé lɛ́ nɔ ɖu le ɖo mɛ e yě yí d’azɔ̌mɛ é jí, ɖó yě nɔ sú axɔ́ e yě jɛxá é yě ǎ wútu. Yě tuun ɖɔ ényí émí ná bo tlɛ sú akwɛ́ kléwún ɖé azɔ̌watɔ́ énɛ́ lɛ́ ɔ, yě ná kpo ɖo azɔ̌ wa nú émí wɛ, ɖó yě kún ɖó ɖěwagbɔn ó. Ðo ali ɖé nu ɔ, mɛ énɛ́ lɛ́ e yí mɛ dó azɔ̌mɛ é ɖo ‘axɔ́ sú mɛ e yě yí dó azɔ̌mɛ lɛ́ é wɛ ǎ.’ Klisánwun e nɔ yí mɛ dó azɔ̌mɛ é ɖé ná ba ná hɛn xó énɛ́ ayi mɛ ganjí. w21.12 10 akpá. 9-10

Kpó nǔ e nu Jezu dɛ ɖe lɛ́ é bǐ kpó ɔ, kɔ ɖó ná ko xú i tawun. É ɖó hudó mɛɖé tɔn, b’ɛ ná ná ɛ sin b’ɛ ná nu. Jezu lin ɖɔ lěe nǔ cí nú émí é ɖiɖɔ nyí winnyánú ǎ, mǐ lɔ ka ɖó ná lin mɔ̌ ǎ. Mǐ nɔ ɖó hudó nǔ gěgé tɔn ɖo gbɛzán mǐtɔn mɛ, bɔ mǐ ka nɔ ba ná flán nú mɛɖé ǎ. Amɔ̌, ényí hwe ɔ nu su bónú mǐ ɖó hudó alɔdó tɔn ɔ, mǐ ɖó ná xo nǔ kpɔ́n cóbó byɔ́ ǎ. Ði kpɔ́ndéwú ɔ, ényí mǐ nyí mɛxómɔ, alǒ, ɖo azɔn jɛ wɛ ɔ, mǐ sixú ɖɔ nú xɔ́ntɔn ɖé ɖɔ é ní kplá mǐ yi cɔ́fu mɛ nú mǐ ná yi xwlé axi, alǒ, kplá mǐ yi dotóoxwé. Ényí awakanmɛ kú mǐ ɔ, mǐ sixú byɔ́ mɛxó agun tɔn ɖé, alǒ xɔ́ntɔn mǐtɔn klisánwun e zin é ɖé ɖɔ é ní ɖótó mǐ, alǒ ɖɔ “xó ɖagbe” e ná dó wǔsyɛ́n lanmɛ nú mǐ é ɖé nú mǐ. (Nǔx. 12:25) Mi nú mǐ ní nɔ flín ɖɔ nɔví mǐtɔn lɛ́ yí wǎn nú mǐ, bo jló ná d’alɔ mǐ ɖo “adǎngbomɛ hwenu.” (Nǔx. 17:17) Amɔ̌, yě sixú mɔ nǔ jɛ ayixa mǐtɔn mɛ ǎ. Ényí mǐ ma ɖɔ xó ɖě nú yě ǎ ɔ, yě sixú tuun nú mǐ ɖó hudó alɔdó tɔn kpó mǐ gbɔ kpó ǎ. w21.04 11-12 akpá. 11-12

Ényí ninɔmɛ mǐtɔn lɛ́ húzú ɔ, é nɔ vɛ́ wǔ nú mǐ mɛ gěgé. È byɔ́ mɛ ɖěɖěe ko wa sinsɛnzɔ́ hwebǐnu tɔn bǔnɔ ɖé nú xwe mɔ̌kpán é ɖé lɛ́ ɖɔ yě ní ɖó sinsɛnzɔ́ e wa wɛ yě ɖe é te. Mɛ ɖěvo lɛ́ jó wǔjɔmɛzɔ́ e yě yí wǎn ná tawun é ɖé dó, ɖó xwe yětɔn wútu. Ényí mǐɖésúnɔ jí wɛ nǔ mɔ̌hun lɛ́ ɖě jɛ dó ɔ, é sɔgbe ɖɔ awakanmɛ ní kú mǐ. Ényí mǐ nɔ tɛ́n kpɔ́n, bó nɔ ɖó linlin ɖokpó ɔ Jexóva ɖɔhun dó ninɔmɛ mǐtɔn wú ɔ, é nɔ bɔ wǔ nú mǐ hú gǎn, bɔ mǐ nɔ ɖí xwi xá hǔzúhúzú ɖé. É ɖo nǔ ɖaxó gěgé wa wɛ ɖo égbé, bɔ mǐ ɖó wǔjɔmɛ bǔnɔ ɔ bó ɖo azɔ̌ wa ɖó kpɔ́ xá ɛ wɛ. (1 Kɔ. 3:9) Wǎn e Jexóva yí nú mǐ é ná húzú ǎ. Énɛ́ wú ɔ, ényí hǔzúhúzú e tutoblónúnǔ ɔ bló é ɖé kúnkplá we tlɔlɔ hǔn, ma zán hwenu gěgé dó ɖo tamɛ lin dó nǔ e wú è bló hǔzúhúzú énɛ́ lɛ́ é bǐ jí wɛ ó. Ma nɔ ɖo tamɛ lin dó “gbɛ ɖ’ayǐ tɔn” ɔ jí wɛ gbɛmɛ ó, é nyɔ́ wa hǔn, byɔ̌ Jexóva ɖɔ é ní d’alɔ we bónú a ní mɔ ɖagbe e ɖo hǔzúhúzú ɔ mɛ é. (Nǔt. 7:10) Kpo ɖo linlin e sɔgbe é ɖó wɛ. Mɔ̌ mɛ ɔ, mǐ ná kpo ɖo awǎjijɛ ɖó wɛ, lobo ná lɛ́ kpo ɖo gbejí ényí ninɔmɛ mǐtɔn ná bó tlɛ húzú ɔ nɛ́. w22.03 17 akpá. 11-12

Mɛ̌ mɛ̌ e wú Jexóva ka nɔ nyɔ́ xomɛ dó? Biblu ɖɔ ɖɔ mǐ sixú yí wǎn nú nǔ gěgé, ɖi ‘glelilɛ,’ “gbɛɖuɖu,” “nǔtuuntuun” “nǔnywɛ́,” kpó nǔ ɖěvo lɛ́ kpó. (2 Tan 26:10; Nǔx. 12:1; 21:17; 29:3) É ɖo mɔ̌ có, è sixú nyɔ́ xomɛ dó nǔ ɖě wú zɛ gbɛtɔ́ lɛ́ kɛ́ɖɛ́ wú ǎ. Amɔ̌, mɛ lɛ́ bǐ wú wɛ Jexóva nɔ nyɔ́ xomɛ dó ǎ. É nyɔ́ wa ɔ, mɛ ɖěɖěe ɖó kancícá bǔnɔ ɖé xá ɛ lɛ́ é wú wɛ é nɔ nyɔ́ xomɛ dó. Mawu mǐtɔn nɔ nyɔ́ xomɛ dó xɔ́ntɔn tɔn lɛ́ wú. É ɖó linlin ɖaaɖagbe ɖé nú yě; é ná gɔn wǎn yí nú yě gbeɖé ǎ. Jexóva xlɛ́ ɖɔ émí yí wǎn nú gbɛtɔ́ lɛ́ bǐ. Jezu ɖɔ nú nya e nɔ nyí Nikodɛ́mu é ɖɔ: “Ðó Mawu yí wǎn nú gbɛtɔ́ sɔmɔ̌, bo sɔ́ Vǐɖokpónɔ tɔn jó, bónú mɛ e ná ɖi nǔ n’i lɛ́ ɖěbǔ ma dɔn ó; loɔ, yě bǐ ní mɔ gbɛ mavɔmavɔ.”—Jaan 3:1, 16; Mat. 5:44, 45. w21.11 2-3 akpá. 3, 6-7

Gbɛ élɔ́ mɛ ninɔ vɛ́ wǔ, bɔ é tlɛ sixú lɛ́ byɔ́ ɖɔ mǐ ní dɛ ɖo nǔ e vɛ́ wǔ tawun hú lě lɛ́ é nu ɖo sɔgúdo. (Mat. 24:21) Mǐ ɖo nukún ɖó hwenu e nǔ énɛ́ lɛ́ ɖě ma sɔ́ ná tíin ǎ é wɛ. Mǐ ná wɔn yě; yě sɔ́ ná tíin gbeɖé ǎ. (Eza. 65:16, 17) É ɖo wɛn, mǐ ɖó ná kpo ɖo nǔ kplɔ́n wɛ, bá dó dɛ hú gǎn. Aniwú? Ðó Jezu ɖɔ: “Ényí mi . . . dɛ ɖo ya énɛ́ lɛ́ nu ɔ, Mawu ná hwlɛ́n mi gán.” (Luk. 21:19) Tamɛ linlin dó lěe mɛ ɖěvo lɛ́ ɖo didɛ wɛ ɖo mɛtɛ́nkpɔ́n mǐtɔn ɖɔhun lɛ́ nu, bɔ é ɖo yě kpa wɛ gbɔn é jí sixú bló bɔ mǐ kpo ɖo didɛ wɛ. Mɛ̌ ka sɔ́ kpɔ́ndéwú didɛ tɔn ɖagbe hú gǎn ɔ ɖ’ayǐ? Jexóva Mawu wɛ. Xósin énɛ́ kpácá we wɛ a? Ényí a lin tamɛ d’é jí ɔ, é sɔ́ ná kpácá we ǎ. Awǒvi sín acɛ mɛ wɛ gbɛ élɔ́ ɖe. Énɛ́ wɛ zɔ́n bɔ tagba gěgé gɔ́ gbɛ ɔ mɛ. Jexóva ɖó hlɔ̌nhlɔ́n, bo sixú ɖó nǔ gbɛ élɔ́ nu ɖo cɛ́jú mɛ, amɔ̌, é ɖo te kpɔ́n hwenu ɖé ɖo sɔgúdo bo ná wa mɔ̌. (Hlɔ̌. 9:22) Din hwɛ̌ ɔ, Mawu mǐtɔn kpo ɖo didɛ wɛ káká bɔ hwenu e é ɖó dó é ná su. w21.07 8 akpá. 2-4