Juillet

Jexóva wɛ ná mǐ nǔwúkpíkpé e mǐ ɖó bo nɔ ɖɔ xó é. É ɖo mɔ̌ có, gbɛtɔ́ lɛ́ zán nǔwúkpíkpé e mǐ ɖó bo nɔ ɖɔ xó é nyi do ǎ. Satáan Awǒvi ɖ’adingban nú Ɛvu, bɔ adingban énɛ́ zɔ́n bɔ gbɛtɔ́ lɛ́ húzú hwɛhutɔ́. (Bǐb. 3:1-4) Hwenu e Adámu dó hwɛ Ɛvu, bo tlɛ lɛ́ dó hwɛ Jexóva ɖó nǔ e éɖésúnɔ wa nyi do lɛ́ é wútu é ɔ, ɖɛ̌ tɔn wɛ é zán nyi do mɔ̌. (Bǐb. 3:12) Kanyɛ́ɛ ɖó adingban nú Jexóva hwenu e é hu nɔví tɔn Abɛ́li gúdo é. (Bǐb. 4:9) Égbé ɔ, xó gblégblé lɛ́ nɔ gɔ́ fímu lɛ́ gěgé mɛ. Wěmaxɔmɛví lɛ́ nɔ se xó gblégblé lɛ́ ɖo wěmaxɔmɛ, bɔ mɛxó lɛ́ lɔ nɔ se xó mɔ̌hun lɛ́ ɖo azɔ̌watɛn yětɔn lɛ́. Ényí mǐ ma cɔ́ mǐɖée ǎ ɔ, mǐ ná se xó gblégblé lɛ́ káká bɔ mǐɖésúnɔ ná jɛ ɖiɖɔ jí. É ɖo wɛn ɖɔ ɖó mǐ nyí Klisánwun wútu ɔ, mǐ ba ɖɔ nǔ mǐtɔn ní nyɔ́ nukún Jexóva tɔn mɛ, bɔ énɛ́ ka nɔ byɔ́ nǔ hú alɔ nyinyi nú xó gblégblé lɛ́ ɖiɖɔ kpowun. Mǐ ba ná zán nǔwúkpíkpé e mǐ ɖó bo nɔ ɖɔ xó é ɖo ali ɖagbe nu, dó kpa susu nú Mawu. w22.04 4-5 akpá. 1-3

Jezu ɖó linlin e ɖo jlɛ̌ jí é dó nǔ agbaza tɔn lɛ́ wú. É nɔ ɖu nǔ bo nɔ lɛ́ nu ahan. (Luk. 19:2, 6, 7) Ðo nǔwiwa ɖé hwenu ɔ, é bló vɛ̌ɛn ɖagbe hú gǎn ɖé; nǔjíwǔ tɔn nukɔntɔn ɔ nɛ́. (Jaan 2:10, 11) Gɔ́ ná ɔ, gbe e gbe é kú é ɔ, awu axivɛ́nú ɖé mɛ wɛ é ɖe. (Jaan 19:23, 24) Amɔ̌, Jezu jó nǔ agbaza tɔn lɛ́ dó bonú yě húzú nǔ tají hú gǎn ɔ ɖo gbɛzán tɔn mɛ ǎ. Jezu kplɔ́n mɛ ɖɔ ényí mǐ ba Axɔ́súɖuto ɔ jɛ nukɔn ɔ, Jexóva ná ná nǔ e hudó mǐ lɛ́ é mǐ. (Mat. 6:31-33) Mɛ gěgé ko ɖu wě e Jexóva ɖe xá mɛ dó akwɛ́ wú, bɔ nǔnywɛ́ kpé é sín le. Kpɔ́n kpɔ́ndéwú nɔví súnnu tlɛnnɔ e è nɔ ylɔ́ ɖɔ Daniel é tɔn. É ɖɔ: “Hwenu e un ɖo wǐnnyáwínnyá mɛ é ɔ, un wá gbeta ɔ kɔn bo ná sɔ́ Jexóva sinsɛn dó ɖó nǔ e ɖo tají hú gǎn é ɖo gbɛzán ce mɛ.” Ðó Daniel zán gbɛ e bɔkun é wútu ɔ, é kpé wú bo zán hwenu tɔn kpó nǔwúkpíkpé tɔn lɛ́ kpó ɖo azɔ̌ tutoblónúnǔ ɔ tɔn gěgé kɔn. É ɖɔ gɔ́ ná ɖɔ: “Jexóva ná mì awǎjijɛ tawun hú gǎn awǎjijɛ e akwɛ́ sixú hɛn wá nú mì é.” w22.05 21-22 akpá. 6-7

Ényí mǐ nɔ kplɔ́n Biblu kpó wěma mǐtɔn lɛ́ kpó hwɛhwɛ hǔn, xlɛ́xlɛ́ wɛ mǐ ɖe ɖɔ mǐ yí wǎn nú nǔgbó ɔ nɛ́. È ná ɖɔ ɔ, nú mǐ ná bo tlɛ ɖo nǔgbó ɔ mɛ bónú é ko lín ɔ, hwebǐnu wɛ mǐ ɖó ná kpo ɖo nǔ kplɔ́n d’é jí wɛ. Nǔkplɔ́nkplɔ́n nɔ d’ayihún ǎ, amɔ̌, gǎn e mǐ ná dó dó wa mɔ̌ é ná gú mǐ gbeɖé ǎ. Mǐ bǐ wɛ nɔ yí wǎn nú nǔxixa kpó nǔkplɔ́nkplɔ́n kpó ǎ. Amɔ̌, Jexóva byɔ́ mǐ ɖɔ mǐ ní “ba” nukúnnúmɔjɛnǔmɛ nǔgbó ɔ tɔn e gɔ́ngɔ́n é, bo lɛ́ “nya gbě tɔn” bá mɔ tɛn dó mɔ nǔ jɛ mɛ ganjí. (Nǔx. 2:4-6) Ényí mǐ ka dó gǎn mɔ̌hun ɔ, hwebǐnu wɛ mǐ nɔ ɖu le tɔn. Corey ɖɔ dó Biblu kplɔ́nkplɔ́n mɛɖésúnɔ tɔn tɔn wú ɖɔ émí nɔ sɔ́ ayi ɖó wěmafɔ ɖokpó ɖokpó jí sín hweɖénu jɛ hweɖénu. É tínmɛ ɖɔ: “Un nɔ xa tínmɛ e ɖo do lɛ́ é bǐ, kpɔ́n alɔdlɛ́ndónǔ ɖěvo e cá kan xá wěmafɔ ɔ lɛ́ é, bo nɔ lɛ́ ba do nú nǔ d’é jí. . . . Wlɛnwín nǔkplɔ́nkplɔ́n tɔn énɛ́ e un nɔ zán é hɛn le gěgé wá nú mì!” Ényí wlɛnwín énɛ́ alǒ ɖěvo wɛ mǐ nɔ zán, bo ka nɔ zán hwenu, lobo nɔ lɛ́ dó gǎn dó kplɔ́n nǔgbó ɔ ɔ, mǐ nɔ xlɛ́ ɖɔ é xɔ akwɛ́ ɖo nukún mǐtɔn mɛ.—Ðɛh. 1:1-3. w22.08 17 akpá. 13; 18-19 akpá. 15-16

Hwenu e Jezu ɖo ayǐkúngban jí é ɔ, é zán nǔɖíɖó lɛ́ dó kplɔ́n nǔ ahwanvú tɔn lɛ́ dó Tɔ́ tɔn wú. Mi nú mǐ ní kpɔ́n nǔ e é kplɔ́n mɛ lɛ́ é ɖokpó. Jexóva nɔ ɖe wǎnyíyí xlɛ́ mɛ lɛ́ bǐ. Ðo mawuxóɖiɖɔ só jí tɔn Jezu tɔn hwenu ɔ, é dɔn ayi ahwanvú tɔn lɛ́ tɔn wá hwe kpó jǐ kpó jí; nǔɖé lɛ́ wɛ bɔ mɛ gěgé nɔ lin tamɛ dó yě jí ǎ. Nǔ we énɛ́ lɛ́ bǐ wɛ ka ɖo tají cóbɔ mǐ ná sixú nɔ gbɛ. Jexóva hɛn ɔ, é ná tɛ nǔ énɛ́ lɛ́ mɛ ɖěɖěe ma nɔ sɛn ɛ ǎ lɛ́ é. Amɔ̌, wǎnyíyí nɔ sísɛ́ ɛ bɔ é nɔ bló bɔ hwesivɔ́ nɔ hun dó mɛ bǐ jí, bɔ jǐ nɔ lɛ́ ja nú mɛ bǐ. (Mat. 5:43-45) Jezu zán kpɔ́ndéwú énɛ́ dó kplɔ́n ahwanvú tɔn lɛ́ ɖɔ Jexóva ba ɖɔ mǐ ní yí wǎn nú mɛ bǐ. Hweɖébǔnu e mǐ ɖo hwe gba amizɛ́n ɖɛkpɛ ɖɛkpɛ ɖé kpɔ́n wɛ bo ɖo vǐví tɔn ɖu wɛ, alǒ mɔ bɔ jǐ ɖo jija wɛ cɛ́ncɛ́ncɛ́n bɔ gbɛ mɛ fá é ɔ, énɛ́ nɔ flín mǐ ɖɔ Jexóva kún nɔ ɖe mɛɖé ɖó vo ɖo mɛɖé mɛ ó. Kpɔ́ndéwú tɔn sixú sísɛ́ mǐ bɔ mǐ lɔ ná nɔ jlá wɛn ɖagbe ɔ mɛ lɛ́ bǐ dó xlɛ́ ɖɔ mǐ yí wǎn nú yě. w23.03 17 akpá. 9-10

Étɛ́ ka kpácá mɛsɛ́dó Jaan? Nyɔ̌nu ɖé ɖo gběkanlin vɔvɔ cɛ́cɛ́ ɖokpó jí. É cí “agalɛtɔ́ ɖaxó” ɖé ɖɔhun, bɔ è ylɔ́ ɛ ɖɔ “Babilɔ́nu ɖaxó ɔ.” É nɔ lɛ aga xá “axɔ́sú e ɖo ayǐkúngban jí lɛ́” é. (Nǔɖe. 17:1-5) Étɛ́ ka nyí “Babilɔ́nu ɖaxó ɔ”? Nyɔ̌nu énɛ́ sixú nɔ te nú tutomɛ toxóɖiɖɔ tɔn ɖé ǎ, ɖó è ɖɔ dó wǔ tɔn ɖɔ é ɖo aga lɛ xá toxóɖɔtɔ́gán gbɛ ɔ tɔn lɛ́ wɛ. (Nǔɖe. 18:9) Gɔ́ ná ɔ, gběkanlin ɔ jí e é ɖe é xlɛ́ ɖɔ é ɖo tíntɛ́nkpɔ́n wɛ bo ná kp’acɛ nú gǎn énɛ́ lɛ́. Ðo alɔ ɖěvo mɛ ɔ, é sixú nɔ te nú tuto ajɔ̌wiwa tɔn e ɖo gbɛ Satáan tɔn mɛ, bɔ nukúnkɛndídó ɖ’é mɛ lɛ́ é ǎ. Ðó è ɖɔ tuto ajɔ̌wiwa tɔn énɛ́ lɛ́ sín xó ɖo wěma Nǔɖexlɛ́mɛ tɔn sín akpáxwé ɖěvo mɛ, bo ylɔ́ yě ɖɔ “ajɔ̌tɔ́ ayǐkúngban jí tɔn lɛ́.” (Nǔɖe. 18:11, 15, 16) Babilɔ́nu hwexónu tɔn ɔ wɛ nyí azinkan sinsɛn nǔvú tɔn. Énɛ́ wú ɔ, Babilɔ́nu ɖaxó ɔ ɖó ná nɔ te nú kplékplé sinsɛn nǔvú lɛ́ bǐ tɔn. Nǔgbó ɔ, é wɛ nyí azinkan sinsɛn nǔvú tɔn.—Nǔɖe. 17:5, 18. w22.05 11 akpá. 14-16

Vǐnɔ ɖé sixú nɔ kanbyɔ́ éɖée hweɖélɛ́nu ɖɔ vǐ émítɔn lɛ́ ka ná wá gbeta ɔ kɔn bo sɛn Jexóva a jí. È ná ɖɔ ɔ, mɛjitɔ́ lɛ́ tuun lě do è nɔ gbídí kɔ nú vǐ yětɔn lɛ́ ɖo gbɛ Satáan tɔn élɔ́ mɛ sɔ é. Gɔ́ ná ɔ, nyɔ̌nu gěgé nɔ mɔ wǔvɛ́ bo ná dó kplɔ́n vǐ yětɔn lɛ́, ɖó yě sɔ́ ɖó asú ǎ, alǒ, asú e yě da é nɔ sɛn Jexóva ǎ wútu. Mɛ e ɖo xwédo e klán ɖo sinsɛn lixo lɛ́ é mɛ lɛ́ é kɛ́ɖɛ́ wɛ nɔ mɔ wǔvɛ́ lɛ́ ǎ. Ényí mɛjitɔ́ we lɛ́ bǐ ná bo tlɛ ɖo nǔgbó ɔ mɛ ɔ, é sixú vɛ́ wǔ bɔ nǔ e kplɔ́n mɛ wínnyáwínnyá yětɔn lɛ́ wɛ yě ɖe bɔ yě ná húzú mɛsɛntɔ́ gbejínɔtɔ́ Jexóva tɔn lɛ́ é ná byɔ́ ayi yětɔn mɛ. Ðěbǔ wɛ é ná bo nyí gbɔnɖěbǔ hǔn, ma nú ado hu we zɛ xwé wú ó. Jexóva ná d’alɔ we. A sixú kan nǔ byɔ́ mɛjitɔ́ e ko mɔ nǔ kpɔ́n lɛ́ é dó lěe yě nɔ zán azɔ̌wanú e tíin lɛ́ é ɖo sinsɛn-bíbló xwédo tɔn yětɔn hwenu gbɔn é wú. (Nǔx. 11:14) Jexóva sixú lɛ́ d’alɔ we bɔ a ná nɔ ɖɔ xó ɖó kpɔ́ xá vǐ towe lɛ́. Nɔ byɔ́ ɛ ɖɔ é ní d’alɔ we bónú a ná zán nǔkanbyɔ́ e sɔgbe lɛ́ é dó tuun nǔ e lin wɛ yě ɖe tawun é kpó lěe nǔ cí nú yě nǔgbó nǔgbó é kpó.—Nǔx. 20:5. w22.04 17 akpá. 4, 7; 18 akpá. 9

Ényí mǐ kplɔ́n bo tuun Vǐ Mawu tɔn e nɔ wa nǔ Tɔ́ tɔn ɖɔhun bɔ nǔ bǐ nɔ vɔ ɖ’é wú é ganjí ɔ, wǎn e mǐ yí nú Jexóva é ná jɛjí. (Ebl. 1:3) Ali ɖagbe hú gǎn e nu mǐ sixú tuun Jezu ɖe é wɛ nyí ɖɔ mǐ ní kplɔ́n Wɛnɖagbewéma ɛnɛ lɛ́. Ényí a ma ko ɖó aca ɖagbe Biblu xixa gbe bǐ gbe tɔn ǎ ɔ, étɛ́wú a ma ka ná sɔ́ nǔ ná din ǎ? Nú a ɖo tan e kúnkplá Jezu lɛ́ é xa wɛ hǔn, nɔ sɔ́ ayi ɖó jijɔ tɔn lɛ́ jí. É nyɔ́ lyá, bo nɔ dɔn yɔkpɔ́vú lɛ́ dó wǔ kpó wǎnyíyí kpó. (Mak. 10:13-16) É nɔ bló bɔ ahwanvú tɔn lɛ́ nɔ vo bo nɔ ɖɔ nǔ e ɖo ayi yětɔn mɛ lɛ́ é. (Mat. 16:22) Ðo ali énɛ́ nu ɔ, kpɔ́ndéwú Tɔ́ tɔn jǐxwé tɔn ɔ tɔn xwedó wɛ é ɖe mɔ̌. Jexóva lɔ nyɔ́ lyá tawun. Mǐ sixú vo bo xo ɖɛ sɛ́dó è. Ényí mǐ ɖo ɖɛ xo wɛ ɔ, mǐ sixú ɖɔ nǔ e ɖo ayi mǐtɔn mɛ lɛ́ é bǐ n’i. Mǐ ɖeji ɖɔ é kún ná dó hwɛ mǐ ó. É yí wǎn nú mǐ, bo nɔ kpé nukún dó mǐ wú.—1 Pi. 5:7. w22.08 3 akpá. 4-5

Ðó Jexóva wɛ nyí Gbɛɖótɔ́ mǐtɔn wú ɔ, é tuun nǔ bǐ dó mǐ wú. Dǒ nukún mɛ kpɔ́n! É tuun gǒflɛ́mɛ ɖěɖěe kúnkplá mɛ e ɖo ayǐkúngban ɔ jí lɛ́ é ɖokpó ɖokpó é bǐ hlɛ́nhlɛ́n. (Ðɛh. 139:15-17) Énɛ́ wú ɔ, é sixú mɔ hwɛhuhu gú e mǐ ɖu ɖo mɛjitɔ́ mǐtɔn lɛ́ gɔ́n é bǐ mlɛ́mlɛ́. É tlɛ tuun nǔ e jɛ ɖo gbɛzán mǐtɔn mɛ, bo zɔ́n bɔ mǐ nyí mɛ e mǐ nyí din é lɛ́ é bǐ. Étɛ́ lě do Jexóva tuun gbɛtɔ́ lɛ́ sɔ é ka nɔ sísɛ́ ɛ bɔ é nɔ wa? É nɔ sísɛ́ ɛ bɔ é nɔ kú nǔbláwǔ nú mǐ. (Ðɛh. 78:39; 103:13, 14, nwt) Jexóva xlɛ́ ɖɔ émí ɖo gbesisɔmɛ bo ná nɔ sɔ́ hwɛ kɛ mɛ. É mɔ nǔ jɛ mɛ ɖɔ nǔ e Adámu e nyí gbɛtɔ́ nukɔntɔn ɔ é wa nyi do é wɛ zɔ́n bɔ mǐ mɛ bǐ nyí hwɛhutɔ́, bɔ wǎgbɔ tɔn ɔ, mǐ nɔ wá kú. (Hlɔ̌. 5:12) Nǔ ɖěbǔ ɖe bɔ mǐ, alǒ mɛ ɖěvo ɖěbǔ sixú wa, bo ná gɔn hwɛ hu alǒ gɔn kúkú ǎ. (Ðɛh. 49:8-10) Amɔ̌, Mawu wǎnyíyínɔ mǐtɔn kú nǔbláwǔ nú mǐ, bo bló nǔɖé, bo ná dó tún kan nú mǐ. Lěe Jaan 3:16 xlɛ́ gbɔn é ɔ, Jexóva sɛ́ Vǐɖokpónɔ tɔn dó bónú é ná kú dó ta mǐtɔn mɛ.—Mat. 20:28; Hlɔ̌. 5:19. w22.06 3 akpá. 5-6

È ná sɔ́ hwɛ kɛ mɛ ɖěɖěe nɔ sɔ́ hwɛ kɛ mɛ lɛ́ é sín xó ɔ jɛ wě ɖo mɛsɛntɔ́ Jexóva tɔn Jɔbu sín ninɔmɛ mɛ. Xógbe vɛ́sin ɖěɖěe Elifázi, Biludádi kpó Sofáa kpó dó nú nya gbejínɔtɔ́ énɛ́ é vɛ́ n’i tawun. Jexóva ɖɔ nú Jɔbu ɖɔ é ní xo ɖɛ dó ta yětɔn mɛ. Ée Jɔbu wa mɔ̌ gúdo é ɔ, Jexóva kɔn nyɔ̌ná dó jǐ tɔn. (Jɔb. 42:8-10) Mɛ hinhɛn dó xomɛ nɔ wa nǔ dó mɛ wú. Mɛ hinhɛn dó xomɛ cí agban kpinkpɛn ɖé ɖɔhun, bɔ Jexóva nɔ ba ɖɔ mǐ ní zlɔ́n agban énɛ́ bá mɔ tɛn dó ɖu vǐví fífá e mɔ̌ wiwa nɔ hɛn wá é tɔn. (Efɛ́. 4:31, 32) É byɔ́ mǐ ɖɔ mǐ ní ‘jó xomɛsin dó, bo jó hunnylánylá dó.’ (Ðɛh. 37:8) Nǔnywɛ́nú wɛ é nyí ɖɔ mǐ ní xwedó wěɖexámɛ énɛ́. Mɛ hinhɛn dó xomɛ sixú wa nǔ dó agbaza mǐtɔn wú, bo lɛ́ wa nǔ dó mǐ wú ɖo taglomɛ. (Nǔx. 14:30) Ényí mǐ hɛn mɛ e wa nǔ nyi do nú mǐ é dó xomɛ ɔ, é nɔ wa nǔ ɖě n’i ǎ, lěe ényí mǐ nu nǔ e ɖó aɖǐ é ɔ, é ma ná wa nǔ ɖě n’i ǎ gbɔn é. Ényí mǐ ka nɔ sɔ́ hwɛ kɛ mɛ ɖěvo lɛ́ ɔ, ɖagbe wa nú mǐɖée wɛ mǐ ɖe nɛ́. Mǐ nɔ ɖó fífá ayi mɛ tɔn, lobo nɔ lɛ́ kpé wú bo nɔ kpo ɖo sinsɛnzɔ́ mǐtɔn wa nú Jexóva wɛ. w22.06 10 akpá. 9-10

Nukúnɖíɖó mǐtɔn cí gangbakún nǔjlɛ́dónǔwú tɔn e nɔ cyɔ́n alɔ linlin mǐtɔn jí, lobo nɔ lɛ́ d’alɔ mǐ bónú mǐ ní ma zán cejɛ́nnábí gbɛ, bónú é wá wa nǔ dó xɔ́ntɔn e mǐ zun xá Jexóva é wú ó é ɖɔhun. (1 Kɔ. 15:33, 34) Nukúnɖíɖó mǐtɔn sixú lɛ́ cyɔ́n alɔ mǐ jí bɔ mǐ ná lin ɖɔ mǐ kún ná kpé wú gbeɖé bo bló bónú nǔ mǐtɔn ná nyɔ́ Jexóva nukúnmɛ ó ǎ. Flín ɖɔ gbɔdónúmɛtɔ́ enyíi Jɔbu tɔn Elifázi lɔ ɖɔ xó mɔ̌hun lɛ́ nú Jɔbu. Elifázi ɖɔ: “Ani wɛ gbɛtɔ́ ka nyí bo ná ɖɔ émí nyí mɛ mímɛ́?” Gɔ́ ná ɔ, é ɖɔ dó Mawu wú ɖɔ: “Mawu ɖeji dó wɛnsagun tɔn lɛ́ lɔ wú ǎ, [jǐxwé] ɔ lɔ nɛ́ ma mɛ́ ɖo nukɔn tɔn ǎ nɛ́.” (Jɔb. 15:14, 15) Nǔvú séé wɛ! Flín mɛ e ɖo gǔdo nú linlin mɔ̌hun lɛ́ é; Satáan wɛ. É tuun ɖɔ ényí a fɔ́n bo nɔ ɖo tamɛ lin gbɔn mɔ̌ wɛ ɔ, nukúnɖíɖó towe ná jɛ ɖiɖe kpo jí kpɛɖé kpɛɖé. Énɛ́ wú ɔ, hɔn nú adingban mɔ̌hun lɛ́. Jexóva ba ɖɔ a ní nɔ gbɛ káká sɔ́yi, bo lɛ́ jló ná d’alɔ we bɔ a ná kpé wú. Ma xo nǔ kpɔ́n dó xó énɛ́ wú gbeɖé ó!—1 Tim. 2:3, 4. w22.10 25-26 akpá. 8-10

Satáan ba ɖɔ Jɔbu ní lin ɖɔ nǔ émítɔn kún sɔ́ nyɔ́ Jexóva nukúnmɛ ó wɛ zɔ́n bɔ émí ɖo wǔvɛ́ mɔ wɛ. Ði kpɔ́ndéwú ɔ, Satáan zán jɔhɔn syɛ́nsyɛ́n ɖé dó mu xɔ e mɛ Jɔbu sín vǐ wǒ lɛ́ bǐ ɖe bo ɖo nǔ ɖu ɖó kpɔ́ wɛ kpó awǎjijɛ kpó é. (Jɔb. 1:18, 19) É lɛ́ bló bɔ so lɛ́ jɛ kanlin Jɔbu tɔn lɛ́, káká jɛ mɛsɛntɔ́ tɔn e ɖo nukún kpé dó yě wú wɛ lɛ́ é jí. (Jɔb. 1:16) Ðó jɔhɔn ɔ kpó myɔ ɔ kpó ɔ, jǐxwé wɛ yě gosín wútu ɔ, Jɔbu lin ɖɔ Jexóva gɔ́n wɛ yě gosín. Wǎgbɔ tɔn ɔ, Jɔbu mɔ ɖɔ nǔɖé jɛ́n émí ná ko wa nyi do nú Jexóva. É ɖo mɔ̌ có, Jɔbu gbɛ́ ɖɔ émí kún ná dó nu Tɔ́ émítɔn jǐxwé tɔn ɔ ó. Jɔbu tuun ɖɔ ɖo xwe lɛ́ vlamɛ ɔ, Jexóva ná nǔ ɖagbe gěgé émí. Énɛ́ wú ɔ, é lin tamɛ bo mɔ ɖɔ ɖó émí ko yí gbe nú nǔ ɖagbe e é ná émí lɛ́ é kpó xomɛhunhun kpó wútu ɔ, émí ɖó ná lɛ́ sɔ́ jlǒ dó yí gbe nú nǔ nyanya lɛ́. É sín mɔ̌ wú ɔ, é ɖɔ: ‘Susu nú Jexóva.’ —Jɔb 1:20, 21. w22.06 21-22 akpá. 7

Jezu gba akpá mɔ̌hun ɖé nú ahwanvú tɔn lɛ́ ɖo nukɔnmɛ bɔ è wlán dó Jaan 17:14 mɛ. É ɖo wɛn ɖɔ, mǐ ɖo lěe nǔɖɔɖayǐ ɔ sín akpáxwé énɛ́ ɖo jijɛnu gbɔn wɛ é mɔ wɛ, tají ɔ, ɖo xwe 100 e mǐ dó gǔdo wá yi din lɛ́ é mɛ. Gbɔn nɛ̌ é? Ée è sɔ́ Jezu b’ɛ húzú Axɔ́sú ɖo 1914 gúdo tlóló é ɔ, è nya Satáan sín jǐxwé dó ayǐkúngban jí. Din ɔ, é sɔ́ sixú kpé wú bo lɛ́ kɔ yi jǐxwé ǎ, bo ɖo te kpɔ́n kún e è ná sú dó n’i é. (Nǔɖe. 12:9, 12) Amɔ̌, é ɖo te xwíí ǎ. Xomɛ sin Satáan tawun, b’ɛ ɖo ahwan tɔ́n togun Mawu tɔn wɛ. (Nǔɖe. 12:13, 17) Énɛ́ wú wɛ wǎn e gbɛ ɔ gbɛ́ nú togun Mawu tɔn é lɛ́ jɛjí. Amɔ̌, mǐ ɖó hwɛjijɔ ɖěbǔ bo ná ɖi xɛsi nú Satáan kpó ahwan tɔn lɛ́ kpó ǎ. É nyɔ́ wa ɔ, mǐ sixú ɖó gǎnjɛwú ɖokpó ɔ mɛsɛ́dó Pɔ́lu e wlán xó élɔ́ lɛ́ é ɖɔhun: “Ényí Mawu ɖo jǐ mǐtɔn ɔ, mɛ̌ ka sixú ɖu ɖo mǐ jí?” (Hlɔ̌. 8:31) Mǐ sixú ɖeji bǐ mlɛ́mlɛ́ dó Jexóva wú. w22.07 18 akpá. 14-15

Jezu ɖi xɛsi ɖɔ azɔ̌watɔ́ lɛ́ kún ná sukpɔ́ ɖo vivɔnu gbɛ ɔ tɔn ó ǎ. É tuun ɖɔ xó élɔ́ lɛ́ e ɖɛhanwlántɔ́ ɔ ɖɔ ɖ’ayǐ lɛ́ é ná jɛ nu: “Togun towe ná zé yěɖée jó kpó jlǒ kpó ɖo ahwangɔnu towe sín azǎn gbe.” (Ðɛh. 110:3, nwt) Ényí a ɖo alɔ ɖó ɖo wɛnɖagbejíjlázɔ́ ɔ mɛ wɛ hǔn, gǔdo nɔ nú Jezu kpó deví gbejínɔtɔ́ ɔ kpó wɛ a ɖe, bo lɛ́ ɖo alɔ dó wɛ bónú nǔɖɔɖayǐ énɛ́ ná jɛnu nɛ́. Azɔ̌ ɔ ɖo nukɔn yi wɛ, amɔ̌, wǔvɛ́ ɖé lɛ́ ka ɖ’é kɔn. Wǔvɛ́ e wɛnjlátɔ́ Axɔ́súɖuto ɔ tɔn lɛ́ nɔ mɔ é ɖokpó wɛ nyí gbeklánxámɛ. Gǔfɔ́ndómawujítɔ́ lɛ́, sinsɛngán lɛ́ kpó toxóɖɔtɔ́ lɛ́ kpó ko kɔn cí gěgé dó azɔ̌ mǐtɔn wú. Ényí hɛ̌nnumɔ mǐtɔn lɛ́, mɛ ɖěvo e mǐ tuun lɛ́ é kpó azɔ̌gbɛ́ mǐtɔn lɛ́ kpó ɖi nǔ nú adingbanxó énɛ́ lɛ́ ɔ, yě sixú dó cɔcɔ nú mǐ ɖɔ mǐ ní ɖó Jexóva sinsɛn kpó wɛn ɖagbe e mǐ nɔ jlá é kpó te. Ðo to ɖé lɛ́ mɛ ɔ, kɛntɔ́ mǐtɔn lɛ́ nɔ dó xɛsi nɔví mǐtɔn lɛ́, nɔ gblɔ́n adǎn nú yě, nɔ wlí yě, lobo tlɛ nɔ dó yě mɛ ɖé lɛ́ gan. w22.07 8 akpá. 1; 9 akpá. 5-6

Jexóva nɔ ɖó nukún ɖɔ mǐ ní nɔ ba hwenu bo nɔ kplɔ́n Biblu hwɛhwɛ, bo nɔ lɛ́ lin tamɛ dó nǔ ɖěɖěe mǐ xa lɛ́ é jí ganjí. Ényí mǐ nɔ zán nǔ e mǐ kplɔ́n lɛ́ é ganjí ɔ, nǔɖiɖi mǐtɔn nɔ lí dǒ, bɔ mǐ nɔ lɛ́ sɛkpɔ́ Tɔ́ mǐtɔn jǐxwé tɔn ɔ hú gǎn. Wǎgbɔ tɔn ɔ, mǐ nɔ lɛ́ mɔ hlɔ̌nhlɔ́n bo nɔ dɛ ɖo wǔvɛ́ mǐtɔn lɛ́ nu. Jexóva nɔ lɛ́ ná gbigbɔ mímɛ́ tɔn mɛ ɖěɖěe nɔ gán jɛ Xó tɔn wú lɛ́ é. Gɔ́ ná ɔ, gbigbɔ énɛ́ sixú ná mǐ “hlɔ̌nhlɔ́n aditi” ɔ, bɔ é ná zɔ́n bɔ mǐ ná dɛ ɖo wǔvɛ́ ɖěbǔ nu. (2 Kɔ. 4:7-10) Kpó alɔdó Jexóva tɔn kpó ɔ, “mɛsɛntɔ́ gbejínɔtɔ́ ayiɖotenánɔ” ɔ nɔ sɔ́ nǔ nú xóta, video kpó han kpó, éé sixú d’alɔ mǐ bɔ mǐ ná ɖó nǔɖiɖi syɛ́nsyɛ́n, bo lɛ́ kpo ɖo wunzɛn ɖo gbigbɔ lixo é gěgé. (Mat. 24:45) Jexóva kplɔ́n mɛsɛntɔ́ tɔn lɛ́ ɖɔ yě ní nɔ yí wǎn nú yěɖée, bo nɔ lɛ́ dó gbɔ nú yěɖée ɖo hwenu vɛ́ wǔ lɛ́ mɛ. (2 Kɔ. 1:3, 4; 1 Tɛ. 4:9) Akpakpa nɔ sɔ́ nɔví súnnu kpó nɔví nyɔ̌nu kpó mǐtɔn lɛ́ bónú yě ná d’alɔ mǐ, bɔ mǐ ná kpo ɖo gbejí hwenu e mǐ ɖo xwi ɖí xá wǔvɛ́ lɛ́ wɛ é. w22.08 12-13 akpá. 12-14

Ényí mǐ lɔ nɔ ɖɔ xó dó jijɔ ɖaaɖagbe nɔví súnnu mǐtɔn lɛ́ kpó nɔví nyɔ̌nu mǐtɔn lɛ́ kpó tɔn wú faa ɔ, mǐ ná lɛ́ vɛ́ d’é jí, bɔ énɛ́ ná zɔ́n bɔ agun ɔ ná lɛ́ lí dǒ ɖo wǎnyíyí mɛ. Gbemanɔkpɔ́, alǒ adɔn tlɛ sixú wá tíin ɖo klisánwun e ko zin lɛ́ é tɛ́ntin hweɖélɛ́nu. Nǔ nyí mɔ̌ nú Mɛsɛ́dó Pɔ́lu kpó xɔ́ntɔn vívɛ́ tɔn Baanabási kpó. Gbemanɔkpɔ́ syɛ́nsyɛ́n ɖé wá súnnu we énɛ́ lɛ́ tɛ́ntin dó Maki kpíkplá ɖo tomɛyiyi mɛsɛ́dó tɔn yětɔn e ná bɔ d’é wú é hwenu wú. “Yě sin xomɛ bo dɔn nǔ syɛ́nsyɛ́n” lobo klán. (Mɛ. 15:37-39) Amɔ̌, Pɔ́lu, Baanabási kpó Maki kpó wá dó hwɛ gbɔ. Nukɔnmɛ ɔ, Pɔ́lu wá ɖɔ ɖagbe Baanabási kpó Maki kpó tɔn. (1 Kɔ. 9:6; Koló. 4:10) Mǐɖésúnɔ ɖó ná nɔ ɖe ɖɛ gbemanɔkpɔ́ e ɖo mǐ kpó mɛ ɖěvo lɛ́ kpó tɛ́ntin ɖo agun ɔ mɛ lɛ́ é bǐ, bo ná kpo ɖo ayi sɔ́ ɖó jijɔ ɖaaɖagbe yětɔn lɛ́ jí wɛ. Mɔ̌ mɛ ɔ, mǐ ná gɔ́ so nú fífá kpó bǔninɔ kpó. w22.08 23 akpá. 10-11

Ée mǐ ná ɖo gǎn dó wɛ bá zán gbɛ sɔgbe xá nǔgbódodó jlɔ́jlɔ́ Jexóva tɔn lɛ́ é ɔ, mǐ ɖó ná nyi alɔ nú hwɛ ɖíɖó nú mɛ ɖěvo lɛ́, bo ma wá húzú nǔjlɔ́jlɔ́watɔ́ zɛ xwé wú ó. Mǐ ɖó ná flín ɖɔ Jexóva wɛ nyí “hwɛɖɔtɔ́ gbɛ ɔ bǐ tɔn.” (Bǐb. 18:25) Jexóva zɔ́n mǐ ɖɔ mǐ ní ɖó hwɛ nú mɛ ɖěvo lɛ́ ǎ. Mi ní ɖɔ xó dó kpɔ́ndéwú nya nǔjlɔ́jlɔ́watɔ́ e nɔ nyí Jozɛ́fu é tɔn jí. É nyi alɔ nú hwɛ ɖíɖó nú mɛ ɖěvo lɛ́, é ná bo tlɛ nyí mɛ ɖěɖěe xo dǎka wǔ tɔn lɛ́ é ɔ nɛ́. Jozɛ́fu sín nɔví lɛ́ wlí i, bo sɔ́ ɛ sa dó kannumɔgbénu, lobo bló bɔ tɔ́ yětɔn mɔ ɖɔ Jozɛ́fu kú. Xwe mɔ̌kpán gúdo ɔ, Jozɛ́fu kpó xwédo tɔn kpó lɛ́ wá kplé. Din e Jozɛ́fu nyí acɛkpatɔ́ hlɔ̌nhlɔ́nnɔ é ɔ, é sixú ko ɖó hwɛ nú nɔví tɔn lɛ́ syɛ́nsyɛ́n lobo lɛ́ ba hlɔn. Nǔ e Jozɛ́fu sín nɔví lɛ́ wa nyi do é vɛ́ nú yě tawun, bɔ yě byɔ́ hwɛsɔ́kɛ có, xɛsi ka lɛ́ kpo ɖo yě ɖi wɛ ɖɔ, Jozɛ́fu ná wa nǔ tɔn xá émí. Amɔ̌, Jozɛ́fu lɛ́ ná yě gǎnjɛwú ɖɔ: “Mi ma ɖi xɛsi ó, ɖó un sixú sɔ́ nyiɖée ɖó Mawu tɛnmɛ ǎ.” (Bǐb. 37:18-20, 27, 28, 31-35; 50:15-21) Kpó mɛɖéesɔ́hwe kpó wɛ Jozɛ́fu jó hwɛɖiɖɔ ɔ dó alɔ mɛ nú Jexóva. w22.08 30-31 akpá. 18-19

A ka tuun ɖɔ Jexóva sixú zán we dó ná xósin nú ɖɛ vívɛ́ e mɛɖé xo é a? Mɛxó agun tɔn, devízɔ́watɔ́ sinsɛnzɔ́wiwa tɔn, gběxosín-alijítɔ́, alǒ wɛnjlátɔ́ wɛ nú we hǔn, a sixú d’alɔ. Mɛ wínnyáwínnyá alǒ mɛxó wɛ nú we oo, nɔví súnnu, alǒ nɔví nyɔ̌nu wɛ nú we ɔ, a sixú d’alɔ. Ényí mɛ e yí wǎn nú Mawu e ɖé sú xó ylɔ́ ɛ bo byɔ́ alɔdó ɔ, hwɛhwɛ wɛ Mawu mǐtɔn nɔ gbɔn mɛxó agun tɔn lɛ́ kpó mɛsɛntɔ́ gbejínɔtɔ́ ɖěvo lɛ́ kpó jí, bɔ yě nɔ “dó wǔsyɛ́n lanmɛ nú” mɛ énɛ́. (Koló. 4:11) Wǔjɔmɛ ɖaxó ɖé wɛ é nyí ɖɔ mǐ ní sɛn Jexóva, bo lɛ́ wa devízɔ́ nú nɔví mǐtɔn lɛ́ ɖo ali énɛ́ nu! Mǐ sixú kpé wú bo d’alɔ nɔví mǐtɔn lɛ́, lobo lɛ́ dó gbɔ nú yě hwenu e jɛmɛjí ɖé, adla, alǒ yadónúmɛ wa nǔ dó yě wú é. Mǐ sixú nɔ ba ná d’alɔ mɛ ɖěvo lɛ́, amɔ̌, ényí mɛ e ɖo xwédo mǐtɔn mɛ é ɖé lɛ́ ɖo azɔn jɛ wɛ ɔ, énɛ́ sixú vɛ́ wǔ nú mǐ. Nǔ ɖo mɔ̌ có, mǐ ba ná d’alɔ nɔví mǐtɔn lɛ́, bɔ ényí mǐ wa nǔ e wú mǐ kpé é bǐ dó d’alɔ yě ɔ, é nɔ su Jexóva nukúnmɛ.—Nǔx. 19:17. w22.12 22 akpá. 1-2

Wǎnyíyí jí wɛ ji ɖiɖe dó mɛ wú nɔ jínjɔ́n. Jezu ɖɔ ɖɔ sɛ́n we e ɖo tají hú sɛ́n lɛ́ bǐ é wɛ nyí è ní yí wǎn nú Jexóva, bo lɛ́ yí wǎn nú nɔzo mɛtɔn lɛ́. (Mat. 22:37-39) Wǎn e mǐ yí nú Jexóva é nɔ sísɛ́ mǐ bɔ mǐ nɔ ba ná xwedó kpɔ́ndéwú maɖóblɔ̌ e é sɔ́ ɖ’ayǐ é, lobo ná nyí mɛ ɖejidéwú éɖɔhun. Ði kpɔ́ndéwú ɔ, wǎn e mǐ yí nú nɔví mǐtɔn lɛ́ é nɔ sísɛ́ mǐ bɔ mǐ nɔ hɛn kpáxó yětɔn lɛ́. Mǐ ná ba gbeɖé ná ɖe nǔɖé gba bɔ é ná wa nǔ dó yě wú, dó winnyá yě alǒ dó wǔvɛ́ nú yě ǎ. Mɛɖéesɔ́hwe lɔ ná d’alɔ mǐ bɔ mǐ ná nyí mɛ ɖejidéwú. Klisánwun e nɔ sɔ́ éɖée hwe é ɖé nɔ nyí mɛ nukɔntɔn e nɔ ɖe xó ɖé gba é dó hu ji nú mɛ ɖěvo lɛ́ ǎ. (Filí. 2:3) É nɔ ba ná bló bɔ mɛ ɖěvo lɛ́ ná lin ɖɔ é tuun kpáxó ɖé lɛ́ bo kún ba ná ɖɔ ó ǎ. Mɛɖéesɔ́hwe ná lɛ́ d’alɔ mǐ bɔ mǐ ná ny’alɔ nú linlin mǐɖésúnɔ tɔn lɛ́ ɖiɖɔ nú mɛ gěgé dó xó ɖěɖěe wú Biblu, alǒ wěma mǐtɔn lɛ́ ma kɛ nu dó ǎ lɛ́ é wú. w22.09 12 akpá. 12-13

Wɛnsagun ɔ ɖɔ nú Daniyɛ́li ɖɔ togun Mawu tɔn ná wá mɔ nǔ jɛ xógbe nǔɖɔɖayǐ tɔn e ɖo wěma Daniyɛ́li tɔn mɛ lɛ́ é mɛ hú gǎn, lé amɔ̌, ‘mɛdídá lɛ́ ɖě kún ná mɔ nukúnnú jɛ mɛ ó.’ (Dan. 12:10) Din wɛ mǐ ɖó ná xlɛ́ gbɔn nǔwalɔ mǐtɔn lɛ́ gblamɛ ɖɔ mǐ kún ɖo mɛ nyanya lɛ́ mɛ ó. (Mal. 3:16-18, nwt) Jexóva ɖo mɛ ɖěɖěe é mɔ dó mɔ ‘mɛ tɔn lɛ́,’ alǒ nǔɖókan bǔnɔ ɖé lɛ́ é xo kplé wɛ, yě wɛ nyí, mɛ ɖěɖěe xɔ akwɛ́ n’i tawun lɛ́ é. É ɖo wɛn ɖɔ mǐ ba ná nɔ mɛ énɛ́ lɛ́ mɛ. É ɖo wɛn ɖɔ hwenu bǔnɔ ɖé nɔ gbɛ ɖe wɛ mǐ ɖe. Amɔ̌, nǔ e sɔ́ akpakpa mɛ tawun lɛ́ é gěgé ná lɛ́ jɛ ɖo malínmálín mɛ. Zaanɖé din ɔ, mǐ ná mɔ bɔ è ná sú mɛ nyanya lɛ́ bǐ sín kún dó. Énɛ́ gúdo ɔ, mǐ ná mɔ bɔ akpá élɔ́ e Jexóva dó nú Daniyɛ́li é ná jɛnu: “A . . . ná fɔ́n sí te, bo ná wá yí ajɔ towe ɖo vivɔnu.” (Dan. 12:13) A ka ɖo te kpɔ́n hwenu e Daniyɛ́li kpó mɛ vívɛ́ná towe lɛ́ kpó “ná fɔ́n sí te” é wɛ kpó akpakpa sɔ́ mɛ kpó a? Ényí mɔ̌ hǔn, wa nǔ e wú a kpé lɛ́ é bǐ din, bo nɔ gbejí, énɛ́ ɔ, a sixú kú d’é jí ɖɔ nyǐkɔ towe ná nɔ gbɛwéma Jexóva tɔn mɛ. w22.09 24-25 akpá. 17, 19-20

Xógbe énɛ́ lɛ́ ɖó ná ko ná hlɔ̌nhlɔ́n Ezekiyɛ́li. Aniwú? É ɖo wɛn ɖɔ é flín ɖɔ Jexóva ko zán xógbe mɔ̌hun lɛ́ hwenu e é zɔ́n azɔ̌ Mɔyízi kpó Ezayíi kpó ɖɔ yě ní wa gbeyíɖɔzɔ́ é. (Tín. 3:10; Eza. 6:8) Ezekiyɛ́li lɛ́ tuun lěe Jexóva d’alɔ gbeyíɖɔ we énɛ́ lɛ́ bɔ yě wa azɔ̌ syɛ́nsyɛ́n e é sɔ́ d’así nú yě lɛ́ é gbɔn é. Énɛ́ wú ɔ, hwenu e Jexóva ɖɔ nú Ezekiyɛ́li azɔn we ɖɔ: “Un sɛ́ we dó” é ɔ, gbeyíɖɔ ɔ ɖó hwɛjijɔ ɖagbe e wú é ná ɖeji ɖɔ Jexóva ná d’alɔ émí é. Gɔ́ ná ɔ, hwɛhwɛ wɛ è nɔ mɔ nukɛgbe élɔ́ ɖo wěma Ezekiyɛ́li tɔn mɛ: ‘Jexóva ɖɔ nú mì ɖɔ.’ (Ezek. 3:16; 6:1) É ɖo wɛn ɖɔ Ezekiyɛ́li kú d’é jí ɖɔ Jexóva wɛ sɛ́ émí dó. Gɔ́ ná ɔ, ɖó vɔ̌sánúxwlémawutɔ́ sín vǐ wɛ Ezekiyɛ́li nyí wútu ɔ, tɔ́ tɔn sixú ko kplɔ́n nǔ i dó lěe Jexóva ná gǎnjɛwú gbeyíɖɔ tɔn lɛ́ ɖɔ émí ná d’alɔ yě hwebǐnu gbɔn é wú. Ði kpɔ́ndéwú ɔ, Jexóva ɖɔ nú Izáki ɖɔ: “Un ɖo kpɔ́ xá we.” É lɛ́ ɖɔ xó ɖokpó ɔ nú Jakɔ́bu kpó Jelemíi kpó.—Bǐb. 26:24; 28:15; Jel. 1:8. w22.11 2-3 akpá. 3

Adámu kpó Ɛvu kpó wa nǔ nyi do, bɔ énɛ́ zɔ́n bɔ vǐ yětɔn lɛ́ nɔ kú có, linlin e Jexóva ɖó é húzú ǎ. Eza. 55:11) É kpo ɖo linlin wɛ bo ná bló bɔ gbɛtɔ́ gbejínɔtɔ́ lɛ́ ná nɔ gbɛ káká sɔ́yi. Kpɔ́n nǔ ɖěɖěe Jexóva ko ɖɔ, bo lɛ́ wa bónú linlin tɔn énɛ́ ní dó jɛnu é. Jexóva d’akpá ɖɔ émí ná fɔ́n mɛ e ko kú lɛ́ é sín kú bo ná hun gbɛ mavɔmavɔ sín ali nú yě. (Mɛ. 24:15; Ti. 1:1, 2) Nya gbejínɔtɔ́ Jɔbu kú d’é jí ɖɔ akpakpa ɖo Jexóva sɔ́ wɛ bɔ é ná fɔ́n mɛ e ko kú lɛ́ é sín kú. (Jɔb. 14:14, 15) Gbeyíɖɔ Daniyɛ́li tuun ɖɔ gbɛtɔ́ lɛ́ ɖo nukún ɖó wɛ bɔ è ná fɔ́n yě sín kú, bónú yě ná nɔ gbɛ káká sɔ́yi. (Ðɛh. 37:29; Dan. 12:2, 13, nwt) Jwifu e nɔ gbɛ ɖo Jezu hwenu lɛ́ é lɔ tuun ɖɔ Jexóva hɛn ɔ, é ná dó ajɔ “gbɛ mavɔmavɔ” tɔn mɛsɛntɔ́ tɔn gbejínɔtɔ́ lɛ́. (Luk. 10:25; 18:18) Azɔn gěgé wɛ Jezu ɖɔ xó dó akpá énɛ́ wú; Tɔ́ tɔn tlɛ fɔ́n éɖésú sín kú.—Mat. 19:29; 22:31, 32; Luk. 18:30; Jaan 11:25. w22.12 4-5 akpá. 8-9

Jexóva byɔ́ mǐ ɖɔ mǐ ní sɛkpɔ́ émí. (Ja. 4:8) É ba ná nyí Mawu mǐtɔn, Tɔ́ mǐtɔn kpó Xɔ́ntɔn mǐtɔn kpó. É nɔ ná xósin nú ɖɛ mǐtɔn lɛ́, bo nɔ lɛ́ d’alɔ mǐ hwenu e mǐ ɖo hwenu vɛ́ wǔ lɛ́ mɛ gbɔn wɛ é. É nɔ kplɔ́n nǔ mǐ gbɔn tutoblónúnǔ tɔn jí, bo nɔ lɛ́ cyɔ́n alɔ mǐ jí. Ényí mǐ nɔ xo ɖɛ sɛ́dó Jexóva, nɔ xa Xó tɔn, bo nɔ lɛ́ lin tamɛ d’é jí ɔ, mǐ sixú sɛkpɔ́ ɛ. Mɔ̌ wiwa ná zɔ́n bɔ wǎn e mǐ yí n’i é kpó nǔ tɔn e nɔ su nukún mǐtɔn mɛ é kpó ná jɛjí. Akpakpa nɔ sɔ́ mǐ dó tónú sise n’i kpó susu e jɛxá ɛ é xixɔ n’i kpó wú. (Nǔɖe. 4:11) Lě do mǐ tuun Jexóva sɔ é ɔ, mɔ̌ do wɛ mǐ ná ɖeji dó wǔ tɔn, lobo lɛ́ ɖeji dó tutoblónúnǔ tɔn e é sɔ́ b’ɛ ɖo alɔ dó mǐ wɛ é wú sɔ é nɛ́. Awǒvi ka nɔ tɛ́n kpɔ́n bo ná vɔ́ da nú jiɖe e mǐ ɖó dó Jexóva kpó tutoblónúnǔ tɔn kpó wú é kpɛɖé kpɛɖé. Amɔ̌, mǐ sixú gbí dɔn ɖo wlɛnwín e é nɔ zán lɛ́ é nukɔn. Ényí nǔɖiɖi e mǐ ɖó nú Jexóva é lí dǒ, bɔ jiɖiɖe e mǐ ɖó dó wǔ tɔn é lɔ ma sɛ do ǎ ɔ, mǐ ná jó Mawu mǐtɔn kpó tutoblónúnǔ tɔn kpó dó ǎ.—Ðɛh. 31:14, 15. w22.11 14 akpá. 1-3

Klisánwun nǔgbó gěgé sɔ́ mɛɖésúsíninɔ yětɔn kpó gbɛ yětɔn kpó ɖ’axɔ́ nu, ɖó wǎn e yě yí nú Jexóva e nyí Nǔbǐwúkpétɔ́ yětɔn é wú. Klisánwun nǔgbó énɛ́ lɛ́ kán ɖ’é jí bá nɔ gbejí nú Jexóva. Yě cí Eblée atɔn ɖěɖěe nɔ gbejí nú Mawu Ajalɔ̌nlɔn ɔ bɔ é hwlɛ́n yě ɖo myɔkpó e mɛ myɔ ɖo jiji wɛ ɖe hɛhɛ é mɛ é ɖɔhun. Ðɛhanwlántɔ́ Davídi ɖɔ dó lě do gbejí nɔ nú Mawu ɖo tají sɔ é wú ɖɔ: ‘Jexóva, hwi wɛ nɔ ɖɔ hwɛ xá togun lɛ́, Jexóva, ɖe xlɛ́ ɖɔ hwɛ ce jɔ, ɖó nǔ jlɔ́jlɔ́ wɛ un wa, xomɛvɔ́nɔ wɛ un nyí.” (Ðɛh. 7:9) Davídi lɛ́ ɖɔ gɔ́ ná ɖɔ: “Xomɛvɔ́ e un ɖe ɔ kpó nǔ jlɔ́jlɔ́ e un nɔ wa ɔ kpó ní hɛn mì ɖó te.” (Ðɛh. 25:21) Ali ɖagbe hú gǎn e nu è sixú zán gbɛ mɛtɔn ɖe é wɛ nyí ɖɔ è ní nɔ gbejí nú Jexóva! Mɔ̌ mɛ ɔ, lěe nǔ cí nú Ðɛhanwlántɔ́ e ɖɔ xó élɔ́ é wɛ é ná cí nú mǐ lɔmɔ̌: ‘Nǔ nyɔ́ nú mɛ e nǔɖé ma jɛ do ɖo walɔ yětɔn wú ǎ, alǒ gbejínɔtɔ́ lɛ́, mɛ e nɔ xwedó Jexóva sɛ́n ɔ dó wa nǔ lɛ́ é.’—Ðɛh. 119:1. w22.10 17 akpá. 18-19

Jɔbu ɖɔ xó gěgé xá mɛ lɛ́ ɖo gbɛzán tɔn bǐ mɛ, amɔ̌, éé dɔn mɛ hú gǎn é wɛ nyí xó e é ɖɔ xá Jexóva Mawu é. Ðo xóɖɔɖókpɔ́ énɛ́ hwenu ɔ, Jexóva dɔn ayi Jɔbu tɔn wá nǔ ɖaaɖagbe e é dá lɛ́ é ɖé lɛ́ jí. Énɛ́ ná d’alɔ Jɔbu bɔ é ná tuun lě do Jexóva ɖó nǔnywɛ́ sɔ é, bo ná lɛ́ ná hlɔ̌nhlɔ́n jiɖe e é ɖó ɖɔ Jexóva sixú ná nǔ ɖěbǔ e hudó mɛsɛntɔ́ tɔn lɛ́ é yě é. Ði kpɔ́ndéwú ɔ, Jexóva flín Jɔbu ɖɔ émí nɔ kpé nukún dó kanlin lɛ́ wú, hǔn, émí sixú kpé nukún dó é lɔmɔ̌ wú. (Jɔb. 38:39-41; 39:1, 5, 13-16) Tamɛ linlin dó nǔ e Jexóva dá lɛ́ é jí d’alɔ Jɔbu bɔ é kplɔ́n nǔ gěgé dó Mawu tɔn sín jijɔ lɛ́ wú. Ényí mǐ nɔ kpɔ́n nǔ ɖěɖěe Mawu mǐtɔn dá lɛ́ é céɖécéɖé ɔ, mǐ lɔmɔ̌ sixú kplɔ́n nǔ dó wǔ tɔn d’é jí. Amɔ̌, mɔ̌ wiwa nɔ bɔ wǔ hwebǐnu ǎ. Nú toxo mɛ wɛ mǐ nɔ nɔ ɔ, ényí azǎn lɛ́ bǐ jí wɛ mǐ ná nɔ mɔ nǔ e Jexóva dá lɛ́ é gěgé ǎ. Nú é ná bo tlɛ lɛ́ nyí gletoxo mɛ wɛ mǐ nɔ nɔ ɔ, mǐ sixú mɔ ɖɔ mǐ kún ɖó hwenu sɔmɔ̌ bo ná kplɔ́n nǔ dó nǔ ɖěɖěe Jexóva dá lɛ́ é wú ó, amɔ̌, é nyɔ́ ɖɔ mǐ ní ba hwenu, bo lɛ́ dó gǎn bo kpɔ́n nǔ ɖěɖěe Jexóva dá lɛ́ é wú. w23.03 15 akpá. 1-2

Jezu ɖɔ ɖɔ “ayǐkúngban ná dán wǔ syɛ́nsyɛ́n,” bɔ adla ɖěvo lɛ́ ná lɛ́ j’ayǐ, cóbɔ gbɛ ɔ ná vɔ. (Luk. 21:11) Jezu lɛ́ ɖɔ ɖɔ “sɛ́ngbigba ná ɖo jijɛjí wɛ”; nǔ e ka ɖo jijɛ wɛ ɖo égbé é nɛ́. Ði kpɔ́ndéwú ɔ, mǐ nɔ mɔ dǎnúwiwa kpó wɔ̌nxixogbɛwú kpó. (Mat. 24:12) Jezu ɖɔ gbeɖé ɖɔ mɛ ɖěɖěe Jexóva jó dó lɛ́ é kɛ́ɖɛ́ wú wɛ nǔ mɔ̌hun lɛ́ ná wa nǔ dó ǎ. Nǔgbó ɔ, mɛsɛntɔ́ gbejínɔtɔ́ Jexóva tɔn gěgé wɛ ko se adla wúvɛ́. (Eza. 57:1; 2 Kɔ. 11:25) Jexóva sixú bló nǔjíwǔ bo xɔ mǐ ɖo adla énɛ́ lɛ́ bǐ sí ǎ, amɔ̌, é ná ná mǐ nǔ ɖěbǔ e sín hudó mǐ ɖó, bo ná kpo ɖo fífá ɖó wɛ é. Ényí mǐ nɔ sɔ́ nǔ nú nǔ e mǐ ná wa é jɛ nukɔn ɔ, énɛ́ ná bɔ wǔ nú mǐ hú gǎn. Amɔ̌, nǔ sísɔ́ ɖ’ayǐ xlɛ́ ɖɔ mǐ kún ɖi nǔ nú Jexóva ó wɛ a? Ðěbǔ lɔ ǎ. Nǔgbó ɔ, ényí mǐ sɔ́ nǔ ɖ’ayǐ nú adla hǔn, xlɛ́xlɛ́ wɛ é ɖe ɖɔ mǐ ɖeji dó nǔwúkpíkpé e Jexóva ɖó bo ná kpé nukún dó mǐ wú é wú. Gbɔn nɛ̌ é? Xó Mawu tɔn dó wǔsyɛ́n lanmɛ nú mǐ ɖɔ mǐ ní sɔ́ nǔ ɖ’ayǐ nú adla e ná j’ayǐ lɛ́ é. w22.12 18 akpá. 9-10

Hwenu e Jozɛ́fu ɖo ganxó é ɔ, Jexóva bló bɔ axɔ́sú Ejípu tɔn kú dlɔ̌ e ɖó adohu nú mɛ é we. Hwenu e axɔ́sú ɔ se ɖɔ Jozɛ́fu kpé wú bo nɔ tín dlɔ̌ lɛ́ mɛ é ɔ, é sɛ́ mɛ dó ɖɔ è ní yi kplá ɛ wá. Kpó alɔdó Jexóva tɔn kpó ɔ, Jozɛ́fu tín dlɔ̌ lɛ́ mɛ, bɔ wě e nyɔ́ zán bɔ é ɖe xá Falawɔ́ɔn lɛ́ é jí wǔ nú Falawɔ́ɔn tawun. Ðó Falawɔ́ɔn mɔ ɖɔ Jexóva ɖo kpɔ́ xá dɔ̌nkpɛvú énɛ́ e nɔ nyí Jozɛ́fu é wútu ɔ, é sɔ́ ɛ gǎn e xwe aza dó nǔɖuɖu nu ɖo Ejíputo ɔ bǐ mɛ é. (Bǐb. 41:38, 41-44) Nukɔnmɛ ɔ, adɔ syɛ́nsyɛ́n ɖé tɔ́n, é ka nyí Ejípu kɛ́ɖɛ́ wɛ se xɔxɔ tɔn ǎ, Kanáa lɔmɔ̌ se; to énɛ́ mɛ wɛ xwédo Jozɛ́fu tɔn ka nɔ nɔ. Tɛn e mɛ Jozɛ́fu ɖe din é ɔ, é hɛn ɔ, é ná hwlɛ́n xwédo tɔn, bɔ mɔ̌ mɛ ɔ, é ná cyɔ́n alɔ kúnkan e mɛ Mɛsíya ɔ ná tɔ́n sín é jí. É ɖo wɛn, Jexóva wɛ bló bɔ nǔ e Jozɛ́fu wa lɛ́ é bǐ kpa ɛ. Jozɛ́fu sín nɔví lɛ́ ba ná hu i có, Jexóva húzú ninɔmɛ ɔ, bónú linlin tɔn ná dó jɛnu. w23.01 16-17 akpá. 11-12

Mɛ e nɔ cɔ́ éɖée é nɔ ɖ’ayi te dó nǔ ɖěbǔ e ná wa nǔ dó xɔ́ntɔn e é zun xá Jexóva é wú é wú, lobo nɔ tɛ́n kpɔ́n bo nɔ nyi alɔ ná. Mɔ̌ mɛ ɔ, é nɔ kpo ɖo wǎnyíyí Mawu tɔn mɛ. (Nǔx. 22:3; Ju. 20, 21) Mɛsɛ́dó Pɔ́lu gb’akpá nú klisánwun lɛ́ ɖɔ yě ní cɔ́ yěɖée. Ði kpɔ́ndéwú ɔ, é ɖɔ xó élɔ́ nú klisánwun Efɛ́zi tɔn lɛ́: “Mi . . . nɔ cɔ́ lěe mi nɔ zán gbɛ gbɔn é ganjí, mi ma nɔ zán gbɛ xlonɔ lɛ́ ɖɔhun ó, loɔ, nǔnywɛ́tɔ́ lɛ́ ɖɔhun.” (Efɛ́. 5:15, 16) Satáan nɔ ɖo gǎn dó wɛ hwebǐnu bo ná wa nǔ dó xɔ́ntɔn e mǐ zun xá Jexóva é wú, énɛ́ wú wɛ Biblu ɖe wě élɔ́ xá mǐ: “Mi ní nɔ ɖo nukúnnú mɔ jɛ nǔ e nyí jlǒ Jexóva tɔn é mɛ wɛ.” Énɛ́ ɔ, mǐ ná cɔ́ mǐɖée bo ná jɛ mɔ Satáan tɔn ɖěbǔ mɛ ǎ. (Efɛ́. 5:17) Cóbónú mǐ ná wá gbeta e nǔnywɛ́ kpé lɛ́ é kɔn ɔ, mǐ ɖó ná tuun nǔ e nyí “jlǒ Jexóva tɔn” é. Ényí mǐ nɔ xa Xó Mawu tɔn hwɛhwɛ lobo nɔ lin tamɛ d’é jí ɔ, mǐ sixú tuun nǔ e nyí jlǒ Jexóva tɔn é. Lě do mǐ tuun jlǒ Jexóva tɔn, lobo lɛ́ tɛ́n kpɔ́n bo ɖó “linlin Klísu tɔn” sɔ é ɔ, vlafo, mɔ̌ do wɛ mǐ ná nɔ wa nǔ “nǔnywɛ́tɔ́ lɛ́” ɖɔhun sɔ, ényí sɛ́n ɖé ma tlɛ ɖe bo ɖɔ nǔ e mǐ ná wa é nú mǐ ǎ ɔ nɛ́.—1 Kɔ. 2:14-16. w23.02 16-17 akpá. 7-9

Azɔn nabí a ka nɔ jlá xɔ towe mɛ ɖó? Bóyá, cóbónú a ná yi jɛ xɔ ɔ mɛ ɔ, a xwe sɔ bo jlá ɖó. Amɔ̌, ényí a ma ka sɔ́ jlá ɖó ɖě ǎ ɔ, étɛ́ ka ná jɛ? Lěe a tuun gbɔn é ɔ, é ná yá wǔ kwíji. Cóbónú xɔ towe mɛ ná nɔ nɔ mǐmɛ́ jí ɔ, é byɔ́ ɖɔ a ní nɔ jlá ɖó hwɛhwɛ. Ðo ali ɖokpó ɔ nu ɔ, mǐ ɖó ná kpo ɖo azɔ̌ wa wɛ ɖo linlin mǐtɔn kpó mɛ alɔkpa e mǐ nyí é kpó wú. É ɖo wɛn ɖɔ cóbónú mǐ ná bló batɛ́mu ɔ, mǐ ko w’azɔ̌ syɛ́nsyɛ́n bo bló hǔzúhúzú e ɖo dandan lɛ́ é ɖo gbɛzán mǐtɔn mɛ, bo ná dó “slá wǔ nú agbaza kpó [gbigbɔ] kpó” mǐtɔn. (2 Kɔ. 7:1) Amɔ̌ din ɔ, é byɔ́ ɖɔ mǐ ní xwedó wěɖexámɛ mɛsɛ́dó Pɔ́lu tɔn e ɖɔ ɖɔ mǐ ɖó ná ‘kpo ɖo ayixa mǐtɔn kpódó linlin mǐtɔn kpó húzú wɛ bǐ kpéte’ é. (Efɛ́. 4:23) Bléwún jɛ́n gbɛ élɔ́ sixú wa nǔ dó mǐ wú bɔ mǐ ná húzú mɛ blíblí ɖo Jexóva nukɔn. Ényí nǔ mɔ̌hun ma ná jɛ ǎ, bɔ mǐ ná kpo ɖo mɛ mímɛ́ nyí wɛ ɖo Jexóva nukɔn ɔ, mǐ ɖó ná nɔ gbéjé linlin mǐtɔn, mɛ alɔkpa e mǐ nyí é kpó jlǒ mǐtɔn lɛ́ kpó kpɔ́n hwɛhwɛ. w23.01 8 akpá. 1-2

Dǒ nukún lěe tó ɖíɖó nǔkplɔ́nmɛ Jezu tɔn lɛ́ ná ko cí é mɛ kpɔ́n! Hwɛhwɛ wɛ é nɔ ɖe xó sín Nǔwlánwlán mímɛ́ e é kplɔ́n bɔ é ɖo ta tɔn mɛ lɛ́ é mɛ. É ɖo wɛn ɖɔ hwenu e Jezu bló batɛ́mu bɔ gbigbɔ mímɛ́ sɔ́ ɛ gúdo é wɛ, nǔ e é ko wa cóbó wá ayǐkúngban jí lɛ́ é bǐ lɛ́ wá tamɛ n’i. Jezu ɖe xó sín Xó Mawu tɔn mɛ ɖo xó nukɔn nukɔntɔn e é ɖɔ ɖo batɛ́mu tɔn gúdo bɔ è wlán ɖ’ayǐ lɛ́ é kpó xó gǔdo gúdo tɔn ɖěɖěe é ɖɔ jɛ nukɔn nú kú tɔn bɔ è wlán ɖ’ayǐ é ɖé lɛ́ kpó mɛ. (Sɛ́n. 8:3; Ðɛh. 31:6; Luk. 4:4; 23:46) Gɔ́ ná ɔ, ɖo xwe atɔn adaɖé e gbo nǔ we énɛ́ lɛ́ mɛ é vlamɛ ɔ, hwɛhwɛ wɛ Jezu nɔ xa Mawuxówéma ɔ ɖo agbawungba, nɔ ɖe xó sín mɛ, lobo nɔ lɛ́ tínmɛ nú mɛ lɛ́. (Mat. 5:17, 18, 21, 22, 27, 28; Luk. 4:16-20) Ðo xwe ɖěɖěe jɛ nukɔn nú sinsɛnzɔ́ Jezu tɔn lɛ́ é mɛ ɔ, é nɔ xa Xó Mawu tɔn, bo nɔ lɛ́ ɖótó hwɛhwɛ. É ɖo wɛn ɖɔ é nɔ se, bɔ Mali kpó Jozɛ́fu kpó nɔ ɖe xó sín Biblu mɛ . (Sɛ́n. 6:6, 7) Gɔ́ ná ɔ, Jezu kpó xwédo tɔn kpó nɔ yi kplɔ́ngbasá ɖo gbɔjɛzángbe lɛ́ bǐ. (Luk. 4:16) Ényí é yi dɔ̌n bɔ è ɖo Mawuxówéma ɔ xa wɛ ɔ, é ná ko nɔ ɖótó kpó sɔxwixwe kpó. w23.02 8-9 akpá. 1-2

Hwɛjijɔ e wú è ná yí wǎn nú Jexóva lɛ́ é sukpɔ́. Ði kpɔ́ndéwú ɔ, a wá mɔ nǔ jɛ wú ɖɔ é “gɔ́n wɛ gbɛ ɔ jɔ sín,” bɔ é gɔ́n wɛ “nǔníná ɖagbe ɖagbe bǐ kpó nǔníná e nǔ bǐ vɔ ɖ’é wú é bǐ kpó” gosín. (Ðɛh. 36:10; Ja. 1:17) Mawu mǐtɔn wǎnyíyínɔ e nɔ hun alɔ dó ná nǔ mɛ é gɔ́n wɛ nǔ ɖagbe ɖěɖěe sín vǐví a nɔ ɖu lɛ́ é bǐ gosín. Nǔníná ɖaaɖagbe ɖé wɛ gbɛxixɔ ɔ nyí bɔ Jexóva ná mǐ. Aniwú mǐ ka sixú ɖɔ mɔ̌? Lin tamɛ dó lě do Jexóva kpó Vǐ tɔn kpó vɛ́ sɔ é jí. Jezu ɖɔ: “Tɔ́ ɔ yí wǎn nú mì,” bɔ “un yí wǎn nú Tɔ́ ɔ.” (Jaan 10:17; 14:31) Xɔ́ntɔn e yě mɛ we lɛ́ zun é lɛ́ lí dǒ d’é jí, ɖo xwe lǐva mɔ̌kpán e yě zán ɖó kpɔ́ lɛ́ é mɛ. (Nǔx. 8:22, 23, 30) Din ɔ, lin tamɛ dó lě do Mawu ná ko se wǔvɛ́ sɔ hwenu e é yí gbe bɔ Vǐ tɔn ji ya bo kú é jí. Jexóva yí wǎn nú gbɛtɔ́ lɛ́, káká jɛ hwi lɔ jí sɔmɔ̌, bɔ éɖésúnɔ jló bo sɔ́ Vǐ vívɛ́ tɔn dó sá vɔ̌, bónú hwi kpó mɛ ɖěvo lɛ́ kpó ná nɔ gbɛ káká sɔ́yi. (Jaan 3:16; Ga. 2:20) Hwɛjijɔ e wú mǐ ná yí wǎn nú Mawu é ɖěvo sɔ́ ɖe bo hú gǎn énɛ́ ǎ. w23.03 4-5 akpá. 11-13

Mǐ ɖó ná hɔn nú nǔkplɔ́nmɛ gǔfɔ́ndómawujítɔ́ lɛ́ tɔn. Jezu gbɛ́ nǔ nú mɛɖé lɛ́ ɖo Pɛɛgámu, ɖó yě ɖo kínklán dɔn byɔ́ nɔví lɛ́ tɛ́ntin wɛ. (Nǔɖe. 2:14-16) É kpa mɛ ɖěɖěe ɖo Tiatíi, bo ma zɔn “do gɔngɔn Satáan tɔn mɛ” ǎ lɛ́ é, lobo dó wǔsyɛ́n lanmɛ nú yě ɖɔ yě ní hɛn nǔgbó e yě ɖó ɔ wú “syɛ́nsyɛ́n.” (Nǔɖe. 2:24-27) Klisánwun ɖěɖěe ɖo fínɛ́ bo vɔ́da, bo jɛ adingban-núkplɔ́nmɛ lɛ́ xwedó jí lɛ́ é ɖó ná bló hǔzúhúzú lɛ́. Bɔ mǐdɛɛ lɛ́ ka lo? Mǐ ɖó ná hɔn nú nǔkplɔ́nmɛ ɖěbǔ e sɔ́ ta linlin Jexóva tɔn é. Gǔfɔ́ndómawujítɔ́ lɛ́ sixú nyí “mawusɛntɔ́ ɖo nukúnta, bo ka ná gbɛ́ nǔ e nyí hlɔ̌nhlɔ́n titewungbe nú sinsɛn ɔ é.” (2 Tim. 3:5) Nú mǐ nɔ kplɔ́n Xó Mawu tɔn ganjí ɔ, é ná bɔ wǔ nú mǐ bɔ mǐ ná tuun adingban-núkplɔ́nmɛ lɛ́, bo lɛ́ hɔn nú yě. (2 Tim. 3:14-17; Ju. 3, 4) Mǐ ɖó ná kú d’é jí ɖɔ lěe sɛn Jexóva gbɔn wɛ mǐ ɖe é nyɔ́ nukún tɔn mɛ. Ényí mǐ ɖo nǔɖé wa wɛ, bɔ é sixú zɔ́n bɔ Jexóva ná gbɛ́ sɛn e sɛn ɛ wɛ mǐ ɖe é ɔ, mǐ ɖó ná yá wǔ ɖe afɔ ɖé, bo jlá nǔ lɛ́ ɖó.—Nǔɖe. 2:5, 16; 3:3, 16. w22.05 4 akpá. 9; 5 akpá. 11