Mɛ̌ Alǒ Etɛ ka Nyí Xó Mawu Tɔn Ɔ?
Xósin e Biblu na é
Hwɛhwɛ ɔ, “Mawuxó ɔ” nɔ dó gesí wɛn Mawu tɔn ɖé, alǒ kplékplé wɛn enɛ lɛ tɔn. (Luki 11:28) Fí kpɛɖé jɛn è zán “Mawuxó,” alǒ “Xó ɔ” nú tɛnmɛ-nyikɔ ɖè.—Nǔɖexlɛ́mɛ 19:13; Jaan 1:14.
Wɛn Mawu tɔn ɖé. Hwɛhwɛ wɛ gbeyiɖɔ lɛ ɖɔ ɖɔ wɛn e ye dó lɛ é nyí xó Mawu tɔn. Ði kpɔ́ndéwú ɔ, Jelemíi nɔ bɛ́ wɛn nǔɖɔɖ’ayǐ tɔn tɔn lɛ didó kpo xógbe elɔ kpo: “Xó e Mawu ɖɔ nú mì é ɖíe.” (Jelemíi 1:4, 11, 13; 2:1) Cobonu gbeyiɖɔ Samuwɛli na ɖɔ nú Sawulu ɖɔ Mawu sɔ́ ɛ axɔ́su ɔ, é ɖɔ: “Nɔte bonu má ɖɔ xó e Mawu ɖɔ ɔ nú we.”—1 Samuwɛli 9:27.
Tɛnmɛ-nyikɔ ɖé. Xógbe “Xó ɔ” lɛ́ tɔ́n ɖò Biblu mɛ b’ɛ nyí tɛnmɛ nyikɔ Jezu Klisu tɔn ɖé, hwenu e é nyí nǔɖiɖó gbigbɔ tɔn ɖé ɖò jixwé é kpo hwenu e é ɖò ayikúngban jí é kpo. Kpɔ́n hwɛjijɔ e wu mǐ wá gbeta enɛ kɔn é ɖé lɛ:
Xó ɔ ko ɖò gbɛ̀ jɛ nukɔn nú nǔɖiɖó ɖevo lɛ bǐ. “Cobonu Mawu na ɖó gbɛ̀ ɔ, Xó ɔ ko tíìn . . . Xó enɛ ko ɖè tɛgbɛ xá Mawu ɖò bǐbɛ̌mɛ.” (Jaan 1:1, 2) Jezu ɔ, “nukɔngbeví wɛ é nyí, bo hugǎn nǔ e Mawu bló lɛ bǐ . . . É ko tíìn cobɔ nǔ lɛ bǐ wá tíìn.”—Kolosinu lɛ 1:13-15, 17.
Xó ɔ nyí gbɛtɔ́ bo wá ayikúngban jí. “Xó ɔ huzu gbɛtɔ́, bo wá nɔ mǐ mɛ.” (Jaan 1:14) Klisu Jezu “gbɛ́ nǔ e é ɖó ɔ bǐ, bo zé ninɔmɛ mɛsɛntɔ́ tɔn. É huzu gbɛtɔ́.”—Filipunu lɛ 2:5-7.
Xó ɔ Mawu sín Vǐ wɛ. Ee mɛsɛ́dó Jaan ɖɔ ɖɔ “Xó ɔ huzu gbɛtɔ́,” lee è ko ɖɔ gbɔn ɖò aga é gudo é ɔ, é gbɛkan d’enu ɖɔ: “Mǐ mɔ susu tɔn, susu e Tɔ́ nɔ na Vǐɖokponɔ tɔn é.” (Jaan 1:14) Jaan lɛ́ wlán ɖɔ: “Jezu nyí Mawu ví.”—1 Jaan 4:15.
Xó ɔ ɖó jijɔ ɖokpo ɔ lɛ Mawu ɖɔhun. “Xó ɔ nyí mawu ɖé.” (Jaan 1:1, nwt) Jezu wɛ nyí “susu Mawu tɔn sín weziza sín xlɛ̌, bo nyí Mawu sín xlɛ̌ titewungbe tɔn.”—Eblée lɛ 1:2, 3.
Xó ɔ nyí Axɔ́su bo ɖò acɛ kpa wɛ. Biblu ɖɔ ɖɔ “axɔ́sugbakún gegě” ɖò ta nú Xó Mawu tɔn. (Nǔɖexlɛ́mɛ 19:12, 13) È lɛ́ ylɔ́ Xó ɔ ɖɔ “Axɔ́su axɔ́su lɛ tɔn; Aklunɔ aklunɔ lɛ tɔn.” (Nǔɖexlɛ́mɛ 19:16) Jezu wɛ è na tɛnmɛ-nyikɔ ɖokpo ɔ.—1 Timɔtée 6:14, 15.
Xó ɔ nyí ɖɛ̌mɛnu Mawu tɔn. É cí ɖɔ tɛnmɛ-nyikɔ “Xó ɔ” nɔ ɖè mɛ e ta é ɖè é xlɛ́ ɖi mɛ e jí Mawu nɔ gbɔn bo nɔ dó wɛn, lobo nɔ lɛ́ na alixlɛ́mɛ lɛ é ɖɔhun. Jezu ɖɔ ɖɔ emi wà nǔ enɛ: “Nǔ e Tɔ́ e sɛ́ mì dó ɔ zɔ́n ɖiɖɔ mì ɔ ɖɔ wɛ un ɖè. . . . Xó e ɖɔ nú mi wɛ un ɖè lɛ bǐ ɔ, lee Tɔ́ ce zɔ́n mì gbɔn ɔ ɖɔ gbɔn wɛ un ɖè.”—Jaan 12:49, 50.