Ko annabaaɓe Alla ɓen jannata en kon fii Alla
Ɓaawo ɗoo, Alla jonnuno annabaaɓe makko ɓen nele hittuɗe fii tagaaɗo. Ɗee nele no waawi en hollude honno heɓirten baraaji Alla ɗin ? Hiihi, hiɗe waawi. Ndaaren ko annabaaɓe tato sella-finndeeɓe jannata en.
ANNABI IBRAHIIMA
Alla ɓurnindirtaa hay gooto : himo faalaa barkinde tagaaɗo fow.
Alla foduno annabi Ibrahiima : « Bolondaaji aduna on fow barkinte sabu maa » (Fuɗɗoode nden 12:3, VPFJ).
Ko honɗun jannguɗen ? Alla no yiɗi en moƴƴa e himo faalaa barkinde ɓeynguureeji aduna on fow : worɓe, rewɓe e fayɓe ɗoftotooɓe mo ɓen.
ANNABI MUUSA
Alla ko yurmeteeɗo e himo barkinde kala wakkiliiɗo fii anndugol mo.
Alla Jom Bawgal on okkuno annabi Muusa bawgal waɗugol kaawakeeji tiiɗuɗi. Kono o torino : « Andinan laawi maa ɗin, ɗun mi andete, mi heɓa sulfu maa on » (Eggudu ndun 33:13, VPFJ). Alla weltino ko annabi Muusa torinoo mo kon e o barkinno mo e hoore ɓeydangol mo ganndal e faamu fii laawi e sifaaji makko ɗin. E piide misal, annabi Muusa annduno Taguɗo on ko « yurmeteeɗo e jom moƴƴere » (Eggudu ndun 34:6, 7, VPFJ).
Ko honɗun jannguɗen ? Alla no faalaa barkinde en fow : worɓe, rewɓe e fayɓe faalaaɓe mo anndude moƴƴa. Himo holli en ka nder Binndi seniiɗi ɗin honno rewirten mo e himo faalaa moƴƴa okkude en sulfu e baraaji makko.
ANNABI IISAA
Annabi Iisaa ɲawnduno kala noone ɲabbeeli e hoore yurmeende
Hiɗen waawi heɓude baraaji Alla poomayankeeji si en janngi fii annabi Iisaa fii ko o waɗunoo kon e ko o jannunoo kon.
Daaluyee Alla on no mari piiji fii ngurndan annabi Iisaa e fii ko o janni kon. Alla okkuno annabi Iisaa bawgal waɗugol kaawakeeji tiiɗuɗi, wano ɲawndugol bumɓe, pahooɓe e boofooɓe. O immintinno hay mayɓe. Ko wano non annabi Iisaa hollirnoo baraaji ɗi Alla okkoyta tagaaɗo ko aroyta. O sifino honno gerdirten fii heɓugol ɗii baraaji : « Ngurndan poomayankejan ɗan ko yo ɓe ande an Alla Bajjo Goongaajo on, e Iisaa Almasiihu, mo nuluɗaa on » (Yuuhanna 17:3).
Annabi Iisaa hari ko yurmeteeɗo, newiiɗo e aadenniiɗo. Worɓe e rewɓe, fayɓe e mawɓe arayno e makko sabu ko o wi’unoo kon e hoore giggol : « Jaɓon janndeeji an ɗin. Ko fii min ko mi newiiɗo, yankiniiɗo kadi e ɓernde, ɗun on heɓay fowtunde fii wonkiiji mon ɗin » (Matta 11:29). Fewndo annabi Iisaa wonunoo ka hoore leydi, o moƴƴuno e rewɓe ɓen, o teddini ɓe hara wonaa wano worɓe ɓen e on saa’i ɗon.
Ko honɗun jannguɗen ? Annabi Iisaa yiɗuno yimɓe ɓen fota e o accuno misal moƴƴal fii huuwondiral men e woɓɓe goo.
ANNABI IISAA WONAA ALLA
Binndi seniiɗi ɗin no janni wonndema « enen ko Alla gooto marɗen » e annabi Iisaa hari ko o nelaaɗo Alla yankiniiɗo (1 Korenti 8:6). Annabi Iisaa haaluno ko laaɓi pos Alla no ɓuri mo mawnude e ko kanko nelunoo mo ka hoore leydi (Yuuhanna 11:41, 42 ; 14:28)a.