Labhraíonn Dia Trína Chuid Fáithe

LE LINN ré ríthe Iosrael agus Iúdá, tháinig grúpa ar leith fir chun cinn—na fáithe. Bhí creideamh agus misneach thar na bearta ag na fir seo a chraobhscaoil teachtaireachtaí Dé. Féach ar cheithre théama tábhachtach a ndearna fáithe Dé forbairt orthu.

1. Scrios Iarúsailéim. I bhfad roimh ré, d’fhógair fáithe Dé, Íseáia agus Irimia go háirithe, go scriosfaí agus go dtréigfí Iarúsailéim. I dtuairisc bhríomhar, léirigh siad cúis feirge Iehova i leith na cathrach. Cé go raibh Iarúsailéim ag maíomh go raibh sí ag feidhmiú thar cheann Iehova, bhréagnaigh sí í féin lena cleachtais reiligiúnacha bréige, caimiléireacht agus foréigin.—2 Ríthe 21:10-15; Íseáia 3:1-8, 16-26; Irimia 2:1–3:13.

2. Fíoradhradh faoi réim arís. Tar éis 70 bliain ar deoraíocht sa Bhablóin ligfí saor pobal Dé. D’fhillfidís ar a dtír dhúchais, a bhí bánaithe, agus thógfaidís as an nua teampall Iehova in Iarúsailéim. (Irimia 46:27; Amós 9:13-15) Thart ar 200 bliain roimh ré, thuar Íseáia ainm an té a chloífeadh an Bhablóin agus a thabharfadh deis do phobal Dé an fíoradhradh a chur faoi réim arís—ba é sin Cíoras. Go deimhin, thug Íseáia mionchuntas cruinn ar an straitéis cogaidh shainiúil a bhí ag Cíoras.—Íseáia 44:24–45:3.

3. Teacht an Mheisias. Shaolófaí an Meisias i mbaile Bheithil. (Míocá 5:1) Is duine umhal a bheadh ann, chuirfeadh sé i láthair é féin in Iarúsailéim ag marcaíocht ar asal. (Zacairia 9:9) Cé go mbeadh sé cineálta agus mánla, ní bheadh aon ghean air agus ní ghlacfadh mórán leis. (Íseáia 42:1-3; 53:1, 3) D’fhulaingeodh sé bás cruálach. An mbeadh deireadh go deo leis ansin? Ní bheadh, mar de bharr a íobartha bhí sé i gceist go dtabharfaí an deis do mhórán daoine maithiúnas a fháil óna bpeacaí. (Íseáia 53:4, 5, 9-12) Is trína aiséirí amháin a bhainfí amach é sin.

4. An Meisias ag rialú na talún. I ndáiríre, níl daoine neamhfhoirfe in ann iad féin a rialú go síochánta, ach thabharfaí Prionsa na Síochána ar an Rí Meisiasach. (Íseáia 9:5, 6 [9:6, 7 i mBíoblaí eile]; Irimia 10:23) Faoina riail, bheadh an cine daonna ar fad síochánta lena chéile agus le hainmhithe an nádúir freisin. (Íseáia 11:3-7) Ní bheadh tinneas ann níos mó. (Íseáia 33:24) Chuirfí an bás féin ar ceal go deo. (Íseáia 25:8) Le linn réimeas an Mheisias, thabharfaí aiséirí do na mairbh le go mairfidís ar an talamh.—Dainéil 12:13.

—Bunaithe ar na leabhair Íseáia, Irimia, Dainéil, Amós, Míocá, agus Zacairia.