Buu Mɔɔ Asafo lɛ Nikasemɔhe lɛ Nɔjɔɔmɔ Gbi Jurɔ Kɛha Yehowa

KƐJƐ blema bei amli lɛ, gbii juji ni yɔɔ miishɛɛ efee anɔkwa jamɔ lɛ fã. Gbii juji lɛ ekomɛi ni aye yɛ blema Israel lɛ yeɔ gbii abɔ, ni mɛi ni ji Yehowa jálɔi akpekpei abɔ babaoo yaa eko. Salomo sɔlemɔtsu lɛ naagbelemɔ hé gbii kpawo, ni nɔ ni nyiɛ sɛɛ ji otsi kome Asesei Agbi Jurɔ lɛ. Enɛ kɛ hegbɛ ha Israelbii lɛ koni amɛsusu naakpɛɛ gbɛ ni Yehowa tsɔ nɔ ekɛ amɛ ye ha lɛ he. Amɛku sɛɛ amɛtee shia “kɛ miishɛɛ kɛ tsuijurɔ yɛ ejuji fɛɛ ni Yehowa efee etsulɔ David kɛ emaŋ Israel lɛ hewɔ.”​—⁠1 Maŋtsɛmɛi 8:⁠66.

Nɔ ni ba yɛ Buu Mɔɔ Asafo lɛ Nikasemɔhe ni yɔɔ Patterson yɛ New York, U.S.A. yɛ May 17-22, 1999 lɛ, ha gbɔi ni ba jɛmɛ lɛ kai blema bei amli gbii juji ni yɔɔ miishɛɛ lɛ. Otsi nɛɛ ji be ni akɛtsu nitsumɔ krɛdɛɛ ko ni kɔɔ tsũi wuji 28 ní ato he gbɛjianɔ lɛ nɔjɔɔmɔ he nii, koni akɛha jeŋ muu fɛɛ Biblia mli wolokasemɔ aya nɔ. Ato gbɛjianɔ koni nitsumɔhe yitso lɛ nitsulɔi akuu lɛ mli bii 5,400 lɛ fɛɛ ni yɔɔ Brooklyn, Wallkill, kɛ Patterson lɛ ayashara shi jogbaŋŋ yɛ Patterson tsũi lɛ amli yɛ nakai otsi ni sa kaimɔ lɛ mli. Mɛi ni fata gbɔi ni ba lɛ ahe ji tsutsu nitsulɔi akuu lɛ mli bii ni fá fe 500 ni kɛ amɛhe ewo nitsumɔ lɛ mli yɛ be mli ni amaa nikasemɔhe lɛ tsũ lɛ, najiaŋdamɔlɔi ni jɛ Buu Mɔɔ Asafo lɛ nitsumɔhe niji 23 mli lɛ, kɛ mɛi krokomɛi ni jɛ asafoi ni bɛŋkɛ jɛmɛ lɛ amli lɛ​—⁠kɛ́ hoo lɛ amɛyibɔ fɛɛ ji 8,100.

Shisharamɔ He Nibii Tsɔɔ Mɛi Anii

Bɔni afee ni aha gbɔi lɛ ale nikasemɔhe lɛ he nɔ ko lɛ, akɛ nibii pɔtɛɛ komɛi tsɔɔ ni ajie vidio ni tsɔɔ mɔ nii, ni ato gbɛjianɔ koni mɔ diɛŋtsɛ anyɛ ashara shi ni mɔ ko kudɔɔɔ lɛ. Sɔlemɔtsu ni hi shi yɛ Yerusalem yɛ Yesu bei amli shikpɔŋ nɔ sɔɔmɔ lɛ henɔ bibioo ni afee ni ma asa wulu lɛ nɔ lɛ gbalaa gbɔi ni baa jɛmɛ lɛ oya nɔŋŋ. Nibii krokomɛi ni afee koni akɛtsɔɔ lɛ gbalaa jwɛŋmɔ kɛyaa Buu Mɔɔ Biblia Gilead Skul lɛ mra be mli yinɔsane, kpeei ni afee yɛ yinɔsane be mli, asafoŋ kpeei, bɔ ni shia Biblia mli nikasemɔi etee hiɛ eha yɛ ŋmɛnɛŋmɛnɛ beaŋ​—⁠ní amrɔ nɛɛ afeɔ emli akpekpei abɔ daa otsi​—⁠kɛ nii ni Mla Nitsumɔhe lɛ tsuɔ koni aná hegbɛ ni akɛtsu nɛkɛ nitsumɔ nɛɛ daa gbi koni akɛfee toiboo aha famɔ ni Yesu kɛha lɛ.​—⁠Mateo 28:​19, 20.

Aha mɛi ni baa kɛha nɔjɔɔmɔ gbii juji lɛ kwɛ vidio ni heɔ minitii 33 ni yitso ji “Jeee Hewalɛ Naa​—⁠Shi Moŋ Mimumɔ lɛ Naa!” lɛ yɛ asa ni bɛŋkɛ ni sɛii kpakpai 1,700 yɔɔ mli lɛ nɔ. Nɛkɛ vidio nɛɛ tsɔɔ bɔ ni fee ni aná Buu Mɔɔ Asafo lɛ Nikasemɔhe lɛ. Saji ni abibii lɛ jie nibii akpo etsɔɔ yɛ faŋŋ mli akɛ, Yehowa gbɛtsɔɔmɔ yɛ nii ni atsu lɛ mli, ni ejɔɔ mɔdɛŋ ni abɔ koni agbe afii 15 tsumaa nitsumɔ nɛɛ naa yɛ omanyeyeli mli lɛ nɔ. Gbɔmɛi akpei abɔ kɛ amɛhe wo tsumaa nitsumɔ lɛ diɛŋtsɛ mli. Yɛ be ko mli yɛ afi 1994 mli lɛ, no mli lɛ nitsulɔi 526 yɔɔ tsumaahe lɛ, ni mɛi 350 ni kɛ amɛhe eha be-fɛɛ, be kuku nitsulɔi 113, kɛ mɛi 63 ni fãa gbɛ daa gbi koni amɛbaye amɛbua fata he. Mɛi krokomɛi babaoo hu kɛ nibii kekeei kɛfĩ nitsumɔ lɛ sɛɛ. Amɛ fɛɛ amɛyɔseɔ akɛ kulɛ enɛ nyɛŋ aba mli kɔkɔɔkɔ kɛ́ Yehowa mumɔ lɛ fataaa he.​—⁠Zakaria 4:⁠6.

Mɛi ni tee shisharamɔ lɛ nyɛɔ amɛnaa akɛ nɔ̃ tuuntu ni atsuɔ yɛ nikasemɔhe lɛ ji ŋwɛi nitsɔɔmɔ ni ahaa eyaa hiɛ. Nii ni afee koni akɛtsɔɔ ni kpɛtɛ he ni atsɔɔ kɛboteɔ Gilead Skul lɛ skultsu ni yɔɔ klɛŋklɛŋ nsɔɔdo lɛ nɔ lɛ maa mumɔŋ gboshinii kɛ skul lɛ he yinɔsane nɔ mi. Gilead Skul lɛ etsɔse nikaselɔi ni fá fe 7,000 kɛha maŋsɛɛ sanekpakpa sɔɔmɔ lɛ kɛjɛ klɛŋklɛŋ klas lɛ shishijee mli yɛ afi 1943 yɛ he ni kulɛ skul lɛ yɔɔ yɛ South Lansing yɛ New York lɛ. Nibii ni afee koni akɛtsɔɔ yɛ skultsu lɛ nsɔɔdo ni ji enyɔ lɛ nɔ lɛ haa anaa Skul Kɛha Nitsumɔhe Nine Ajinafoi Akuu lɛ Mli Bii kɛ Skul Kɛha Nɔkwɛlɔi Gbɛfalɔi lɛ, ni jɛmɛ nɔŋŋ ji he ni afeɔ skul enyɔ nɛɛ fɛɛ yɛ. Kɛjɛ beni aje nitsumɔhe nine lɛ skul lɛ shishi yɛ November afi 1995 mli lɛ, ekɛ nitsɔɔmɔ ni hi jogbaŋŋ eha Nitsumɔhe Nine Ajinafoi Akuu lɛ mli bii 360 ni jɛ shikpɔji 106 nɔ.

Yɛ be mli ni gbɔi lɛ sharaa shi lɛ, amɛkɛ oyaiyeli yɔse amrɔ nɔŋŋ akɛ, yɛ hei pii lɛ, amɛnyɛɔ amɛnaa nibii babaoo fe mfonirii kɛkɛ ni akɛtsɔɔ. Amɛnyɛɔ amɛboteɔ nitsumɔhei srɔtoi lɛ amli tɛ̃ɛ, ni amɛboteɔ ɔfis srɔtoi lɛ kɛ nitsumɔhei krokomɛi lɛ amli, ni amɛleɔ nibii babaoo ni kɔɔ nɔ ni atsuɔ yɛ jɛmɛ lɛ he. Nɔ ni agbala jwɛŋmɔ kɛtee nɔ yɛ shisharamɔ lɛ mli ji Audio/Video Services (Kasɛt kɛ Vidio Nitsumɔhei) tsũ lɛ. Mɛɛ tsũi ni nɔ bɛ akɛtsuɔ nii yɛ jɛmɛ koni akɛha Biblia mli wolokasemɔ aya hiɛ po nɛ! Kɛtsɔ adafitswaa srɔtoi ni akɛtsɔɔ kɛ vidioi ni sɛɛ jɛkɛɛɛ ni ajieɔ lɛ anɔ lɛ, ayeɔ abuaa gbɔi lɛ koni amɛna bɔ ni afeɔ amɔmɔɔ wiemɔi awoɔ kpãa nɔ kɛ bɔ ni atoɔ vidioi ahe gbɛjianɔ ahaa. Amɛkase nɔ ko ni kɔɔ niiamlitaomɔi babaoo ni afeɔ dani atoɔ nibii ni akɛfeɔ drama kɛ drama mli atadei lɛ ahe gbɛjianɔ lɛ ahe nii. Amɛna bɔ ni nibii ni akɛfeɔ drama lɛ haaa afite shika pii shi afeɔ nɔ fɛɛ nɔ jogbaŋŋ fitsofitso hu. Amɛna bɔ ni akɛ lala tsuɔ nii ahaa koni akɛha gbɔmɛi anu he tamɔ nɔ ni amɛyɛ nɔ ni afeɔ lɛ mli. Kɛjɛ afi 1990 kɛbaa lɛ, Asafo lɛ efee vidioi nyɔŋma yɛ wiemɔi 41 mli, ní maa Biblia mli saneyitsei srɔtoi babaoo nɔ mi, kɛfata vidioi krokomɛi ni afee aha mɛi ni kɛ Amerika Mumuii Awiemɔ tsuɔ nii lɛ ahe.

Mɛi ni tee shisharamɔ lɛ ateŋ mɛi babaoo tee Photo Lab, Art Department, Information Services, ní kɛ kɔmpiuta he tsɔsemɔ kɛ ehe yelikɛbuamɔ haa, Service Department ní kwɛɔ asafoi 11,242 kɛ nɔkwɛlɔi gbɛfalɔi 572 anitsumɔ nɔ, kɛ Writing Correspondence, he ni atsuɔ sanebimɔi srɔtoi 14,000 ahe nii yɛ daa afi lɛ. Amɛná niiamlitaomɔi babaoo ni afeɔ dani akɛ woji ni aŋmalaa lɛ majeɔ kɛ anɔkwa hesusumɔ ni ajieɔ lɛ kpo atsɔɔ mɛi ni saji ni amɛbiɔ lɛ yeɔ odase akɛ amɛmiibɔ mɔdɛŋ ni amɛkɛ naagbai ni naa wawai akpe lɛ ahe miishɛɛ.

Mɛi ni sharaa shi lɛ ateŋ mɛi babaoo yasara Translation Services nitsumɔhe lɛ. Amɛnaa kpɛ amɛhe akɛ amɛná amɛle akɛ yɛ afii enumɔ ni eho lɛ mli lɛ, akɛ wiemɔi ni fá fe 102 krokomɛi hu fata wiemɔi abɔ ni Asafo lɛ feɔ Biblia he woji yɛ mli lɛ ahe. Yɛ je lɛŋ fɛɛ lɛ, aaafee Yehowa Odasefoi oha mlijaa 80 kaneɔ Asafo lɛ woji lɛ yɛ wiemɔi ni jeee Blɔfo wiemɔ lɛ mli. Bɔni afee ni atsu amɛ hiamɔ nii ahe nii lɛ, ayɛ mɛi ni fá fe 1,700 ni kɛ amɛhe eha ni tsuɔ nii yɛ wiemɔi ashishitsɔɔmɔ nitsumɔhe lɛ mli yɛ wiemɔi 100 mli. Nibii ni akɛkpɛtɛkpɛtɛɛ shi lɛ tsɔɔ Buu-Mɔɔ ni afeɔ yɛ Amerikabii awiemɔi amli, Europa wiemɔi amli, Asia wiemɔi, kɛ Afrika wiemɔi amli. Gbɔi lɛ nyɛɔ amɛnaa New World Translation Biblia ni afee yɛ wiemɔi 31 mli lɛ. Amɛná amɛle akɛ, amrɔ nɛɛ Buu Mɔɔ Asafo lɛ woji lɛ yɛ wiemɔi 332 mli, ni akala wolo bibioo ni ji Mɛni Nyɔŋmɔ Taoɔ yɛ Wɔdɛŋ? lɛ yɛ enɛɛmɛi ateŋ 219 mli.

Atsɔɔ gbɔi ni tee Mla Nitsumɔhe lɛ nibii srɔtoi amli ní ebiɔ koni atsu he nii yɛ mla naa yɛ jeŋ fɛɛ lɛ mli. Amɛna bɔ ni ayeɔ sane diɛŋtsɛ ahaa yɛ vidio lɛ eko mli ni tsɔɔ bɔ ni Odasefonyo ko ni ji mlalelɔ lɛ yeɔ sane ko ni kɔɔ lá ni agbalaa awoɔ mɔ mli lɛ he. Amɛkase nɔ ni afeɔ hu koni akɛgbele gbɛ daa kɛha sanekpakpa lɛ shiɛmɔ lɛ he nii. (Filipibii 1:⁠7) Agbala jwɛŋmɔ kɛtee yiŋkpɛɛ ni maŋ saneyelihe lɛ fee yɛ March yɛ afi nɛɛ mli, ní kɛ gbɛtsɔɔmɔ ha maŋ ni yɔɔ Oradell yɛ New Jersey, U.S.A., koni etsake emlai lɛ koni ejie gbɛŋmɛɛ he wolo kɛ kadimɔnii ni abiɔ kɛjɛɔ Yehowa Odasefoi ni sumɔɔ ni amɛkɛ amɛhe awo amɛmaŋ shiɛmɔ nitsumɔ lɛ mli kɛjɛ shia kɛ shia yɛ nakai akutso lɛ mli lɛ kɛya.

Jeee enɛɛmɛi fɛɛ pɛ kɛkɛ gbɔi lɛ na. Amɛkwɛ tsumaa nibii ni ajieɔ atsɔɔ yɛ Precast Shop lɛ, ni amɛyashara shi kɛtee Wastewater Treatment tsũi, Powerhouse, Water-Softening Facility, kɛ nisaamɔ shwapoi babaoo lɛ amli kɛfata nibii krokomɛi ahe. Eji hegbɛ ko ni nɔ bɛ kwraa.

Nɔjɔɔmɔ Nifeemɔ Maa Ŋwɛi Nitsɔɔmɔ Nɔ Mi

Atsu nɔjɔɔmɔ nifeemɔ lɛ diɛŋtsɛ he nii yɛ Shɔ, May 19, kɛjɛ gbɛkɛ 4:00. Mɛi ni fata gbɔmɛi 6,929 ni ná miishɛɛ lɛ ahe ji nitsumɔhe yitso lɛ mli nitsulɔi, Asafo lɛ gbɔi, kɛ mɛi 372 ni amɛbua amɛhe naa yɛ Canada nitsumɔhe nine lɛ, ni atsɔ ilɛtrɔnik hewalɛ nɔ aha amɛnine shɛ nifeemɔ ni tee nɔ lɛ nɔ lɛ.

Toibolɔi lɛ amii shɛ amɛhe waa diɛŋtsɛ, beni Milton G. Henschel, ni ji Buu Mɔɔ Asafo lɛ sɛinɔtalɔ lɛ kɛ wiemɔi ni taa mɔ tsuiŋ kpee amɛ lɛ. Kɛkɛ ni Theodore Jaracz ni ji Nɔyeli Kuu lɛ mlinyo kɛ nifeemɔ lɛ sɛinɔtalɔ lɛ tsɛ́ William Malenfant kɛba. Yɛ be mli ni ekɛ “Tsumaa He Gbɛjianɔtoo lɛ Mli Saji Otii” haa lɛ, ebibii nyɛmimɛi hii etɛ ni tsu nibii ni he hiaa waa yɛ Watchtower Educational Center (Buu Mɔɔ Asafo lɛ Nikasemɔhe) tsumaa lɛ nɔyaa, emaa he mfoniri, kɛ emaa mli lɛ ahe saji. Yɛ sanebimɔi lɛ amli lɛ, atsĩ tã akɛ yɛ be mli ni tsumaa nitsumɔ lɛ diɛŋtsɛ yaa nɔ yɛ afii lɛ amli lɛ, gbɔmɛi ni batsu nii be fioo ni amɛkpa lɛ ayi fá fe 8,700, ni amɛfiteɔ amɛ diɛŋtsɛ amɛ shika kɛtsuɔ amɛhiamɔ nibii ahe nii koni amɛtsu tsumaa nitsumɔ lɛ. Mɛɛ ekomefeemɔ kɛ ejurɔfeemɔ he odaseyeli fɛfɛo ni ŋwɛi nitsɔɔmɔ kɛba enɛ ji nɛkɛ!

Nɔ ni nyiɛ sɛɛ ji wiemɔ ni ahaa kɛtsaraa nɔ ni yitso ji “Ŋwɛi Nitsɔɔmɔ ni Yaa nɔ yɛ Jeŋ Fɛɛ.” Nɔyeli Kuu lɛ mli bii ejwɛ ji mɛi ni kɛha. John E. Barr ma nɔ mi akɛ ŋwɛi nitsɔɔmɔ ji nɔ ni damɔ Nyɔŋmɔ Wiemɔ lɛ nɔ, ní ji Biblia ni woɔ Kristofoi ahewalɛ koni ‘amɛya nɔ amɛwo yibii yɛ nitsumɔ kpakpa fɛɛ nitsumɔ kpakpa mli, ni amɛshwere yɛ Nyɔŋmɔ he nilee mli’ lɛ. (Kolosebii 1:10) Daniel Sydlik tsɔɔ bɔ ni atoɔ ŋwɛi nitsɔɔmɔ he gbɛjianɔ yɛ teokrase gbɛjianɔtoo naa kɛjɛ Kristofoi asafo lɛ yitso, Yesu Kristo nɔ aahu kɛbashi jeŋ muu fɛɛ nyɛmimɛi anaanyobɔɔ lɛ ateŋ mɔ fɛɛ mɔ nɔ. (1 Korintobii 12:​12-27) Wiemɔi ni ahaa kɛtsaraa nɔ lɛ mli naagbee fãi enyɔ, ní Gerrit Lösch kɛ Carey Barber kɛha lɛ, tsɔɔ bɔ ni ŋwɛi nitsɔɔmɔ haa sɔɔlɔi ahe saa koni amɛya gbɔmɛi ni yɔɔ he fɛɛ he lɛ aŋɔɔ koni amɛtsɔɔ amɛ nii bɔni afee ni amɛ hu amɛnyɛ amɛnyiɛ yɛ Nyɔŋmɔ gbɛ nɔ.​—⁠Yesaia 2:​1-4; 2 Korintobii 3:⁠5.

Bɔni afee ni aha toibolɔi lɛ ale tsɔsemɔi srɔtoi ni yaa nɔ yɛ nikasemɔhe nɛɛ, abibii tsɔɔlɔi lɛ kɛ mɛi krokomɛi hu ni fata amɛhe kɛtsuɔ nii lɛ saji ni amɛkɛ mɛi gba sane. Atsɔɔ nitsumɔ ni tsɔsemɔ lɛ eko fɛɛ eko tsuɔ yɛ ŋwɛi nitsɔɔmɔ nifeemɔ ni yaa nɔ yɛ jeŋ fɛɛ lɛ mli. Atsɔɔ mli akɛ, Gilead Skul lɛ gbalaa jwɛŋmɔ kɛyaa Biblia wolo fɛɛ wolo kasemɔ nɔ, egbalaa jwɛŋmɔ kɛyaa Yehowa webii lɛ aŋmɛnɛŋmɛnɛ yinɔsane nɔ, ni egbalaa jwɛŋmɔ kɛyaa hesaamɔ kɛha maŋsɛɛ sɔɔmɔ nitsumɔ lɛ nɔ. Nitsumɔhe nine skul lɛ ji skul ko ni akaseɔ nibii srɔtoi ni Nitsumɔhe Nine Ajinafoi Akuu lɛ mli bii tsuɔ lɛ ahe nii waa yɛ naakpɛɛ gbɛ nɔ. Jeee akɛ ato Nɔkwɛlɔi Gbɛfalɔi a-Skul lɛ he gbɛjianɔ koni akɛtsu nɔkwɛlɔi gbɛfalɔi lɛ ahiamɔ nii ahe nii kɛkɛ, shi koni akɛwaje amɛ ni amɛkɛ mumɔŋ yelikɛbuamɔ ni asafoi lɛ baaná he sɛɛ titri lɛ aha.

Lloyd Barry ni ji Nɔyeli Kuu lɛ mlinyo lɛ ha nɔjɔɔmɔ wiemɔ ni yitso ji, “Wɔ-Bɔlɔ Kpeteŋkpele lɛ Ní Wɔkɛ Lɛ Aaatswa Wɔma Shi,” ni ekɛ nifeemɔ lɛ ba naagbee. Etsɔɔ mli akɛ Bɔlɔ lɛ ni ji Yehowa lɛ náa ebɔɔ nii fɛɛ ahe miishɛɛ ni efɔ̃ɔ wɔ nine koni wɔkɛ lɛ abaná miishɛɛ. (Yesaia 65:18) Akɛni “mɔ ni saa nii fiaa to ji Nyɔŋmɔ” hewɔ lɛ, tsumaa nɛɛ fɛɛ he yijiemɔ lɛ fɛɛ yaa Yehowa Nyɔŋmɔ ŋɔɔ. (Hebribii 3:⁠4) Beni wielɔ lɛ etsɔɔ jwɛŋmɔ ni tamɔ nɛkɛ egbe naa lɛ, esɔle sɔlemɔ ni jɛ tsuiŋ, ni ejɔɔ Buu Mɔɔ Asafo lɛ Nikasemɔhe lɛ nɔ eha Yehowa, wɔ-Bɔlɔ Kpeteŋkpele lɛ.a

Ŋwanejee ko kwraa bɛ he akɛ, mɛi ni tee eko lɛ baakai otsi muu lɛ fɛɛ mli gbii juji lɛ aahu. Mɛni hewɔ otooo gbɛjianɔ koni oyasara Buu Mɔɔ Asafo lɛ Nikasemɔhe lɛ? Wɔheɔ wɔyeɔ akɛ kɛ́ otee ni oyashara shi yɛ jɛmɛ lɛ, ebaafee hewalɛwoo kɛha bo yɛ be mli ni obɔɔ mɔdɛŋ ni okase wɔ-Bɔlɔ ni yɔɔ suɔmɔ lɛ he nii babaoo ni ohi shi yɛ ejalɛ tɛi ni efolɔ eshwie shi lɛ anaa lɛ.

[Shishigbɛ niŋmaa]

[Mfonirii ni yɔɔ baafa 10]

Asa ni mɛi eyi mli obɔ kɛ toibolɔi ni fá babaoo yɛ niyelihe lɛ

[Mfonirii ni yɔɔ baafa 10]

Shisharamɔi lɛ ji nifeemɔ ko ni yɔɔ miishɛɛ waa diɛŋtsɛ