Sanebimɔ He

● Namɔ esa akɛ akɛ adafitswai lɛ aha yɛ Sɔɔmɔ Kpee lɛ mli?

Kadimɔ: Akɛ otii ni atsɔɔ yɛ shishigbɛ nɛɛ baatsu nii kwraa kɛmɔ shi kɛ ajie naatsii lɛ.

Yiŋtoo ni yɔɔ Sɔɔmɔ Kpee lɛ fa nɛɛ he ji ni atswa asafo lɛ adafi yɛ nibii ni he hiaa koni anyɛ atsu sɔɔmɔ ni atu awo wɔdɛŋ lɛ he nii lɛ he. Akɛ adafitswai lɛ ekomɛi baa akɛ kaimɔi ni amɛtamɔ nɔ ni akɛhaa yɛ otsii krokomɛi amli lɛ nɔŋŋ. Shi kɛlɛ, esa akɛ atswa adafi lɛ ni emli aka shi faŋŋ. Esaaa akɛ atsuɔ ekomɛi ahe nii akɛ nɔ ni amɛhe ehiaaa tsɔ loo aawie he kɛkɛ.

Bɔ ni adafitswai lɛ ekomɛi ji ha lɛ baabi ni onukpa kɛ enɛ aha. Be fɛɛ be ni eeeba lɛ nakai lɛ, eji gbɛnaa nii ni ka onukpai asɛinɔtalɔ lɛ nɔ akɛ eto gbɛjianɔ ni nyɛminuu ni he esa kɛ adafitswaa lɛ aha, eyɛ mli akɛ nyɛminuu kroko kɛ adafitswai ni eshwɛ ni ato he gbɛjianɔ lɛ baaha.

Kɛ wolo ko ni aŋma lɛ mli sane kɔɔ asafo lɛ he ni yɛ nakai beaŋ nɔŋŋ lɛ emli sane ko yɛ kɛha onukpai lɛ pɛ lɛ, esa akɛ onukpa ko kɛ emli adafitswaa lɛ aha. Kɛ woji komɛi jɛ Asafo lɛ ŋɔɔ ni kɛ gbɛtsɔɔmɔ krɛdɛɛi komɛi miiha asafo lɛ, ebaahi jogbaŋŋ akɛ onukpa ko ni he esa aaakane woji nɛɛ. Ekolɛ woji ni tamɔ nɛkɛ miikɔ wolo-ŋmaa he tafaa yɛ wɔnyɛmimɛi ni awaa amɛ yi lɛ ahewɔ lɛ he. Woji lɛ ekomɛi hu baanyɛ ekɛ adafitswai ni kɔɔ wɔsɛɛ teokrase nitsumɔi ahe, tamɔ kpokpaa nɔkwɛlɔ saramɔ be, kpokpaa nɔ kpeei, kɛ kpeei wuji ahe lɛ aha.

Eshɛɔ bei komɛi ni ebiɔ ni akɛ adafitswaa ko ni he hiaa ni kɔɔ asafo lɛ hilɛ he aha, ni esa akɛ akɛ adafitswaa nɛɛ aba ni emli atse. Ebaabi jogbaŋŋ akɛ onukpa ko kɛ adafitswaa ni tamɔ nɛkɛ aaaha.

Kɛji akɛ onukpai loo asafoŋ sɔɔlɔi ji mɛi ni tswaa adafi lɛ jio, esa akɛ adafitswaa lɛ mli atse ni emli aka shi faŋŋ hu. Kɛ wɔkɛ ŋaawooi nɛɛ tsu nii lɛ ebaaha akɛ gbɛtsɔɔmɔi aha asafo lɛ yɛ gbɛ ni sa nɔ koni wɔ fɛɛ wɔya wɔhiɛ yɛ ekomefeemɔ mli.​—Lala 133:1; 1 Kor. 14:​8, 9, 40.